Tempo Timor Online

 

Tempo Timor : Bazeia ba karta Komunikadu Imprensa ne’ebé fó sai husi Gabinete Presidente da Republika, Taur Matan Ruak iha loron, 5 Augostu 2015 sita katak,  iha Sesta-Feira liu ba (31 Jullu 2015) atraves “Dekretu no 57/2015 /5 Augostu” nomeia Dr. Rui Agosto Gomes PhD hodi asumi kargu hanesan Xefe Kaza Sivíl foun troka Dr.Fidelis Leite Magalhães,

 

Tuir karta Komunikadu Imprensa ne’e hateten, Dr. Rui Agosto Gomes PhD, asume kargu Xefe Kaza Sivíl, hafoin Xefe Kaza Sívil sesante, Dr.Fidelis Leite Magalhães husik hela kargu ida ne’e hodi ba kontinua nia estudu iha Estadus Unidus Amerika.

 

Molok asume kna’ar ida ne’e, Dr. Rui Gomes antes ne’e hala’o kna’ar hanesan Assessor Pesoal ba Prezidente Repúblika, Taur Matan Ruak hodi tau matan liú ba asuntu ekonomia nian. Prosesu nomeiasaun ne’e tuir planu sei hala’o iha tempu badak nian laran.

 

 

Dr.Rui Agosto Gomes, moris iha Dili loron 21 Setembru 1958 no hasai ninia kursu ka estudu Doutoradu iha Universidade Southbank, Londres, Reinu Unidu nian. (**)

Publika iha Politika

 

Tempo Timor : Sesta Feira, (7/8) mais ou menus iha tuku 9 : 30 otl, eis Prezidente da Republika, Jose Ramos Horta hakat ba Palasiu Presidente Ai-Tarak Laran hasoru malu  ho stusl Presidente da Republika Jose Maria de Vasconelos ne’ebe kuinesidu liu ho naran Taur Matan Ruak hodi informa rejultadu vizita iha Indonesia bainhira partisipa konferensia Asia Pasifiku.  

“Hau mai iha ne’e, atu relata informasaun ba Presidente da Repbulika relasiona ona ho ha’u nia vizita ba Indonesia hodi partisipa konferensia Asia Pasifiku nu’udar orador prinsipil. Atividade ne’e Deplu maka organiza kona ba Peace Caping iha mundu.” Dehan Horta ba Jornalista sira hafoin hasoru malu Presidente da Republika Taur Matan Ruak. 

Durante iha Indoensia Horta hasoru mós ho vise Presidente Yusuf Kala no hasoru ho ema bara-bara tan hodi koalia kona ba asuntu ida ne’e no Indonesia rasik iha kontribuisaun makas kona ba peace keeping ninia iha mundo. 

Aliende de informa rejultadu servisu iha Indonezia ba Prezidenti da Republika iha momentu hanesan eis reprezentante Sekretariu Jeral ONU ninian ba Guinea Bissau ne’e mos koalia kona ba situasaun iha nasaun eis kolonia Portugal refere tan ba dudauk ne’e iha tensaun politika makas entre Presidente da Republika ho Primeiru Ministru iha ne’ebá no problema ida ne’e akontese uluk kedas ona. 

“Governu iha ne’eba halo serbisu di’ak los, Primeiru Ministru iha tinan ida nia laran sira hatudu rejultadu serbisu kapas, ne’eduni ema hotu hakfodak tanbasá maka tensaun politiku mosu fali. Ne’e duni, Presidente da Republika Taur Matan Ruak hateten ba ha’u para atu tau matan no se iha karik nesesidade para atu ba, ha’u prontu atu ba” esklarese Horta. 

 

Tuir Horta, oras ne’e daudauk nia parte kontaktu hela ho autoridade sira iha Guine Bisau, kontaktu ho PM Guine Bisau halo ona deklarasaun ba iha ne’eba no inpaktu boot ba sira, Parlamentu maka hamamutuk PM no populasaun, ne’e duni fiar katak Presidenre da Republika sei sukat didiak buat hotu iha ne’ebe no labele provoka krize ida, tanba Timor-Leste rasik ho rain bulun apoiu makas no gasta ona osan ba povu Guine Bisau ne’e duni sira labele halo politika hodi sobu sakrifisiu sira ne’e hotu. (**)

Publika iha Nasional

MNEK Partisipa ARF iha Malaysia

 

Dili, Tempo Timor – Tuir nota de imprensa ne’ebe hato’o husi departamentu Komunikasaun social Ministru Negosiu Estranjeiru no Koperasaun (MNEK) informa katak MNEK, Hernani Coelho, partisipa iha Fórum Rejional ASEAN (ARF) ba dala XXII, hahu hosi loron 4 to’o 6 Agostu 2015, iha Malazia.

 

ASEAN Regional Forum (ARF) sai hanesan reuniaun regular ne’ebé involve Ministru Negósiu Estranjeiru sira hosi ASEAN nomos nasaun membru ARF ninian hamutuk 27, hodi diskute konabá kestaun politika no seguransa iha rejiaun Azia Pasifiku no mos global. Timor-Leste rasik hola parte hanesan membru organizasaun nian, hahu kedas iha tinan 2005.

 

Abertura hosi reuniaun refere hahu iha loron 04 Agostu 2015, ho reuniaun Ministru Negósiu Estranjeiru ASEAN sira nian ba dala-48, hodi diskute konabá assuntu sira ne’ebé mak relasiona ho atividades politikas, ekonomikas no sosiais iha rejiaun nomos iha mundu tomak. 

 

“Ohin hanesan loron dahuluk abertura ba sesaun reuniaun ministerial hosi Ministru ASEAN sira nian. Enkontru Ministru Negósiu Estranjeiru ARF sira nian rasik sei hahu iha loron 06 Agostu. Maibé, ohin ne’e hahu uluk ho sesaun abertura ba reuniaun Ministru Negósiu Estranjeiru hosi Países 10 membru ASEAN ninian. Timor-Leste hamutuk ho Papua Nova Guiné sai nudar konvidadu spesial hodi tuir iha sesaun abertura ne’e. Abertura ne’e, hanesan ita hatene, sesaun normal ida konabá serimonial ho intervensaun ne’ebé halo hosi Ministru Negósiu Estranjeiru no Primeiru Ministru Malazia nian. Hafoin sesaun abertura, ami iha oportunidade hodi hasoru malu ho Mnistru Negósiu Estranjeiru hosi rai seluk-seluk no hosi rai 10 membru ASEAN hodi bele koalia ba malu” katak Hernani Coelho.

 

Iha okaziaun ne’e, Ministru Hernani Coelho iha oportunide hasoru malu mos ho Primeiru Ministru Malazia. Iha sorumutu kortezia ne’e, Ministru Hernani hato’o ba Primeiru Ministru konabá koperasaun ne’ebé mak durante ne’e Governu Malazia ho Timor-Leste halao ona, situasaun politika iha rai laran, planu dezenvolvimentu Timor-Leste nian tuir vizaun 2030 no interese Timor-Leste nian relasiona ho kestaun ASEAN. Ministru Hernani mós atualiza konabá Timor-Leste nian involvimentu iha atividade sira seluk iha rejiaun no mundu, nomos preparasaun Timor-Leste nian ba reuniaun Assembleia Jeral Nasõens Unidas iha fulan Setembru, iha Nova Iorke. 

 

Ministru Hernani Coelho haktuir katak Malazia interesadu teb-tebes iha Timor-Leste nian dezenvolvimentu, liu-liu konabá koperasaun iha nivel emprezariu sira nian iha investimentu esternu ne’ebé maka lao iha Timor-Leste no sira ne’ebé maka posivelmente bele loke dalan foun ba koperasaun entre seitor privadu Timor-Leste ho Malazia nian iha area ne’ebé maka konsidera hanesan area estratejika no interese rai rua nian, iha futuru. 

 

Hafoin sorumutu ho Primeiru Ministru Malazia, Ministru Hernani Coelho halao mos sorumutu ho Ministru Negósiu Estranjeiru Filipinas, Albert F. Del Rosario, hodi fahe informasaun ba malu konabá situasaun polítika rai ida-idak nian nomos diskute konabá assuntu koperasaun ne’ebé Filipinas ho Timor-Leste iha. Parte rua mos konkorda malu katak iha tinan ida ne’e nian laran sei iha troka vizita nivel Ministru Negósiu Estranjeiru nian.

 

“Ami konkorda malu katak iha tinan ida ne’e nian laran, sira konvida hau atu bele ba vizita Filipinas ofisialmente nudar Ministru Negósiu Estranjeiru, no ita mos aproveita oportunidade ne’e konvida fila fali Ministru Negósiu Estranjeiru Filipinas nian atu vizita Timor-Leste iha tempu badak. Ami mos koalia konabá kestaun ne’ebé pratiku liu,konabá dialogu politiku ne’ebé mak Filipinas ho Timor-Leste bele halao. Relasiona ho kestaun ASEAN, Filipinas mantein nafatin sira nian pozisaun konabá apoiu total ba Timor-Leste atu bele sai membru ASEAN iha tempu badak. Alende ne’e, ami mos koalia konabá kestaun Sul Mar Xina ka South China Sea no koalia mos konabá kestaun Tasi Timor ninian,” dehan Ministru Hernani Coelho.

 

Entertantu, Ministru Hernani Coelho hasoru malu mos ho Embaixador Ukraina naun rezidente, ne’ebé kobre mos Timor-Leste, ho rezidente iha Malazia hodi koalia konabá kestõens koperasaun entre Timor-Leste ho Ukraina.

 

“Ho Ukraina, konsentra ba area possibilidade ka potensialidade ba formasaun rekursu humanu, liu-liu area enerjia, tamba Ukraina mos iha esperiensia bo’ot hanesan pontu pasazen ba industria bo’ot barak iha area gas ninian. Ita hatene katak situasaun agora iha Ukraina laos fasil. Sira liu hosi periodu ida hafoin tinan kotuk mosu diferensa opiniaun entre partidu opozisaun ho governu. Ita aprezenta ita nian solidariedade no hanoin konabá rezolusaun ba problema sira ne’ebé maka akontese liu hosi ita nian esperiensia rasik durante tinan 24. Ita hato’o mos esperansa katak sira bele hetan solusaun ne’ebé sustentavel, atu nune’e bele retoma fila fali sira nian prosesu dezenvolvimentu ba moris diak. Kestaun seluk mak koalia konabá sira nian kandidatura ba Konselhu Seguransa ba membru naun permanente. Ita mos esplika konabá prinsipiu sira ne’ebé Timor-Leste advoka, relasaun konabá reforma Konselhu Seguransa no ita nian pozisaun konabá situasaun pas, stabilidade no operasaun pas iha mundu tomak,” haktuir Hernani Coelho. 

 

 

Tuir programa, iha loron 05 Agostu, Ministru Hernani Coelho partisipa mos iha reuniaun Southwest Pacific Dialogue no sei kontinua mos ho reuniaun bilateral ho Reprezentante rai balun, ne’ebé hola parte mos iha fórum ne’e.

Publika iha Nasional

 

 

Geoologia ho Minerais iha Timor Leste

Preokupasaun ba estudos geologicos no minerais atu hatene saida maka iha Timor Leste, hahu kedas chegada colonos Europeus iha Timor Leste desde seculo XVI. Objectivo principal colonos sira, maka buka hetan riko soi hodi explora maximo ba sira nia interreses. Ho motivasaun ida ne, maka colonial powers hanesan: Portugueses, Holandeses, Inglezes, Franceses, Espanoisnaklear ba kontinente 4. I Portugueses sira mai to Timor Leste, hodi permanese durante tinan 450.

Recentemente iha seculo XX, esforsus sucessivos husi Americanos, Australianos, Japoneses ho Indonesios sira nian prospectors, halo survey no dokumenta potenciais depositos minerais iha solo no sub-solo TL. Buat hirak nebe sira deskobre maka hanesan: copper, gold, silver, iron, manganese, marble, limestone,marl, travertine, klay, kaolin, bentonite, chromite, phosfate, sand and gravel, andesite, basalt, gabbro, dolomite, talc, gypsum, salt, silica, naturalmente oil and gas sistematicamente dokumenta  hotu tiha ona particularmente iha area JPDA no em geral iha Timor Sea.

Absurdo ka bizarre misconception bot, hanoin katak, antepassados sira,  la matenek ka menos inteligente no la ambiciosos hanesan presente gerasaun. Embora meios hirak nebe limitados iha sekulo ida ba kotuk, liu-liu iha aspecto komunikasaun no tranporte, la signifika resultados hirak nebe sira alkansa, la  iha valor kompara ho meios sofistikados nebe presente gerasaun possue. Talvez sira matenek liu ita karik.

Ho breve diskrisaun ida ne, atu alerta ba Professor Alfredo Pires, Ministro Petroleo & Recurso Natural atu iha curiosidade, tau iha konsiderasaun survey ka estudos barak nebe halo tiha ona iha tempo kotuk.

Professor Alfredo ho nia cronies labele hanoin katak sira deit maka matenek ba assunto geologico no mineral, ho mos oil& gas, iha Timor Leste, enkuanto Timor oan seluk mesak ignorante hotu.

Hegemonia  Politica- Alfredo + Emilia

Iha enontro regular Concelho Ministros Tersa Feira ( 21/07/15) matenek bot, Professor Alfredo Pires – Ministro Petroleo & Recurso Natural, propoen $ 50 million atu halo estudos kona ba riko soin iha Timor Leste, (taci okos, rai leten no rai okos) Professor Alfredo Pires ho no cornies sira, hanoin katak, sira maka matenek liu iha Timor Leste, sira maka iha influencia bot liu iha TL, nune saida maka sira hakarak, Concelho Ministros aprova hotu deit, tanba iha backing forte. 

Professor Alfredo iha 2009 iha fulan Julho dehan nune iha nia office:  “ Bocy, ema nebe + poderosa iha governo maka Emilia. Saida maka nia hakarak ka propoen, Katuas Xanana tuir deit. Ami iha networking iha fatin hotu-hotu”. Hau hamnasa hodi dehan:” imi la konhece Xanana. Preciza tempo atu konhece imi. Buat nebe imi halo ba kauza nacional Xanana sei konfia imi nafatin. Se lae, Xanana sei abandona imi, lei maka hasoru imi, lori imi ba  prizaun”.

Evidencias nebe sekunda Emilia + Alfredo nia influencia.

1.Projecto Taci Mane, nebe la iha racionalidade –economica; embora gasta ona multi million dollar;  Alfredo ho nia kronies halo manipulasoens intelegentes hodi konvence Katuas Xanana.

Projecto Taci Mane depende directamente ba pipeline Sunrise. To ohin loron, la hatene bainhira los maka hetan solusaun politica, embora lori ona tinan 8. Oras ne, TL lori ona kazu ne ba Tribunal Arbitrazem Internacional.

 Sunrise nia status oras ne, 80% iha Sea Bed Australia no Indonesia Economic Exclusive Zone (EEZ) tuir acordos hirak nebe assina tiha ona. Atu transfere tomak 80% mai TL, Australia passa  uluk lai nia direito Sea Bed ba Indonesia, ikus mai, maka Indonesia passa mai TL. Atu atinge akordo ida ne, sei lori tempo ka tinan barak. Governo tenki isola uluk lai Alfredo ho Monteiro atu loke dalan. “Bastard” rua ne maka nafatin, solusaun politica sei dificil ka impossivel tanba “kakutak mamuk”.

2.Orsamento bot, aloka ba uma luxo Emilia Pires (Alfredo nia bin) ikus mai la ba hela, tanba kritikas husi sociedade civil. Triste ka redikulo liu tan, Emilia hetan akuzasaun  korupsaun, la tama iha VI governo. Oras ne, hanesan acesora iha Minesterio Finansas, hodi hein ba julgamentu iha tempo badak;

3.Mega edificio Ministerio Finansas  ho orsamento inicial $ 23.5 million, atu satisfaz Emilia nia kaprichos aumenta ida ne, ida neba, fatin helicopetro hodi tun - tula Emilia. Nune halo tan adicional ho orsamento dobrado, nebe Emilia deit maka hatene.

Pedido $ 50 million ba survey

Tuir regra ka procedimento normal, developers (operadores) sira maka hasai osan, hodi halo estudos, depois maka halo fali cobertura nebe kostuma bolu  – recovery cost. (rekuperasaun kustos).

 Hau la hatene baseia ba logika saida makaProfessor Alfredo Pires toma iniciativa ida ne. Parece hanoin katak montante $50 million ne, kauntia ida kik no la vale. Ka hanesan produto Alfredo nia kosar ben ou eransa familiar nian, nebe matebian sira husik hela ba oan mane mesak, nune permite halo saida deit konforme hakarak.

 Orsamento pertence ba Povo Timor Leste. La pertence ba ema ida  ka grupo nebe deit maka iha poder executivo decisorio. Aplikasaun ka uzo orsamento Estado tenki ho maxima responsabilidade no certeza maxima atu povo hetan beneficios atu, hasai husi “kiak no mukit”.

Professor Alfredo matenek karik, halo diskrisaun ida komprehensiva  kona kustos  estudos geologikos no geofisicos kona assessment of  - national potential in hidrocarbons and minerals. Nune la fo margem atu deskonfia katak Professor Alfredo Pires iha tendencias atu komete korupsaun – legal, inteligente no organizada ho nia cronies sira.

Tan sa maka iha deskonfiansa bot? Tanba iha  ona indikasaun korupsaun nebe Doutora Emilia komete. Kuanto mais ho $50 million nebe ausente ho diskrisaun ida detalhada no sistematica?

Racio tamanho TL ho potencia mineral

Timor Leste metade ilha ho superfice terrestre : 15,410 k2 nebe inklui Oekusi, Atauro no Jako.  Superficie maritima : 82,000 k2, nebe tama iha JPDA 35,000 km2. Utilizasaun $50 million la koresponde tamanho sperficie terrestre ho maritima tanba alokasaun fundos bot liu.

Tuir informasaun nebe iha, desde seculo 19 kedas halo tiha extensivamente estudos no drills (perfurasaun) komprehensivas iha Timor Leste. Parece Professor Alfredo Pires “baruten” atu buka informasaun kona estudos hirak nebe Australianos sira halo iha dekada 60 no 70. Indonesias sira mos iha curiosidade halo tan kona ba minerais. Iha UNTAET nia tempo mos ekipa ida halo no publika tiha ona,  hodi menciona lokalizasaun exacta (kordinat no latitude) no kuantidade. Professor Alfredo hanoin katak nia ho nia kronies deit maka hatene, no Timor oan seluk totalmente ignorante ba assunto ida ne, nune apresenta proposta foun, hodi uza deit dados nebe existe tiha ona.

Hydrocarbons iha JPDA: (Producing fields)

  • Bayu Udan :Produz desde 2005. Condensate ho LPG kuaze besik remata ona, reservas hela deit 15%. Gas maka sei hela 40%.
  • Kitang: hahu produz iha 2011. Hasai ona 92%
  • Elang Kakatua: hahu produz iha 1998 -2007. Remata tiha ona.

 

Unproven fields: (Posus hirak sei dauk iha provas)

 

  • Krill: Posu ida kik ho reservas sei deskonhece hela
  • Chuditch: Possue kuantidade 0.5 tcf nakuno ho C02. Kik liu ba LNG
  • Kelp Deep: sei dauk hetan provas, no mos reservas desconhecidas (unproven and unknown reserve) 

Potenciais Posus nebe hatama receitas:

Bayu Udan : Hahu produsaun iha 2004 tó 31 Dezembro 2014,  Condensate ho LPG hasai ona 85%, hela deit 15%. Osan bot maka hetan husi Condensate ho LPG Enkuanto Gas nia folin la dun bot. Kuantidade nebe sei hela 40%. Kauntidade LNG, Condensate no LPG hatama ossan maka tuir mai ne:

a)LNG : 1,289,609 MMSCF (million standard cubic feet) ekivalente metric ton 26,851,224  ba GJ(gigajoules) 1,375,763,973.

b)Condensate : 209,372,100 barrels

c)LPG: 115,782,590 kalkula ba metric tons 9,883,683.

From “ first Tranche Petroleum “ tax revenue, we were able to infer production revenues, the Production Sharing Agreement stating that 10% of production revenue before any cost recover is devolved to the operator and governments, 50% to the operator and 50% to the governments (90% goes to East Timor and 10% to Australia). Husi 1a.produsaun, receitas taxa, ami halo inferencias receitas produsaun tuir Contrato nebe dehan 10% receitas produsaun antes kualker kusto rekuperasaun fo fila ba operador no governos. 50% ba operador no 50% governos (90% ba TL no `10% ba Australia). Nune receitas nebe tama maka :

  • LNG : $ 10,900,689,852.6
  • Condensate : $16,239,031,725.56
  • LPG : $ 5,507,813,321.78

Kalkulos hirak ne, baseia ba  average  unit price LNG: $ 405.97 per metric ton. Ou $7.92 per GJ. Condensate : $77.56 per barrel. LPG.$557.26 per metric ton.

Posso Bayu Udan possue 3,400 tcf gas no condensate 380 mbbl – 3.6 MTPA nebe hatama receitas ba TL hahu tinan 2006 to ohin loron. Condensate 2016 bele remata ona no gas tuir predisaun entre 2020-2022.  

Receitas husi Bayu Udan tuir Qauartly Report husi Santos (Bayu Udan LNG revenue US $ per day) tun ona mai $ 4 000 000  por dia tuir ( 2015 Q2) report . Peak maka  iha 2013 Q2 atinge $10 000 000 por dia.

 Condensate barrels per day 2015 Q2  30 000 barrels ped day  enkuanto peak  2010 Q4  60 000 barrels per day. 

Kitang:

Operasaun hahu  4th quarter, 2011. Peak productio 2nd quarter,2012: 44,219 barrels per day, ho gross revenue $5.1 million per day .Tama ba kofre Timor Leste provavelmente 75% deduz tiha recovered cost.

Produsaun iha finais 2014: 5,530 per day ho gross revenue $509,000 per day. Operational cost talvez $200,000 per day. Tuir ANP reports, receitas  iha Junho $33,304. 

Produsaun Bayu Udan Gas & Condensate  maka hatama receitas loro-loron mai kofre TL, aumenta ho porsaun kik husi Kitan, hodi financia despezas anuais publikas. Receitas ne maka deposita iha Banko Federal Amerika ho naran  Fundo Petroleo nebe nia total atinge ona $ 17 billion.

Ho ilustrasaun ida ne, atu fo hatene ba publiko no particularmente Professor Alfredo ho nia kronis sira katak, iha JPDA ho zona exklusiva TL, probabilidades atu hetan tan Gas&Oil fields, chance la bot. Sekarik iha, kuantidade insuficiente ba LNG.

Aspecto seluk interesante, nusa maka ideia nobre ida ne la hahu iha 2007? Tan sa maka Professor Alfredo falta deit fulan 23 atu remata nia knar hanesan Ministro maka foin hakfodak?

Ema ida-ida, iha moris ne, “ambisaun bot ba osan” Se se deit iha mundo ne. Ba governantes sira, balu uza kakutak ho vias inteligentes no legais, atu protege  an, livre husi akuzasoens;  balu menos inteligente hetan akusazaun korupsaun hodi hetan pena prizaun.

Antes atu termina atu fo hanoin ba Professor Alfredo ho nia cronies sira atu sai pragmaticos objectivos atu uza kuidadosamente Estado nia osan obedece  ba regra common sense basika:  halo uluk lai, saida maka necessario no possilvel. Ikus mai, ida nebe impossivel  atu hasae  ka tane ita bot nia reputasaun hanesan heroiba desenvolvimento iha sector Petroleo no Mineral idealismo ida ke ita bot tanto mehi atu alkansa antes remata ita bot nia mandato iha 2017.

 

Ita hotu hein, ho $50 million Professor Alfredo Pires halo milgare bot, hetan depositos minerais no hydrocarbon potenciais, antes termina  nia mandato.

Publika iha Opiniaun

Tempo Timor : Antes ne’e iha fulan tolu liu ba Koordenador sesante Partidu Frente Revolusionariu Timor-Leste Indepedente (Fretilin), Munisipiu Lautem realiza konferensia ba datoluk hodi hili estrutura foun partidu nian ba periodu 2015-2020, maibe rejultadu konferensia iha momentu ne’ebá la konsege estabelese estrutura foun tanba mosu dezentendimentu iha prosesu votasaun nia laran. 

 

Konferensia iha momentu ne’e, kongresista sira aprezenta pakote tolu (3), pakote primeiru lidera husi Jequito de Oliveira, Pakote 

Segundu lidera husi Vitor Dias Quintas no Pakote Terseiru lidera husi Aurelio Freitas Ribeiro. Bainhira hala’o votasaun ba pakote hirak ne’e, Rejultadu hatudu, pakote ne’ebé lidera husi, Aurelio Freitas Ribeiro maka manan, maibe la to’o bareira ne’ebé iha, ne’e duni hala’o votasaun ba segundu ronde nian no iha momentu ne’e pakote ne’ebé lidera husi Vitor Dias Quitas ho pakote ne’ebé lidera husi Aurelio Freitas Ribeiru maka avansa ba segundu ronde. 

 

Votasaun ba segundu ronde nian iha momentu ne’e akontese naksalak iha prosesu kontazen, ne’e duni halo kandidatura husi pakote rua ne’e tau preokupasaun makas ate la simu malu ne’e duni membru CCF ne’ebé marka prezensa iha konferensia momentu ne’e deside adia, tan ne’e iha loron 1 de Augusutus 2015 foin lalais maka rekonferensia fali. 

 

Rejultadu rekonferensia ne’ebé hala’o iha Centru Kultura Lospalos foin lalais hatudu katak, Aurelio Freitas Ribeiro reeleitu nu’udar koordenador Partidu Fretilin iha Munisipiu Lautem ba periodu 2015-2020 hafoin hetan votu konfiansia husi kongresista hamutuk 116. Total kongresista ne’ebé partisipa rekonferensia ne’e hamutuk 283 maibe kongresista na’in 40 maka la vota. Kongresista hirak ne’e mai husi postu administrativa lima iha Munisiipu Lautem. 

 

Prosesu eleisaun iha rekonferensia ne’e hala’o ho sistema aberta, ne’e duni bazeia ba rejimentu ne’ebé iha kongresista aprezenta proposta kandidatura no proposta kandidatura ne’ebe kongresista sira aprezenta iha momentu ne’e hamutuk kuaze ema nain 25 resin, maibe kandidatu balun rejigna an, duni hela de’it kandidatu na’in 23. 

 

Bainhira hala’o votasaun ba kandidatura hirak ne’e, rejultadu hatudu katak, Aurelio Freitas Ribeiro maka hetan votus maioria (116), Abilio Quintão hetan votus 98, Ana Bela Savio hetan votus 74 no Gil Da Crus ho Leovogildo maka okupa kuatru n sinku lugar. 

 

Ho rejultadu ida ne’e hatudu katak, Aurelio Freitas Ribeiro reeleitu nu’udar Koordenador, Abilio Quintão Pinto nu’udar Primeiru Vise Koordenador, Ana Bela Savio Segundu Vice Koordenador, Primeiru Sekertariu Gil da Crus, Segundu Sekertariu Levogildo ho ninia membru na’in 6. Aliende ne’e, iha eleisaun refere hili mós estrutura Komisaun Juridisaun ne’ebé kompostu husi Presidente da meza, Jacinto da Costa, Sekertariu na’in rua ho ninia membru na’in rua, nune’e mós Estrutura Komisaun Fiskalizasaun, Paulino dos Santos nu’udar ho no ninia membru nain 2. 

 

Hafoin tomada de pose ba estrutura eleitu, Adjuntu Sekertariu Jeral Partidu Fretilin Jose Reis hateten, se iha serbisu barak maka halo ne’e duni husu ba militants Partidu Fretilin tomak iha Munisipiu Lautem, liu-liu ba estrutura eleitu tenke esforsu hodi serbisu maka liu tan para lori Fretilin ba hetan Vitoria. 

 

“atu lori Fretilin ba hetan Vitoria, importante liu maka ini tenke hametin unidade no kontinua serbisu hamutuk tanba Fretilin hanesan partidu alternativu ne’ebé atu luta ba povu nia moris diak” dehan Reis iha Centru Cultura Lautem (2/8). 

 

Iha fatin hanesan, Koordenador eleitu Aurelio Freitas Ribeiro hateten, atu lori partidu Fretilin atinje ninia objetivu presiza ita hotu nia kontribuisaun, la’os deit ba estrutura eleitu sira, tan ne’e estrutura ida ne’e husu atu ita hotu serbisu hamutuk. 

 

“agradese ba kongresista sira ne’ebe deposita ona ninia votu ba ha’u hodi asumi fila-fali kargu ida ne’e no ha’u komprimitivu sei la husik monu responsabilidade ho fiar ne’ebe imi fo ba ha’u” dehan Aurelio hodi taka ninia liafuan. 

 

 

Seremonia tomada de pose ba estrutura ne’e ofisialmente hala’o husi Presidente da meza konferensia Gil ne’ebé akompaina direita husi membru Komite Central Fretilin no Koordenador eleitu partidu Fretilin nian husi munisipiu 12. (**)

Publika iha Politika

 

Dili,Tempo Timor – Vise-Ministru Negósiu Estranjeiru no Koperasaun Timor-Leste, Roberto Soares, iha loron 30 Julhu 2015, halo intervensaun iha debate abertu Konselhu Seguransa Nasõens Unidas, iha Nova Iorke, ho tema “Manutensaun pas no seguransa internasional: dezafius pas no seguransa ne’ebe Estadu ilha ki’ik sira hasoru no foti mos kestaun maritima, nune’e Roberto Soares reitera ba Membru Konselhu sira katak Governu Timor-Leste fo importansia bo’ot tebes ba prinsipiu fundamental sira husi Konvensaun Nasõens Unidas konaba Lei Tasi nian, atu assegura Timor-Leste nian direitu soberanu ba teritoriu nasional inklui mos fronteira tasi nian.  

 

“Ho konsiderasaun ida katak Timor-Leste nudar mos nasaun maritima, ami fiar metin no respeitu ba direitu internasional atu rezolve disputa internasional ho pas liu hosi kuadru ka mekanismu multilateral,” dehan Vise-Ministru Roberto Soares.    

 

Iha debate abertu ne’ebe lidera hosi Nova Zelandia nudar Presidente ba Konselhu Seguransa Nasõens Unidas, periodu fulan Julhu, hetan partisipasaun hosi orador liu 70. Tuir dokumentu ne’ebe prepara hosi delegasaun Nova Zelandia nian haktuir katak Nasõens Unidas klasifika territoriu hamutuk 52 nudar Estadu ilha ki’ik, inklui mos Estadu Membru hamutuk 37.

 

Iha debate ne’e, Vise-Ministru Roberto Soares relata ba membru Konselhu Seguransa Nasõens Unidas ho delegasaun sira, informasaun konabá Timor-Leste nian dezenvolvimentu iha setor hotu-hotu no susessu ne’ebe Timor-Leste atinzi ona.

 

“Nudar nasaun soberana, ami sente orgulhu tamba iha Dezembru 2012, Timor-Leste la tama ona iha ajenda Konselhu Seguransa nian. Ida ne’e hatudu vontade lideransa no povu Timor-Leste nian determinasaun atu moris iha pas no prosperiedade nian laran. Ami agradese mos komunidade internasional no Nasoens Unidas ba susessu ida ne’e. Aproveita mos oportunidade ida ne’e, lori povu Timor-Leste nian naran, hau hato’o gratidaun ba Sekretáriu Jeral Nasõens Unidas, Excelensia Sr. Ban Ki-Moon, ba nian involvimentu pessoal no kompromisu ba ita nian prosesu konstrusaun pas no estadu,” katak Vise-Ministru Roberto Soares.

 

Iha biban ne’eba, Vise-Ministru Roberto Soares realsa katak mudansa klimatika iha potensia atu halo esforsu dezenvolvimentu lao ba kotuk, habo’ot tensaun no bele hamosu konflitu. Tamba ne’e, atuasaun liu hosi kordenasaun global hodi hasoru ameasa hirak ne’e, importante tebes. Vise-Ministru Roberto hatutan katak assesu ba rekursus naturais no distribuisaun reseita ne’ebe hanesan, ba povu , importante tebes ba seguransa. Timor-Leste bele orgulhu tamba iha nivel global, sai mos nudar nasaun ne’ebe durante ne’e sempre iha linha-oin wainhira koalia konaba jestaun rekursu natural. Kestaun mudansa klimatika, alende, afeta Estadu ilha ki’ik sira, afeta mos pas no seguransa global. 

 

Iha okaziaun ne’e, orador sira hosi Estadu ilha ki’ik sira akresenta katak situasaun hirak hanesan krime transnasional, explorasaun ilísita ba rekursu, mudansa klimatika, dezastre naturais no fator sira seluk ne’ebe ameasa Estadu ilha ki’ik sira tenke dirije globalmente no iha kontestu stabilidade internasional. Iha sorin seluk, Sekretáriu Jeral Nasõens Unidas, Ban Ki-Moon hato’o katak kestaun hirak ne’ebe Estadu ilha ki’ik sira hasoru sai nudar dezafiu global tamba ne’e, situasaun ida ne’e  sai nudar responsabilidade koletiva.   

 

 

 

Iha Debate ne’e, Vise-Ministru Roberto Soares akompanha hosi Embaixadora Sofia Borges, Diretor Licinio Branco no Segundu Sekretáriu Misaun Permanente Timor-Leste iha Nova Iorke.

Publika iha Nasional

 

 

Tempo Timor: Politika Governu hodi hadia estrada nasional iha teritoriu Timor Leste felismente hetan aplaus husi entidade tomak, liu-liu benefisariu sira. Maibe, fiar ne’ebé Governu fó ba empreza balun ikus mai hetan kritikan, tanba konsidera iha fatin balun projetu hadia Estrada halo terus fali povu ki’ik sira tan ba Governu gasta osan Milaun no kompania tolan milaun maibe populasaun rai rahun maka hafalun.

“La’os ami lakohi dezenvolvimentu atu halo iha ami nia suku ka Munisipiu, maibe hakarak atu fo hanoin deit ba kompaina ne’ebé hetan fiar husi Governu hodi kaer projetu Estrada iha dirasaun ida ne’e (Dili-Ermera) oinsá bele finaliza lalais projetu ne’e, tanba rai rahun husi estrada ne’ebé seidauk hadia fó impaktu makas ba komunidade sira ne’ebé hala’o movimentu iha area ne’ebá” dehan Manuel das Santos komunidade Suku Ulmera, Postu Administrativu Bazartete, Munisipiu Likisa foin lalais.

Kompara ho tinan hirak liu ba, Manuel rekoñese katak, Estrada iha dirasaun refere barak maka hadia ona, maibe balun seidauk no foin maka dudu tetuk ne’e duni halo rai rahun makas, nune’e mós fatin balun ne’ebé maka seidauk tau alktraun komesa kuak fali ona.

  haktuir, Iha fulan hirak liu ba, reprezentante povu iha Uma Fukun Parlamentu Nasional kestiona kona ba kondisaun Estrada partensia dirasaun Bairo Formoza no Estrada dirasaun Bairos dos Grilos nian ne’ebé iha etapa reabilitasaun nia laran maibe la iha kualidade.

“ nu’udar povu ami mos iha direitu atu hala’o kontru no fó hanoin Governu konaba lala’ok ka implementasaun husi projetu hirak ne’e, ne’e duni ami mós sempre ajize kualidade projetu” Manuel kestiona.

Entertantu Antonio G. da Costa hateten, impaktu husi Estrada balun ne’ebé seidauk hadia halo ninia uma sempre nakonu ho rai rahun, tanba ho movimetasaun kareta ne’eb’e ba mai iha area ne’ebá halo rai rahun sa’e makas, tan ne’e nia parte husu ba kompaina atu finalize ona projetu ne’e ho lalais.

 “Projetu reabilitasaun estarada ida ne’e kleur ona, maibe tanba saida maka to’o ohin loron seidauk remata no ponte hirak ne’ebé iha area ne’ebá mos seidauk hadia.” Antonio esklarese.

Aliende ejize atu finaliza lalais projetu, nu’udar komunidade Antonio ejize mos kualidade projetu, tanba faktus hatudu iha fatin balun Estrada la iha kualidade no agora daudauk hahú at fali ona. 

 

Iha momentu ne’e Jornalista Online Tempo Timor tenta atu hala’o konfirmsaun ba parte kompaina no lider komunitariu sira maibe la konsege tanba fonts hirak ne’e la iha fatin. (**)

Publika iha Nasional

Tempo Timor : Tinan-tinan Governu Timor-Leste Propoin Orsamentu Jeral do Estadu no Parlamentu aprova orsamentu ba kada Ministeriu ida-idak tuir planu ne’ebé Ministeriu hirak ne’e aprezenta. Orsamentu sira ne’e mos inklui despezas balun ba iha Departamentu Serbisu Aque Saneamentu (SAS).

Entidade tomak hateten objetivu alokasaun orsamentu ba Ministeriu hirak ne’e atu hala’o dezenvolvimentu nomós oinsá bele responde problema ne’ebé komunidade sira infrenta iha terenu, liu-liu problema Estrada, bemos, edukasaun, saude no problema socsial sira seluk.

Ho haktus hirak ne’e hatudu katak, kumprimisiu ne’ebé Governantes sira hato’o ba povu ida ne’e malahuk hela, tanba iha fatin balun komunidade seidauk sente didi’ak rejultadu dezenvovimentu ida ne’e, ezemplu iha Aldeia Mausoi, Suku Ulmera, Postu Administrativu Bazartete, Munisipiu Likisa komunidade sira defisil tebes asesu ba bemos.

“ to’o ohin loron ami seidauk asesu ba bemos husi SAS, ne’e duni ami tenke la’o lubuk ida hodi mai kuru bemos iha bematan ida ne’e.” dehan Almerinda Dos Santos bainhira tutur hela Jerigen hodi ba kuru bemos.

Tuir Almerinda, situasaun hanesan ne’e la’os foin maka akontese, maibe akontese ona iha tinan barak nia laran tanba iha aldeia refere komunidade sira nunka asesu ba bemos, tan ne’e sira husu ba Governu, liu-liu ba Departamentu SAS Munisipiu Likisa tenke hare problema ida ne’e ho seriu.

Bematan ne’ebé komunidade Aldeia Mausoi komsumu durante ne’e lokaliza loos iha Estrada ibun no kondisaun Estrada iha area refere rai rahun barak ne’e dni bainhira kareta hala’o makas entaun be sai fo’er tanba impaktu husi rai rahun. Mesmu nune’e, komunidade sira ho pasensia uza nafatin be ida ne’e tanba la iha alternativu seluk.

“ ami hatene ho rai rahun ne’ebe makas sempre halo fo’er bematan ida ne’e, maibe tenke kuru nafatin tanba la iha bematan ka be kanu seluk ne’ebé besik area idan ne’e.” esplika Almerinda ho triste hodi ejize ba Governantes sira atu realiza promesa ne’ebe hato’o iha kampaina nia laran. 

Entertantu Marcal Ribeiro hateten, kuaze komunidade barak iha suku Ulmera sei depedenta ba bematan ne’ebé iha no bainhira hakarak kuru bemos komunidade balun tenke la’o mais ou menus kilo metro ida ka rua hafoin bele kuru be.

“ kestaun ne’e seriu tanba iha tempu udan bematan hirak ne’e foer, nune’e mós iha tempu bailoron naruk ba matan balun maran tia entaun defikulta tebebs komunidade sira, ne’e duni ami husu ba Governu, liu-liu ministeriu kompontente buka resolve took problema ida ne’e” Marcal husu.

Iha biban ida ne’e, aman husi oan nain hitu ne’e husu ba governu hanoin netik povu ida ne’e tanba loron- loron komunidade sira tenke tutur masa boot hodi tun sa’e foho tan de’it hakaarak kuru bemos.

 

“ la presija dada kanu bee nian ba uma kain ida-ida, maibe pelemenus bele hari tanki bee nian besik komunidade sira nian hela fatin, hodi nune’e komunidade sira atu kuru bemos karik la presiza la’o fali ba fatin dodok” (**)

Publika iha Nasional

 

Tempo Timor : Xefe Sentru Klinika Matan Nasional, Belmerio Jeronimo rekoñese katak, durante ne’e pasiente ne’ebé mai konsulta iha sentru matan nasional menus tebes, ne’e duni maka sira deside lansa sms ba publiku atu mai konseulta sira nia matan tanba matan importante ba ema ida-idak nia moris.

“sentru matan ne’e tinan oin mai sei entrega ba governu no governu iha hanoin atu kontinua, tanba durante ne’e ONG Fred Hollows mak implementa programa ida ne’e no programa ne’e ami hahú hala’o iha tinan 2008 to’o agora,” tenik Belmerio ba Jornalista sira iha, Hospital Nasional Guido Valadares (HNGV) foin lalais.

Belmerio esplika, hahu husi loron dahuluk bainhira lansa tiha mensajen sentru konsege hetan pasiente ne’ebé mai konsulta matan hamutuk kuaze ema nain 40 no iha loron tuir numeru ema ne’ebe mai konsulta matan aumenta ba bebeik no tama ba loron tolu nian sa’e ba 50 resin.

“Ho total numeru ne’ebé iha hatudu katak pasiente ne’ebe mak mai konsulta iha sentru klinika matan ne’e aumenta tanba ne’e ita presija dezenvolve centru klinika ida iha futuru” esklarese Belmerio.

Aproveita  oportunidade ida ne’e, Belmerio apela ba komunidade tomak ne’ebe iha problema kona ba matan bele mai konsulta, nune’e mos ba sira ne’ebe hakarak check up mos bele mai, tanba kuandu ita nia idade tama ona ba 40 ba leten persijza ona olku.

 “Agora daudauk ne’e husi 90% paseinte ne’ebe iha maioria maka hare la mós, nune’e mós ami indentifika ona paseinte nain 6 maka iha problema moras matan katar ne’e duni ami planu hela atu hala’o operasaun.” Belmerio dehan.

Tuir nia, maluk sira ne’ebe mak iha problema matan sira bele mai diretamente iha klinika ida ne’e, tanba klinika ne’e loke husi Sigunda to’o Sesta hahu husi dader to’o lokraik.

Aliende hala’o konsulta iha Dili, kada fulan ekipa husi sentru ne’e sempre ba hala’o konsulta no operasaun iha munisipiu no durante ne’e munisipiu ne’ebé maka sentru ne’e identifika hetan moras matan barak liu maka iha Munisipiu Viqueqe. (**) 

Publika iha Nasional

LIAFUAN KORRUPSAUN HANESAN VENENO IDA

 

 

Hakerek Na’in: Moisés Vicente

Telefone: +670 77291406

 

Loron diak, le’e na’in ba sidadaun hotu!. 

 

Korrupsaun governo nian mak kona-bá ema boot sira iha governo ka funsionáriu públiku sira-nia hahalok ne’ebé uza sala sira nia kbi’it atu bele aproveita buat diak ba sira nia aan rasik. Maibé ne’e la’os foin akontese, exemplo iha tinan 3.500 liu bá, iha livru bíblia fó sai lei ida ne’ebé bandu ema la bele fó osan bolsu nian ba juiz sira. Ida ne’e hatudu katak ema iha tempu ne’ebá mós halo korrupsaun. Keluaran 23:8 ho lian Melayu hatete katak “Jangan menerima suap, sebab suap membutakan orang yang berpenglihatan terang dan dapat memutarbalikan perkataan orang yang adil-benar”.

 

Korrupsaun laos deit kona-bá simu osan bolsu nian. Dala ruma mos, funsionáriu sira buka jeitu atu uza sasan diak  ne’ebé lolos sira la hetan lisensa, no aat liu tan mak naok povu nia osan. Karik sira mos aproveita ho sira nia pozisaun atu ajuda sira nia familia ka kolega sira hodi halo buat ne’ebé la tuir lei. Maski korrupsaun bele mosu iha organizasaun ne’ebé deit, maibé iha rai barak korrupsaun governo nia mak aat liu. Iha livru ida (2013 Global Corruption Barometer, hosi Transparency International) fó sai katak iha mundu tomak ema hanoin iha grupu lima ne’ebé halo korrupsaun barak liu, ne’e mak Partidu Politiku nian, Polísia, Funsionáriu Públiku sira, ema ne’ebé halo Lei, no mós Juiz sira. 

 

Hakerek na’in hakarak haree problema balu iha ema nia nasaun seluk mak tuir mai ne’e. Iha AFRIKA, iha 2013 rai-Afrika Súl, maizumenus funsináriu públiku na’in-22.000 mak hetan akuzasaun tanba halo korrupsaun. Iha AMÉRIKA SÚL, iha 2012 iha Brazil, ema boot na’in 25 mak simu julgamentu todan tanba sira uza povu nia osan atu selu ema hodi bele hetan apoiu politiku nian. Husi sira ne’e, ida mak xefe ne’ebé toma konta ba eis-prezidente nia staff sira, katak ema ne’ebé iha pozisaun segundu tuir prezidente. Iha ÁZIA, iha 1995 iha sidade Seúl, rai Koreia Súl, ema na’in-502 mak mate tanba loja andár boot ida monu namtate. Investigador sira foin hatete katak sidade ne’e nia funsionáriu sira simu osan bolsu nian husi kompañia ne’ebé kaer projetu hodi husik sira uza simente ho kualidade la diak, ne’ebé la tuir kritériu atu harii uma ne’ebé metin. Iha EUROPA, Politiku-nain ida ne’ebé toma konta ba kazu oioin iha Europa laran, naran Cecilia Malmstrón hatete: “Hahalok korrupsaun ne’ebé habelar iha rai Europa halo ema hakfodak tebe-tebes la iha vontade atu fokit sai korrupsaun nia abut”. 

 

Loos duni, korrupsaun governo nian mak venenu ida, no nia abut metin ona iha mundu tomak. Susan Rose-Ackerman, matenek-na’in ida ne’ebé estuda kona-ba oinsa atu hapara korrupsaun hakerek, atu bele hadia situasaun ne’e tenkeser iha mudansa boot kona-bá oinsa governo ida sei halao ninia servisu. Maske ita sente laiha ema ida mak bele halakon korrupsaun, maibé iha iha livru bíblia fó sai katak lakleur tan mundu ne’e sei iha duni mudansa boot no sei la iha tan hahalok korrupsaun. Governu ida ne’ebé la iha Korrupsaun, ita mos konkorda katak se karik komunidade nia moral mak aat, loos ka lae? 

 

Se nunee, tenki ser iha governo ida ne’ebé laos ita ema sala nain mak harii. Nee mak Maromak nia reinu, ka ukun ne’ebé Jesus hanorin ninia dixiplu sira husu atu to’o mai. Mateus, 6:9,10 hatete nune’e “Maromak nia reinu mak governo ida iha lalehan ne’ebé sei troka ema nia governo hotu iha rai no sei ukun mundu tomak”.(Salmo [Mazmur] 2:8,9; Apokalipse 16:14; 19:19-12) Governo ne’e mos sei haraik bensaun barak ba ema, bensaun ida mak governo ne’e  sei halakon korrupsaun hotu”. 

 

Kbiit, atu halao governo ida presiza osan husi povu, babain liu hosi impostu no pagamentu sira. Osan sira ne’e mak bele sai tensaun ba funsionáriu sira atu naok. Dala ruma ema mos fo osan bolsu nian ba funsionáriu sira hodi husu atu hamenus impostu ne’ebé lolos sira tenke selu. Rezultadu mak estadu la bele hetan osan ne’ebe natoon, tan ne’e estadu tenke hasae tan folin impostu nian, no ida ne’e book ema atu halo korrupsaun liutan. Iha situasaun hanesan nee, ema ne’ebé selu impostu ho laran-moos mak sai vitima ba korrupsaun. Governo ne’e sei halao ninia ukun ho kbiit hosi maromak ne’ebé iha forsa boot liu hotu. Maromak nia governo ne’e la presiza ema selu impostu. Maibe tanba maromak nia kbiit boot no laran luak, ninia governo ne’e sei fo buat hotu ne’ebé ninia povu sira presiza. 

 

Ukun Nain Susan Rose-Ackerman ne’ebé foin temi, dehan atu hapara korrupsaun, tenke hahu husi ukun nain boot sira. Maibe susar tebes atu halo nunee tanba maski governo sira haka’as an hapara funsionáriu públiku sira nia korrupsaun hanesan polisia ka alfandega, maibé sira taka matan deit ba ukun-nain boot sira ne’ebé halo korrupsaun. Liu tan ne’e, maski ukun nain balu ne’ebé koko makaas atu la halo korrupsaun mos ema sala nain. Iha livru bíblia dehan “la iha ema ida mak loos iha rai tomak ne’ebé nafatin halo buat diak no la halo sala”. “Karena tidak ada orang yang adil-benar di bumi yang terus berbuat baik dan tidak berbuat dosa”.Eclesiastes (Pengkhotbah) 7:20.

 

Iha rai barak ema halo eleisaun bebeik tanba ida ne’e bele fo oportunidade ba povu atu troka ukun nain sira ne’ebé halo korrupsaun. Maibe realidade mak, maski iha rai riku, ka kiak, ema nafatin halo korrupsaun iha tempu kampañia ka eleisaun, exemplo ema riku sira fo osan atu apoia politiku nain ka partidu ruma hodi sira bele manan eleisaun nee. Juiz ida iha Tribunal Aas liu iha rai Estadus Unidus, naran John Paul Stevenshatete katak ema riku sira nia hahalok hanesan nee “laos deit fo impaktu ladiak ba governo nian lalaok no kualidade, maibé mos halo povu la bele tau fiar ba governo”. Lei ema hanoin se governo ida halo lei foun, ida ne’e sei ajuda atu hadia nasaun nia situasaun. Maibé matenek nain sira hatete katak, tuir loloos bainhira lei sira aumenta, ida ne’e bele loke dalan liu tanba ema atu halo korrupsaun. Liu tan ne’e atu halao lei foun sira hodi bele hapara korrupsaun, babain governo tenke gasta osan barak maibé hetan rezultadu diak uituan deit. 

 

Iha lidun seluk, ita prega iha ita nian nasaun Repúblika Demokrátika Timor-Leste (RDTL) kazu korrupsaun barak maibé ita nia nai ulun governante balu halo hela korrupsaun lakoi kopera ho justisa ne’e tamba saida?, perguntas ida ne’e fila-fali ba ita nia an no sidadaun hotu-hotu nian konsiensia rasik.  Tuir dadus 2014 TI (Transparency International) Corruption Perception Index indika Timor-Leste iha numerú 8 (Asia Pasifico) no iha numerú 28 iha Mundu, ne’e signifika katak Timor-Leste tama iha 10 top iha Asia Pacifico. Ita hotu fó esforsu atu bele halakon korrupsaun iha ita nia rain, hodi bele atinji moris prosperiedade no justisa sosial. 

Iha debate ida, iha mídia nasional Radio-Televisão Timor Leste (RTTL) iha ne’ebé Primeiro Ministru Timor-Leste VI Governo Konstitusional Dr. Rui Maria de Araujo hatete katak “Estratéjia importante liu hodi kontra korrupsaun mak lei. Iha jestaun despeza públika sira, iha prosesu aprovizionamentu, iha regra sira. Ita tenke kumpri. No karik iha iregularidade, investiga no aplika lei”. Korrupsaun kontinua ás iha Timor-Leste no susar atu kombate, tamba Parlamentu Nasional la iha seriadade atu aprova Lei Anti Korrupsaun, hodi tau matan ba ema ne’ebé halao korrupsaun. Ita hotu mehi atu hadia dezenvolvimentu ba povu no nasaun, maibé durante nee mosu oin seluk tamba korrupsaun ás, ema hotu hakarak luta atu kombate korrupsaun nee, maibé ita nia Parlamentu Nasional rasik hakiak korrupsaun, tamba sira la kohi aprova Lei Anti Korrupsaun.

Ikus liu, hakerek na’in halo rekomendasaun ba orgaun Parlamentu Nasional atu kombate korrupsaun iha rai laran, bele ka lae Lei Anti Korrupsaun la bele budu hela iha meja Parlamentu Nasional, tenki despaixo iha komisaun relevante atu nune’e bele halo diskusaun iha plenaria, hodi nune’e sidadaun ne’ebé mak halo korrupsaun bele halo julgamentu lori ba iha Tribunál. No sidadaun sira seluk bele tauk ona atu halo korrupsaun no sidadaun sira bele hakribi korrupsaun iha ita nia rai doben Timor-Leste. ****

 

Referénsia:

 

 

Publika iha Opiniaun
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version