Tempo Timor Online

 

 

Dili, Tempo Semanal - Kustu kombustil tun maka’as maibe tarifa ba transporte publiku sa’e maka’as liu fali roket. Maske nune’e durante fulan ida ona la iha medidas ruma maka mosu hodi normaliza tarifa ba transporte publiku hanesan taxi no mikrolet.

 

Tuir observasaun tarifa taxi hasa’e no hatun konforme sofer sira ninia gostu hodi deside ho variabel. Taxi balun husi Terminal Bekora ba Hotel Timor halo pasajeiru mos dada iis la hetan. 

 

“Maun husi ne’e ba Hotel Timor hira”, Jornalista Tempo Semanal husu ba sofer taxi ida dahuluk.

 

“Lima Dollar maun”, hatan Taxista refere.

 

Tan ba karun demais entaun hein fali taxi seluk ida no la espera ninia tarifa a’as liu fali. Wainhira Segundu Taxi mai husu kona ba tarifa entre bekora ho Hotel Timor sofer taxi ho oin midar dehan, “husi ne’e ba Hotel Timor sinku Dollar Amerikanu”.

 

Nune’e duni hein fali taxi terseiru ne’ebe to’o mai para ho hamnasa Jornalista Tempo Semanal dehan ha’u atu ba Audian hira? Sofer ne’e hatan dehan Dollar rua. Depois kontinua husu se atu ba Kolmera? Dollar Hat,

 

Taxi husi Hotel Timor ba Ospital Nasional Guido Valadares ninia tarifa Dollar tolu Amerikanu.

 

Tuir Abel da Costa, Komunidade ida husi Bekora lamenta ho falta atuasaun husi parte Governu ninian hodi regula no kontrola tarifa transporte publiku sira ne’ebe halo susar ba komunidade sira.

 

“ha’u hare bu’at ne’e hanesan mafia ida iha parte Ministeiru Transporte no Telekomunikasaun ninian hodi lakohi regula no kontrolo presu tarifa transporte Publiku ba bis entre Distritu, angunan entre sub distritu ho Distritu nune’e mos mikrolet no taxi sira iha Dili laran,” dehan Abel da Costa.

 

Iha fatin seluk, Martinho de J. Soares, komunidade ida ne’ebe foin to’o husi Ermera iha Terminal Taxi Tolu ho triste dehan, “Governu la iha interese atu hamenus susar povu ninian no empata movimentu populasaun. Biar mina foin tun mas biaya transporte publiku la tun heto’ok sa’e tan. Ida ne’e at liu tebes tan ba Estadu la proteze komunidade husi esplorasaun”.

 

Hatan ba Kestaun ne’e vise Ministru Asuntus Transporte Komunikasaun iha VI Governu Konstitusional, Inasio Moreira rekuinese asuntus ne’e importante.

 

“Ne’e problema importante para hare hafoin hetan tiha tomada depose. Ida ne’e hanesan kazu ida importante para atu hola lalais desizaun. Tan ba los duni tarifa ba iha ita nia kareta publiku sira ne’e maka ha’u hare hanesan ida-idak kobra ne’e tuir fali sira nia gostu”, dehan Vise Ministru Inasio ba Tempo Semanal.

 

Nia rekuinese katak, “de faktu seida’uk tau tarifa ida lolo’os. Tuir ha’u nia kompriensaun, ha’u hatene katak normalizaun ba tarifa sira ne’e maka ha’u hanoin seida’uk halo. Ne’e maka ita tenke hare no ha’u hakarak loke fila fali  hafoin sete anus I meiu de governasaun husi AMP (Aliansa Maioria Parlamentar) mai to’o bloku. I agora ne’e ha’u hateten de’it katak ne’e hanesan faze ida importante ida kea mi tenke hare par abele tau fali iha nia fatin”.

 

Gazulina ho Gazoel ninia folin tun maka’as maibe tarifa ne’ebe kobra husi transporte publiku sei a’as nafatin nune’e tuir Vise Ministru Inasio promete katak Governu sei foti aksaun hodi halolon fali situasaun sira ne’e.

 

“Ne’e ita tenke regularize duni tan ba ne’e tama hotu ha’u nia ajenda ne’e oin sa maka atu hare asuntus sira hanesan presiza regularize hotu”, Inasio Moreira promete.

 

 

 

Martinho G. da Silva Gusmão

 

Titulo “Labirinto da Democracia” ne’e ha’u hetan wainhira le hela livro Dr. Paulo Pires nian “TIMOR: Labirinto da Descolonização” (Lisboa: 2013). Nia hakerek katak, Timor oan sira terus no tanis, fakar ran no mate tan “irrealismo e à ânsia pelo poder da FRETILIN e à imaturidade e ingenuidade políticas da UDT!” (pg. 79). 

 

Tuir hau nia opinião, fenomena “Maun Bo’ot” Kay Rala Xanana Gusmão (XG) fo kadeira ba “Maun Bo’ot” Dr. Rui Maria de Araujo (RMA) hatudu katak “Estado de direito democrático” hanesan la’o de’it iha labirinto ida nia laran. Liafuan “labirinto” (francês – “labyrinthe”; inglês – “labyrinth”) mai husi “laburinthos” (grego)/ “labyrinthos” (latim), katak, estrutura nebe complicado, arquitectura ba construção nebe lori confusão oin-oin; network nebe bobar ba bobar mai halo oin halai de’it. 

 

Saída mak Labirinto da Democracia?

 

Labirinto da democracia katak democracia la’o rungu ranga, la’o bobar dalan no kleuk tun sae! Ita hanesan tama iha palácio do governo ida, maibe tan palácio ne’e complexo (indonesia: rumit, ruwet), nune’e ita la hatene atu tama halo nusa no ikus mai atu sai fali ba nebe. 

 

Bele dehan Governo troka tun sae, Parlamento halo lei tuir nia hakarak, Oposição lakohi funciona tuir dalan, sira foti kadeira ida riba ba seluk, hiit bloku ida tibak ba grupo seluk, maibe povo moris hakmatek nafatin, hare la liga rai tiha. Graças a Deus, la terus no tanis, fakar no mate hanesan uluk! Tan sa? Resposta: “… o problema foi se deslocando do bom governo para a boa sociedade. A questão do bom governo talvez interesse menos não porque de repente a faculdade (i.e., da ciência e filosofia política) de desejar e de esperar tenha perdido vigor, por efeito do positivismo, do historicismo, do empirismo e de outros maléfeitos ‘ismos’, mas porque já não se acredita mais que, para mudar a sociedade, basta mudar o regime político, como era possível acreditar quando o Estado era tudo e a sociedade fora do Estado era nada. Seria um grave erro ... Mas trata-se, sem dúvida, da questão da boa sociedade e não, de modo limitado, do bom governo” (Norberto Bobbio, Teoria Geral da Política, 2000: 81).

 

Professor Bobbio hatudu buat nebe importante – mudança iha governo nia laran (transferência do poder) husi V ba VI Governo Constitucional la’os sasukat atu hadi’ak povo nia moris! Iha mudança ida ne’e bele mosu integração do sistema liu husi consenso no convergência entre CNRT, FRETILIN, PD no FM. Maibe dala barak liu la liga ho integração social. Los duni, povo hakmatek no la halo rungu ranga, hanesan uluk 2007 wainhira FRETILIN lakon no AMP kaer ukun. Estabilidade nacional nebe ita goza iha momento critico ida ne’e la’os tan “bom governo” nia mérito, maibe “boa sociedade” nia virtude.

 

Integração do sistema ne’e la’o relativamente estável, tan processo fo poder husi XG ba RMA hatur duni iha consenso no convergência. Maibe, mos husik hela perplexidade (keragu-raguan) ba ita hotu, liu-liu “derasan foun” (nova geração). Primeiro Ministro foun RMA nia liafuan sira iha Palácio Nobre, Lahane (hau rona liu husi rádio), seidauk hatudu lolos “derasaun foun” nia carimbo rasik, maibe sei moris iha “Maun Bo’ot” sira nia sombra. Diferencia iha linguagem política RMA no TMR nebe lotuk hanesan fuk lahan hametin ha’u nia intuição katak integração do sistema la la’o hamutuk ho integração social. Exemplo ki’ik ida, RMA dehan ZEESM Oe-Cusse ne’e buat furak no kmanek ida; TMR ho liafuan simples dehan “la precisa”! Nune’e mos, TMR dehan katak, maski ita iha ona Lei-Inan atu hatudu dalan, maibe ukun-na’in la’o tun sae la hatene mai husi nebe no sei too fali iha nebe. TMR nia liafuan, “ita iha tiha lei maibe halo fali buat seluk”, bele mos “halo lei la tuir povo nia contexto”. Ka iha filosofia estoicismo balun dehan, “quod principi placuit, legis habet vigorem” (= saída mak fo gosto [prazer] ba líder sira, ida ne’e mak vigora nu’udar lei). Ho liafuan badak, ita nia ukun na’in sira la iha tour d’horizon (tidak memiliki wawasan/ gagasan yang jelas) konaba saída mak principio geral no particular, ida nebe mak sai hanesan necessidade no ida nebe mak prioridade.

 

Ne’e duni, mudança ka transferência iha Governo nia laran ne’e desnecessário (tidak penting) ba povo nia moris. Kala XG hanoin katak fo poder ba RMA ne’e atu halo mudança radical ruma. Maibe, tata nanal, tan povo la iha entusiasmo. Buat nebe ema sente liu mak iha processo ida ne’e nia laran, ita nia democracia moras tan desintegração iha sistema ho social. Iha nível teoria/ filosofia política mos hamosu dificuldade. Maibe, ita bele halo deculpa barak hodi dehan, ita ne’e Nação fohin mak hari’i, ita nia Estado ne’e sei frágil hela. Ne’e, “Sakitnya tuch di sini ...”!

 

Estado ne’e hatudu ba Presidência da República, Parlamento Nacional, Governo no Tribunais. Sira mak frágil. Sakitnya tuch di sini ...! Ninia vírus mak ida nebe? Tuir ha’u nia hanoin, vírus no bactéria mak iha Partidos Políticos nebe la iha tour d’horizon bele sai hanesan causa ba fragile state. Matenek na’in balun hakerek nune’e, “Political parties, however, are widely held in disrepute in established and developing democracy alike. Citizens often view parties as ineffective, corrupt, and out of touch. Not infrequently, in struggling democracies, political parties are among the most undemocratic institutions. Often they become captive of strong, even autocratic personalities or function as tools of entrenched special interests. Only occasionally do parties represente the views of broad-based constituencies. Sometimes, in societies in transition, the same parties that help foster change themselves subsequently become obstacles to representative government and further reform. They can easily become part of the problema for democratic consolidation rather than part of the potential solution” (D.W. Brinkerhoff, Governance in Post-Conflict Societies: Rebuilding fragile sates, 2007: 66). Ne’e duni, partido sira mak halo Estado ne’e fraco, líder sira nebe ulun moruk no fuan to’os koko atu halo povo moris susar, maski povo ne’e fuan di’ak no laran maus nafatin.

 

“Derasan Foinsae”: mitos ka realidade?

 

Iha discussão lubuk ida ita hare katak husi XG ba RMA mosu confusão konaba “transformação” ka “transferência” ka “transição”. Liafuan transformação katak oinsa mak mosu mudança ida ho forma no potencia foun, hanesan metamorfose ida nebe sai husi célula simples ida hodi ba fali criatura ka figura foun ida; sei tutan ida uluk, maibe la hanesan ona. Ba fali liafuan transferência, katak fo sasan ruma ka muda buat ruma; hasai husi fatin ida ba tau fali fatin seluk; ka, atu hatur didiak iha posição ruma. Ikus liu, liafuan transição katak ita rai hela buat ruma ka sasan ruma iha fatin di’ak ida, hein wainhira hetan fatin di’ak liu fali mak ba tidin fali iha neba.

 

Ida nebe los mak mosu iha mudança husi XG ba RMA, husi V ba VI Governo Constitucional? Dala ida tan, tuir Professor Bobbio nia hanorin, atu sukat bom governo ida, ita sei hare husi sikun tolu (3) – sede do exercício, sede de apoio no sede efectiva.

 

Ida uluk (1) “Sede do exercício”, ninia fatin mak iha Conselho de Ministros. Iha ne’e ita bele hare ona buat oan ida: RMA tur nu’udar PM, XG kaer pasta nu’udar MPIE (Ministro do Planeamento e Investimento Estratégico). Pasta ida ne’e la iha diferencia ho saída mak XG halo hamutuk ho AMP uluk – PDN (Plano do Desenvolvimento Nacional) no PED (Plano Estratégico do Desenvolvimento). Tuir lógica, XG sei tur nu’udar Premier karik nia mak kaer “ultima palavra”, tan ninia posição nu’udar Chefe iha sede do exercício! Problema: nu’udar Premier ida, RMA assina de’it XG nia estratégia sira, ka, RM mak sei fo orientação ba XG atu halo plano no investimento nu’udar ninia estratégia rasik? Resposta: RMA rasik dehan ona, nia sei halo tuir de’it PDN/ PED husi Governo anterior. Bingo! Então,  ita seidauk to’o iha fase “transformação da geração”, maibe simplesmente iha “transição” (kedudukan sementara), ka, “minimal state” (Robert Nozick) – fo assinatura no tau carimbo de óleo de’it. Sa tan, VI Governo ne’e la’os RMA mak “remodela”, maibe XG mak halo “formato” no hatur Membro tuir “political imagination” (Martin Jay) Maun Bo’ot nian.

 

Tuir mai (2) “Sede de apoio”, katak, ema sira nebe fo tulun atu governo bele la’o di’ak. Hanesan departamentos no diretores ministeriais to’o funcionário publico sira. Confusão bele mosu iha ne’e. Basá, sira nia tulun bele lori ba dalan di’ak; maibe sira nia boicote bele mos lori ba falhanço barak. Iha tinan barak nia laran, MA no XG la biban atu hetan apoio husi linha ministeriais. Durante FRETILIN ukun, bele dehan ministro no diretores sira mai husi “partido”. La’os técnico profissional. Wainhira AMP no BGK ukun, “tradição” ida ne’e hatutan nafatin. Maibe mos la’os mistério lalehan nian atu ita hateten katak hahu 2007-2012, iha fatin nebe FRETILIN nakonu, sira lakohi halo tuir AMP nia programa ka BGK nia orientação! Hahu husi CCF no Oposição Maioria Parlamentar (OMP) FRETILIN, sira hotu haklalak ho liafuan ida “Governo de facto, inconstitucional”. Agora problema mosu: RMA lori husi partido nebe: FRETILIN, ka CNRT, ka PD ka FM? Hau nia intuição hateten nafatin katak, agora “salada unidade nacional” sei hamosu “boicote halus” – katak – iha fatin nebe XG monta ona Ministro husi FRETILIN, ema sira husi BGK (nebe sente lakon) sei halo “resistência” (hanesan uluk aprende halo resistência hasoru Indonesia). Nune’e, RMA hetan “transferência” vírus no bactéria dodok! Ita dok demais husi transformação da geração

 

Ikus liu (3), “Sede efectiva”, ne’e mak hatudu ba classe intelectual no média social. La’os segredo, katak, Ministro sira, Vice no Secretário do Estado sira halo recrutamento político ba ema sira atu sai “assessor” maibe ho kualidade nebe la suficiente; sira nia serviço mak loro-loron tulun sira nia boss atu ba halo fotocópia, hakerek notulen, nst. Tuir ha’u nia hanoin, “sede efectiva” ne’e mai husi camada intelectual, la’os de’it homo faber (assessor pesuruh) maibe liu-liu homo economicus no homo sapiens ka homo criticus. Sira nia knar mak atu halo sede do exercício no sede de apoio hatene nafatin “sense of crisis”. Atu dehan lolos de’it karik MPIE hela iha “sede efectiva” karik diak! Hanesan Indonesia nian karik BAPPENAS (Badan Perencanaan Pembangunan Nacional) nebe tun mai BAPPEDA (Badan Perencanaan Pembangunan Daerah). XG lalika ba iha “sede do exercício”. Iha BGK mosu Secretário do Estado ba Fortalecimento Institucional (SEFI). Maibe, ninia serviço la iha diferencia barak ho Comissão da Função Publica. Tuir hau nia hare, “sede efectiva” ne’e labele hanesan ho “sede de apoio”. XG no MA mak tur iha “sede efectiva” karik diak! Maibe, sira rua fahe malu ona “zona especiais”: XG hola Timor Leste tomak, no fo pedasuk ida iha Oe-Cusse ba MA. Na verdade, hanesan filosofo F. Nietzsche dehan, ita ema ne’e moris ho “sede do poder” (the will of power).

 

Ho itinerário 3 ne’e, ita bele hare oituan katak liafuan transformação ba derasan foun sei dok husi realidade. Transformação mosu wainhira ema hare ninia processo iha orientação normativa (Lei-Inan no Lei-oan), integração sistema no integração social (Estado ho povo; classe eleito ho eleitorado) to’o organização (funcionalismo iha aparatus Estado nian, husi leten to’o kraik).  Hau sei fila ba assunto ne’e iha ikus. 

 

Iha labirinto da confusão ne’e nia laran mak RMA sei kaer knar nu’udar Chefe do Governo. Ha’u la’os pessimista, maibe hanoin katak RMA no derasan foinsae sira hanesan moris tuir Na’i Jesus Cristo nia liafuan: «Envio-vos como ovelhas para o meio dos lobos; sede, pois, prudentes como as serpentes e simples como as pombas» (Mateus 10, 16). Husi ideia ida ne’e mak filosofo Thomas Hobbes dehan katak política na’in sira hanesan “homo homini lupus” – ema sai hanesan asu-fuik iha ema sira seluk nia let. Iha sira nia let mak ita halo política “samean” no hatudu moral “manu-falur”. Samean ne’e único animal ida nebe la’o ho ulun, dólar ho paciência. Manu falur ne’e animal ida nebe hatudu damen, kmanek no murak. Se Maun RMA hakarak hatudu carimbo derasan foun, ninia sasukat mak ne’e: halo política ho ulun no fuan; paixão e compaixão!

(sei continua ...)

 

*) Hakerek na’in docente filosofia (especial iha ética no política), iha Instituto Superior de Filosofia e de Teologia (ISFIT) Dom Jaime Garcia Goulart, Dili, hahu 2005. Mestrado (S2) iha teologia sistemática (especialidade: política) iha Sekolah Tinggi Filsafat dan Teologi (STFT) Widya Sasana, Malang (1997) no Mestrado iha filosofia pratica (especialidade: política), Pontifícia Universidade da Gregoriana (PUG), Roma, Italia (2004). Membro FORUM MAUBISSE; Eis Comissário iha Comissão Nacional de Eleições (2007-2013) 

 

 

 

Dili, Tempo Semanal – Ohin, Sesta-feira (27/2) dadersan tuku sia Oras Timor-Leste, Primeiru Ministro VI Governu Konstitusional, DR. Rui Maria de Araujo ne’ebe akompanha husi Ministro de Estado, koordenador dos Assuntos Administrativos e Ministro da Administração Interna, DR. Dionisio Babo Soares hala’o vizita ba edifisiu  Komissão Anti-Korrupção (KAK) iha Farol hodi hare’e ho matan kondisaun servisu Komisaun ne’ebe ninia kna’ar atu evita mal gastu ba Orsamentu Estadu ninian ne’e no hala’o kna’ar Korrupsaun ninian.

 

Komisariu Dr. Adérito Tilman akopanha husi Komisariu Adjuntu nain rua José “Sama larua” Neves, Manuel Bucar, Sekretariu Ezekutivu Alexandre Freitas no servisu nain Komisaun nian tomak simu Chefe governu ne’e ho laran haksolok iha sira nia kna’ar fatin.

 

Durante vizita iha oras rua nia laran PM Rui hala’o sorumutu konfidensial ho Senior Management Komisaun nian iha Salaun Enkountru KAK nian. 

 

“Hau nia prezensa loron ohin nian iha ne’e (Komisaun) atu intende diak liu tan servisu Komisaun nian, prosedimentu ne’ebé sira iha, dezafius no difikuldades ne’ebé sira infrenta. Mai mos atu manifesta governo ninia apresiasaun ho apoiu ba sira nia servisu,” dehan Primeiru Ministro Rui Araujo.

 

Hafoin sorumutu Primeiru Ministru, Ministru Dionisio Babo halo vizita ba salas servisu komisaun nian hotu hodi hare’e ho matan kondisaun real servisu Komisaun nian.

 

  “Prevene no kombate korrupsaun la’os kompetensia KAK nian de’it maibe governo mos iha komprimitidu ho papel ida ne’e”, haktuir Primeiru Ministru VI Governu Konstitusional ne’e.

 

Relasaun Komisaun Anti Korrupsaun ho IV Governu ne’e hahoris komisaun ne’e mos la amigavel nune’e sempre hetan atakes husi Primeiru Ministru V Governu Konstitusional tan ba kazus ne’ebe deskonfia involve membru exekutivu sira iha governasaun rua ba kotuk maibe iha VI Governu ne’e hahu mosu sinal relasaun ne’ebe konduxivu ho prezensa PM Rui Maria De Araujo iha seremonia aniversariu KAK ninian iha semana kotuk.

 

Iha parte seluk Komisariu Adjuntu José “Sama Larua” Neves lori Komisaun nia naran apresia no agradese inisiativa Chefe VI Governu Konstitusional nian mai vizita Komisaun nian hodi hare’e rasik ho matan no husu atu kontinua tau matan ba Komisaun nia difikuldades, obstakulu no dezafiu iha futuru.

 

“Inisiativa Senhor Primeiru Ministro mai vizita Komisaun bele artipula esforsu prevene no kombate korrupsaun ne’e iha Estado tomak tamba prevene no kombate korrupsaun laos . Agradese no apresia ba Nai Primeiru MInistru nia vizita no bele hare’e rasik ho matan sa difikuldades ho dezafius  mak Komisaun infrenta,” katak Komisariu Adjuntu Neves.

 

Ida ne’e vizita ba Dahuluk halo husi Chefe Lejislativu dr. Rui Maria Araujo mai edifisiu Komisaun nian iha Farol hafoin nia simu posse iha loron 16 Fulan Fevereiru liu ba iha Palacio Nobre Lahane Dili.

 

Ema sira ne’ebe hakna’ar a’an iha Komisaun Anti Korrupsaun, hamutuk ema nain 64; ho detallu hanesan, investigador ema nain 15, administrasaun ema nain 19, prevensaun ema nain 7, edukasaun no peskiza ema nain 8, motorista ema nain 7, Komisariu no Komisariu Adjuntu ema nain 3, Cleaner ema nain 4, Asesor nasional ema nain 1, asesor internasional ema nain 1 no aponta professional ema nain 1. (*)

 

Motor ho Kareta Rei Malu, Tribunal Tes

Publika iha Justisa

 

Dili, TEMPO SEMANÁL- Semana kotuk,motor ho kareta trek ida soke malu iha parte Hera besik baliza Metinaro. Iha asidente ne’e, motorista la konsege salva-nia vida. Tuir kronolozia akontesementu ne’ebé haktuir husi kondutor trek katak, iha momentu neba nia tulan naha  nakonu iha kareta laran atu halo viazen ba Manatutu.

Maibé bainhira nia to’o iha dalan entre Hera ho Metinaro nian, nia hasoru malu ho matebian Constancio ne’ebé hanesan motorista, mai husi parte Metinaro. Tuir kondutor trek hateten, motorista ne’e halai motor ho belosidade as, entaun nia mós komu husi dok haree ona, entaun nia halo lian klakson. Maske nune’e, nia sei haree motor halai ho belosidade as, tan ne’e para tiha kareta, maibé derepente motor soke ona kareta trek ne’ebé nia lori, husi parte odamtan kondutor tur nian.

“Motor halai ho lansadu, halai husi dok mai ha’u hare tiha ona, entaun hau apita kareta maibé nia la rona no halai mai deit to’o soke kona iha ha’u-nia kareta no kona kedas iha odamatan nebe mak hau tun fatin”. 

“Ha’u hare   nia halai maka’as, entaun ha’u traba tiha kareta maibé nia halai mai maka'as tan deit no soke kona duni  kareta, ha’u hateke ba nia katik ho motor mais ou menus  metru tolu hanesan nee, entaun ha’u tauk, ha’u la para kareta ida, ha’u halai ba buka kantor polisia”.

“Wainhira ha’u halai ba iha neba, komu ha’u tauk maka'as ona keta ema ne’e mate, hau nia fuan la hakmatek entaun ha’u la ba to’o  kantor polisia, maibé ha’u ba para deit iha forsa ida nia uma. Bainhira ha’u tun husi kareta  ha’u haree ran mak iha kareta.

Entaun iha forsa nia uma sira halai ba haree kareta mesak ran entaun sira haree polisia militar liu sira entrega ha’u ba iha polisia militar hodi lori ha’u ba iha kantor polisia.

Tuir sasin Filipi Ximenes Belo haktuir iha tribunal katak, iha momentu neba nia mós la hatene kona ba akontesementu ne’e, maibé iha tuku tolu loraik, derepenti kareta trek ida ba para fali iha nia uma kotuk. “ha’u hateke ba kareta mesak ran deit entaun ha’u husu ba kondutor depois kondutor dehan nia soke motor iha dalan. Entaun ha’u dehan ba kondutor atu ba para iha kantor polisia labele para fali iha ha’u-nia uma. 

Maibé depois sira haree kareta Polisia Militar liu husi nr'eba, entaun sira entrega kondutor ne’e ba Polisia Militar lori nia ba kantor polisia.

Tuir matebian nia maun konfesa  iha tribunal katak, sira hanesan familia no hanesan  maun rasik, durante ne’e matebian servisu hanesan membrus forsa defeza FDTL iha fen no oan ida. Maske  nia alin mate, maibé nia la husu buat ida, buat hotu ne’ebé akontese nia intrega hotu ba lei atu rezolve tuir lei.

Entertantu, Ministériu Publiku akuza arguidu (kondutor trek) ho artigu 140 konaba komete iha krime homesidu. Kazu ne’e sei adia fali ba 18/02/2015 ho numeru prosesu 145, ne’ebé prezide husi Juis Fransica Maria Cabral, MP Dr. Reinato defeza, Orlando. (aro)        

 

Roberto Soares, Husi Karitas ba Vise MNEK

Publika iha Nasional

 

“Ba ha’u, ida ne’e hanesan esperiénsia foun, he’in katak bazeia ba ha’u-nia esperiénsia ne’ebé mak mai housi kna’ar uluk ha’u hala’o tiha ona, sei bele reforsa liután iha kna’ar foun ne’ebé ke ha’u sei halo nu’udár  Vise-Ministru Negósiu Estranjeiru (MNEK) ba tempu oin mai. Buat ida ne’ebé mak ha’u hakarak atu hateten mak ne’e, atu halo sussesu iha ita-nia servisu ida ne’e, ita presiza iha espíritu traballu nu’udar ekipa, ita bainhira iha espíritu ida ne’e maka ita sei konsege alkansa objetivu sira hotu ne’ebé maka ita tau iha ita-nia planu estratéjiku ne’e. Tanba laiha ema ida atu bele servisu mesak, i laiha ema ida, nia atu halo buat hotu para bele sussesu ba nia-an rasik. Ita bele dehan katak ita kuandu atu hamri’ik metin, bainhira ita servisu hamutuk.” 

Roberto Sarmento de Oliveira Soares moris iha Quelicai, Distrito Baucau, Timor-Leste, iha loron 17 Setembru 1974. Oan hosi Aman Tadeu Soares (matebian) no Inan Maria Filomena de Jesus Cabral. Nudar figura jerasaun foun, ninia kareira politika no diplomatika kontinua sae tuir lalaok tempu ne’ebé iha. Kaben ba Cecilia da Costa Salsinha no Aman husi oan mane rua no oan feto rua ne’e(Roberto Junior, Thalia, Robinho no Elizabeth), kuñesidu hanesan ema ne’ebé sempre ativu no prontu wainhira nasaun bolu.

Iha tempu rezistensia, Roberto Soares, ne’ebé halao ninia eskola primaria to’o sekundaria iha Timor-Leste, hahu husi 1983 – 1994, ativu mos iha atividade klandestina no igreja nian. Nudar Sobrevivente husi Masakre Santa Cruz, 12 Novembru 1991, Roberto Soares la nonok, wainhira iha tempu difisil hakat a’an se’es husi Timor-Leste ba Filipina.

Iha Filipina, alem de hala’o ninia estudu nu-udár Seminarista iha eskola katolika, Kongregasaun Filhos Kanosiano, husi tinan 1994 – 1998, Roberto Soares mos assume funsaun nudar Reprezentante Rezistensia Klandestina iha ne’ebá. Iha tinan 1994 -1999, Roberto Soares partisipa mos iha programa estaziu ho IID (Initiatives for International Dialogue) no APCET (Asia-Pacific Coalition for East Timor). 

Iha tinan 1999, hamutuk ho maluk balun, Roberto Soares fó ninia testemuña nu-udár Sobrevivente Masakre Santa Cruz 1991, iha Komite Daha’at Dekolonizasaun Nasõens Unidas iha Nova Iorke, Komite Relasõens Internasionais Amerikanu ne’ebé tau matan konabá Timor-Leste no Komisaun Direitus Humanus iha Irlanda.

Roberto Soares akaba ninian kursu Maestradu iha area Administrasaun Bisnis husi Universidade Berkley, Delaware, Michigan, Estadus Unidus Amerika, iha tinan 2006. Halao mos kursu iha area Estudu Seguransa no hetan diploma husi Koleziu Sentru Azia Pasifiku ba Estudu Seguransa, iha Honolulu, Hawaii, EUA, iha tinan 2003.

Roberto Soares sai mos nudar ema primeiru husi grupo ne’ebé servisu iha Ministériu Negósiu Estranjeiru Timor-Leste wainhira hahu lao iha tinan 2000. Molok tama iha Ministériu Negósiu Estranjeiru, Roberto Soares servisu nu-udár Kordenador Nasional ba Programa Psiko-sosial iha Caritas Timor-Leste ho ninia fokus ba rezolusaun konflitu, mediasaun, tratamentu ba kondisaun trauma no assistensia humanitaria.

Nu’udar Diplomata kareira, Roberto Soares ninian jornada iha Ministériu Negósiu Estranjeiru lao diak tebes maske nakonu ho dezafius. Hahu ho kargu nu-udár Diretor Jeral ba Koperasaun no Integrasaun Rejional, Roberto Soares kontinua ba assume postu nudar Embaixador Extraordinariu no Plenipotensiariu Timor-Leste nian ba Singapura no Brunei Darrusalam hahu iha tinan 2009 – 2012. 

Iha sorin seluk, Roberto Soares mos assume pasta nu-udár Responsável ba Sub-Komite Tékniku ba Demarkasaun no Regulamentasaun Fronteira entre Timor-Leste no Indonesia hahu husi tinan 2008 – 2010, no sai mos nu-udár Porta vos ba Sosializasaun no Desiminasaun ba Relatoriu Rekomendasaun husi Komisaun Verdade no Amizade entre Timor-Leste ho Indonésia, iha tinan 2009.

Maibé, hanesan ema matenek dehan, ho dezafiu ne’ebé iha, mosu mós oportunidade. Iha V Governu Konstitusional, Roberto Soares hetan fiar nu-udár Sekretáriu Estadu ba Assuntu ASEAN hodi tau matan no assegura prosesu preparasaun adezaun Timor-Leste ba ASEAN. Ho dedikasaun, disiplina no neon badinas, liu husi lideransa Sekretáriu Estadu ida ne’e, konsege halao ona buat barak hodi haklean,hadiak no hametin ema barak nian kuñesimentu no konsiensia konabá prosesu adezaun Timor-Leste ba ASEAN. 

Ho tempu nian lalaok, konfiansa husi ulun bo’ot ba Roberto Soares kontinua aumenta. Tamba ne’e, iha lista VI Governu Konstitusional, Roberto Soares sei husik ninia pasta nu-udár Sekretáriu Estadu ba Assuntu ASEAN hodi ba assume hikas pasta foun nu-udár Vise-Ministru Negósiu Estranjeiru Timor-Leste, ne’ebé tuir planu sei hetan tomada de posse iha loron 16 Fevereiru 2015, tuku 15h00 OTL, iha Palasio Nobre, Lahane. 

Atu hatene diak liu tan konabá sentimentu wainhira hetan fiar atu assume pasta foun nu-udár Vise Ministru Negósiu Estranjeiru, programa saida mak sei halao, oinsa kontinuasaun prosesu preparasaun adezaun Timor-Leste ba ASEAN, mai ita akompaña hamutuk intervista exklusivu ho (Roberto Soares) ne’ebe hatan ba Perguntas (P) balun hanesan tuir.

 Oinsa sentimentu husi Sekretáriu Estadu hanesan membru governu ne’ebé sei assume hikas  kargu foun hanesan Vise-MNEK?

Pessoalmente ba ha’u, ida ne’e hanesan onra i priviléjiu boot ida nu-udár jerasaun foun ka otas foun iha prosesu ba kontrusaun no konsolidasaun ita-nia estadu ke simu konfiansa ida ne’e husi ita-nia lideransa nasionál sira.

Ha’u hanoin katak ida ne’e hanesan konfiansa ida ne’ebé ba ha’u estraordinária tebtebes atu bele kontribui no servi nafatin ba ita-nia rain lulik no povo doben ida ne’e, através de Ministériu Negósius Estranjeirus iha hodi assegura ita-nia interese nasionál i salvaguarda ita-nia independénsia, ita-nia soberania ne’ebé ita hot-hotu konxiente katak ita-nia rai lulik ida ne’e, ita hari’i ho ruin ho ran, i tanba ne’e duni maka bainhira ata-oan ha’u hetan konfiansa ida ne’e, ha’u sente katak ida ne’e konfiansa ida ne’ebé ke nakonu mós ho dezafius, nakonu mós ho oportunidades oinsa maka hanesan otas foun.

Jerasaun foun bele iha korajen, determinasaun i konviksaun para atu bele hatutan no atu bele hametin liután legacy, vizaun no polítika ne’ebé ita-nia fundador estadu sira husik hela ba ita, atu ita bele hatutan nafatin husi jerasaun ba jerasaun. I tanba ne’e maka ho liafuan badak ha’u bele dehan dala ida tan katak konfiansa ne’ebéke ha’u hetan ne’e hanesan onra i priviléjiu boot teb-tebes. 

Ha’u prontu kualker momentu atu kontribui tuir kapasidade ne’ebé ke ha’u iha, tuir matenek no esperiénsia modesta ne’ebé ke ha’u hetan durantetinan sanuku resin rua (doze anos) iha prosesu hari’i ita-nia Ministériu Negósius Estranjeirus ida ne’e no ba konstrusaun nasaun no estado rai lulik doben Timor Lorosae. 

Ba ha’u, laos senti orgullu ho konfiansa ne’ebé ke ha’u hetan, maibe ha’u senti katak nu-udár Timor-oan i mós hanesan diplomata ida ne’ebé sempre manifesta ninia prontidaun hodi kontribui ba prosesu de promosaun no protesaun ba ita-nia interese nasionál iha siklu foun, siklu de restaurasaun ba ita-nia independénsia ne’e, ha’u fiar katak konfiansa ne’ebé ke fó ona ba ha’u, ida ne’e hanesan onra i priviléjiu atu hametin, haburas no haklean liután iha ha’u  ia knar ba diplomasia liu-liu atu salvaguarda ita-nia soberania, ita-nia independénsia no ita-nia interese nasionál hanesan ohin ha’u temi tiha ona.

Hanesan otas foun ne’ebé ke hetan konfiansa husi jerasaun tuan, husi lider sira atu assume responsabilidade ida ke ba oin sei nakonu mós ho dezafiu. Iha ona hanoin, programa ka ajenda ruma durante assume mandatu ba tinan rua tuir mai?

Nu’udár diplomata ne’ebé ke akompaña teb-tebes prosesu dezenvolvimentu no evolusaun kona-ba dezenvolvimentu organizasaun no servisu lala’ok Ministériu Negósius Estranjeirus nian rasik, ha’u rasik hare’e no akompaña ba dezafius no oportunidades ne’ebé ke ita hetan durante deliberasaun ba ita-nia polítika esterna. 

Tanba ne’e maka ha’u sei revela ha’u nia an tomak, no tenta atu ajuda maximu ba Ministru Negósius Estranjeirus ne’ebé ke sei mai atu bele reforsa liután, fortifika liután, no melhora liután dezempeñu ka deliberasaun Ministériu Negósius Estranjeirus ne’ebé ke ita hotu hakarak atu halo ninia servisu ida ne’ebé mak sei sai efikasia i efisiénsia liután. 

Tanba ita hotu hatene katak ita-nia rai lulik ida ne’e, ita-nia nasaun doben ida ne’e hari’i iha era globalizasaun, iha era ne’ebé ke nakonu ho complexidade no informasaun tecnologia, nakonu ho sirkunstánsias oi-oin ne’ebé maka sofistikadu teb-tebes. 

I tanba ne’e duni maka ita ne’ebé maka iha kbi’it no iha konfiansa atu hala’o, proteje no promove ita-nia diplomasia ne’e, ita tenki barani no tenki prontu nafatin atu oinsa maka bele defende ita-nia interese nasionál ne’e ho kapasidade ne’ebé maka ita iha hodi lori Timor-Leste ninia naran sai morin liután iha mundu. 

Ne’ebé ha’u hanoin katak buat ne’ebé maka sei ajuda para atu bele melhora liután ita-nia dezempeñu, ita-nia servisu iha Ministériu Negósius Estranjeirus maka sei hare’e ba mekanismu importantes  ka sistemas importantes ne’ebé maka ministériu iha, ke presiza atu halo reforma. Ita sei konsentra ba iha ne’ebá atu nune’e bele ajuda liután ita-nia sistema sai efikasia no efisiénsia liután iha deliberasaunservisu ita-nian hodi defende ita-nia interese nasionál ne’e. 

Seluk, ita mós sei konsentra maka’as oinsa mak atu bele hasa’e liután kbi’it no kapasidade ita-nia funsionárius no diplomatas sira rasik. Pessoalmente, ha’u iha inklinasaun maka’as para atu aproveita com máximu, ho oportunidade ne’ebé ke iha, karik ita buka para atu koloka duni ita-nia diplomata sira ba hasai sira-nia matenek iha área espesialista sira, para depois sira mak sai hanesan peritus ka espesialistas iha ita-nia ministériu tuir área ida-idak, iha diplomacia política-seguransa, economia, social-cultura, iha informasaun teknolojia, iha jestaun ka iha administrasaun, ou iha área sel-seluk ne’ebé maka ita hotu hare’e katak pertinente i fundamentál atu salvaguarda ita-nia diplomasia. Portantu, melhoramentu ba sistema iha ita-nia Ministériu Negósius Estranjeirus fundamentál.

Hasa’e ka aumenta liután koñesimentu ka dezenvolvimentu rekursus umanus iha ita-nia ministériu fundamentál i konserteza sei buka para oinsa atu ajuda Ministru para durante oportunidade ne’ebé ke iha, koloka didi’ak duni ita-nia diplomata sira, ita-nia funsionárius Ministériu Negósius Estranjeirus ninia pensamentu, ninia matenek no ninia hahalok, oinsa maka bele tane a’as espíritu nasionalizmu, espíritu patriotizmu para ke iha sira-nia servisu lor-loron lalika he’in fó orientasaun maka halo, lalika he’in fó despaxu ruma maka halo servisu. 

Maibé, oinsa maka sira bele manifesta sira-nia prontidaun, manifesta sira-nia disponibilidade ho konviksaun no disciplina rigorosa hodi salvaguarda ita-nia diplomasia no interesse nasional. Tamba ne’e, ha’u hanoin áreas importante tolu ne’e maka ha’u sei koloka i sei diskute ho Ministru foun para atu oinsa bele melhora liután servisu ita-nian iha ita-nia ministériu.

Konserteza, labele haluha no nega katak fundamentál tebtebes mós ba ita atu hatutan programas no atividades ne’ebé maka ita trasa tiha ona durante períodu governasaun V Governu Konstitusionál nian, atu gosta ou la gosta, rekoñese ou la rekoñese, depende ema ida-idak nia perspetivas, maibé planu ne’ebé maka tau tiha ona iha oin para Sinku anus tuir mandatu V Governu Konstitusionál ninian, ha’u bele dehan katak planu ida ne’ebé ke di’ak teb-tebes i importante maka oinsa ita atu implementa programa ida ne’e para ke depois ita halo ho efisiénsia, ho efikásia. 

Ida ne’e maka ha’u sei hateten ba Señór Ministru foun para halo ita-nian servisu di’ak liu tán i konserteza iha mós programa sira sel-seluk ne’ebé ke ita hotu hatene hela, ita hotu akompaña hanesan Prezidénsia CPLP laiha dúvidas, ita sei iha tán tinan ida tomak nia-laran mai para atu asegura ita-nia prezidénsia ida ne’e oinsa maka ita bele halo susesu iha ita-nia Prezidénsia CPLP ne’e, para ke ita bele mós kontribui ba mudança CPLP ne’e rasik i liu-liu kontribuisaun ba iha rejiaun no ba mundu kona-ba importánsia CPLP i Timor-Leste nia kontribuisaun rasik. 

Iha programa espesífikas ne’ebé ke iha ona ho grupu tékniku sira ne’ebé maka prepara hela ida ne’e, i tanba ne’e ha’u fiar katak Señór Ministru ho ha’u, ami sei servisu hamutuk ho tékniku sira ne’e, para depois reforsa liután ita-nia preparasaun no ita-nia lideransa ne’ebé ke oras ne’e dadaun ita hala’o iha presidência CPLP ninian. 

Nu’udár Sekretáriu Estadu ba Assuntu ASEAN ne’ebé ke sei assume pasta foun hanesan Vise-MNEK, ita bo’ot nian haree konabá kontinuasaun prosesu adezaun ba ASEAN?

Relasiona ho ASEAN, nu-udár mós hanesan Sekretáriu Estadu Assuntu ASEAN ne’ebé ke iha oportunidade hodi hetan fali konfiansa ida ne’e, ha’u fiar metin katak ita-nia servisu ligasaun ba iha ita-nia mehi atu tama ba iha ASEAN sei kontinua nafatin. 

Tanba, ida ne’e mehi ida ne’ebé ke mehi koletivu, mehi konsensuál i ida ne’e sai tiha ona kauza nasionál ba ita-nia rain rasik. I tanba ne’e, ha’u fiar katak Ministru ho ha’u, ami sei koordena di’ak liután oinsa maka bele artikula klean liután iha ligasaun ba ita-nia preparasaun atu tama ba ASEAN ne’e. 

Ne’ebé, pasu ida ne’ebé maka ita atu halo tuir mai ne’e, ita sei tenta organiza ita-nia preparasaun ida ne’ebé maka sei haklean liután koñesimentus kada liña ministériu i liuliu oinsa maka atu bele prepara rekursus hot-hotu, tantu ligasaun ba rekursus umanus no instituisoens i mós ligasaun ba ita-nia rekursus naturais rasik ne’ebé ke ita bele esplora no dezenvolve para bele kontribui di’ak liu tán ba ASEAN bainhira ita sai membru ba ASEAN. 

I buat ida ne’ebé maka hanesan interesante teb-tebes ba ha’u rasik, se ha’u liga ita-nia estrutura VI Governu Konstitusionál ho ita-nia preparasaun ba ASEAN nian, ha’u kontente teb-tebes tanba estrutura ida ne’e kuaze atu refleta mós preparasaun ne’ebé maka durante ne’e ita halo. Tanba sa? Tanba iha ASEAN, ita bele dehan katak ASEAN ne’e oras ne’e dadaun prepara ona atu transforma an atu sai komunidade ida de’it. Maibé, atu sai komunidade ida ne’e, iha pilares importante tolu mak sai hanesan sasukat para atu bele atinji komunidade ida iha 2015 ne’e. Sasukat tolu ne’e maka: Husi pilár polítika no seguransa,  Ekonomia,  Sosiál i kultura.

I defaktu, iha ita-nia governo nia estrutura ne’ebé ke agora mai, existe Ministrus Koordenadores na’in tolu ne’ebé maka koordena áreas ne’ebé maka iha ligasaun diretamente ba pilares importante tolu ne’e. Ida ne’e hatudu ba ha’u katak ita-nia estrutura ne’e rasik prepara ita atu reforsa ita-nia mehi ba ASEAN. Ne’ebé, ha’u hanesan senti orgulho e kontente mós ho estrutura ida ne’ebe iha ligasaun ba ita-nia adezaun ba ASEAN. 

Ha’u fiar metin katak ho estrutura ne’e rasik i ho mós ita, Ministériu Negósius Estranjeirus ninia determinasaun rasik, nasaun ASEAN sira nebe akompaña hela ita-nia prosesu konsolidasaun ba ita-nia estadu ida ne’e, ha’u fiar ,etin katak iha tempu badak oin mai sira sei deside no determina oinsa ita-nia partisipasaun iha organizasaun ASEAN ne’e rasik.                                          

Mudansa polítika ne’ebé mosu,  ne’ebé ita atravesa provoka reasoens oi-oin. Balun mai husi akadémiku, balu mai husi sosiedade sivil, mai rasik mós husi instituisaun governu sira i mosu mos reasaun husi líder kaliber balun, pur izempu hanesan Dr. Horta ne’ebé ke koñese di’ak teb-tebes relasoens internasionais ho funsionamentu diplomasia Timor-Leste nian. Foin lalais, Dr. Horta hasai hanoin ruma, iha ne’ebá koloka kestaun rua ke karik lida mós mai servisu Ministériu dos Negósius Estranjeirus i Kooperasaun. Entaun, iha ne’ebá Dr. Horta propoin mos pontu rua: ida, para atu reduz orsamentu viajen estranjeiru, ida fali mak atu hare’e oinsa atu reduz mós númeru embaixada ke iha implikasaun mos ba gastus. Hanesan Vise-Ministru foun ne’ebé sei toma posse iha semana oin mai, hare’e ba hanoin ida ne’e, oinsa ita nian hanoin?

Primeiru, ha’u bele dehan apresiasaun ida ke boot teb-tebes ba ita-nia maun boot Dr. José Ramos Horta ne’ebé ke mós hanesan fundadór ba ita-nia estadu ida ne’e i nia maka mós hanesan The Leading Legacy ba ita-nia diplomasia i defaktu nia rasik mós mak ema primeiru ne’ebé ke lidera instituisaun ida ne’e i ohin loron hanesan ata-oan ha’u hetan priviléjiu ida ne’e mós, tanba liu husi ninia lideransa rasik. Ha’u ho hanoin modesta atu dehan hanesan ne’e;

Primeiru, liga ba viajen estranjeirus ninian, ha’u fiar metin katak viajens entranjeirus ida ne’e espesifikamente laos liga ba servisus Negósius Estranjeirus ninian. Tanba Negósius Estranjeirus ninia servisu maka atu oinsa assegura apoiu i konfiansa komunidade internasionál ba iha ita-nia ezisténsia nu-udár nasaun foun, nu-udár hanesan nasaun ne’ebé maka fó importánsia teb-tebes ba promosaun valores demokrasia, direitus umanus i valores ne’ebé maka sai tiha ona hanesan ita-nia kbi’it ida ke ita kontribui ho nasaun sira tomak iha mundu liu-liu kbi’it ne’ebé ke halo ita tur On Equal Footingho nasaun sira seluk iha mundu

Nemak ita-nia determinasaun, ita-nia komitmentu ba promosaun valores rekonsiliasaun, demokrasia no direitus umanus. Tanba ne’e, viajen estranjeirus ne’ebé ke Negósius Estranjeirus karik hala’o ha’u fiar metin katak viajen sira ne’ebé ke ita halo konserteza ho ninia objetivu fundamentál maka atu assegura valores sira ne’e. I tanba ne’e, viajen estranjeirus sira ne’ebé ita halo, ita sei halo ho kuidadu i ita sei halo ho kualidade. 

Ita la’os halo viajen ne’ebé para atu ba pasear, atu ba goza hare’e ema nia rain, ha’u hanoin sei la hanesan ne’e. Nu-udár hanesan Vise, ha’u sei tur hamutuk ho Ministru hodi halo ami-nia planu asaun ida ne’ebé ke ami sei koordena, komunika ba malu para depois hare’e oinsa viajen sira ne’ebé ita halo, viajen sira ne’e sei fó duni benefísiu ba ita-nia nasaun. 

Ha’u hanoin laiha ema ida ne’ebé ke hakarak halo viajen ba iha liúr só para atu destroi fila fali imajen no esforsu tomak ne’ebé ke ita-nia lideransa nasionál sira, liu-liu hanesan ita-nia eis-Prezidente Repúblika nomós eis-Ministru, Dr. José Ramos Horta ke durante ne’e nia hala’o iha ligasaun ba ita-nia diplomasia ne’e. Ha’u hanoin ita laos atu estraga fali ida ne’e. Konserteza, ami sei tenta ho ami-nia esperiénsia, ami-nia kapasidade no tuir matenek modesta ne’ebé ke ami iha,i sei tenta nafatin kontribui hodi alvaguarda liután ita-nia diplomasia ne’ebé ke durante ne’e ita hala’o. 

Segundu, ligasaun ba redusaun ba ita-nia embaixadas, ha’u hanoin ligasaun ba kestaun ida ne’e laos ha’u foin mak rona. Buat ida ne’e mós uluk kedas kuandu Dr. José Ramos Horta sei Ministru, nia rasik mós koalia beibeik konabá kestaun ida ne’e. Ita loke ita-nia embaixadas iha área sira ne’ebé ke ita hare’e katak estratejiku, pertenente teb-tebes, fundamentál teb-tebes ba iha relasaun ita-nian ho nasaun ne’e. 

Oinsa mak atu aprofunda ita-nia intereses entre nasaun rua ne’e. Ne’ebé se karik to’o agora ita hare’e katak iha ita-nia embaixada balun ne’ebé mak ladun koresponde ba ita-nia interese, ha’u lakohi halo uluk konkluzaun katak atu taka. Maibé, konserteza sei koalia ho Señór Ministru, ami sei tu’ur hare’e no halo evalusaun ba ninia konsekuénsias, hare’e ninia implikasoens, haree ninia vantajen no dezvantajen para ke oinsa bainhira taka karik ita taka ho dignidade, ita taka ho kualidade. 

Ha’u hanoin Dr. José Ramos-Horta, ema ida ke hatene liu, koñese liu kona-ba diplomasia ida ne’e, ha’u fiar metin katak nia rasik mós hatene bainhira ita taka embaixada ida sei iha nia konsekuénsias i sei iha nia impaktus ba nasaun ne’ebé maka taka nia embaixadas ne’e. Ita hotu konxiente, ita hotu rekoñese katak iha era globalizasaun ida ne’e kuaze nasaun tomak iha mundu hot-hotu konfronta kona-ba difikuldades ka dezafius iha globalizasaun ekonomik no finanseirus ninian ne’e. 

Ne’ebé, ida ne’e sai ona kestaun ida ke ha’u hanoin sempre fó atensaun ba ita atu hare’e oinsa mak ita mós buka dalan i buka meius hot-hotu para ke kuandu ita loke ita-nia embaixada karik, ita-nia embaixada ne’e ita loke ho di’ak, ita asegura ho di’ak i sira halo servisu mós ho di’ak i iha ninia retornu ne’ebé ke bele mós fó benefísiu ba ita-nia nasaun rasik. 

Ne’ebé, ha’u hanoin ha’u sei toma nota ida ne’e ho kuidadu i sei koalia ho Señór Ministru i konserteza kuandu koalia ami sei aprezenta mós iha Konsellu Ministrus, konsulta ho Primeiru-Ministru, konsulta ho Prezidente Repúblika i mós konsulta ho ita-nia individus ka ita-nia komponentes estadu ne’ebé ke iha ninia interese ligasaun ba iha ita-nia diplomasia ne’e molok ita halo asaun finál ida. Ne’ebé, ha’u hanion, ha’u apresia teb-tebes, agradese teb-tebes ba ita-nia maun boot, Dr. José Ramos Horta ne’ebé ke kontinua nafatin fó hanoin ba ita, tau matan ba ita para ita hala’o ita-nia diplomasia ne’e ho kuidadu i ho kualidade. 

Ida ne mak ha’u bele hateten i konserteza ha’u hanoin Señór Ministru ne’ebé ke atu mai i ha’u rasik mai husi instituisaun ida ne’ebé ke uluk Dr. José Ramos Horta rasik maka lidera iha prosesu dezenvolvimentu ba ita-nia diplomasia ne’e. I ha’u fiar katak nia mós sei rekoñese i sei koñese nafatin atan oan ha’u, i fiar metin katak nia rasik mos sei tulun oinsa maka ami bele halo ami-nia knaar di’ak liu tán para atu bele salvaguarda ita-nia interese nasionál.  

Iha mensajen ruma nu’udar Sekretáriu Estadu ba Assuntu ASEAN, ba funsionáriu MNEK? 

Hanesan Sekretáriu Estadu ba Assuntu ASEAN, ha’u hakarak aproveita oportunidade ida ne’e reitera ha’u-nia agradesimentu profundu teb-tebes ba Sua Excelencia Presidenti Repuklika Sr Taur Matan Ruak, ba Sua Excelencia Maun Bo’ot primeiro Ministro Kay Rala Xanana Gusmao, ba Ministru no Vise Ministru Negósiu Estranjeiru e Kooperasaun, ba funsionárius Ministériu Negósiu Estranjeiru nian tomak, ba ita-nia embaixada sira, ba ita-nia embaixadores, diplomata sira, ba ita-nia assesores internasionáis, assesores nasionais i mós ba ha’u-nia staff sira ne’ebé ke fó apoiu ba ha’u iha ha’u-nia gabinete rasik i konserteza ba mós componenetes no instituisoens tomak, sociedade civil, igreja, NGOs, civitas académico, públiku em jerál, prinsipalmente ba ita-nia relasoens públikas, empresas, mídias sira ne’ebé maka durante ne’e fó apoiu bo’ot tebes iha ha’u-nia servisu ligasaun ba prosesu adezaun Timor-Leste ba ASEAN ne’e. 

Apoiu ne’ebé maka durante ne’e ha’u hetan husi ita boot sira hotu ha’u sei kontinua nafatin tau iha ha’u-nia diária pessoál, kontribuisaun ema ida-idak ne’ebé ke fó, tantu direta no indiretamente ne’ebé ke ha’u simu ne’e sai hanesan rekordasaun ida ne’ebé ke esepsionál teb-tebes iha ha’u-nia vida profisionál i mós vida hanesan kareira diplomata i mós hanesan iha vida polítika ne’ebé ke durante ne’e ha’u hetan. 

I espera katak buat ne’ebé ha’u hala’o, knaar nu-udár Sekretáriu Estadu ba Assuntu ASEAN, bele mós sai hanesan esperiénsia di’ak ida ba belun sira tomak i mós bele sai hanesan oportunidade ida ke halo ita hasouru malu, iha servisu ida ne’ebé ke iha ligasaun ba ASEAN. Ita hotu tenke nota no tau iha ita-nia record katak iha V Governu Konstitusionál de’it maka hamosu Sekretáriu Estadu ida ne’ebé ke pela primeira vez ho ninia konsertasaun hare’e ba Timor-Leste nia adezaun ba ASEAN. 

Ha’u hanoin iha tinan rua ho balu nia-laran, ita konsege manifesta ita-nia determinasaun atu sai membru ba ASEAN liu-hosi atividade lobuk ida, ita hot-hotu halo hamutuk ne’ebé ke ita konsege hatudu ba nasaun sira iha ASEAN katak buat ne’ebé ita halo ne’e únika teb-tebes i esepsionál teb-tebes ligasaun ba oinsa maka lori ita-nia maluk sira tomak husi komponente hot-hotu akompaña prosesu ne’e rasik. Ne’ebé, ha’u sente orgullu teb-tebes ba apoiu tomak ne’ebé ke ha’u hetan durante ha’u hala’o ha’u-nia knaar nu-udár Sekretáriu Estadu ba Assuntu ASEAN.

Hanesan baibain ema kriatura, ita sempre dehan katak karik durante iha deliberasaun ha’u-nia servisu ne’e la konsege mós koresponde ba maluk sira balu ninia laran karik, ema kriatura nia la se’es husi sala. Através de mensajen ida ne’e, ha’u mós hato’o deskulpa ba maluk sira hotu, karik ha’u la konsege hateten ba imi diretamente mas através de meius ida ne’e espera katak imi bele simu, imi bele aseita i oinsa mak imi mós bele fó fali imi-nia konfiansa, fó apoiu para ke ha’u bele kontinua nafatin hala’o ha’u-nia knaar iha ha’u-nia misaun ne’ebé mak sei tuir mai.  Obrigadu wa’in tebes ba ita boot sira-nia apoiu tomak, kolaborasaun i he’in katak ita bele servisu hamutuk di’ak liu tán iha ita-nia servisu loron hirak tuir mai. 

Ikus liu, Mensajem ruma ba funsionariu tomak MNEK nian, hanesan Vise Ministru Negósiu Estranjeiru foun ne’ebé sei toma posse iha semana oin mai?

Hanesan Vise-Ministru Negósiu Estranjeiru iha tempu oin mai, ha’u hanoin kna’ar ida ne’e, kna’ar ida ne’ebé ke foun, kna’ar ida ne’ebé ke foin atu hahú, oinsa maka tau ha’u-nia-an iha kna’ar ida ne’e hodi hala’o ha’u-nia misaun nu-udár Vise-Ministru Negósiu Estranjeiru ninian. Ita boot sira hotu akompaña no hatene katak ita-nia Ministériu Negósiu Estranjeiru ida ne’e eziste ona Vise-Ministrus ne’ebé mak halao ona sira nia knar-uluk ona ba ha’u, sira ida-idak iha sira-nia esperiénsia, sira ida-idak iha sira-nia matenek no iha sira-nia kapasidade oinsa maka sira hala’o sira-nia kna’ar hodi salvaguarda ita hot-hotu ninia interesse, liu-liu ligasaun ba ita-nia servisu iha Negósiu Estranjeiru ida ne’e. 

Ba ha’u, ida ne’e hanesan esperiénsia foun, he’in katak bazeia ba ha’u-nia esperiénsia ne’ebé mak mai housi kna’ar uluk ha’u hala’o tiha ona, sei bele reforsa liután iha kna’ar foun ne’ebé ke ha’u halo nu-udár hanesan Vise-Ministru Negósiu Estranjeiru ba tempu oin mai.

 Buat ida ne’ebé mak ha’u hakarak atu hateten mak ne’e, atu halo sussesu iha ita-nia servisu ida ne’e, ita presiza iha espíritu traballu nu’udar ekipa, ita bainhira iha espíritu ida ne’e maka ita sei konsege alkansa objetivu sira hotu ne’ebé maka ita tau iha ita-nia planu estratéjiku ne’e. 

Tanba laiha ema ida atu bele servisu mesak, i laiha ema ida, nia atu halo buat hotu para bele sussesu ba nia-an rasik. Ita bele dehan katak ita kuandu atu hamri’ik metin, bainhira ita servisu hamutuk. Istória iha ita-nia rezisténsia funu nian prova ba ita-nia espiritu servisu ekipa ida ne’e. 

Ita-nia servisu ekipa iha ita-nia istória hatudu ba ita katak ita manifesta kontribuisaun ita-nian liu-housi dalan bar-barak maibé ho nia objetivu ida de’it. Objetivu ne’e mak atinji ita-nia independénsia i tanba ne’e ha’u konvida maluk sira tomak liu-liu ba belun funsionárius, diplomatas, sira ne’ebé maka iha Negósiu Estranjeiru atu hade’er i hamri’ik firme iha ita boot sira-nia kna’ar lor-loron nian, hametin liután imi-nia koñesimentu, haklean liután imi-nia kapasidade para ita bele tau hamutuk ita-nia matenek no talentus, atu nune’e, ita bele alkansa no avansa ita-nia polítika diplomacia ne’ebé ke ita-nia nai-ulun sira husik hela ba ita i tau ona ba iha ita-nia oin. 

Buat ida ne’ebé mak ha’u hakarak sempre fó hatene i hakarak dala-ida tán reitera ba ita hot-hotu mak ne’e: “atu Vise-Ministru fali ka atu Ministru fali, atu Sekretáriu Jerál, atu Diretóres Jerais ou Diretóres Nasionais ou staff bai-bain to’o cleaner, ita hot-hotu iha ida-idak ninia misaun. Ita halo komparasaun karik hanesan viola ida bainhia viola ne’e ninia lian ne’e atu sai-di’ak,instrumentu sira iha viola ne’e ida-idak iha ninia papél, ita ida-idak ne’e balun hanesan viola nia talin, ita ida-idak ne’e balun hanesan viola nia-isin lolon tomak, ita balun hanesan viola ninia parafuzu, ida-idak iha ninia papél bainhira ita tau hamutuk instrumento sira ne’e hotu, mak ita hasai lian ou harmonia ida ne’ebé ke furak no extraordinário teb-tebes. 

I tanba ne’e, mak ha’u reitera dala ida tan katak bainhira ita iha espíritu traballu de ekipa hanesan ne’e, ha’u fiar metin katak ita se konsege sussesu i ita sei konsege avansa ba oin tuir mehi ne’ebé maka ita hakarak ba ita-nia ministériu no ba ita-nia rai-lulik doben ida ne’e. 

Ha’u-nia mensajen maka ida ne’e no husu tulun ita boot sira-nia apoiu tomak i ha’u laos atu aproveita oportunidade ida ne’e para atu hanesan dezafia maibé atu fó korajen, atu fó motivasaun ba ita hotu para ke ida ne’e momentu ida “ a real test case” ba ita nuudár jerasaun foun, otas foun ne’ebé ke hahú dadaun ona hetan konfiansa husi ita-nia lideransa nasionál sira.

Mai ita prova, hatudu ba ita-nia lideransa nasionál sira katak otas foun, jerasaun foun iha duni ninia konviksaun, iha duni ninia determinasaun no iha duni ninia komitmentu atu salvaguarda ita-nia lideransa nasionál sira-nia polítika, ita-nia lideransa sira-nia mehi ba ita-nia rai-lulik doben ida ne’e. 

Bainhira ita halo ida ne’e iha ita nia vida professional, maka ha’u fiar metin katak ita hot-hotu sei susesu, ita hot-hotu sei kontente ba ita ida-idak ninia kontribuisaun. Hakoak boot ba ita-boot sira hotu, mai ita tau hamutuk ita nia matenek, espereriensia no talentus hodi fortifica sprito equipa de trabalho ba melhoramento, desempenho no deleiebarcao serviço ho efisiencia no efikasia ba diplomasia Timor-Leste ninian. (ts)

 

 

Dili, tempo Semanal - Iha mais ou menus meudia Oras Timor-Leste, loron Sabadu (21/02), Polisia Nasional Timor-Leste (PNTL) ne’ebe lidera husi komandante PNTL Distritu Dili, halo hakfodak ba iha Timor Plaza tan ba autoridade seguransa ne'ebe tama iha fatin refere kompletu ho ekipamentus inklui kilat halo atuasaun ba fatin elektronik game ne’ebe lokaliza iha publiku ne'e bazea ba mandadu detensaun no buska husi Tribunal.

 

Iha loron ne’e mos PNTL konsege detein kdesa Diretor ba elektronik game, Sr. Lorenco Oliviera no hatama iha sela PNTL distritu Dili ninian to’o oras hitu nolu resin rua no iha loron Tersa Feira (24/02) aprezenta ba Tribunal Distrital Dili (TDD) hodi halo primeira interogatoriu maibe diretor ne’e prova ba Tribunal katak akuzasaun husi parte justisa ninian ba nia ne’e injustu.

 

“Ha’u agora han lai sasoro tan ba loron tolu ona toba iha sela polisia ninian”, dehan Lorenco Oliviera wainhira dada lia ho Tempo Semanal.

 

Tuir Fali Lorenco dehan ninia parte lori dokumentus kompletu ba Tribunal hodi justifika katak jogu elektronik ne’ebe hetan asaltu husi autoridade lei ho Ordem ninian iha loron Sabadu ne’e legal tan ba hetan licenca husi parte inpeksaun jeral do jogu Ministeiru Turizmu Timor-Leste no fulan-fulan selu taxa ba Governu.

 

“La iha bu’at ida se hakarak taka sa taka ba yang jelas ha’u ha’u bu’at ida ne’ebe legal, pasta la iha bu’at ke ha’u bosok. Ha’u ohin prova ba iha tribunal, hatudu dokumentus komprovativu no bu’at hotu-hotu ne’ebe ha’u halo iha fatin ne’eba”, relata Lorenco.

 

Maske sente los hela maibe diretor ba elektronik game ne’e la empata no kontra maibe kolabora ho justisa depois to’o iha Tribunal maka prova kontra mandadu husi Tribunal ninian ne’ebe ezekuta ho tipu ezajeradu husi PNTL.

 

“Iha mandadu husi Tribunal para Polisia mai kaptura ha’u, polisia mai tahan ha’u nia sasan sira ne’e hotu entaun ha’u tenke halo tuir de’I i ha’u la berdaya tan ba ne’e lei ho ordem. Ha’u tenke tuir i depois to’o ba iha Tribunal maka terbukti ha’u tidak bersalah maka pronto ha’u bebas fali no ha’u bele kontinua ha’u nia atividades hanesan bainbain”, dehan Lorenco oliviera.

 

Nia esplika, “Ba ha’u primeiru liu bu’at ne’e legal nune’e ho atuasaun polisia nian iha Timor Plaza ne’e halo tauk ba investidor sira. Ha’u sa la tauk taka sa taka de’it ba mas familias husi ema 32 ne’ebe durante ne’e serbisu iha fatin ne’e sa la iha ona”.

 

“Segundu Taxa ne’e kan selu hela ba Governu. Iha fulan primeiru selu por volta de 17,000,- segundu mes, selu US$33,000,- tuir fali mai iha terseiru mes selu US$85,000 I iha posibilidade ninia taxa ne’e sa’e ba beibeik depende ba rendimentu ne’ebe aumenta”.

 

Hafoin de julgamentu Lorenco hateten katak, “desizaun Tribunal ohin sai dehan ha’u legal ne’ebe ha’u sei kontinua nafatin. Ha’u sebele aban (25/02) loke fali ona’.

 

Iha parte seluk, Miguel Lobato, ulun bo’ot husi Inspeksaun Jeral dos jogus iha Ministeiru Turizmu (MT) konfirma katak jogu elektonika ne’ebe PNTL sira halo asaltu iha loron Sabadu (21/02) ne’e legal no hatama ona rendimentu taxa ba kofre estadu iha dezde loke iha loron 18/11/2014.

 

“Ami mos hakfodak tan polisia nein halo koordenasaun ho ami ba husu mandate husi Ministeiru publiku”, dehan Miguel Lobato husi Inpeksaun Jeral dos Jogus iha Ministeiru Turizmu.

 

Nia esplika, “Fatin ne’e, sira selu kompletu pajak hotu no bukti pembayaran iha hotu ami. Pajak ba selu iha konta ne’ebe Ministeiru Finansas mak fo iha tezouru ninian. Sira selu iha fulan Novemro (2014) maka sei ki’ik, iha fulan Dezembru sa’e tan ba ema hahu kuinese ona entaun selu ona taxa 130 ital mill Dollar Amerika no konta ida ikus ne’ebe sei restu atu selu ne’e kuaze 40 ate 50 Mil Dollar tan. Depois loron rua tan hodi ba hatama maka sir aba selu restu ne’ebe tuir ha’u nia kalkulasaun bele besik 200 mill Dollar”. 

 

Lei ba jogus iha Timor-Leste seida’uk hetan promulgasaun husi Prezidenti da Republika tan ba tuir Parte Prezidenti Timor-Leste katak presiza aplika taxa ne’ebe bo’ot ba iha jogus iha nasaun ne’e.

 

“Jogu ida ne’ene iha despachu Ministru Turizmu (MT) ninian maka ami halo teste hodi hatene sirkulasaun osan iha merkadu jogu ne’e hira. Tan ba iha proposta lei sobre jogus ninian sei iha hela sua exselensia Prezidenti da Republika ninia meja. Lei ne’e aprova ona iha Konsello dos Ministru maibe hein de’it promulgasaun. Mas to’o iha Prezidensia da Republika, Prezidenti muda fali idea husi proposta Governu ninian. Proposta Governu ninian 25% sobre reseita bruto maibe Sr. Prezidenti hakarak foti taxa ne’e ba 35% husi reseita bruto. Entaun presiza halo teste ida para hatene nia potensia merkadu ne’e halo nusa. Durante tres to’o kuatru meses I teste ne’e la’o hela no surat ba halo teste ne’e sai husi Ministeiru Turizmu. Iha surat ne’e hakerek dehan presiza halo teste hodi hare potensia merkadu. Depois de halo teste ne’e ami sei halo relatoriu ba Sua Excelensia Prezidenti da Republika sobre kondisaun jogus ninian ne’e hanesan ne’e para Sr. Prezidenti bele hola desizaun taxa ne’e hira maka nia hakarak implementa. Primeiru ita tenke teste uluk para determina nia taxa ne’e”, haktuir Miguel.

 

Maske nune’e tuir Miguel ninia servidor Estadu ne’e hateten, “ternyata teste ne’e hatudu jogu ne’e nia merkadu bo’ot duni bele dehan jutaan Dollar. Mas iha prosesu teste ne’e rasik ami implementa ona pajak (Taxa) 25% sesuai ida ne’ebe agora ne’e berlaku”.

 

“Maibe Teste ne’e la’o hela maka polisia ba halo tiha kapturasaun no halo tiha buska ba fatin jogu ne’e”. 

 

Tuir Mandadu ne’e PNTL lori hodi justifika sira nia operasaun dehan jogu elektronika iha fatin refere ilega.Nune’e maka halo Diretor inpeksaun jeral ba jogus husi Ministeiru Turizmu ne’e lamenta ho atuasaun PNTL ne’ebe ba atua fali fatin jogu ne’ebe legal maibe la halo ba fatin jogu ilegal ne’ebe Ministeiru Turizmu informa ba parte autoridade seguransa ninian ne’e.

 

“Ami rasik serbisu hamutuk ho Polisia kleur ona no ami informa on aba polisia sobre jogus ilegal sira iha Dili laran ne’e mas to’o agora nungka kaer i nein ka’er no husik hela. Mas polisia hakarak ba ka’er de’it maka ida ne’e”, informa Diretor Inspeksaun jeral ba jogus ninian ne’e.

 

Nia esplika katak, “iha fatin jogus hanesan ne’ene barak los iha Dili. Iha duni fatin Timor Palza ne’e iha jogu rua no ida ilegal. Polisia iha kuinesimentu tan baa mi fo hatene. Ami fo hatene ba sira dehan ida ne’e ilegal mas sira halo los buska fatin ida legal ne’e. Restu iha Dili ne’ene to’o agora la’o hela”. 

 

“Iha ilegal ida iha duni Timor Plaza husi sorin fali ne’e bo’ot hanesan hotu ida legal ne’ebe PNTL sira buska iha sabado ne’e. Ami deteta tan ilegal ida iha Dita Plaza, ida iha land mark plaza, ida iha tasi ibun ocean view, ida iha mandarin”, Miguel relata.

 

Tempo Semanal koko ona atu hetan konfirmasaun husi parte Polisia ninian kona ba alegasaun husi Inpeskaun jeral dos jogus Ministeiru Turizmu ninian maibe to’o notisia ne’e hatun ami seida’uk iha sorte atu hetan informasaun ruma husi Parte PNTL ninian.

 

 

Dili, Tempo Semanal - Primeiru Ministru VI Governu konstitusional hala’o visita kortezia ba iha Ministeiru da Defesa no Kuartel Jeneral FALINTIL – Forsa Defesa Timor-Leste (F-FDTL) iha Fatu Hada dili, iha tuku 10h00 Oras Timor-Leste, iha loron Tersa Feira (24/02).

 

Wainhira Primeiru Ministru DR. Rui Maria de Araujo to’o iha edifisiu Kuatel Jeneral ho Ministeiru da Defesa simu ho Parade military hafoin tuir kedan ho enkontru ho Estadu Maior Jeneral F-FDTL hafoin vizita ba iha kna’ar fatin Ministeiru da Defesa ninian.

 

“Primeiru Ministru nia vizita mai iha ne’e (Kuartel F-FDTL ho Ministeiru Defesa) atu hare no rona preokupasoeins ne’ebe Ministeiru Defesa infrenta, liu-liu Forsa FDTL infrenta”, Ministru da Defesa Jose Cirilio Cristovao ba jornalista sira hafoin de vizita Primeiru Ministru ninia remata.

 

Ministru Defesa ne’e esplika liu tan katak durante vizita Primeiru Ministru VI Governu Konstitusional hetan esplikasaun direitamente husi Xefe Estadu Maijor Jeneral F-FDTL kona ba situasaun dezenvolvimentu lutu nasaun ninian ne’e inklui mos problemas no preokupasaun kona ba meloramentu ba kondisaun moris forsa ninian.

 

“Hanesan ita hotu hatene katak ohin loron ita iha postu sanolu resin ida i postu balun seida’uk konstroe i depois nesecidades bazikus ba forsa sira nian. Kona ba formasaun halo nusa maka halo kapasitasaun ba forsa nune’e ita bele hetan forsa ne’ebe professional liu. Kapasita ita nia rekursu ho kualidade di’ak liu-liu iha komponente unidade enginaria. Ba komponente Naval halo nusa maka ita fo kursus no fo formasaun di’ak liu ba sira para bele mos, ita labele dependenti ona kona ba halo nusa maka hadi’a ita nia parku sira ne’ebe iha komponente Naval”, Ministru Defesa relata hikas briefing ne’ebe hato’o husi Xefe Estadu Maijor Jeneral F-FDTL ho ninia komponente ba Xefe do Governu.

 

Antes ne’e eis Sekretariu Estadu da Defesa iha IV no V Governu Konstitusional husu ona Ministru da Defesa iha VI Governu Konstitusional atu tau atensaun ba revizaun planu 2020, despozitivu forsa, Konseitu Estratejiku Defesa Seguransa Nasional, Autoridade Nasional Maritima ho konstrusaun postu ba F-FDTL sira.

 

Tuir Planu Estratejiku Dezenvolvimentu 2020 F-FDTL ninian fo Prioridade ba dezenvolvimentu komponente Naval maibe dezenvolvimentu F-FDTL sei hein hela aprovasaun ba Estatutu Defesa no Seguransa Nasional ne’ebe tuir informasaun ne’ebe Tempo Semanal hetan ate agora sei latan hela iha meja leten Parlamentu Nasional ninian no ate agora seida’uk deskute nafatin. 

Xanana Saran A’an Hodi TDD Liberta Pasaporte Emilia

Publika iha Nasional

 

 

Dili, Tempo Semanal - Tribunal Distrital Dili iha loron Sexta Feira (20/02) entrega devolve hikas pasaporte eis Ministra Finansas, Emilia Pires hafoin simu karta de rekerementus husi ekipa advogadu no eis Primeiru Ministru Ministru Kay Rala Xanana Gusmao.

 

“Ne’e tuir juiz prosesu autoriza nia (Eis Ministra das Finansas DRA. Emilia Pires) ba, tan ba fundamentu ne’e katak nia halo hela serbisu Estadu ninian. Segundu garante katak nia la halai tan ba la iha perigu atu halai. Terseiru iha rekerementu husi Ministru Planeamentu Investimentu Estratejiku, Kay Rala Xanana Gusmao maka hakerek karta mai I nia garante katak medidas koasaun iha pozisaun Arguida ne’e la iha perigu ida”, hateten Juiz Administrador Tribunal Distrital Dili, DR. Juiz Duarte Tilman iha Intervista eskluxivu ho Tempo Semanal. 

 

Iha loron Sabadu (21/02) Eis Ministra das Finansas, Emilia Pires ne’ebe daudaun ne’e assume hela kargu enviada espesial g7+ hala’o viajen hamutuk ho eis Primeiru Ministru Kay Rala Xanana Gusmao ba hala’o misaun g7+ iha Republika Afrika Central no Republika Congo.

 

“Juiz prosesu autoriza nia sai durante prazu 20 dias mas kuandu nia to’o fali mai tenke entrega fila fali pasaporte para depois garante nia atu ba tuir julgamentu ne’ebe markadu iha 21 ate 25 de marco (2015)”, DR. Duarte informa. 

 

DR. Juiz ne’e kontinua relata dehan, “ne’e tuir informasaun ne’ebe juiz prosesu informa mai ha’u. Hanesan ita bo’ot hakerek ona katak iha rekerementu ida mos mai husi Defesa duni. Hanesan ha’u hateten dehan ha’u rona defesa aprezenta rekerementu ida mai ne’ebe Prokurador mos konfirma duni ho despacho dehan la opozisaun, tan ba la iha perigu de fuga”. 

 

Hafoin simu karta rekerementus husi parte advogadus no karta garantia husi parte enviada espesial g7+ ho eis Primeiru Ministru Tribunal mos konsidera kedan hodi hola desizaun.

 

“Ita hare posibilidade katak nia la halai. Konviksaun ne’e mai husi ne’ebe nia mos hanesan ema Timor ida i ema ukun nain ida no nia mos sei hatudu katak nia naran at liu tan se nia halai katak nia naran agora ne’e seida’uk estragadu i nia mos hakerek karta mai dehan nia sei la halai”, Juiz Administrador Tribunal Dili ne’e esplika. 

 

Antes ne’e iha loron Kinta Feira loron kraik (19/02) Polisia Nasional Timor-Leste exekuta mandadu de koasaun ne’ebe hasai husi Tribunal Dili hodi prende tiha pasaporte eis Ministra Finansas ne’e ninian hodi evita nia atu la’o sai husi nasaun ne’e maibe atuasaun ne’e hetan protest maka’as husi ekipa advogadus ne’ebe defende Arguida DR. Emilia Pires. 

 

“Karta rekerementus sira husi Arguida. Defesa no Ministru Planeamentu Investimentu Estratejiku haruka hotu ba Prokurador pronunsia, nia dehan konkorda no la iha perigu ida ne’ebe bele simu pedidu mak mai atu nia bele hala’o serbisu Estadu ninian”, haktuir DR. Duarte Tilman. 

Droga Hahú Kait Familia Politikus TL

Publika iha Justisa

Dili, TEMPO SEMANÁL – Tinan kotuk, Prezidente da Repúblika, Taur Matan Ruak halo breafing ba journalista sira hodi ko’alia konaba asuntus nasionais ne’ebé inklui kazu transaksaun droga,  pornografia no prostituisaun iha rai laran. Prezidente hateten, koantu mais nasaun dezemvolve, koantu mais nivel kriminalidade aumenta. Krime ne’ebé bele fó efeitu makaas ba joven sira maka prostituisaun no drogas.

Deklarasaun Prezidente da Repúblika nian ne’e hahú komprova daudaun ona. Tanba, daudaun ne’e la’ós deit ema ho ekonomia ka moris simples maka involve iha kazu droga, maibé droga hahú kait daudaun ona matenek nain balu ninia oan, hodi hahú involve iha kazu refere. 

Tanba ne’e, semana foin lalais ne’e, Tribunál Distrital Dili hala’o prosesu interogatoriu ba arguidu kazu droga nain 7, hodi rona sira-nia deklarasaun. 

“Ami halo duni primeiru interogatoriu tanba juis sira oferese sira-nia tempu hodi rona arguidu sira. Maibé Segunda-feira sei lori fali mai hodi rona dispaisu, atu nune’e  bele aplika medida  ba sira. Ministeiro Publiku hateten arguidu sira tenki tama iha prizaun preventiva, maibé ami advogadu defende katak labele, di’ak liu aplika de’it medida Termu Identidade Rezidensia (TIR)”, dehan Advogadu, Pedro Aparicio ba jornalista iha Tribunál Distrital Dili.

Aparicio informa liutan, akuzasaun kontra ninia klientes nain 7 ne’e tanba deskomfia konsumu droga. Sira ne’e mak hanesan (naran inisial); R ,D, A, M, DM, AA (AA politikus balu nia oan), M (politikus balu nia mane foun).

Suspeitu nain 7 ne’e entrega an ba polisia parte investigasaun kriminal iha Kinta-feira, 05/02/2015, no sira kumpri ona pena detensaun iha sela komando polisia durante oras hitunulu resin rua (72). La’ós de’it iha sela polisia maibé mos ba hatan to’o Tribunál  Distrital Dili, no hetan akompañamentu husi polisia servisu investigasaun.

Iha primeiru interogatoriu ne’ebé hala’o  durante oras lima-nia laran ne’e  taka ba publiku. Entertantu advogadu Pedro Aparicio hateten, ”ha’u-nia kliente sira ne’e la’os polisia ba kaptura, maibé sira rasik mak ba entrega an iha polisia, tanba Ministéiriu Publiku hasai mandatu ida hodi fó ordem ba polisia halo kapturasaun, maibé polisia sira telefoni deit sira rasik ba entrega an”, dehan Aparicio.

Iha akuzasaun Minitériu Publiku nian hateten, suspeitu sira hanesan konsumu droga ne’ebé bele hetan  pena kman. Entertantu, Minitério Publiku (MP) akuza suspeitu sira ho lei nú. 22/1997 kona ba droga no lei Indonézia nian  artigo 85. 

Iha primeiru interogatoriu,  alegasaun MP husu atu aplika pena prizaun preventiva ba arguidu sira, maibé parte defeza husu atu aplika termu de identidade rezidensia ne’ebé tribunal sei tetu fila fali iha loron Segunda, 09/02/2015 hodi foti desizaun ba primeira interogativu.

Iha primeiru interogatoriu ne’e preside husi  Dr. Antonino Goncalves husi MP no Prokuradora Bemvinda do Rosario no arguido sira hetan assistensia  legal husi advogado privadu nain tolu  kompostu husi advogadu Jose Camoes, Pedro Aparicio ho Jose Manuel.  Desizaun ikus primeiru interogatoriu nian  tribunal  aplika pena ba arguidu sira liu husi aprezentasaun periodika. (aro)

Dili, Tempo Semanal - Iha Dada lia eskluxivu ho Tempo Semanal, Primeiru Ministru Rui Maria de Araujo dehan Nasaun Timor-Leste sofre moras desizaun politika no Jestasaun implementasaun.

Primeiru Ministru Rui Araújo moris iha Suku Mape, Rejiaun Zumalai, distritu Kovalima.iha loron 21 Maiu 1964. Aman ba oan mane rua ne’e lisensiadu iha Medisina iha Universidade Bali, no Maestradu iha Saúde Públika iha Universidade Otago, Dunedin, Nova Zelandia.

Page 1 of 7
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version