Tempo Timor Online

 

 

Dili, Tempo Semanal - Nota de imprensa ne’ebe fo sai husi Palasio do Governu informa katak durante reuniaun estraordinariu Konsellu Ministru iha segunda-feira, loron 24 fulan-novembru tinan 2014, iha sala sorumutuk Konsellu Ministrus nian, iha Palásiu Governu Dili, aprova ona Proposta Nomeasaun Envidu Espesiál CPLP nian ba Guiné-Bisau no Guiné Ekuatoriál.

 

“Dr. José Ramos Horta hanesan ema ne’ebé Governu propoin hodi kaer kargu ida ne’e, ne’ebé harii iha ámbitu Prezidénsia Rotativu Komunidade Nasaun sira Lian Portugés nian (CPLP) hosi Timor-Leste”, informa iha komunikadu ba imprensa ne’e.

 

Konsellu dos Ministru fo lembra fali katak, “Guiné Ekuatoriál integra ona ba CPLP, iha fulan-jullu liubá, durante Simeira da-X husi Xefe Estadu sira no Governu, ne’ebé hala’o iha Dili no importante akompaña dezenvolvimentu sosiál no polítika nasaun ne’e nian, nune’e mós fó apoiu ne’ebé mak membru foun ne’e presiza ba ninia prosesu integrasaun iha Komunidade”.

 

Maske Timor-Leste nasaun ne’ebe foin maka hetan ninia independencia maibe konsege hala’o misaun da paz ne’ebe ho sucesu hodi tulun nasaun irmaun Guine-Bisau ultrapasa krize politiku. 

 

“Guiné-Bisau, nasaun ne’ebé mak durante ne’e Timor-Leste fó ona apoiu espesiál, tanba ne’e importante atu akompaña nafatin prosesu tranzisaun ne’ebé mak sei difísil hela no manutensaun ba pás sosiál no polítika nian”, komunikadu ne’e jaktuir.

 

Antes ne’e DR. Jose Ramos Horta rasik hato’o ona ninia prontidaun mak sei assume responsabilidade hodi nafatin tau matan ba problema iha Guine-Bisau no nasaun Guiné Ekuatoriál wainhira iha konsultasaun ho diplomata numeru um iha Timor-Leste ne’e.

 

“Tanba Timor-Leste mak prezide CPLP durante tinan 2 ne’e, no rekomendasaun sira husi Simeira fulan- jullu nian fó hanoin atu akompaña situasaun nasaun rua ne’e nian, no tanba simu tiha ona akordu husi membru-nasaun Komunidade nian sira seluk, Konsellu Ministru deside ona hodi hato’o ba Prezidente Repúblika atu hili Prémiu Nobel Pás no eis-xefe misaun Nasoins Unidas nian ba-iha Guiné-Bisau, Dr.José Ramos Horta, hodi kaer kargu Enviadu Espesiál CPLP nian ba Guiné-Bisau no ba Guiné Ekuatoriál”, haklaken iha komunikadu imprensa Konsellu do Ministrus ne’e.

 

Aileu, Tempo Semanal – Selebrasaun aniversariu deklarasaun independencia unilateral loron 28/11/1975 ba dala tolu nolu resin sia iha tinan ida ne’e sei kontinua sofre virus sala husi Protokolo estado Timor-Leste ninian. Iha selebrasaun aniversariu 28 de Novembru tinan ida ne’e hala’o Iha distritu rai hussar ne’e hetan partisipasaun no konsentrasaun ema wain hodi asiste loron heroizmu nian ne’e. Maibe erru ne'ebe akontese ona iha tinan sira uluk sai on a hanesan kultura murak hodi repete hikas iha tinan 2014. Ironia liu tan maka Xefe komisaun organizadora ba eventu ne'e, Ministru do Administrasaun Estatal, DR. Jorge Teme la hatene hasai foto ho bandeira nasional.

 

Tuir observasaun iha Aileu kuaze maioria orgaun do Estadu inklui setor privadu partisipa iha feira menus de’it instituisaun uitoan maka la partisipa. Ema lubun bo’ot maka la’o tama sai fatin expozisaun ninian. Komunidade barak maka iha interese atu hare istoria no hato’o lia husu hodi buka hatene. 

 

“Ha’u kontente tebes atu mai hare sai ida maka hatudu iha expozisaun ne’e. Ami kontente tebes bele hetan oportunidade hodi vizita stand expozisaun no rona esplikasaun depois karik la kompriende husu pergunta hodi hetan matenek ruma”, dehan estudante ida ba Tempo Semanal iha stand expozisaun Presidenti da Republika ninian. 

 

Juventude ne’e kontente mos bele ba hare fatin expozisaun sira seluk ho antuziasmu hodi apriende lala’ok balun. Maibe ironia tebes wainhira hakat ba iha fatin expozisaun balun hamosu perguntas kona membru governu balun ninia retratu hasai ho bandeira Nasional. Balun Bandeira nasional ta’u iha liman los no seluk tau fali iha lima karuk.

 

Tempo Semanal koko husu esplikasaun husi Xefe Protokolo Ministeiru Estatal hodi buka hatene karik tuir Protoko Estadu Timor-Leste ninia kuninesimentu kuandu membru do Governu ida hasai foto ho Bandeira RDTL ne’e tau iha parte karuk ka parte liman los.

 

“ Ita hare foto ne’e karik? (tempo semana-foto sira taka tesik iha stand sira) aaahhh…..Ita hare foto ne’e los duni. Tuir loloos ne’ene…….(nonok dada iis) ha’u la hatene foto nusa maka ema edit tiha fali bandeira ne’e iha eskerda fali. Ha’u, sira la konsulta ho ha’u foto ne’e ta’u iha ne’eba. Mas foto ida bainbain ta’u iha Ministeiru ne’e la’os hanesan ne’eba”, esplika Carlito Martins, Xefe Protoko Estadu iha Ministeiru Administrasaun Estatal.

 

Wainhira Tempo Semanal koko husu liu tan dehan hanesan servidor do Estadu Timor-Leste Protokolo karik hatene loloos ne’e bandeira tau iha parte lliman los maka los. Maibe dala ida tan carlito nega katak ninia partela iha kuinesimentu ema se maka monta foto refere no husi ninia logat Xefe Protokolo do estado ne’e koko atu husik responsabilidade ba eru sira ne’e ba fali ema seluk.

 

“Ha’u la hatene, espanduk ka foto ne’ene tau tiha iha ne’eba maka ha’u hare”, Carlito hatan.

 

Wainhira Tempo Semanal husu se los maka sei responsabiliza ba erru refere xefe protokolo ne’e la hatan no jornalista Tempo Semanal koko konfirma mas telefone buti mate ona.

 

Iha parte seluk iha lokraik loron Kinta Feira (27/11) eis komandante en Xefe Kay rala Xanana Gusmao halo inaugurasaun ba estatua eis Presidenti Nicolao dos Reis Lobato iha Asirimo.

 

Hafoin de ida ne’e Primeiru Ministru mos entrega kondekorasaun ba estafeta no eis klandestina ne’ebe subar lider superior da Rezistencia iha tempu funu kontra TNI.

 

Maibe lider maximu sira ne’ebe sei moris balun la partisipa inklui  lider fenomenal Maximu da Resistencia Mahuno. Nune’e Tempo Semanal koko husu klarifikasaun kona ba auzencia Mahuno iha seremonia solene ne’e.

 

“Agora pronlema ne’e hanesan ne’e, konvite ne’e ami simu ba seremonia kondekorasaun ne’e, aban (28/11) depois de ensar Bandeira maka kondekorasaun ne’e hala’o”, konfirma Mahunu ninia kaben Teresinha Viegas ba Tempo Semanal

 

Nia haktuir katak, “iha konvite ne’ebe sira fo ne’e, iha ne’eba hakerek programa. Programa kondekorasaun ba ema sira ne’ebe subar maun sira ne’e aban (28/11)  .

 

“Tuir Programa ne’e, ensar de bandeira, depois leitura textu proklamasaun no tuir mai maka kondekorasaun ba estafetas no ema sira ne’ebe subar bo’ot sira ne’e 10:50 dadersan tuir hakerek iha konvite ne’e,”esplika Sekreataria asuntus Parlamentar ne’e.

 

Mas akontese katak ida ne’e tantu Maun Mahunu no mana mos simu hanoin katak aban ne’ebe aban dader maka sai husi Dili.

 

Sekretaria Asuntus Parlamentar, Teresinha Viegas ne’ebe mos hanesan kaben husi Mahunu konfirma katak ninia parte hanoin katak programa refere sei hala’o iha dia 28/11/2014 nune’e iha loron 27/11/2014 sei hala’o servisu iha Parlamentu.

 

“Ha’u mos ohin (27/11) sei hare hela programa orsamentu ne’ebe halo ajendamentu ba plenaria nune’e ha’u akompania nafatin no foin maka hotu no Presidenti Parlamentu Nasional foin maka asina. Nune’e mos maun hatene katak atu fo kondekorasaun ba lider maximu sira nain nen ka sira nain lima ne’e aban (28/11) maka halo iha tuku 10:50. Ne’ebe ho hanoin ida ne’e maka aban madruguada maka ami sa’e ba”, esplika Sekretaria Asuntus Parlamentu ne’e.

Mahuno ho ninia kaben la hatene karik iha alterasaun ruma ba ajenda ne’e elabora hamutuk ho konvite maka iha.

 

“Iha alterasaun ba ajenda ne’e neim fo hatene ba ami. Foin daudauk Presidenti Parlamentu hatudu fali SMS mai ha’u mas iha Aileu seremonia hala’o hela tiha ona”, dale Teresinha.

 

Nia esplika katak, “Sira husi Komisaun Organizadora ne’e haruka de’it mensajen ne’e ba iha Deputadus sira. Ha’u hanoin membrus do Governu barak mos la simu muito menus ha’u sa tan ha’u nia kaben la simu buat ida. Tan ba ida ne’e maka maun la marka prezensa mas aban dader maun ba”.

 

Teresinha Viegas hanesan kaben husi Mahuno lamenta tebes ho atetude komisaun organizadora ne’ebe hakerek iha konvite oin seluk ho implementasaun programa iha terenu.

 

“Agora iha membru balun liu-liu ba Deputadu sira, komisaun organizadora informa kona ba alterasaun programa ne’e. Tuir loloos sira mos informa, karik Mahuno sira ne’e importante atu marka prezensa loloos informa mos ba Mahuno, tan ba konvite ba nia ne’e kan sira lori ba uma. Agora informasaun ne’e muito menus ha’u la simu, apa lagi ha’u nia laen Mahuno mos la simu. Ami neim iha kunesimentu ida sobre adiantamentu ba aletrasaun ajenda aban nian ba fali ohin ne’e, ami la iha. I ami kaer nafatin ajenda ne’ebe maka tuir konvite komisaun organizadora fo sai”, dehan Teresinha Viegas ba tempo Semanal.

 

Kaben husi Mahuno ne’e relata ba Tempo Semanal dehan Primeiru Ministru, husu ninia eskolta sira telefone fali iha Sekretaria asuntus Parlamentar hodi konfirma prezensa Mahuno iha Aileu maibe Mahuno sei iha hela Dili.

 

 

Depois de Parlamentu Nasional hatun Rezolusaun Númeru 12/2014, datada, 24 de Outubro de 2014, kona-bá Kriasaun Konselhu Ida ba delimitasaun definitiva kona-bá FRONTEIRAS MARÍTIMAS.

 

Hanesan públiku tomak hatene katak, Prinsipiu Legal Internasionál tuir UNCLOS 1982, United Nations Convention on Law of the Sea/Konvensaun Nasoins Unidas kona-ba Lei Tasi nian fó sai katak atu sukat fronteira maritima entre nasaun rua tenke marka ho liña klaran (Median Line), metade entre tasi ibun, bainhira entre nasaun rua nia Zona Ekonómiku Eskluzivu nian kobre parsialmente (overlap). 

 

Infelizmente Governu Australia lakohi atu aplika uza prinsipiu ne’e iha Tasi Timor. Karik uza “Median Line”, 100% husi kampu gas no petróleu iha Bayu Undan, Greater Sunrise, Laminaria no Corallina sei sai parte husi territóriu Timor-Leste nian.

 

Estadu Timor-Leste foin ratifika UNCLOS iha Janeiru 2013 no Governu Australia rasik dezde 1994, maibé unilateramente iha Marsu 2002 Australia retira ona hosi prosesu rezolusaun mandatóriu atu rezolve disputa fronteira maritima iha UNCLOS, fulan rua antes Timor-Leste restora nia independénsia, hodi hatudu katak Australia lakohi iha prosesu legal mandatóriu atu rezolve kestaun sira ne’e, ne’ebé Canberra prefere atu halo ida ne’e liu hosi negosiasaun.

 

Istória no provas barak hatudu katak, dezde kleur ona Governu Australia iha interese boot atu haluan sira nia asesu ba kampu mina-rai no gas iha Tasi Timor, hetan porsaun boot liu duke ida ne’ebé sira merese tuir prinsipiu legal internasionál. Australia uza aproximasaun hanesan atu okupa territóriu tasi nasaun viziñu sira nian, uza negosiasaun bilateral ne’ebé fó valor ba nasaun ho podér ekonómiku no polítiku ne’ebé boot. Iha ezemplu barak hanesan: Zona Kooperasaun ka ZOCA (Zone of Cooperation) ZOCA ikus mai bolu JPDA, Greater Sunrise, Laminaria, Corallina no Buffalo, kazu Ashmore Reef, kazu fronteira ho Nova Zelándia no ho kazu disputa ho viziñu sira balu iha area Antartika.

 

Ba kazu espesífiku ho Timor-Leste, maske Tratadu Tasi Timor ne’e asina iha 2002, maibé foin vigora iha 2003 bainhira Governu Australiano konsege obriga Timor-Leste hodi asina Akordu Unitizasaun Internasionál (IUA) atu fasilita dezenvolvimentu Greater Sunrise.

 

Governu Australia hakarak duni atu dezenvolve Greater Sunrise, no sira hatene katak Estadu Timor-Leste nudár nasaun foun ho situasaun ekonómiku ne’ebé fraku, presiza duni Bayu Undan lalais atu finansia atividade Estadu nian. Nune’e Australia adia atu ratifika Tratadu Tasi Timor to’o Timor-Leste asina Akordu Unitizasaun Internasionál ba Greater Sunrise iha 2003. Iha tempu ne’ebá Governu Timor-Leste sente katak presaun Australia nian la justu no hanesan hanehan tiha Timor-Leste, no Timor-Leste rejeita atu ratifika ida ne’e. Ikus mai, Akordu Unitizasaun Internasionál ne’e ratifika duni liu husi Parlamentu Nasional iha tinan 2007, no iha tempu ne’ebé hanesan nasaun rua ne’e ratifika Tratadu CMATS (Certain Maritime Arrangements in the Timor Sea).

 

Provizaun Tratadu CMATS ne’e fó abrigu katak sei laiha kualkér asaun hodi ko’alia kona-ba fronteira maritima durante periodu tinan 50 (Lima Nulu) nia laran. Maske, durasaun Tratadu ne’e bele habadak husi parte ida, husi nasaun rua ne’e bainhira órgaun reguladór hosi Australia no Timor-Leste la aprova Planu Dezenvolvimentu ba kampu Greater Sunrise nian iha tinan neen nia laran hafoin Tratadu CMATS vigora, katak 23 Fevreiru 2013. Kualkér tempu hafoin data ne’e, parte Timor-Leste ka Australia bele fó notifikasaun hodi husu atu termina tratadu ida ne’e, ne’ebé sei vigora durante fulan tolu nia laran. Maske Tratadu CMATS bele termina depende ba pozisaun kada nasaun rua ne’e atu halo renegosiasaun ba Tratadu CMATS.

 

Konsidera-mos ba situasaun atual nebe depois de Rezolusaun ne’e hatun husi Parlamentu Nasional, iha tentativa oin-oin HO MEIUS PROXY WAR hodi fó presaun direitamente ba V Governu Konstitusional nebe lidera husi Maun Boot Kayrala Xanana Gusmão. Tentantiva hirak nebe, detetadu hanesan:

 

  • Dezakredita, ofende no alegasaun ba imajem ka personajem lideransa Nasional ho ninia intensaun ATU OHO KARATER KA CHARRATER ASASSINATION ho ALEGASUN KORUPTOR!!

 

  • Hahu tenta atu SORAN ÓRGAUN SOBERANA TIMOR-LESTE, Entre Exekutivu-Judisiariu-Legislativu (Tribunais versus Governu versus Parlamentu);

 

  • Hahu tenta PROVOKA NO SORAN entre Entidade Religizioza hanesan “ISLAM Versus KATÓLIKA” nebé liu husi insulta iha asaun grafika ”ANTI-MUSLIM” iha dalan públiku balun iha Kapital Dili laran.

 

  • Issu NINJA hahu moris ona iha komundadi nia le’et.

 

  • No mos issu no provokasaun balun nebé sei mosu liu tan iha tempu badak ne’e.    

 

Ho, akontesimentu hirak nebe ami tenik iha leten. Ita tenki konfesa katak “NIA HUN NO NIA ABUT, LA SELUK-LA LET MAK KESTAUN RIKU SOI ITA NIA MINIARAI NEBE DADAUN NE’E ESTADU TIMOR-LESTE FOTI POZISAUN FIRME BA NINIA DIREITU SOBERANIA BA KALOHAN, RAI  NO TASI NEBE TENKI TUIR TERMUS JURISDISAUN DIREITU INTERNASIONAL.  

 

Nuné, Ami ASSOCIAÇÃO DOS COMBANTENTES DA BRIGADA NEGRA, sente urjentimente, sem dúvidas, apio 100% ho karater Inkondisionalmente (tanpa syarat), ba Rezolusaun Parlamentu Nasional Númeru: 12/2014, datada, 24 de Outubro 2014, atu fó mandatu tomak ba V Governu Konstitusional hodi kria Konselhu Espesial ida hodi foti medida adekuada ba DELIMITASUAN DEFINITIVA BA FRONTEIRAS MARÍTIMAS,

 

 

 

NUNÉ HODI:

 

  • Husu ba Sua Excelênsia Primeiru Ministru, Maun Boot Kayrala Xanana Gusmão atu aselera lalais exekusaun mandatu Rezolusaun Parlamentu Nasional Númeru: 12/2014, datada, 24 de Outubro 2014;

 

  • Apela ba Komunidade tomak no ba PARTIDUS POLÍTIKUS nebe existe iha rai ida ne’e, atu MATAN MORIS NO NEON NAIN hodi KONDENA ba manobra GRUPU ORGANIZADU balun, nebe hakarak soran ita ho meiu oin-oin no mos ho osan. Hahalok sira ne’e mos potensialmente bele hamosu sosiedade kaótiku, tan la-fiar malu no mos la-fiar ba Lideransa Nasional sira hodi fasilmente hamosu krize lideransa ne’ebe nu’udar odamatan ka konvite ba DEZINTEGRASAUN NACIONAL no INTERVENSAUN INTERNASIONAL hodi kria nafatin ESTADU EMERJENSIA, FUNU NO DEPENDENTE NAFATIN.

 

  • EXIZI no APELA ba Komunidade Timorense nebe iha diaspora, hanesan iha; PORTUGAL,  AUSTRALIA NO MOS IHA RAI LIUR SELUK, atu foti pozisaun ho “LIAN IDA BA ASAUN IDA” hodi DEFENDE ITA NIA SOBERANIA LINHA MÉDIA (median line), nebe dadauk ne’e ita inferenta hasoru Nasaun Jigantes, hamutuk ho sira kompanhia Petróleo, tanba deit sira sente “karik matenek no mafiozu”, hodi sira uza instrumentos legais sira nebe ita kompromete iha tempo difisil, atu explora ita nia mina, la selu tan ita nia taxa, maibe hakarak hatama tan ita ba Tribunal!

 

  • Husu ba Estadu Timor-Leste nebe reprezenta husi V Governu Konstitusional atu tetu katak; vantajen ba Estadu Timor-Leste ATU SAI HUSI TRATADU CMATS mak iha posibilidade diak liu atu negosia fila fali fronteira maritima hodi reklama ita nia direitu soberania ba Tasi Timor, inklui kampu Greater Sunrise, Area Dezenvolvimentu Petróleu Konjunta, kampu Laminaria no Corallina!

 

  • Apoio inkondisionalmente ba Kampaña ba Justisa Tasi Timor nian (Timor Sea Justice Campaign - TSJC) nebe lidera husi Belun Tom Clarke ho ninia kompanheiru sira,Sidadaun Austaliano nebe ho justu no solidaridade humanu entre povo Australiano ho povu Timorense, rekonhense katak; sira nian Governu Australiano tenki rekonhese ho omilde no justu ba saida-mak Direitu Teritorial Internasional haruka. No tenki rekonhese pozisaun politika “kan-ten” Governu Australiano ba teritori Timor-Leste nian!

 

  • Apoio inkondisionalmente ba pozisaun polítika Prezidente Repúblika Indonézia Sua Excelênsia, Ir. Joko Widodo hamutuk ho Povu Indonezia nebe solidariza iha tempu defisil rezistentesia Timor-Leste nian, hodi hahu ona re-negosiasaun tuir Prinsipiu Legal Internasionál UNCLOS ba linha fronteira tasi entre Indonézia,Timor-Leste no Australia.  

 

Ikus mai, ami apelu ba ita tomak katak “Você nunca irá ganhar se você nunca começar” ka “Ita nunka bele manan wanhira ita la hahú komesa”... Nune, Mai ita tomak hahú, tamba ita nia vitoria certa, kestaun mak tempu deit....!!!! 

 

A Luta Continua, hanesan PALAVRA DE ORDEM iha Passadu, no mos sei relevante iha tempu prezente, hodi defende ita nia Soberania Nasional nebe ita seidauk liberta mak ITA NIA TASI KETAN, TASI FETO, TAAI MANE, TASI IDA DEIT,  MAK TASI TIMOR!!!!

 

 

Díli, 25 de Novembru 2014

 

Reprezentante ACBN:

 

Prezidente ACBN: Nuno Corvelo “Laloran”

 

Sekretáriu-Jeral ABCN: Nelson Correia “Maotula”

 

Vogal ABCN: Constançio dos Santos “Tamalaka Aquita”

 

 

Breaking News Tempo Semanal - Ministru Defesa Portugal Visita mai iha Timor Leste hahu husi loron 25-26 de Novembru 2014 hodi hametin nafatin lasu amizade no kooperasaun iha area Defesa entre instituisaun defesa nasaun rua ne’e hafoin de orgaun do Estadu iha Republika Demokratika de Timor-Leste hasai rezolusaun hodi duni sai jurista Poruges husi Nasaun ne’e.

 

Ministru Defesa Portugal, jose pedro Aquir Branco ho ninia ekipa enkontru to’o iha Palasiu do Governu tuku 17.00 OTL no agora hala’o hela bilateral hela enkontru ho Ministru de Defesa Timor-Leste Kay Rala Xanana Guysmao ne’ebe akompania husi Sekretariu do Estadu da Defesa Timor-Leste DR. Julio Tomas Pinto iha sala Konselho Dos Ministru, Palasiu do Governu.

 

“Ministru defesa Portugal Visita mai atu responde ba konvite ne’ebe ke Ministru defesa Seguransa Timor-Leste hato’o ba nia  iha tinan kotuk, konvida nia mai visita timor tan ba depois de sai hanesan Ministru Defesa Portugal nia seidauk mai ihaTimor leste. Ita nia Ministru Defesa no Seguransa maka konvida nia mai”, dehan Sekretariu de Defesa Timor-Leste, Julio Tomas Pinto ba Tempop Semanal iha Dili (25/11). 

 

Julio Tomas Pinto esplika katak relasaun Ministeiru de Defesa Timor-Leste ho Portugal estabele kleur ona antes nasaun ne’e restaura ninia Ukun Rasik A’an nune’e presiza visita importante ne’e.

 

“Nia mai atu hametin no hasae liu tan ita nia kooperasaun  iha area defesa ninian tan ba ida ne’e maka vizita ida ne’e importante. I durante nia vizita mai iha ne’e sei asina mos akordu ida kona ba akordu kooperasaun iha lingua portuges ninian. Katak atu estabelese centru lingua portuges iha Centru Treinamentu Metinaro ba Forcas Armadas”, dale Julio pinto. 

 

Dezde F-FDTL harii iha nasaun ne’e iha inisiu 2001 Portugal sempre apoiu ona instituisaun mas antigun iha Nasaun Timor Leste.

 

“Ita nia kooperasaun ho Portugal di’ak tebes tan ba apoiu Portugal nia ba Timor dezde ita harii forcas armadas iha Aileu, iha 2001. Depois sira apoiu iha Treinamentu no apoiu komesa husi selesaun no rekrutamentu ne’e apoiu husi Portugal hotu”, relembra Julio Tomas Pinto.

 

Wauinhira F-FDTL atu hari nasaun barak maka kontra no la aseita atu nasaun ki’ik oan ne’e atu iha ninia instituisaun de Defesa rasik inklui mos instituisaun Kings College ne’ebe UNTAET husu atu halo estu viabilidade kona ba F-FDTL.

 

“Durante tinan hirak nia laran ne’e Portugal prova ona nia komprimisu maka’as ba konsolidasaun Forcas Armadas Timor Leste nian. Portugal fo sira nia apoiu maximu, inklui mos kuandu ita estabelese ita nia komponente Naval, nasaun barak maka la konkorda maibe Portugal nasaun primeiru maka fo apoiu tomak ba forcas komponente Napal,” dehan relembra Julio Tomas pinto.

 

Eis colonial Timor-Leste ne’e sei nafatin apoiu nasaun ne’e atu iha ninia forca Aero ida tan ba Timor-Leste ninia lalehan sei libre ba ema internasional sei hodi utiliza sei kontrola.

 

“Agora daudaun Portugal apoiu ita atu hare hela posibilidade oin sa halo kooperasaun iha konstrusaun no dezenvolve forca aero Timor-leste nian. Tan ba iha tinan kotuk ekipa ida husi Portugal mai ona hare no halo estudu ida kona ba posibilidade Timor-leste iha forca Komponente Aero, iha F-FDTL”, afirma Julio Tomas Pinto.

 

Iha momentu hanesan Portugal apoiu ona Timor-Leste ninia forcas Armadas hodi partisipa iha operasaun da Pas iha rai sira ne’ebe iha funu hanesan F-FDTL balun partisipa iha operasaun da pas iha nasaun Afrikanu balun.

 

“Apoiu Sira ne’e hotu inklui apoiu asesores ba F-FDTL,inklui relasiona ho rekrutamentu, apoiu ba iha asesor F-FDTL, apoiu asesor ba iha komponente naval I apoiu asesor ba mos iha kuartel F-FDTL nu’udar kooperasaun tekniku militar Timor-Leste ho Portugal ninian”, Julio remata.

 

Relasaun nasaun Timor-Leste no ninia eis colonial Portugal sai manas hafoin iha inisiu fulan ne’e Orgaun soberanu Timor-Leste, Parlamentu ho Governu futu lia hodi sasurut tama ba iha kuartu orgaun judiciariu hodi duni sai jurista Portuges sira maka hakna’ar aan iha Ministeiru publiku no Tribunais ninian inklui asesor id aba iha Komisaun Anti Korrupsaun.

 

 

 

 

 

Dili, Tempo Semanal – Primeiru Ministru Kay Rala Xanana Gusmao rekere ona ba arguido ida ne’e daudaun ne’e assume hela kargu hanesan Presidenti Parlamentu nasional atu labele autoriza Parlamentu Nasional hodi halo levantamentu ba imunidade membru V Governu Konstitusional to’o sira nia manatu remata.

 

Surat refere datada 22 de Oetobru 2014 ne’e PM Xanana direje ba DR. Vicente Guterres ne’ebe mos Ministeiru Publika akuza ona no ninia prosesu iha ona Tribunal Distrital Dili.

 

Parte balun konsidera katak, karta ne’ebe haruka husi Primeiru Ministru, Kay Rala Xanana Gusmao sei hatauk Parlamentu Nasional nune’e orgaun do estadu ne’e sei la hala’o ninia misaun ida tuur konstituisaun deside atu hasai imunidade  membru governu sira ne’ebe akuza ona husi Ministeiru Publiku tan ba deskonfia involve iha kazu krime KKN.

 

Maibe Presidenti da Republika Demokratika de Timor-Leste, Taur Matan Ruak espresa ninia neon metin atu Parlamentu Nasional hala’o nafatin sira nia kna’ar mezmu Primeiru Ministru hato’o ona pedidu ba orgaun segundu do estadu ne’e atu labele hasai imunidade servidores estadu sira, liu-liu iha orgaun V Governu konstitusional ne’ebe hetan ona akuzasaun husi Ministeiru Publiku no hatoo ona ba TDD no notifika parte sira interesadu.

 

“Parlamentu orgaun de poder ida independent, apezar interdependenti, ligasaun ho orgaun do estadu sira seluk. Mas nia orgaun ida ke, nia deside rasik na base de konsiencia no na baze de lei. Portantu primeiru Ministru bele hakerek mas desizaun final so Parlamentu maka toma. Parlamentu orgaun soberanu, nia deside tuir bu’at ne’ebe ke nia deside”, Presidenti da Republika Taur Matan Ruak hateten lian hira ne'e ba Jornalista sira wainhira sei hala’o hela visit aba suku sira iha area rurais iha Distritu Bobonaro ninian iha semana kotuk.

 

Tuir informasaun husi Uma Fukun Parlamentu nasional relata katak Presidenti Parlamentu Nasional informa ona asuntus pedidu Primeiru Ministru ninian ne’e ba Xefe das bankadas Parlamentar sira.

 

“Presidenti Parlamentu Nasional informa ona asuntus surat Primeiru Ministru ninian wainhira hatan ba Xefe bankada Opozisaun ninia perguntas relasiona ho hasai imunidade ba membru governu sira inklui Ministra das Financas”, dehan membru parlamentu ida ba Tempo Semanal.

 

Iha parte seluk Presidenti da Republika ho diplomasia elojia PM Xanana ninia hahalok hodi lori dokumentus sira ba entrega ba autor judisiariu sira. Presidenti Taur dehan lia hirak ne’e wainhira hatan ba perguntas jornalista ninian kona ba prezensa Primeiru Ministru Kay Rala Xanana Gusmao  iha Tribunal Distrital Dili, iha semana kotuk. 

 

“Prezenca Primeiru Ministru nian ba iha Tribunal, so hateten ba ita katak iha ita nia rain, Presidenti, Primeiru Ministru, presidenti parlamentu la iha lei nia leten. Ita hotu-hotu iha lei nia okos, tan ba ida ne’e ha’u kontente. E Ainda posibel iha momentu ida ne’ebe ema dehan ita atu sobu justica, pelo faktu Primeiru Ministru ba iha ne’eba hatudu  pelo kontrariu ita la’os sobu mas ita aijuda para dezenvolve di’ak liu no forte liu tan ba oin”, Presidenti taur Matan Ruak hatan ba perguntas jornalista ninian.

 

Primeiru Ministru Kay Rala Xanana Gusmao iha loron 18 fulan Novembru lori dokumentus futun bo’ot lubun ruma hodi ba entrega iha Tribunal Distrital Dili (TDD). Maibe tuir juiz Administrador TDD, DR. Duarte Tilman katak dokumentus sira ne’e nia entrega fila fali ba Ministeiru Publiku nu’udar prosesu hotu-hotu ninia nain hodi investiga liu tan.

 

 

 

 

 

Dili, Tempo Semanal - Foin lalais ne’e mosu polimika pinta parede ka odamatan iha UNDIL Dili. Iha ne’ebe ema balun hakerek letra “Abaixo Xanana” no dun malu hela. Agora mosu tan pinta parede iha Tasi Tolu hodi insulta komunidade muslumanu ninia Nabi Muhammad.

 

PM Xanana hanesan mos presidenti fundasaun UNDIL ne’ebe antes ne’e hetan uluk ona atakes iha parede UNDIL ninian ne’e ohin (23/11) hatudu momos ninia hirus relasiona ho pinta parede no husu atu jovens sira labele pinta tun sa’e iha parede no nia sei buka kaer no silu tohar tiha jovens maka gosta pinta parede.

 

“See de’it mak liman katar, mai hakerek hodi sobu sosiedade kaer baku tasak, silu tohar tiha nia liman, tiru tohar para fó hatene ba mundu katak Timor-Leste la permite Anti”, Primeiru Ministru Xanana Ko’alia ho hirus ba hahalok ema balun hodi pinta parede halo trosa hasoru komunidade muslanu iha nasaun ne’e. 

 

Primeiru Ministru ohin (23/11) maka fila husi Indonesia hafoin ba halo tratamentu ba ninia saude iha Jakarta. To’o iha Dili nia hakat kedan ba Tasi Tolu dili no iha ne’ebe PM Xanana hatudu duni ninia hirus hasoru ema ne’ebe pinta Parede ate PM mos so’e piadas ba ulun bo’ot nasaun bo’ot sira iha mundo.

 

“Anti Muslim ne’e Obama (Presidenti amerika) nia problema, Abbott (Primeiriru Ministru Australia) nia problema, David Carmeron (Primeiru Ministru Reniu Unidu) ho bobo’ot sira iha Europa ne’ebá nia problema, la’os ita nia problema. Ita iha ne’e iha kultura toleransia, tanba ne’e mak nu’udar Primeiru Ministru  ha’u sei la permite see see de’it, ha’u dehan tiha ba Polisia sira kaer imi la tau ba kadeia ida, maibé tiru tohar de’it imi nia ain, tanba la’os ema nain rua ka tolu mak estraga ita nia sosiedade”, Primeiru Ministru fo sai iha konferénsia imprensa, iha Tasi Tolu.

 

 “Ita tuda malu, baku malu sira hamnasa, tanba ne’e hahú hosi ne’e (Tasi Tolu) ba fatin seluk hodi fó hatene ba povu katak Timor-Leste la ejiste liafuan ida bolu naran Anti Muslim, maibé sai hanesan Timor-oan hotu hodi sai sosiedade ida de’it”, Xefe Governu ne’e dale.

 

Primeiru Ministru Kay Rala Xanana Gusmao mos la’os deskonfia de’it ema Timor Oan maka pinta parede sira ne’e maibe mos nia deskonfia karik ema estranjeiru ruma maka hakarak halo nune’e hodi prejudika toleransia entre komunidade sira.

 

 “Ema malae mai hosi rai liur karik, antes ha’u duni nia, nia liman sei tohar, tuur hamutuk, hanesan Igreza la hanorin. Ha’u sei buka nafatin malae atu metan ka malae atu mutin ka ha’u sei kaer nia”, PM Xanana expresa ninia deskonfiansa, 

 

Primeiru Ministru dala ida tan reitera hikas ninia lia alegasaun ne'ebe so'e on a ba publiku iha rate Santa Cruz ninia oin hodi dun katak joventude Timor Oan balun hahu faan aan ba mala'e hodi hetan osan Dollar no tua atu hamosu problemas ba nasaun,

 

“Ne’e duni ha’u husu ba labarik sira ema balun lohi imi, fó osan imi hemu tiha tua, fó 20 Dollar sae motor hodi halai ba halai mai, ha’u kaer imi, imi sei arepende imi nia vida tomak sei la to’o,”Tenik nia.

 

Jovens barak maka ohin loron dezenpregu iha Dili laran tan ba buka servisu la iha nune’e tuir parte balun katak fasil atu ema foo san hodi halo problema nune’e PM Xanana hato’o ninia apelho.

 

“Imi keta beik, ba hahan no ba osan ne’ebe sira fo mai ita atu ba hemu tua. Aviza ba labarik sira atu kuidadu aan, kuidadu ita nia rain. Tan ba bainhira ita fraku, ita fahe malu maka mala’e sira mai, liu-liu sira be riku bobo’ot sira ne’e mak mai, mai hanehan ita nia ulun hodi hada’u ita nia riku soi. 

 

"Ema barak mate. Liu rihun atus maka mate atu defende riku soi sira ne’e ho ita nia rai. Nune’e labarik foin sa’e sira matenek uitoan ona labele sai beikten. Kontinua nafatin mehi sira ne’ebe ita nia be alan sira, imi nia aman, imi nia inan, imi nia avon no imi nia tiun sira, foin daudauk tinan hat nolu ba kotuk sira mate ne’e. so’e hela mai, hadomi uitoan ita nia rain ba", PM Xanana husu ba jovens sira.

 

 

 “Kuandu kaer, ha’u haruka baku tiha, silu no tiru tohar tiha, mak ha’u ba hatán iha tribunál, ha’u sei la permite sosiedade ida ne’e atu baku malu, hirus malu. Nee duni hot-hotu iha responsabilidade harii estabilidade. Inan-aman, xefe suku fó hatene ba oan sira katak ikus-ikus ne’e eskola sira iha tiha ona motor. kalan halai taru, ha’u haruka kaer hodi prende tiha motor,”Ameasa Xefe Governu.

 

 “Ha’u foin to’o mai, ha’u triste tanba rona no haree katak komesa mosu grupus hakerek iha didin lolon iha ne’e (Tasi Tolu) katak Anti Muslim. Ne’e hanesan buat ida kontra ita nia kultura, tanba ita nia kultura laiha liafuan ida dehan anti ida ne’e, anti ida ne’ebá, ne’e sala bo’ot,”Dehan nia.

 

PM Xanana mos ohin hasoru malu ho imam sira husi muslumanu ninian  iha mejid Anur hodi hato’o ninia solidaridade no informa pozisaun Governu ninia sei to’os ba ema sira ne’ebe nakar hodi provoka hafera toleransia relijiaun sira iha nasaun ne’e.

 

“Agora hamriik ho imam sira iha mejid, atu fo hatene ba povu tomak katak nu’udar Xefe do Governu ha’u hirus tebes. Ha’u hirus tan ba jovens balun maka ulun fatuk la iha, beikten ba hakerek tun sa’e kontra Islam. Bu’at ke la iha relijiaun ida iha ita nia rain ne’e hanorin, kontra ita nia konstituisaun, kontra ita nia kultura no kontra bu’at hotu-hotu. 

 

Xefe do governu ne’e dehan, “Dala ruma ema bele dehan aah foin maka dala rua, foin iha ne’eba no iha ne’eba, la’e, hahu kedas, foin dala ida de’it mos ita tenke ko’alia tiha kedas. Ko’alia tiha kedas katak ha’u sei la permite. Ha’u sei la permite no ha’u foo ona orientasaun ba xefe suku hotu-hotu, inan aman hotu-hotu no mestre hotu-hotu atu hanorin labarik sira atu sai Timor Oan ne’ebe di’ak”, PM V Governu Konstitusional ne’e reitera. 

 

Antes ne’e, pinta parede hodi hahi no insulta ema sai hanesan kultura ida iha sociedade Timor-Leste, dezde 1999 no sai buras liu tan iha krize 2006 mai leten. Kazu pinta parede rua maka sai fenomenal liu hanesan, jovens sira pinta parede embaixada Australia hodi expresa sira nia sentimentu ba injustica husi nasaun Australia hasoru Timor-Leste inklui Australia halo espionazen hasoru lideransa TL no kazu pinta parede ikus liu maka deskonfia ema balun pinta letra balun kona ba PM Xanana rasik iha UNDIL hafoin de manifestasaun iha 12/11/2014.

 

“Los foin dala rua, se ita husik maka parede iha Timor tomak. Ita halo hanesan ne’e ita maka han malu I ema seluk maka hamnasa. Ema hakarak sobu ita. Tan ba ema hakarak sobu ita, uza meus oioin atu provoka. Ne’e duni ha’u bolu no husu, ha’u mai ko’alia uitoan ho imam-imam sira iha ne’e, sira hatene no sira kompriende katak la’os povu tomak.  Katak laberik balun, malandru maibe ha’u atu dehan tiha ona, ha’u sei buka tuir no ha’u sei kaer sei silu tiha liman. La tama kadeia, lalika mas silu tiha de’it liman hodi apriende. Apriende katak sai sidadaun di’ak, sai Timor Oan di’ak katak la’os hanesan ne’e”, Xanana hateten. 

 

PM Xanana relembra hikas ba Timor Oan sira katak iha ema espiaun balun iha Timor oan ninia let hodi koko estraga hikas estabilidade nasaun ne’e ninian.

 

“Ema hakarak sobu ita, 2006 no antes 2006, kada tinan rua-rua sobu uitoan-sobu uitoan. 2006 sobu ita han malu tiha, sira hamnasa sira halai hotu. Sira hakarak ita hanesan ne’e nafatin. Ohin ka’er fali relijiaun, bu’at ke nungka akontese I sei la permite atu akontese. Ne’e duni Xefe suku sira favor ida, Nai Lulik sira mos favor ida, mestre sira, inan aman sira eduka labarik sira”, Ministru Defesa no Seguransa ne’e foo sai ninia deskonfianca.

 

Primeiru Ministru Kay Rala Xanana Gusmao reitera katak sei iha ema estranjeiru balun maka foo osan ba ema Timor oan sira atu halo aksaun sira ne’e.

 

“Labarik sira ikus-ikus ne’e ema husi liur fo tuan uitoan no foo san uitoan hemu lanu tiha halo bu’at arbiru. Halo bu’at arbiru, ita maka han malu, ita maka hirus malu, ita maka baku malu, sira sa’e aviaun ba liu tiha hodi dehan Timor beikten”, eis lider maximu da Rezistencia ne’e hateten. 

 

“Ne’e duni aviza ba jovens hotu-hotu kuidadu aan, hadomi uitoan rai ida ne’e. Hadomi uitoan rai ida ne’e. Ema barak mate atu ita ukun, kaer rasik kuda talin ne’e katak atu hadomi rai ida ne’e no atu hadi’a rai ida ne’e. Ne’e duni sei la permite, ha’u sei la permite”, PM Xanana bolu atensaun.

 

Nia esplika, “ohin ha’u hirus uitoan mas atu dehan ba hotu-hotu katak, kalan-kalan maka halai ho motor tun sa’e maka halo barulho polisia sei kaer. Maka pinta tun sa’e iha parede sira ne’e sei kaer. Atu pinta saida de’it. Atu de’it ha;u hadomi ha’u nia doben ne’e mos labele, (di’ak liu) hakerek surat ba o nia doben. La’os fali ba hakerek iha parede sira ne’e dehan ha’u hadomi ha’u nia doben. At liu see ita hatun fali ema seluk no hatun fali relijiaun seluk, ida ne’e ita nia kultura la permite. Ne’e duni ha’u mai hamutuk ho imam-imam sira iha ne’e, atu dehan ba sira katak pozisaun Governu nian mak ida ne’e”.

 

PM Xanana hatudu foto letra ne’ebe pinta iha parede lolon hodi trosa nabi Muhammad hodi dehan, “karik ita bo’ot sira hatene ida ne’e (halo husi) sira ne’eba foo hatene mai ha’u kaer tiha, silu tiha nia liman, silu tohar liu tiha nia liman. Polisia agora la halimar ona. Tau direitus umanus, ha’u maka ba hatan iha Tribunal. Silu tohar tiha nia liman, ida ne’e maka ha’u foo ona orientasoeins ba polisia hodi dehan katak agora ita atu tama ba fin do ano, mai tama tan festa Natal, festa Fin do Ano se ita atu kontente no dame malu. Agora mosu bu’at ida ne’e, agora dehan foin, foin ne’e los mas iha galolen dehan tenke bertindak.”

 

Nia hatuir katakm, “ha’u dehan tiha ona ba apparatus seguransa ninian dehan la toba. Kalan-kalan buka, hare tuir. Hotu-hotu ne’ebe iha karik hanesan informasaun ruma, se, fo hatene mai. Foo hatene mai ami kaer. Ne’ebe bu’at mesak la di’ak hanesan ne’e la permite liu. Edukasaun dehan bu’at sira hanesan ne’e la permite. See maka katolik mos maromak sei la permite. Se maka budha mos la permite. “

 

“Ne’e maka ohin kedas, ha’u foin to’o, ha’u tenke toma ne’e tan ba labele, labele. Ha’u aviza ba jovens sira, imi sira be malandru, malandru oan sira ne’e, ha’u sei kaer imi no silu tohar tiha imi nia liman maka haruka ba imi nia inan aman eduka imi”, PM Xanana hatuur nia pozisaun. 

 

Maibe iha paste seluk tuir observasaun husi eis FALINTIL balun dehan problema seguransa iha nasaun ne’e la’os resolve ho ameasa no kilat maibe tenke liu husi edukasaun, kreia kampu de servisu no governu presiza loke kampu de servisu no eskola universitariu iha distritu atu evita jovens sira mai butuk iha Dili.

 

“Ha’u hanoin ita nia Maun Bo’ot hatene mas la hatene karik ne’e problema ba ninia membru sira nia kapacidade atu hare asuntus ne’e. Atu resolve sira tuasaun sira ne’e la’os ho ameasas no kilat ou servisu ba seguransa ne’e la’os de’it responsavel husi FDTL ho PNTL maibe lolo’os ne’e ministeiru sira ne’ebe ligadu ba edukasaun, agrikultura, ekonomia no empregu ninian presiza servisu maka’as hodi fo sustentabilidade ba estabilidade. Se la’e ema hamlaha ita ko’alia ema sei la rona”, dehan veteranus ne’ebe lakohi temi ninia naran iha notisia ne’e tan ba uluk iha tempu rezistencia besik liu ba Komandante en xefe das FALINTIL.

 

Nia haktuir, "Tuir observasaun ko'alia kona ba indepedensia Timor-Leste la'os fo husi bandeiza maibe iha realidade foin sa'e barak maka la hatene se maka heroi nasional nasaun ne'e ninian. Ne'e oin sa maka ita obriga jovens sira atu hadomi sira nia rain".

 

"Kampu de trabalho ida maka agricultura mas Ministeiru ida ne'e hakdasak hela oin sa maka ita bele aijuda motiva jovens sira hela iha foho".

 

Tuir diskusaun grupu veteranus sira ne'e mos identifika katak instituisaun PNTL ninian sei frajil hela nune'e presiza atu hametin liu tan.

Xanana vs "Lia Nain Sira"

Publika iha Opiniaun

 

 

BY : Dalia Kiakilir Agostinho

 

Ohin Xanana Politico, Xanana, Xanana, Xanana. Xanana iha né, Xanana iha neba, Xanana halo ida né, Xanana halo ida neba.

 

Ema barak ohin loron gosta temi Xanana nia naran, dehan ida né, dehan ida neba.

 

Uluk Xanana Funu-na'in ka Guerrilheiro, ema barak mak haluha ona katak uluk, Xanana iha ne, Xanana iha neba, Xanana halo ida ne, Xanana halo ida neba, Xanana iha fatin hotu hotu. "O omnipresente"!

 

Xanana agora ema político ida, defende nia politica. Iha rai laran politicos barak no Partido ko'or oin-oin. Makerek. Ida-idak defende nia politica, consequencia mak mosu apoiantes nebe mak concorda ho politica nebe mak sira hanoin diak liu ho hare ko'or nebe mak sira gosta liu. Haktuir sira nia convicções políticas ou ideológicas.

 

Tamba ne ma'ak barak apoio Xanana no seluk defende politica sira nian.

 

Diferença iha ne... Funu-na'in ka guerrilheiro la hanesan ho politico ida, nebe opera iha ambito ho terreno la hanesan. Maibe barak la hatene ka simplesmente ignora.

 

Wainhira problema ida mosu, primeiro alvo mak Primeiro Ministro, no se mak Primeiro Ministro agora? Xanana mak Primeiro Ministro, nia mak Ukun-nain.

 

"Lia na'in sira" dehan katak defende Lia Los, no kontra Lia Bosok. "Lia na'in sira" mos dehan katak defende Justiça, no sei la defende ema nebe nauk.

 

Maibe, iha realidade, sira rasik mos la defende principio nebe sira comunga wainhira halo afirmasaun sem interpreta ka buka tuir issue ne'e los ka lae no muito menos la buka hatene lae Lia Los nebe mak dehan sira defende. Falta de objetividade halo ita ka "Lia na'in sira" fiar matak deit ba informasaun nebe mak Media sira  fo sai. Ho litik itoan karik ita mos sei questiona fundamento informasaun nebe media sira hato'o nebe iha tendencia provocativa no mos joga ho interesse economico-politico. Alias "fa'an informasaun". 

 

Ne la'os defende Lia Los, ne defende ego. Ego nebe mak a'as liu fali Lia Los, halo sira matan delek no laiha interesse ba causa/consequencia nebe los, motivo saida, ita la hatene... Ba balun, joga ona ho interesse,  karik?!?!!!!!

 

Ego la fanun justiça, ego baralha no manipula justiça. Lia Los no realidade mak fanun justiça.

 

Ukun-nain reconhece falha barak iha sistema judicial, Ukun-nain reconhece iha corrupção iha rai laran, Ukun-nain mesak la consegue controla ema sira nebe serviço ba iha governo no nem controla crime uluk iha Primeiro Governo.

 

Se Ukun-nain cria injustiça no se Ukun-nain comete crime, ita hein resultado ikus husi acontecimentos oinsa...   A justiça tem o seu tempo próprio e ha-de chegar um dia destes! Aguardo!

 

Justiça ohin loron funciona ona, bele la ho lais mas funciona. La'os hanesan fofoun iha Primeiro Governo justiça la la'o, Governo desorganizado. Resultado, Crise Politica, resultado Governo monu.

 

Iha Portugal deit ema foin mak kaer EX PRIMEIRO MINISTRO, Jose Socrates, tama ba cadeia, e Portugal país nebe mak avançado liu quanto mais Timor foin ukun a'an tinan 12.

 

Xanana, Xanana, Xanana,

Xanana la desiste, Se nia desiste nia mate kleur ona,

Xanana Luta ho matenek usa Frente Diplomatica, Clandestina e Armada, Xanana tuba rai metin, povu resiste, Timor manan,

Tamba ne mak ohin ita livre, tamba ne mak ohin ita kaer rasik kuda talin Ukun Rasik An! 

 

Hodi pronuncia ita nia liberdade no hakilar ba mundo "TIMOR MAK NE'E"!

 

Ema Ida dehan Mai hau: "DESISTIR É MORRER" maibe "ITA RESISTE NO ITA MANAN", "RESISTIR É VENCER"

 

 

 

Marí: Ita Labele Riku ho Osan Imprestadus

Publika iha Ekonomia

 

 

Dili, TEMPO SEMANÁL – Durante konferensia OJETIL iha CCD, eis Primeiru Ministru iha Primeiru Governu Konstitusional hato’o ninia preokupasaun kona ba osan fundus petolifeiru. Nia husu atu Timor-Oan labele sente katak nasaun ne’e riku ona ho osan 20 billoens husi fundus minarai no nia so’e piadas dehan Timor Oan mos labele sente riku tan ba ba deve osan husi ema seluk.

 

Tuir DR. Mari alkatiri hato’o mensajen ida ne’e ba konferensistas sira tan ba tuir ninia hanoin Ojetil nudar organizasaun ida ne’ebé moris hanesan organizasaun juventude para atu hatutan tan sakrefisiu joven sira hanesan Nicolão Lobato, Vicente Reis ho sira barbarak tan, ne’ebé fó an ba mate para ita atu hatutan sira-nia luta.

 

Ojetil moris hanesan organizasaun juventude ne’ebé agora halo ninia komfrensia ba daruak, para atu loke dalan ba joven foun hodi bele hatutan liutan luta Ojetil nian, luta Fretilin nian. la’ós halo komfrensia ba daruak para atu tuba rai metin i la fó dalan ba joven jerasaun foun sira. Ha’u dehan katak, loke dalan ba jerasaun foun, maibé kaer metin nafatin espíritu juventide Ojetil nian iha tempu luta armada. 

 

Espíritu jovens buat ida, foti an sei joven nafatin, ne’e buat seluk. Se ita foti an nafatin sente katak ita joven nafatin, ne’e ita taka dalan ba jerasaun foun purke sira mós iha direitu atu partisipa, sira mós iha direitu atu hatutan luta ne’e”, dehan Sekretariu Jerál partidu Fretilin, Dr. Marí Alkatiri iha ninia intervensaun, iha komferensia Ojetil ba daruak iha CCD Dili iha loron 11/11/2014. 

 

Liutan nia hatutan, tema ba komfrensia ida ne’e atu haburas fila fali patriotismu ho nasionalismu para atu hala’o dezemvolvimentu. Dala barak ita sira vetateranus ne’e koandu ita ko’alia konaba dezemvolvimentu ita ko’alia deit konaba ekonomia, ita ko’alia deit konaba osan. Dezemvolvimentu la’ós ida ne’e deit, tanba se ita hakarak koalia duni konaba dezemvolvimentu, primeiru ita koalia konaba ita-nia kapasidade atu transfere saida mak ita dehan nasionalismu no patriotismu ba jerasaun foun, hahú husi ita-nia uma laran kedas. 

 

Halo nusa mak espíritu ida ne’e, valores sira ne’e, prinsipius sira hanesan ne’e ita bele transfere ba ita-nia oan sira no ita-nia bei oan sira. Ne’e maka fundasaun ba dezemvolvimentu nasional, se laiha kapasidade atu halo buat ida ne’e, ita ko’alia ba dezemvolvimentu sustetanvelno se laiha kapasidade atu halo buat ida ne’e hodi transfere valores no prinsipius luta nian (laos funu) ba jerasaun foun, entaun osan bele barbarak, dezemvolvimentu sei la sustentavel.

 

Koandu ita dehan transfere, transfere no haburas. Haburas tan sistema edukasaun ida ke di’ak, sistema saúde ida ke di’ak para atu servi di’ak liu ita-nia oan sira no ita-nia bei oan sira, para sira bele matenek liu ita, sira bele halo servisu di’ak liu ita hotu, ne’e mak dezemvolvimentu.

 

Iha tinan sanulu resin rua nia laran, natureza impresta mai ita barak tebes, hodi loke dezafiu foun ba ita hotu atu halo jestaun ba abundansia ida ne’e. Normalmente koandu ita ko’alia konaba ekonomia la’os jestaun da abundansia mas jestaun dus rekursus no gastus. Tanba koandu rekursus la to’o entaun ita tau ita-nia ulun fatuk hodi hanoin para halo oinsa rekursu ida ke la to’o, ita bele halo jestaun ho vida nasional ida ke di’ak.

 

Dezafiu ida ke boot tebes ba ita tanba ita seidauk preparadu para halo jestaun da abundansia, entaun ita hotu hanoin katak ne’e ita riku ona. Ho osan imprestadu laiha ema ida sai riku, ho osan imprestadu labele iha ema ida sai riku. Tanba ne’e natureza mak impresta. Balu sein, bele dehan duni Maromak mak impresta osan ne’e mai ita. 

 

Koandu ita riku ona ita sala ona, tanba osan ne’e la sai husi ita-nia kosar wen, osan ne’e la sai husi ita-nia servisu rasik, ita la riku tanba la kleur tan osan bele 20 bilioens iha ita nia fundu petroliferu, maibé ita la riku. Tanba ho osan ida ne’e ita aban bainrua bele sai riku ou bele sai kiak liutan. Bainhira ita sai riku di’ak, maibé bainhira ita sai kiak liutan maka iha uma ida koandu paun laiha ita hotu fó sala ba malu mas laiha ema ida ke iha razaun. Agora paun laiha, aifarina mós ita la kuda, entaun at liutan. Tanba hein deit proyek...proyek para sateia Primeiru Ministru, para sateia ha’u tanba prezidente ZEESM, la hetan projetu ami nain rua mak sala.

 

Ami veteranus katuas liu maibé ha’u hakarak hateten fila fali, veteranus buat ida vetereanismu buat seluk ida. Koandu ita uza deit ita-nia estutu hanesan veteranus para atu reklama deit direitus, hanoin laiha obrigasoens, ne’e vetereanismu. 

 

Koandu ita veteranus duni ita hatene katak, ita halo duni ona, ita iha direitus mas direitus ne’e para fó kbiit mai ita atu kumpri ita-nia deveres, para atu kontinua prosesu ne’e ba livertasaun povu.  Povu la’ós ita veteranus deit, povu la’os veteranus nia oan ho bei oan deit, povu ne’e maka Timor oan tomak.

 

Tanba ne’e povu atu partisipa iha dezemvolvimentu, iha komfrensia ne’e tenke defini didi’ak saida mak tenki halo atu bele partisipa iha dezemvolvimentu. Maibé ha’u fiar katak organizasaun ida hanesan Ojetil, iha tempu atu fó an ba mate la tauk no tempu agora atu harii estadu ida ke bele dehan ho ekonomia forte mós sei hatene atu la’o halo nusa. 

 

Purtantu, espíritu joven ne’e nafatin, mas situasaun hanesan joven ne’e ita fó fatin. Uluk koandu ami hahú ami sei joven dunik, seidauk 20 ou 26 anus. Agora ami terseira idade ona mas seidauk simu terseira idade nian, maibé espíritu ne’e nafatin, prinsipius ho valores nafatin”, katak Marí.

 

Nia hatutan, iha prosesu harí estadu ho abundansia de rekeza, ita tenke iha atensaun boot para haree katak, labele fó dalan atu ema uza ita-nia hanoin ke la hanesan, labele fó dalan ema uza ita-nia diferensa atu fahe ita. Ita-nia hanoin la hanesan ita tur hamutuk ko’alia. Se ita haree katak ema komesa uza ita-nia diferensia para atu sama ita, hamutuk fila fali, para hatudu katak it-nia rain ne’e ema barak mak fó nia vida para ita liberta, tanba ne’e maka ita nia povu ne’e presiza ita atu hamutuk fila fali para tau interese nasaun nian, tau interese estadu nian iha leten, depois ita rezolve ita-nia diferensia.

 

Tanba ne’e ohin daudauk ha’u hakarak hateten fila fali katak ita liu husi situasaun ida ke ema balu hanoin katak bele fahe ita, mas ha’u bele garante ba delegadus sira hotu no povu tomak ke agora haree ita iha ne’e, ema sei la fahe ita, ne’e garantidu. Tanba ne’e ha’u husu ba Ojetil atu akompana prosesu ne’e tomak ho atensaun, atu nune’e ita hotu bele hatudu dala ida tan katak tanba interese nasional, interese estadu maka iha situasaun susar, ita hotu sei hamutuk fila fali atu defende”, tenik Marí. (ts)

Tempo Semanal - Primeiru Ministru kay Rala Xanana Gusmao hala’o ona konsulta no tratamentu ba ninia saude iha ospital Militar ida iha Jakarta no tuir autoridade Timor-Leste informa katak Primeiru Ministru hahu deskanca hodi halo rekoperasaun iha Otel ne’ebe PM hela ba iha jakarta no la baixa iha Ospital militar Indonezia ninian iha Jakarta.

 

“Neste momentu Primeiru Ministru deskanca Primeiru Ministru deskanca uitoan tan ba problema iha nia kidan ne’e, mas bu’at hotu la iha bu’at seriu ida”, hateten DR. Constancio Pinto ba Tempo Semanal (20/11).

 

Iha loron Tersa Feira (18/11), Primeiru Ministru akompania husi ninia seguransa pesoal ba iha Tribunal Distrital Dili (TDD) hodi entrega dokumentus futun bo’ot tolu (stop map jumbo 10) ba Juis Administrador Tribunal Distrital Dili, ne’e hatudu husi PM ninia la’o bele nota moras. 

 

Ho jestu diplomatika vice Ministru Pinto konfirma verosidade informasaun ne’ebe dehan katak Primeiru Ministru Kay Rala Xanana Gusmao, hala’o ona tratamentus iha ospital TNI Gatot Subroto, Jakarta.

 

“Sim, bu’at hotu-hotu la’o di’ak, Primeiru Ministru oras ne’e deskanca hela. Primeiru Ministru ninia moras ne’e hanesan nervus ne’e mak saida uitoan mas hodiseik (Kuarta, 19/11) mediku sira hare tiha I nia fila tiha on aba nia hotel”, hateten Vice Ministru Negosiu Estranjeiru no Cooperasaun, DR. Constancio Pinto iha intervista ho Tempo Semanal.

 

Iha loron Tersa (18/11) wainhira PM Xanana too iha TDD tuku 9:45 otl, no tun husi ninia kareta, halo ema lubun maka hein nia hakfodak iha TDD hakfodak hodi hare kondisaun PM Xanana ne’ebe la’o ho ain kudeik no ninia eskoltu sira kaer nia husi sorin-sorin no balun kaer husi kotuk. 

 

Nune’e mos hafoin hasoru malu ho Juis Administrador TDD, Duarte Tilman mais ou menus iha minute 25 nia laran, PM Xanana tu’un hikas fali husi andar leten edifisiu TDD mos PM Xanana la’o liman kaer ba seguransa nia kapas. 

 

Wainhira to’o fali iha Palasiu do Governu, liu tiha minutu balun PM Xanana sai fali hodi ba liu kedan aeroportu hodi sa’e aviaun Garuda ba kedan Indonesia no tuir observasaun PM ninia seguransa sira ba ikus ho aviaun sriwijaya.

 

Iha parte seluk wainhira Tempo Semanal dada lia ho Sekretariu Estadu Komunikasaun social, DR. Nelio Isac sarmento ko’alia lian hanesan mos ho Vice Ministru Negosiu estranjeiru ninian.

 

“la informasaun seriu no entantu nia halo tratamentu no kondisaun di’ak hela I agora uza loron rua para halo deskanca no sei fila iha sabadu agora, bainrua (22/11),", dehan Sekretariu Estadu Nelio ba Tempo Semanal iha loron Kinta (20/11).

 

Tuir informasaun ne’ebe Tempo Semanal simu husi Jakarta informa katak iha dadersan loron Kuarta (19/11) akompania husi Embaixador Timor-Leste ba Jakarta, pesoal balun iha embaixada, Diretor Servisu Nasional Intelijen (SNI) no membru familia Primeiru Ministru ninian ida hodi ba halo tratamentu iha Ospital central forsa TNI nian iha Jakarta, kapital Republika Indonesia.

 

“Dezde dadersan (19/11) Primeiru Ministru akompania husi Embaixador Timor-Leste ba Jakarta, Sr. serano, adidu Militar iha embaixada Timor-Leste, Tanente Koronel Alux, Pak Cirilio (Diretor SNI) ho PM ninia subrinu ho ema balun tan ba halo tratamentu iha ospital military ninian, iha Gatot Suproto Jakarta, no hela iha ospital hela”, dehan fontes TS iha Jakarta.

 

Maibe Vice Ministru DR. Constancio Pinto nega verisidade informasaun ne’e nune’e dehan Primeiru Ministru Kay Rala Xanana Gusmao baixa iha ospital military ida iha Jakarak.

 

“la’e, la’e, Primeiru Ministru ba konsulta de’it, kuandu baixa ne’e dehan hela iha ospital ne’e mak baixa”, Vice MNEC halolon.

 

Tuir Sekretariu Estadu Nelio reforsa katak Primeiru Ministru Xanana Gusmao sei hela iha hotel ida iha Jakarta hodi hein rezultadu husi konsulta ne’ebe halo ona no PM la baixa iha Ospital.

 

 

Tempo Semanal, Breaking News – Hafoin sai Bispo Diosese Dili, Dom Alberto ricardo da Costa muda husi Ospital Royal Darwin ba Adelaide atu kontinua halo tratamentu ba ninia saude, ohin Doutor sira sei halo operasaun ba eis Padre Parokia Igreija Motael iha era 1991 ne’e.

 

“Ha’u foin hetan informasaun husi Doutor kolega sira iha Ospital ne’e katak operasaun sei halo iha 12:00 meudia Oras Adelaide ninian”, dehan fontes Tempo Semanal via telefone husi sidade Adelaide, Australia.

 

Diferensa oras entre Adelaide ho oras Timor-Leste oras ida.

 

“Hahu semana kotuk muda mai iha ne’e Doutor sira iha ospital refere halo teste no halo analize ba saude Amo Ricardo ninian sira hola ona dezisaun atu halo opera ba Amo ninia ulun”, fontes ne’e esplika.

 

Amo Bispo Dom Alberto Ricardo dezde loron ikus fulan Oetobru husik hela Diosese Dili hodi ba konsulta ba ninia Saude maibe iha inisiu fulan ne’e Doutor sira iha Ospital Royal Darwin deteta Moras ne’ebe ema numeru dahuluk iha diocese Dili ne’e. 

 

“Tuir kolega sira ne’e dehan operasaun ba Amo Bispo ne’e sei lori tempu oras lima ka neen. Maske operasaun sei kleur mas Doutor sira konfiante hotu katak Amo Bispo sei di’ak”, informa husi Adelaide.

 

Hafoin Baixa iha Ospital Darwin hodi hein parte relevantes husi Dili to’o tuir ba iha semana kotuk Bispo diocese Dili mudah ba baixa iha ospital Frinders, iha Adelaide, Australia.

 

 

Page 1 of 4
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version