Tempo Timor Online

 

 

Dili, Tempo Semanal - Prezidenti da Republika Taur Matan Ruak, hato’o nafatin apello ba Mauk Moruk atu kolabora ho Estadu hodi hametin paz nune’e Xefe Estadu husu ba ulun bo’ot Konsellu Revolusaun Maubere atu entrega ninia a’an ba autoridade nasaun RDTL.

 

“Ha’u aproveita oportunidade, kontinua apela ba Mauk para nia mai aprezenta a’an. Ne’e forma di’ak liu kontribui ba estabilidade Timor nian. La iha dalan seluk tuir ha’u nia hare. Ha’u nia alin mas nia prezidenti mos,” apella husi Prezidenti Taur Matan Ruak ba Mauk Moruk.

 

Prezidenti da Republika hateten lia fuan sira ne’e durante ninia vizita ba suku sanolu iha Distritu Aileu iha semana kotuk.

 

“Timor iha problemas bo’ot ke barak liu para fera ulun ba. Bu’at ne’ebe pasadu ne’e pasadu nian. Be ne’ebe liu ona, la habokon ona natar”, Xefe do estadu dale.

 

Iha loron Segunda Feira (02/03) mos Xefe Estadu Maijor Jeneral F-FDTL, Maijor Jeneral Lere Anan Timur realsa apellu ne’ebe hato’o husi Xefe do Estadu hafoin sorumutuk iha Palasiu Prezidenti Ai Tarak Laran. 

 

“Ohin (02/03) ami levanta ona operasoeins husi Laga, i ami hare oin sabele resolve situasaun ne’e. Ha’u hateten katak Mauk, nia tenke konsiente katak nu’udar Timor oan nia tenke konsiente labele halo terus ninia a’an no labele halo terus ninia alin sira seluk ne’ebe ke uluk terus ba rai ida ne’e I hakarak rai ida ne’e ukun a’an I ohin loron ita ukun a’an ona nune’e sira mos hakarak goza rezultadu Ukun a’an ninian. Ha’u hanoin katak Mauk podia toma konsiensia (tan ba) nia mos ida ona seix senta ital. anus I subar preokupa, stress I ida ne’e mos bele agrava ita nia saude”. 

 

Eis komandante Rejiaun de gerilia numeru um ne’ebe funu tinan rua nolu resin ha’at iha ai laran ne’e sente kestiona objetivu ulun bo’ot Konsellu Revolusaun Maubere (KRM) ninian ne’ebe halai subar iha ai laran.

 

“Ita subar ne’e uluk iha ai laran ne’e oin seluk, 24 anus ita subar tan ba objetivu ida. ita hakarak ukn a’an. Be agora ita subar ne’e objetivu saida? Objetivu saida? Se politiku ita tu’ur hamutuk. Se Politik Mauk antes ne’e oin seluk. Uluk nia ba detensaun iha Bekora no sai husi Bekora ne’e ita dehan ne’e politiku duni. Maibe situasaun sa’elari ne’e la’os ona politiku”, dehan Lere.

 

Eis komandante guerilia numeru um ne’ebe kobre lospalos ho parte leste laga durante tempu funu gerilia kontra Tentara Nasional Indonezia ninian ne’e husu atu Mauk Moruk atu tuur resolve ninia problema tuir ida-idak ninia dalan.

 

“Politiku ne’e ketak no krime ne’e ketak ona. Ne’e duni ha’u husu ba Mauk, ne’e ha’u nia alin ka ha’u nia maun Mauk mai. Mai ita nu’udar Politiku, ita nu’udar lider no ita nu’udar ema matenek mai tuur hamutuk, ita resolve. Politiku ne’e ita ko’alia ho politiku no ida ne’ebe kona ba lei ne’e ita ko’alia ho lei”. 

 

Relasiona ho deklarasaun Mauk Moruk ne’ebe dehan ona lakohi entrega a’an ba justisa, Jeneral fitun rua F-FDTL ne’e dehan aksaun ne’ebe ulun bo’ot KRM foti ne’e hanesan, “suicide, ne’e oho a’an. Ne’e ita nia maun Mauk hakarak oho ona nia a’an. Be ita nia a;in sira seluk ne’ebe ke uluk  hanesan dehan uluk Kaixa, uluk balun ha’u nia seguransa sira ne’e mos hakarak suicida a’an? Ha’u hateten ba sira ne’ebe por izemplu Koboy sira, Lemorai sira, Carlos siribou sira, ha’u dehan katak di’ak liu imi mai entrega (a’an) duke forsa sir aba ka’er imi”. 

 

Tuir eis sub Xefe Estadu Maior das FALINTIL ne’e dehan fasil atu forsa sira atu ba kaptura Mauk Moruk ho ninia grupu maibe estadu maka la fo mandatu ba forsa de Defesa.

 

“Tan ba mandatu forsa ninian ne’e, forsa ba apoiu de’it. Mas loron ruma Prezidenti dehan bele fo ordem I mangame forsa ba ka’er sira ne’e la difisil”, promete maijor Jeneral Lere Anan Timur.

 

Nia esplika termus kompetensia ba operasaun ida ne’ebe hala’o hasoru Mauk Moruk ho ninia grupu dezde akontesimentu iha Sa’elari iha fulan ida liu ba kotuk ne’e iha PNTL ninia liman no F-FDTL so apoiu de’it.

 

“Agora daudauk ne’e kompetensia tomak polisia ninian, i ami apoia de’it. Ami husi kotuk kerdizer la iha poder tomak halo operasaun ne’e, so polisia maka halo operasaun. Ami ba ne’e tan ba ami maka kompriende (hodi) ba, podia ami lalika ba. Porke forsa kuandu tun ne’e, (wainhira) Prezidenti ho Governu tenke uha linguazen ida de’it. Agora Governu fo diretiva dehan forsa tun, ami mos ragu-ragu hela entaun ne’e serbisu polisia nian i ami fo apoiu ba polisia atu bele hala’o didiak nia kna’ar. Mas dala ida tan ha’u hateten ba Mauk di’ak liu entrega a’an duke ita subar-subar para suicidu, nia hakarak oho a’an entaun pelumenus nia alin sira seluk mai ba depois nia subar mesak mos labu’at ida”, deklara Lere.

 

Maske nune’e Mauk Moruk selebra aniversariu loron 03/03/1981 Reorganizasaun Nasional Maubai iha publiku no iha momentu ne'ebe hanesan Mauk Moruk hato'o ninia deskursu hodi ezije nafatin ba Prezidenti da Republika atu dizolve Parlamentu no Governu, depois ezije mos muda naran F-FDTL, hasai kilat bo’ot sira husi PNTL no lori korruptores sir aba kastigu iha Natarbora maka nia sei entrega hikas pistol rua ne’e ba estadu.

 

Dili, Tempo Semanal - Ministru Negósiu Estranjeiru no Koperasaun (MNEK), Hernani Coelho, iha loron 27 Fevereiru 2015, halao reuniaun kortezia ho Embaixador nain lima rezidente iha Dili, hanesan Karen Clark Stanton  Embaixadora husi Estadus Unidus Amerika, Sylvie Catherine Tabesse, Embaixadora husi Uniaun Europeia, Jonathan Douglas Schwass, Embaixador husi Nova Zelandia, Tiang Guang Feng, Embaixador husi Repúblika Popular Xina no Primanto Hendrasmoro, Embaixador Repúblika Indonesia.

 

Reuniaun  ne’ebé halao ketak-ketak  iha sala enkontru MNEK sai nu’udar reuniaun dahuluk ba Embaixador hirak ne’e ho Ministru Negósiu Estranjeiru no Koperasaun, Hernani Coelho. Reuniaun ne’e, alende sai hanesan oportunidade atu introdus an ba malu, iha mos assuntu importante balun  ne’ebé mak diskute hanesan koperasaun politika, ekonomika no sosiál entre Timor-Leste ho rai hirak ne’e. 

 

“Rai ida, sira kuandu hare iha Ministru Negósiu Estranjeiru foun, sira mai koalia iha aspetu rua; ida atu introdus ka aprezenta sira nian a’an ba Ministru foun no ida fali mak atu koalia konabá liñas jerais koperasaun politika, ekonomika no sosiál entre rai rua ne’e. Hau hasoru malu ho Embaixadora husi Estadus Unidus Amerika, Uniaun Europeia no Embaixador husi Nova Zelandia, Xina no mos husi Indonesia. Sira prezente iha ita nian rain nu’udar Embaixador ho rezidensia iha Timor-Leste. Sira iha koperasaun ho Timor-Leste iha aspetu barak. Sira iha koperasaun iha areas dezenvolvimentu ninian no mos iha area politika sosiál nian. Sira mos aproveita oportunidade ne’e mai aprezenta karta kongratulasaun husi sira nian Ministru Negósiu Estranjeiru ne’ebé ami bolu hanesan ami nian homologu no konvida hau hanesan Ministru Negósiu Estranjeiru atu ba vizita sira nian rai,” hateten Ministru Hernani Coelho.

 

Ministru Hernani Coelho hatutan katak koperasaun hirak ne’e la relasiona deit ho interese bilateral entre Timor-Leste ho rai hirak ne’e, maibe relasiona mos ho assuntu internasional interese global nian hanesan kazu ACP, ASEAN, Ilhas Pasifikas, reforma Konselhu Seguransa Nasõens Unidas no mos evolusaun politika seguransa ne’ebé lao iha Europa, Mediu Oriente, Afrika ho fatin seluk-seluk tan. Iha enkontru ne’e, Timor-Leste bele rona mos nasaun hirak ne’e nian opiniõens konabá sira nian pozisõens no bele fahe mos ho sira konabá Timor-Leste ninian hare, pozisõens no hanoin konabá futuru ninian.

 

Iha enkontru ho Embaixador Repúblika Indonesia, Primanto Hendrasmoro, Ministru Negósiu Estranjeiru no Koperasaun, Hernani Coelho haktuir “hau mensiona ba Embaixador Indonesia konabá interesse Timor-Leste nian  para atu bele koalia konabá assuntus barak, assuntu de koperasaun ne’ebé ita iha entre Timor-Leste ho Indonesia liu husi Joint Ministerial Commission ne’ebé toma konta konabá area koperasaun barak. Ami koalia mos  konabá Joint Border Committee ne’ebé koalia konabá assuntu fronteira terrestre nian no koalia ituan mos konabá assuntu fronteira maritima no hanoin ruma oinsa atu resolve segimentu rua iha Oecusse ke to’o ohin loron seidauk konsege resolve.” 

 

Iha sorin seluk, Ministru Negósiu Estranjeiru no Koperasaun, Hernani Coelho, koalia mos ho Embaixador Indonesia, Primanto Hendrasmoro, konabá prosesu preprasaun adezaun Timor-Leste ba ASEAN no selebrasaun tinan 60 konferensia Azia Afrika ne’ebé Indonesia sai mos nudar fundador ba inisiativa ida ne’e. 

 

Tuir plano, konferensia refere sei halao iha Jakarta iha fulan Abril nian laran, tinan ida ne’e, hafoin simeira Xefe Estadu.

 

“Konferensia Azia Afrika ne’e sei halao iha Jakarta iha fulan Abril nian laran. Antes de enkontru Azia Afrika, sei iha mos enkontru iha tipu de simeira ida husi Xefe de Estadu sira no mos enkontru nivel ministerial husi Ministériu Negósiu Estranjeiru sira nian. Hau mos simu konvite ofisial husi Ministru Negósiu Estranjeiru Indonesia nian atu bele ba partisipa iha enkontru ida ne’e no mos ita hein katak bele iha mos enkontru ofisial ho Ministru durante eventu Konferensia Azia Afrika ne’e,” dehan Ministru Hernani.

 

Entertantu, durante reuniaun kortezia ho Embaixador hirak ne’e, Ministru Hernani Coelho hato’o agradesimentu ba konvite hirak ne’ebé nia simu no bazeia ba prinsipiu resiprosidade, Ministru Hernani Coelho mos konvida ninia homologu liu husi Embaixador hirak ne’e atu bele visita Timor-Leste loron ruma.

 

 

Husi : Vicente Maubocy (Observador Politico)

 

Introdusaun:

 

Artigo ida ne, koloka  membros VI governo nian iha “kampu laran”  hasoru Povo nia Kiak no Terus. Oin sa maka chefe governo ho nia membros sira “prepara no organiza” atu hasoru “batalha” “kiak no susar” iha ne, maka “test case” atu desafia   membros governo sira “kapasidade”  tuir ida-idak nia portfolio.

 

 Iha dia 16 Fevereiro 2015 membros VI Governo hamutuk 37 komposto husi : ministros, vice ministros ho secretarios Estado simu tomada de posse husi Presidente da Republika Taur Matan Ruak liu husi cerimonia ida official nebe participa husi orgaun Estado tomak ho presensa korpos diplomaticos nebe instala iha Timor Leste.

 

VI governo nia naran oficialmente sei dauk anuncia. Bele tama iha kategoria “governo inklusaun” tanba partido oposisaun mos halo parte iha governo.

 

Primeiro Ministro ba VI governo lidera husi Dr. Rui Araujo, membro CCF. Eskolha Rui Araujo produto “consensus” Xanana + Mari + Horta, ikus mai sekunda husi Presidente da Republika Taur hodi fo tomada de posse iha 16 Fevereiro 2015.

 

Participasaun membros FRETILIN iha VI governo

 

Posisaun lideransa FRETILIN hahu husi tinan 2000, “antogoniku” ho Xanana Gusmao ho motivos politicos. Resultado eleisaun Asembleia Constituinte FRETILIN manang ho 57%, nebe loke dalan ba  FRETILIN hodi forma governo Dr. Mari Alkatiri maka Primeiro Ministro ba period  2002-2007.

 

Iha biban neba halo mos eleisaun ba Presidente da Republika, nebe Xanana sai vencedor hodi sai Presidente da Republika period 2002-2007.

 

Tensaun politica “manas” nebe “explode” hodi provoka “crise Abril 2006 “hodi kauza destruisoens no prejuizos massivas no inkalkulaveis liu-liu ba populasaun  “kiak”; lakon sira bens no propriedades.

 “Fitar” crise 2006 sei “kanek” nafatin iha vitimas sira nia memorias; liu liu ba sira nebe “lakon” sira nia membros familia.

 

Hau rona lamentasoens dala barak husi vitimas sira  iha fatin “deslokados” lia fuan sai husi sira nia ibun, dehan nune iha biban neba: “ imi, bot sira haksesuk malu poderes” ami povo kiak sira maka “ sofre no terus”. 

 

Eleisaun 2007:

 

Ambiente eleisaun Presidencial no Legislativa 2007 dekore iha “ambiente no temperatura” ida manas tebe-tebes. Mossu konflitos oi-oin akompanha ho hostilidades, entre militantes FRETILIN ho CNRT. Ou ho lia fuan seluk “frisoens” entre apoiantes Xanana ho Alkatiri. 

 

Resultado eleisaun, FRETILIN manang ho maioria simples ho 21 deputados. Xanana forma AMP hodi kaer governo. Xanana maka nudar Primeiro Ministro.

 

 

 

Eleisaun 2012:

 

Tensaun politica entre Xanana ho Mari, la para to eleisaun 2012. Previsaun no expectativa  Xanana ho estrutura CNRT tomak, garante katak CNRT manang maioria absoluta entre 35minimo, 45 maximo. Maibe resultados ikus sai mai, (disappointed) hetan deit 30 kadeiras. Xanana preciza PD ho FM atu forma Bloko Koligasaun . FRETILIN em vez de tun, sae tan ba 25 kadeiras.

 

Votos husi 17 partidos nebe la liu barreira eleitora hamutuk 94, 379 ekivalente  20%, nebe bele koresponde tó  17 kadeiras se karik haksoit liu barreira eleitoral. 

 

Lisoens resultados (aftermath) eleisaun 2012. 

 

  1. Indikadores eleitoral 2012, referencia ida vital, ba Xanana ho Alkatiri, atu halo leitura ida kuidadoza hodi extrai lisoens, ba xadres politico tuir mai.  CNRT atu manang mesak, la konsegue hetan. Nune mos ba FRETILIN. 
  2. Kontinua rivalidades politicas la manang buat ida. Entaun tenki muda posisoens “asimetrikas ba simetrikas” ba “WIN WIN SOLUTION “. Xanana ho Alkatiri idade mos avansa,  ba oin nafatin. Hakarak ka lakohi tenki buka formas de “entendimento ho koperasaun”.

 

  1. 3.VI governo  “produto” era foun, nebe marka  relasoens koperasaun entre Xanana ho Alkatiri hodi husik hela ba kotuk memorias “amargas ho tirstes” iha tempo kotuk .

 

  1. 4.FRETILIN husi 2012, mai oin, muda estrategia politica iha Parlamento Nacional hodi fo suporte tomak ba aprovasaun orsamento governo Bloko.  Ho mudansa postura politica ne, adiciona ho Projecto JEESM, iha Oekusi lidera husi Secreatario Geral FRETILIN Dr. Mari Alkatiri  maka alkansa “new deal” entre Xanana ho Mari Alkatiri, hodi membros CCF nian participa iha VI governo.

 

  1. 5.Ho aparecimento Primeiro Ministro foun maka existencia Bloko pratikamente la iha ona, Tanba Xanana Gusmao resigna aan tiha ona. Embora statement hirak nebe koalia, sei refere nafatin existencia Bloko nian, mai be iha “pratika” Bloko lakon tiha ona.

 

  1. 6.Produto VI governo resulta husi negosiasaun leader historiku rua : Xanana ho Mari Alkatiri, ho preokupasaun bot ba desenvolvimento no bem estar povo Timor Leste. 

Motto nebe sira kaer maka “se uluk ita hamutuk luta ba libertasaun, tan sa maka ohin loron la hamutuk luta ba desenvolviemto”.

 

  1. 7.Baseia ba filosofia no preokupasaun ida ne maka, forma VI governo, Xanana hili Rui Araujo ba Primeiro Ministro, embora “rompe” akordo Bloko to 2017, nune mos exigencias Partido CNRT, normas konstitucinal nebe dehan katak “Primeiro ministro indigita husi Partido + votado ou koligasaun de partidos” iha neba la temi katak iha possibilidade Primeiro Ministro hili husi Partido Oposisaun.

 

  1. 8.Komo politica no lei ema maka halo, bainhira leaders partidos sira iha maioria parlamentares  iha sira nia “kontrole”, kuando  necessidades “obriga” halo mudansas radikais,  dado momento bele “haksoit” regras balu, atu responde desafios desenvolvimento, husi sorin ida, no sorin seluk atu konsolida forte liu tan leaders politicos sira nia influencia  politica.

 

  1. 9.Pratika ida  ne, maka kostuma dehan “magia no ciencia “ politica. Poiticos sira uza “meios” hotu-hotu iha sira nia alkanse ba fins hirak nebe sira hakarak atinge. Bele halo “ inferno sai lalehan no mos ba sentido kontrario - lalehan sai inferno”.

 

  1. 10.Historia regista desde sekulos,  buat rua ne, ida “ leaders sira uza poderes, ba sira nian bem estar, ou povo nian bem estar”. Se  ba povo nia bem estar, sira “sakrifika” sira nia intereses. Koloka leaders sira nia bem estar maka uluk, entaun “ sakrifika” povo.

 

Singapore país ida nebe hetan sucesso depois da Independencia. Celebres leaders famosos 3 hanesan : Lee Kuan Yew; S. Rajaratnan ho Goh Ken Sew  maka sai pioneiros ba grandiose  Singapore ba oin loron. Nune  transcreve Dr.Kishore nia lia menon murak iha tinan 2002, fulan Abril loron  26 dehan ba leaders historikos Timor Leste (Xanana + Alkatiri) iha Singapore National University bainhira sira koalia kona ba futuru Timor Leste: Folin lalais iha loron 14/ 02/ 2015 iha Dili Convention Center Dr. Kishore  repete tan fila fali lia fuan hirak ne ba membros governo, deputados no publiko nune:

 

“The lesson of history of the past few decades is relatively clear: independence, even if it comes after a hard-fought struggle, may still be a relatively  easy victory. Success after independence, unfortunately,  has been relatively rare” Katak : “ lisoens historikas iha dekadas hirak iha kotuk relativamente klaru: independencia nebe hetan husi luta ida dura no dificil, sei sai Vitoria ida relativamente facil. Mai be sucesso depois independencia la os buat ida facil ka kman, mai be  relativamente raro” (la dun barak).

Prioriedades  VI governo maka saida?

Qualker governo iha fatin nebe deit focus ba area rua importante hanesan:

  1. Haburas crescimento ekonomico (pengembangan ekonomi); i
  2. Disposisaun kondisoens konduzivas atu habelar investimentos. (peningkatan investasi)

 

Conceitos rua ne,embora le ba facil hela, bainhira implementa komplexo duni tanba necessita plano ida integrado, lesgilasaun,  sistema, alokasaun orsamental, rekursos humanos kualifikados, team work no follow up, stake holders hotu nebe involve.

 

Besik tinan 13 ukun aan, sinais crescimento ekonomiko no  mega investimentos atu kria kampos trabalho pratikamente sei dauk mossu. Nune VI governo tenki halo “ginastika cerebral” pelo menos tinan 2 mai oin, investimento ruma bele hahu.

 

Strategias Desenvolvimento

 

VI governo nia membros tenki tur hamutuk, provoka debates ka “brain stroming” kona ba estrategias  desenvolvimento iha areas hirak nebe maka hanesan prioridades das prioridades. Nune author ajuda fo hanoin ba ilustres membros VI governo strategias balu nebe relevantes hanesan:

  1. Human basic needs strategy; refere liu-liu ba food security; education, health; and  house;
  2. Basic Infrastructure development strategy; refere liu-liu ba estradas, portos, aeroportos. Kona ba elecricidade iha ona rede transmisaun mai be tenki troka gasoleo ho gas, atu folin per kilowatts baratu atu atrai industrias;
  3. Investment development strategy; investimento ba industrias sei dauk hahu to ohin loron. Sinal katak buat ruma sei “salah” ka sei dauk kompleto, de modo investors sira sei dauk iha interese; lei ba rai, demora ba licensas hanesan obstakulos ba investimentos.
  4. Creating Productive Employment Strategy: SEPFOPE  maka desempenha papel importante iha area ida ne. Oin sa hare ba demand iha merkado, hodi prepara maõ de obra kualifikidas atu koloka sira hodi presta servisos ho kualidade.
  5. Improving the quality of Public service strategy. Funsaun publika nia servisos, importante tebe-tebes. Precisa treinamento ida intensivu, atu funcionarios sira sai professionais iha sira nia areas atu publiko kontente ba atendimento.

 

Konklusaun:

 

  1. VI governo produto relasoens amigaveis Xanana ho Alkatiri nebe hakotu ona sira nia rivalidades antagonistas. Nune, loke dalan FRETILIN nia membros  3 participa; 
  2. Indigitasaun Dr. Rui ba PM, resultado negosiasaun  Xanana + Alkatiri ho Horta; ho motto ka test case “transisaun” poder ba gerasaun foun;
  3. Sucesso VI governo hansan “foot ball” jogadores sira tenki iha “skills no talent” no treino dididak hodi hasoru ekipa adversaria. Fundamental kada membro governo  possue : “talent, creatividade, team work , problem solving skills and make things happened”; i 
  4. Historia sei regista kapacidade VI governo  konsegue ka lae, durante tinan rua nia laran, halo buat ruma diak hasoru “Povo nia Kiak no Susar”.

 

 

Dili, Tempo Semanal - Maske Primeiru Ministru Kay Rala Xanana Gusmao rezigna ona ninia a’an husi kargu Primeiru Ministru V Governu Konstitusional no Timor-Leste oras ne’e iha ona Primeiru Ministru foun maibe KRM sei nafatin ezije atu Prezidenti da Republika dezolve Parlamentu no VI Governu Konstitusional ne’ebe tomada de pose iha loron 16 Fulan Fevereiru 2015.

 

Agora Governu ida ne’e ami la rekuinese I ami kontinua ami nia pozisaun klara nune’e ami ezije nafatin ba Prezidenti da republika atu bubar tiha Gobvernu ida ne’e no Parlamentu para e instala primeiru novo rezime”, dehan Mauk Moruk iha ninia intervista eskluxivu ho Tempo Semanal

 

Nia esplika, “Governu foun ia ne’ebe serve duni povu nia interese la’os serve maka ukun nain riku no bosokten sira nia interese. Governu foun ne’ebe sei mai ninia ukun tenkeser reflete ba povu ninia moris la’os ukun nain sira nian no lei la’o tau iha kadeira leten maka ukun nain sira tuur fali iha leten mas povu ki’ik, ki’ak no mukit maka ba kadeia entaun ida ne’e ami la fo ulun”.

 

Tuir  Dili ninia hanoin ezijensia husi KRM ne’e imposible atu bele halo tuir maibe PRezidenti KRM dehan sira la fiar mudansa governasaun ne’ebe foin lalais ne’e akontese.

 

“Mai Konsello Revolusaun Maubere hare ba V Governu ne’ebe muda ninia pozisaun ne’e la serve. This is a media gamble. I am not accepted it (Ne’e hanesan jogu id aba media. Ha’u la simu ida ne’e). Ha’u la’os ayam potong”, dehan Mauk Moruk.

 

Wainhira Tempo Semanal kestiona Prezidenti KRM ne’e konsiente katak tan ba ninia politika maka populasaun barak lakon sira nia independensia ho autoridade seguransa ho defesa halo pasa de revista iha dalan no ema barak labele halo to’os nune’e karik  Mauk Moruk iha hanoin atu entrega a’an ba justica.

 

“La rende, la rende tan ba ha'u hakru’uk de’it ba Maromak, rai lulik, foho lulik, uma lulik no matebian sira”, hateten Mauk moruk,

 

Ministeiru publiku hasai ona mandadu de detensaun ba Mauk Moruk hafoin de akontesimentu salari iha Janeiru 2015 maibe ho hamnasa eis komandante Brigada Vermella ne’e dehan Forsa Seguransa ho Forsa Defesa ne’ebe agora hala’o hela operasaun hasoru nia ho ninia emar sira inkompetente atu bele hetan no kaptura nia. Tempo Semanal koko atu hetan resposta ruma husi parte PNTL maibe infelizmente la iha resposta ruma.

 

Transkrisaun kompletu  kona ba Intervista eskluxivu ne’ebe jornalista tempo Semanal halo ho Prezidenti Konsello Revolusaun Maubere (KRM) sei hatun iha Jornal tempo Semanal iha edisaun oin mai.

 

Konsello Revolusaun Maubere iha meadus tinan 2013 hasai deklarasaun hodi ezije ba Prezidenti da republika hodi halo dezolusaun ba Parlamentu nasional ho demite Primeiru Ministru V Governu Konstitusional ne’ebe rezulta Rezolusaun husi Parlamentu Nasional hodi kaptura Prezidenti KRM hatama tiha ba kadeia.

 Cesar Dias Quintas (Lere Cay) 

 

Rai sira foin dezenvolve barak mak preokupa los ho estabilidade iha prosesu konstruksaun  ba estado de direito democtarico. Governu ou estado balun adora no paranoia (tauk los) saida los ou see los mak sai fatores instabilidade, entao sira halo maneira saida deit atu hatuur no mantein estabilidade nasional ho rasionalidade no irasionalidade. Pregozu ituan mak balun uza fali “ estabilidade hanesan sai ideologia interese nasional” atu konsolida no hamatin sira nia poder politiku no economico. Povu sai parte ba instabilidade wainhira iha disigualidade economico no descontrolado lei e orden hanesan fator importante nebe contribui makas ba prosesu estabilidade iha estado de direito democratico ida. Iha esperiensia emperiku hatudu ona katak wainhira iha lei e orden no distribuisaun igualidade economico sai parte komponetus importante atu sai sasukat atu hametin estabilidade atu harii esatdo de direito democratico . Instituisaun estadu sira inkluindu governu persiza uza sira nia direito instituisaun democratico atu hametin estabilidade maibe instituisaun estadu mos labele abuza poder maioria iha instituisaun ida atu interfere no dramatiza/politiza  “estabilidade no interese nasional” atu inpoin fali interese gropu ida nebe sai kauza ida ba instabilidade. 

Mais ou menus iha fatores rua nebe bele sai sasukat atu harii estabilidade rai laran atu harii estado de direito democratico maka hanesan hametin lei e orden no distribuisaun igualidade economico. Iha esperensia  rai dezenvolvidu barak hametin uluk lei e orden (rule of law) liu husi insittuisaun estado hanesan baze ida harii estado dedireito democratico no hanesan baze ida para reforca no hametin estabilidade nacional tamba lei e orden mak sai sasukat estabilidade nasional maibe iha rai foin dezenvolve  kontrariu ituan tamba sira preucupa los oinsa atu hametin sira nia estbilidade nasional ho maneira oioin nebe kahor politika ho lei, ikus foin hanoin atu haforca lei e orden entao hetan obstaclo barak liu no costu barak liu nebe tenque selu . Agora depende ba governu hanesan Timor-Leste iha poder executivo makas no makina dezenvolvimentu atu bele halo balanco estabilidade nasional tuir valores no spirito estado de direito democratio,  persiza komesa ona harii no haforca  husi inisiu kedas. Rai foin dezenvolve barak sidauk iha kapasidade atu harii lolos estado de direito democratic tamba menus rekurso humanu ho jestaun rekursu humanu nebe diak maski sira iha ona recurco finanseiro no infrastrutura. Entao ikus mai sira hetan dificuladade barak no uza meius oioin, em termus  mistura politika ho lei no uza naran interese nasional  atu hametin estabilidade nasional e a’at liu mak meius balun sai ixemplu negative nebe husik hela ba jerasaun foun tuir mai. 

Estabilidade persiza hahu husi instituisaun soberania estadu hanesan autoridade nasional  atu hametin lei e orden i sai mos izimplu ida ( role model) nebe tenki  hases a’an husi qualker pratica crime henesan abosu de poderes, corupcao,  immoral no buat sst. Instituisaun estado sira tenque iha transparansia no acontabilidade nebe iha integridade nacional atu hatur lei e orden para labele hamosu injustice no disqualidade economic nebe afeta ba seitor sira seluk. Wainhira iha independencia no estabilidade iha instituisaun estado sira hanesan Legisltivu, Executivo (Presidetnte da Republica hamutuk Premeiro Ministro) no Judiciario nebe iha integridade bazeia ba constituisaun maka instituisaun sira nee rasik sai pilar metin ba estabilidade tamba sira metin ho lei e orden ( Rule of Law). Maibe wainhira sira maka la-iha ona independencia no iha integridade tuir sira nia papel mak sira rasik sai kauza ba instabilidade nasional, ixemplu ida mak hatudu ona husi krize military no politica iha 2006.  

Ita hatene katak rai nebe deit instabilidade nasional sai inimigu boot ba governu tamba instabilidade sai osbtaklu boot ba prosesu dezenvolvimentu atu hatur lolos estado de direito  democratico. Iha parte ida krize saida deit, em termus krize politika povu maka sai terus tamba sira mak uhun ba vitima, purisu povu tauk liu mak violasaun no crimi politika husi instituisaun estadu sira nebe husi interese grupo balun saran aan. Estado de direito democratico laos deit reseponsibilidade instituisaun estado sira incluindu governu maibe povu mos iha dever atu sai agente ba estabilidade no paz iha rai laran atu hatur rai ida democratico, maibe hanesan motor dezenvolvimento governu mak sai fator principal ba proseso dezenvolvimento estabilidade no paz atu hametin estado de direito democratic. Durante quaze tinan 13 ukun aan ona governu ou estado Timor-Leste  tenta hela dadauk  planu no acao oioin tuir lei no kultura politika para hatur no hametin estabilidade tuir sira nia kapasidade, em termus jestaun governasaun maibe iha realidade sidauk reforca didiak lei e orden hanesan baze fundamental no mata dalan ba estabilidade no dezenvolvimentu nasional. 

 Analiza simplis ida katak karik agenda nasional nebe urgente tebtebes maibe nusa governu no estado la prioritiza iha sira nia agenda hanesan lei teras e propridade ( Lei rai nian), lei anti-corupcao no seluk seluk tan. Karik governu no estado hanoin katak agenda importante sira nee iha potensia hamusu instabilidade? bele kontrario karik tamba waihinra statute rai la claro no lei corupcao la define ho diak, nia sai fator nebe potensia tebes contribui ba instabilidade. Tamba hanoin ida simples katak Timor-oan luta too mate ho sofermento oioin maibe too ikus mais, direito ba rai sidauk define didiak  depois sira la hetan nebe lalais ou neneik sei iha problema boot nebe sempre kontribui ba instabilidade iha rai laran. Tuir mai mak hanesan lei anti-corupcao nebe sidauk aprova, nebe bele atraza acao instituisaun esrado relevantes atu combate corupcao nebe potensia bot atu hamusu distribuisaun disigualidade  economic tamba bele hamosu injustice nebe boot liu. Wainhira Timor-Leste atrazu iha apravosaun no implementasaun lei sira nee, bele mos kria oprotunidade atu hamosu konflitu nebe bele halai ba instabilidade nasional. Nee duni instituisaun estado persiza haree parte leis sira nebe sai fator importante atu kontribui ba estabilidade tamba nee fas parte husi lei e orden. Bele kria lei barbarak maibe importante liu mak povu hetan benefisiu husi lei sira nee ( laos aprova deit maibe nia implemetasaun no benefisiu lei hanesan parte importante tebes).  Parlamento persiza komesa haree no fiskaliza lei sira (legislation monitoring)nebe la coresponde ona nesidade povu nia, liuliu uluk UNTAET husi hela. 

Durante Timor-Leste independensia, estabilidade sai ona hanesan fator importante iha prosesu dezenvolvimento nasional. Husi governasaun premeiro too agora tenta bebeik ona oinsa atu koordena no hatur lolos estabilidade tuir sira nia kapasidadeno maneira politika tuir lei iha Timor-Leste. Iha parte ida mosu bebeik sintido ida uza termus estabilidade sai hanesan ideologia ida ba dezenvolvimentu maibe persiza mos hanoin didiak katak “estabilidade” nee laos ideologia maibe konseinsia, direitu no dever sidadaun ida ida nia nebe governu no estado tenki proteza tuir lei no orden tamba ema ida ida hakarak moris hakmatek iha paz nia laran (moris hakmatek siknifika estbilidade). Agora iha aspeito rua fundamental nebe bele kontribui ba estabilidade nasional iha estado de direito democratico: iha iqualidade distribuisaun ekonomiku no iha estabilidade instituisaun estado sira nebe que independente no solidu ho spiritu separacao de poderes nebe bele mantein lei e orden.  Wainhira fatores rua nee la existe ona bele iha potensia boot atu halai ba injsutisa no instabilidade nasional. Wainhira governo hanesan poder executivo la iha ona poder no capacidade atu jere no orienta assunto distribuisaun economico ho efetivo no afikas e la consege halo koordenasaun diak atu hametin instituisaun esatdo selsluk para hametin lei e orden mak simplismente sei halai ba instabilidade. 

Distribuisaun direitos basicos ba igulidade hamutuk economico mak povu ou sidadaun ida ida iha direito atu aksesu ba qualidade edukasaun, saude, justisa, empregu, comercio , bee mos, direito ba rai no buat seluk seluk tan. Segundo lei e orden nebe sai mos fator determinante tebes ba prosesu estabilidade ida iha estado dedireito  democratic tamba lei e orden sai hanesan spiritu no lalenok ba ema hotu atu bele hetan sira nia direitu no responsibilidade tuir lei sira nebe vigor iha Timor-Leste. Independensia no estabilidade persiza no tenque intrepreta no pratika turi lei e orden (rule of law) tamba estabilidade tenki sai hanesan nesesidade ba sidadaun ida tuir lei e orden laos tuir poder politika or poder maioria husi instituisaun estado ida. 

Estabilidade sai ameasa no perigu boot ba rai ida wainhira governu ou estado komesa adora ou paranoia ona nia estabilidade rasik. Rai sira foin dezenvolve sai ditadura tamba sira uza konseitu estabilidade no instabilidade atu hetan poder no hamate valores no prinsipiu democrasia, hanesan bandu ema atu kolia no esersisiu sira nia direito no hanoin no kolia liu husi demostrasaun, la simu kritika konstruktivu, halo subornu ba partido politiku sira, organizasaun sosidade sivil inkluindo organizasaun religioza no veteranu. Tamba nee estabilidade nasional persiza intrepreta iha direitu ho dever cada sidadaun no independensia no estabilidade husi instituisaun estadu sira para sira labele influensia husi parte nebe deit ho maneira saida deit.

Dalan ida estabilidade bele existi no dura (tahan) wainhira instituisaun estadu sira iha independencia, intergridade ho estabilidade tuir lei e orden (rule of law), liliu iha separacao de poderes tuir lei inan no lei organic (regimento) sira husi kada instituisaun estadu  no konstituisaun nebe existe. Maibe wainhira instituisaun estado sira la iha ona independensia, integridade no estabilidade tuir lei e orden maka fasil liu halai ba instabilidade nasional tamba iha dependencia no estabilidade sai sentralizadu ba iha poder ida. Wainhira instituisaun estadu sira la iha ona independensia no estabilidade atu ezerse sira nia poder instituisaun konstituisionalmente, mak fasil tebes sai krize instituisaun estado nebe la refleta ona spiritu estado de direito democratico nebe hatudu ona iha krize 2006. 

Pais fragile hanesan Timor-Leste, nia estabildade depende  ba instituisaun estado sira atu hatur metin lei e orden hanesan pilar estabildade. Organizasaun sosidade sivil parte elementus importante atu contribui ba estabilaidade nasional hanesan parseira insittuisaun estado sira. Estabiliade nacional persiza iha konseitu no defenisaun ida claro tuir spiritu interese nasional “ common ground”. Maibe dala ida tan, sai pergosu ituan wainhira governu Timor-Leste komesa adora ou paranoia ona ho estabilidade, depois uza meius oioin, em termus kahor politika ho lei atu hametin estabilidade nasional  ou maneira ida harri estabilidade hanesan ideologia ba “interese nasional”. Estabilidade persiza iha nia definisaun claro tuir lei e orden nebe hanesan espiritu husi konstituisaun. Estabildade laos idelogia maibe sai hanesan direitu no dever kada sidadao tuir lei e orden, agora la iha lei orden sei iha instabilidade, wainhira iha lei e orden sei iha estabilidede. Instituisaun estado tenque iha firmeza atu hamatin lei e orden, laos fasil maibe sei fasil atu serteza ba lei orden atu haree estabilidade wainhira ema hotu hotu hamarik hanesan iha lei nia matan. Laos seitor economia deit mak persiza halo investimentu maibe lei e orden mos persiza iha investimentu nebe iha susteinabilidade.

Governu VI Konstitusional: Old Wine in a New Bottle

Publika iha Opiniaun

 

Hosi  NélsonBelo

 

Xanana Gusmão  rezigna an hosi kargu Permeiru Ministru Timor-Leste, maibe nia sidauk rezigna an hosi prosesu politik iha Timor-Leste. Xanana Gusmão  lasai ona cefi governu, maibe ho nia figura influensial historiku nian ne’ebe dalen iha Tetun katak “Ulun Boot tu’ur  nafatin iha Meza nia Ulun” ba prosesu saida deit iha Timor-Leste.

 

Dadaun ne’e governu foun mai ho kedas nia Permeiru Ministru foun (dotor Rui Araujo). Governu ne’ebe laos produz hosi “elisaun” hanesan prosesu demoikratik normal, maibe oponta hosi eis Permeiru Ministru Xanana Gusmão ne’ebe mos tur iha governu foun dadaun ne’e hanesan mos Ministru Planuamentu Estratejiku ho Investmentu. Modelu ida ne’e atu kaduak ka hanesan lalaok ho eis Permeiru Ministru Singapura Lee Kuan Yew ne’ebe uluk rezigna an hosi Permeiru Ministru ba fali Ministru dahuluk (first minister/ mentri Pertama) depois nia hili nia susesor Permeiru Ministru foun. Lee Kuan Yew nia dominasaun iha prosesu politik tomak iha Singapura maske nia laos cefi governu to nia hakdasak iha kadeira roda.

 

Xanana Gusmão ho governu Foun similarmente tintu tuan iha butir Foun.

 

Kazu Singapura se-ita prega ba kontekstu Timor-Leste nian, iha similaridade agresiva. Xanana Gusmão mos bolu ho estimadu romantiku naran “ maun Boot ka Avo Nana”  sei kontinua domina iha prosesu politika tomak iha Timor-Leste to’o nia laiha iha ita hotu nia let. Timor oan nain rau ne’ebe loial ho agresivamente ba Xanana Gusmão ne’e idak-idak laafilia ba Partidu Politiku ruma, aponta sai Ministro Interna ho Ministru Defeza. Ministru Interna foun Longuinos Monteiro ho Ministru Defeza foun Cirilio Cristovao ho klaru los sei lacente responsabilidade ba Permeiru Ministru foun Rui Araujo maibe sei ba eis Permeiru Ministru Xanana Gusmão ne’ebe nudar Ministru Planuamentu Estratejiku i Investementu. Formatu foun ida ne’e estrainu maibe laestranu liu hanesan ema barak nia hanoin, tamba realidade politika Timor-Leste ba dadaun ne’e mak nune’e duni, ne’e sorin ida.

 

Hosi sorin seluk, entre tinan 2013 ho tinan 2015 Xanana Gusmão halo relasaun politik romantiku tebtebes ho rezultadu susesu los ho partidu opozisaun FRETILIN ne’ebe dadaun ne’e asumi kargu “savi” iha governu VI Konstitusional, no  Sekretariu Jeral Partidu FRETILIN Dr. Mari Alkatiri mos foin aponta sai Prezidente ba Autoridade Otonimia Espesial ba Regional Oekussie ne’ebe nia kna’ar funsionamentu barak hanesan funsaun membru governu.

 

Iha komentariu barak ne’ebe naklekar iha publiku Timor-Leste ho internasional  katak lalaok formatu ba governu lademokrasia ida ne’e, ne’ebe nasaun Republika Demokrasia de Timor-Leste adopata dadaun ne’e funsiona hanesan “monarkia/kerajan”. Dala ruma ne’e bele los ou bele sala, maibe realidade hatudu katak Xanana Gusmão  ho elit partidu Politiku sira hatene nia sasidik ho risku boot ho ninia sensitividade duni , entre husu Xanana Gusmão  husik ka sai imidiatamentu hosi porsesu politiku iha Timor-Leste.

 

Estabilidade Timor-Leste radikalmente dependenti ba  Xanana Gusmão, Veteranu ho Fundus hosi Tasi Timor. Wainhira desloka ida hosi hirak  ne’e ho lalais, maka lalaok politika iha Timor-Leste bele hamosu insiguru seguransa no tentative ba ameasa estabilidade nasional. Re-organizasaun ba modelu governu tuir politika Xanana Gusmão  nia dadaun ne’e, dezena tiha ona nia mekanismu ida hodi  sei koko i koko daudaun ona ba kapasidade nasional atu atende no fo responsta gradualmente depois Xanana Gusmão totalmente sai.

 

Gropu rebeldes kontinua eksiste liu-liu iha Munisipiu Baucau. Gropu sira ne’e laos ameasa, maibe sira hanesan halo book oituan depois halai. Karik husik deit lahalo atendementu maka kleur ka lalais bele estraga ita nia pasensia. Perguntas mak ida ne’e, bele ka lae governu foun ne’ebe lideradu hosi doutor Rui fo solusaun, ou ka Xanana Gusmão  sei kontinua kaer hamutuk? 

 

Utulizasaun forsa ho postura boot ba kada operasaun hasoru gropu saida  iha foho no iha sidade sai ona atitude politika agresiva. Bele ka lae governu foun sei reduz ka hamenus atitude politika ne’e? Ministru Defeza ho Ministru Interna foun sei hetan xamada hosi sira nia bos Ministeru Planuamentu Estratejiku i Investementu atu halo dezisaun.  Dala ruma iha biban kiik liu ba PM Rui atu involve nia dezisaun final, hanesan kura moras iha uma moras ne’ebe durante ne’e nia halo.  

 

Aknanoik ita bele Hamutuk!

 

Iha biban saida deit Xanana Gusmão  sempre alerta aiknanoik ida ne’e ” Hamutuk ita bele la’o ba oin ho lalais”. (Xanana). Maibe iha mos lia hatan hosi Mari Alkatiri “ ita so bele hamutuk la’o ba oin , maibe so lolos ho momos mak foin ita hamutuk  ba oin ho lalais” (Alkatiri).  Bainhira PM Rui halo deklarasaun nia riku soin ba Komisaun Anti Korupsaun (KAK), ne’e  nudar pratika politika real hosi aiknanoik hosi Lia Nain Xanana-Alkatiri. katak tenki ho momos bele hamutuk la’o ba oin, ba membru governu sira ne’ebe lao lalos no lamos sei laiha fatin ba sira atu hamutuk. Maibe karik “terlanjur” hamutuk sei sai oinsa los?  

 

Karik iha leten hanesan lalatak ba presente, oinsa iha Futuru? 

 

Iha rit’mu muzika Politik nian iha Timor-Leste, elit sira halo kompitisaun ho ambisaun maka’as ho boot tebtebes atu tur hakdasak an hakmatek iha kadeira mamar hanesan preszidente, Permeiru Ministru, Ministru ho visi ministru/a, Sekretaria do Estadu, ho Membru Parlementu. Agora ita hela tempu restu fulan 24 deit atu hakur ba elisaun prezidensial ho parlementar tuir mai iha Timor-Leste. Mundansa Politkka komtemporer mosu dadaun ona iha governu, no ema sira balun ne’ebe bele sai kandidatu ba elisaun tuir mai iha tiha ona karik?  

 

 

Imajina Xanana Gusmão nia planu atu ba elisaun presidensial ba 2017

 

Ita bele imajina  Taur Matan Ruak (TMR) atual Prezidente sei nomea ba PM hosi partidu FRETILIN ou CNTR, ou partidu kiik sira ne’ebe sei halo kolegasaun? Bele ita imajina Xanana Gusmão sei suporta kandidatura TMR nudar cefi governu ba tinan 2017-23 iha biban ne’ebe Xanana Gusmão sei domina Politik, maibe nudar Presidenti Seremonial? Resposta ba perguntas hirak ne’e mak ita hotu bele imajina hamutuk ka lae? 

 

(Artigu ida ne’e larepresenta institusaun ne’ebe Autor haknar ba, maibe idea no argumentu sira ne’ebe lekar iha artigu ne’e nudar opiniuan pesoal! Autor nudar Observador Politika-Seguransa halo kna’ar iha NGO Nasional Fundasaun Mahein). 

 

 

Martinho G. da Silva Gusmão

 

Iha ninia alocução, RMA hatudu simpatia ba projecto piloto ZEESM iha Oe-Cusse nu’udar modelo foun ida nebe sei halo Timor Leste moris di’ak. Maski nune’e, TMR hatudu sinal ki’ik ida, katak, “la precisa hasai milhões de dólares atu halo uma andar hanesan Ministério das Finanças no Oe-Cusse”. Husi diferencia lotuk ne’e mosu labirinto da democracia be dramático tebes. Moras ida ne’e todan!

 

Ba ha’u ZEESM ne’e hanesan “Kelinci Percobaan”! Sukat husi sikun legal no política, Lei no. 3/2014 konaba ZEESM ne’e hanesan crime husi Estado hasoru Povo. Husi sikun teologia moral, “projecto piloto” ne’e hatudu de’it “cultura da violência” no “cultura da morte” (liafuan husi São João Paulo II, Evangelium vitae). Ne’e katak, ita toman ona atu halo susar no terus, tanis no halerik ba povo to’o mate no lakon direito ba moris. 

 

“Abaixo Capitalismo”

 

Uluk 1975, FRETILIN hakilar bebeik abaixo capitalismo. Iha eleições 2007 no 2012 mos partido histórico ne’e halo nafatin propaganda ne’e. Ne’e linguagem iha The Communist Manisfesto (1848) nebe Karl Marx ho Friedrich Engels hasai! Tuir sira nia hanoin, “bourgeoisie” sira halo “exploitation of the world-market”, raut no rakut mos fatin “production” no manipula ema nia gosto ba “consumption”. Hodi ida ne’e mak sira sai tiha capitalista! Katak, bou no tibak hamutuk rikusoi no osan iha grupo (burgesia) nia liman. Ho brutalismo, sira harahun tiha sistema industria nacional no hatama sistema foun. Liu husi sistema foun ne’e, capitalista sira kesi metin tiha cidadão nia “a life-and-death question”. Hodi hamaten tiha “indigenous raw material” ka “old and national seclusion” no “the old wants”, capitalista no burgesia hatama fali “new wants” hodi bele habosu no habokur sira nia an rasik, liu husi gurita corrupção ida: “intercourse in every direction, universal interdependence of nations” (liafuan sira inglês nian hasai husi The Communist Manifesto: 223). Atu bele “abaixo capitalismo” ida ne’e mak Marx-Engels hakilar atu halo revolução hodi hari’i hikas socialismo. 

 

Maibe, tan sa mak capitalismo la naksobun? Tan sa mak socialismo la manan (1992 USSR rahun rasik)? Matenek nain sira husi escola marxista rasik mak hateten nanis ona. Uluk nana’in (1), husi sikun ECONOMIA nian, Ludgwig von Mises (1881–1973) ho ninia “Wirtschaftsrechnung” (argumento da calculação económico) dehan katak economia socialismo la iha racionabilidade (pendasaran yang masuk akal) no praticabilidade (perwujudan nyata), tan “humans are not able to operate a society on ‘socialist’ lines, because modern industry cannot be successfully guided or administered without information provided by market prices of factors of production” (cf., D.R. Steele, From Marx to Mises, 1992: xvi. 2). Mises dehan katak Marx nia proposta konaba economia socialismo ne’e insuportável (tidak mungkin bertahan). Ba Mises, uluk nana’in sociedade ida atu bele moris di’ak, iha uluk lai industria no mercado! Mercado fa’an sasan ho folin nebe competitivo. Sasan sira ne’e mai husi industria nebe produz ho qualidade di’ak. Ne’e duni iha “competição” ba sasan nia folin. Marx fali buka de’it mak dehan abaixo capitalismo, hotu tiha ba toba nonok lakon. Mises fo hanoin katak atu sociedade ida bele moris di’ak wainhira iha ona economia de mercado! Husi ne’e mak mosu proposta konaba “economia social de mercado” (cf., N. Abbagnano, Storia della Filosofia, 2003: 142-150). Ne’e duni, “economia social de mercado” (ESM) ne’e la’os modelo foun nebe MA halo! Mises mak hetan teoria ida ne’e tan la fiar Marx nia analisa critica sira. Hateten lolos karik, MA halo “coppy and paste” de’it iha Oe-Cusse.

 

Tuir mai (2) husi SOCIOLOGIA (sociology of knowlege) Marx hanoin katak “estrutura social” hotu-hotu hari’i husi “classe social”. Revolução mosu hanesan sinal husi confrontação iha “classe social” sira nia laran. Maibe, Karl Mannheim (Ideology and Utopia: An Introduction to the Sociology of Knowledge, 1968) dehan katak revolução labele la’o wainhira la iha “free-floating class” nebe hatudu duni “autonomous intellectuals”. Wainhira la iha homo criticus mak revolução sei namtate. Mannheim dehan intelectual sira labele sai fali “the bureaucratic authoritarianism”. Ho liafuan badak, revolução proletar bele sucesso wainhira iha suporta intelectual. Wainhira intelectual nonok de’it, ne’e katak hahu ona “the eclipse of Enlightenment” (Max Horkheimer) no “the decline of working class” (Herbert Marcuse). Iha 1975 dehan “P’lo caminho da revolução” husi FRETILIN ne’e mak halo povo mate mohu, tan la dun iha ema matenek. La iha classe intelectual nebe forte atu suporta. Iha 2015, FRETILIN halo ZEESM maibe maibe ho intelectual sira nebe tauk atu lakon “contract”! MA halo beik de’it ita foinsae sira.

 

Tutan ba (3) aspecto POLITICA. Marx fiar katak atu hari’i sistema social ida, Estado halo manutenção ba ninia poder liu husi “class struggle” entre proletar hasoru capitalista sira. Classe proletar mak kaer ukun hodi hametin “interesse nacional”. Maibe, liafuan “interesse nacional” sai fali “conflito nacional” wainhira “penguasa” hahu hadau malu ho “pengusaha”. Iha situação hanesan ne’e Nação (povo). Norberto Bobbio hakerek «se for luta de classe se entende a luta entre a classe dominante e a classe dominada, é preciso contudo reconhecer que o teatro da história apresenta muitos outros protagonistas e, com freqüência, bem mais terríveis, que são as classes dominantes em luta entre si, de cujo domínio as classes dominadas sempre foram instrumentos passivos ou vítimas inocentes …» (Teoria Geral da Politica: 345). Ha’u fiar katak ZEESM Oe-Cusse ne’e sai fatin nebe Povo Atoni no Timor Leste sai vitima, tan MA no empresario sira husi FRETILIN hadau malu “profit” ho empresario sira husi Indonesia liu husi “kurita KKN” (liman barak mak lamas no raut osan hatama bolsu). Ikus mai, Oe-Cusse sai de’it “lumpen proletar” (Marx nia liafuan), Liafuan “lumpen proletar” katak grupo bandido sira, naok ten no lanu ten sira, ka, ema sira nebe ukun-na’in sira considera folin la iha lori halo revolução. Manan tiha funu, kaer sira joga sai ba liur. MA nia liafuan karik lumpen proletar ne’e mak “fahi krekas” “fuk naruk la fase”, “manduku”, no seluk tan. 

 

Haka’it ba (4) aspecto MORAL. The Communist Manifesto halo “abaixo capitalismo” sai nu’udar “crença política” (ideologia) ida. Maibe, ideologia la’os crença moral. Iha luta atu hada’u poder, político sira hakilar “povo nia terus, tanis no susar”; “povo maubere”. Manan tiha kadeira, sira ko’alia konaba ba hametin “Estado” no hare ba “interesse nacional”. Interesse nacional ne’e sukat la’os de’it husi material maibe mos espiritual. Ne’e duni, ema la’os deit ko’alia konaba “surplus value” (Marx), maibe mos “ethics value”. La’os ona socialismo (comunismo), maibe “capitalismo” nia liafuan (Max Weber, The Protestant Ethics and Spirit of Capitalism, 1970). Ne’e duni, abaixo capitalismo ne’e bosok ten! Partido be hakilar abaixo capitalismo, manan eleição ka revolução sei hananu viva capitalismo! Iha Oe-Cusse “viva capitalismo falso”!

 

No ikus liu (5) husi TEOLOGIA. Marx hakerek nune’e, “Religious suffering is at the same time an expression of real suffering and a protest against real suffering. Religion is the sight of the oppressed creature, the feeling of heartless world, and the soul of soulless circumstances. It is the opium of the people” (cf., Karl Marx Selected Writings, 2002: 72). Marx hatudu momos katak ema sira nebe terus no halerik, tanis no hakilar, fakar ran no mate mak halai ba religião. Iha religião nia laran mak ki’ak no mukit sira sente netik kman no hakmatek oituan. Los, Marx acusa religão nu’udar “opio do povo”, tan la ko’alia konaba revolução no taka ibun hasoru injustiça, sofrimento no miseria. Tuir Marx, religião tenki revolta hasoru ukun-na’in sira nebe hanehan povo. Iha Timor Leste, husi 1515, liu-liu 1975 to’o 2015, catolicismo sai “voice of voiceless people”. Dom Martinho da Costa Lopes no Dom Carlos F.X. Belo SDB sai hanesan povo nia nanal, povo nia tilun no povo nia fuan. Papa Francisco dehan Igreja Catolica halo “revolução da ternura” (revolução fuan laran nian); la’os “revolução fisica” (violencia). Igreja hanorin “Spes salvi” (esperançã mak salva). Ernst Bloch (marxista ateu) ida mak dehan katak cristianismo nia hun no abut mak revolta hasoru injustiça social, escravidão (perbudakan) no cativeiro (kerusakan). Igreja loke janela no odataman atu ema ki’ak no mukit sira hare ba futuru, iha nafatin “esperança” atu hada’u moris nebe di’ak liu tan (E. Bloch, The Principle of Hope, Volume I-III, 1993). Cristianismo la’os “opium”, maibe “energia” (esperança) atu hadau liberdade no haklaken salvação; ba sarani sira liberdade katak salvação. Gloria ba Maromak leten as ba ne’e los duni, maibe tenki iha justiça no paz iha rai klaran (José P. Miranda, Marx y la biblia, Critica a la filosofia de la opresion, 1971). La vale ona atu dehan “Igreja labele tama política; Bispo ho Padre sira hasai tiha batina mak halo política”. Ema sira ne’e mesak traidor ba história Povo Timor Leste.

 

Ersatz Capitalism: Sakitnya tuch di sini ...

 

Hare ba revolução (socialismo/ comunismo) nebe fo moras no mate ba povo, no capitalismo nebe halo krekas de’it ema nia moris, Konrad Joseph Adenauer (1876-1967) hola hikas “Soziale Marktwirtschaft” ka “The social market economy”. Adenauer sai Kanselir 1946 hodi troka Adolf Hitler nebe halo Alemanha sai inferno iha história mundial. Partido Christlich Demokratische Union (CDU) foti hikas ESM nu’udar ninia plataforma política. Nu’udar sarani ho devoção boot, Adenauer hatur Doutrina Social da Igreja Católica nian: “Bem comum, solidariedade, no subsidiariedade” iha ninia política. Dala ida tan, ESM ne’e la’os líder partido FRETILIN mak design, maibe União Democratica Cristã. Hela furak wainhira “Maun Bo’ot” ka “Katuas Bo’ot” sira labele de’it dehan “sarjana supermi” ka “sarjana la iha kualidade”, maibe lori fali ema nia matenek mai lohi no bosok fali foinsae no bei-oan sira.

 

Hau hare DVD konaba Projecto Piloto ZEESM no Lei no. 3/ 2014, depois sukat ho livro S.F. Franke & D. Gregosz, The Social Market Economy: What Does It Really Mean? (2013). Iha liman sorin, ha’u kaer mos Kunio Yoshihara, The Rise of Ersatz Capitalism iha South East Asia (1988) no Ch. Arsnperger, Critical Political Economy (London, 2008). Husi ne’e ha’u hakarak ta’es hanoin balun:

 

Ida uluk (1), ESM ne’e hatudu ba “private ownership of the means of production including economic freedom, professional freedom, both necessarily linked to liability”. Ne’e CAPITALISMO asli. Oinsa mak “private ownership” bele moris iha ZEESM laran?  Ema sira nebe kaer ukun iha Oe-Cusse sei hetan “private ownership” liu husi “nauksaun” no “corrupção”. OGE 2015 fo osan US$ 81,390M ba Presidente da Autoridade Oe-Cusse. Yoshihara dehan liu husi “rent seeker” ka “rent-seeking behaviour”: MA sei sai “padrinho” no  nia sei “sunat” nia “oan sarani” sira. Oinsa mak “sunat” sira? Yoshihara nia analisa:

a) “Horizontal investment” – katak “modal” husi liur mak tama barak atu bele ajuda Estado no povo. Maibe, ita hare ona Estado mak hatama US$ 81,390M; investidor husi rai liur bolsu mamuk. Iha de’it “promessa” no “acordo” barak. Liu husi Lei no. 3/2014, MA sei usa osan ne’e tuir ninia “poder regulamentar” rasik (artigo 9o). Lei no regulamento hanesan lâmina kroat ida iha MA nia liman atu lori “sunat” osan sira sira ne’e.

b) “Vertical investment”, Estado hasai osan atu investe liu husi empresário local. Iha Oe-Cusse, Estado mak investe osan US$ 81,390M ba MA. Nia forma ona “empresário local” (mesak dirigente FRETILIN de’it). Sira sei hatutan contrato ho Waskita Karya (WK), Hutama Karya (HK) no Adi Karya (AK). Ema nebe hatene “The Business Pillar of Suharto’s Indonesia” hatene mos katak companhia sira ne’e Golongan Karya (Golkar) no Militar (ABRI) nia “oan sarani” sira. Atu hahu, MA halo contrato US$97M ho WK atu kaer aeroporto Internacional iha Oe-Cusse (tan sa la halo iha Dili nu’udar Capital; ka hadi’ak de’it iha Baucau nebe fo beneficio ba Timor Leste tomak?). Ita bele hare momos ona, katak, Partido GOLKAR ho FRETILIN sei hametin cooperação iha Oe-Cusse. Ha’u hanoin uluk militar Indonesio hanorin ami hananu “Integração ho Indonesia, Timor bele manan”. Agora FRETILIN hanorin Oe-Cusse, “integração ho Indonesia, Oe-Cusse bele manan”.

c)“Conglomerate investment” katak empresário internacional mak sei lori osan mai. Japão, China no Korea sai “State capitalism”, moris ho “emerging market”, investe sira nia osan ba Nação sira iha ASEAN. Sira halo investimento hamutuk (joint venture) ho Australia no USA. Iha Timor Leste, nação hirak ne’e la’os “investor”, maibe “doador”. Iha conferencia PLG (Policy Leader Group) Timor Plaza, Arsenio Bano dehan empresário internacional pronto ona atu investe iha ZEESM. Maibe, Bano nia body language ne’e hatudu katak nia mos la fiar nia liafuan rasik!

 

Tuir mai (2), “Competition as a goal that ensures freedom and that includes free consumer choice”. ESM hakarak atu ema hotu bele halo competição, liu-liu atu hatama, fa’an no hola sasan. Iha ne’e, consumedor sira ninia interesse mak sai hanesan sasukat atu empresário sira bele halo competição livre. Iha ZEESM nia laran, MA mak determina ... nia mak halo jogo, nia mak arbitro no nia mesak mak joga. Equipa nebe atu joga mos ida de’it: FRETILIN. Dala ida tan, Yoshihara bele ajuda ita atu hare “competition” ka “jogo” Ersatz capitalism ne’e:

a)Capitalismo “Keraton”. Iha ASEAN Yoshihara hatudu ba Sultan sira nebe riku ona, usa sira nia rikusoi atu investe ba Estado hanesan Kesultanan Yogyakarta, Malaysia, Brunei Darussalam no Thailandia. Iha Oe-Cusse sai “zona especial” tan, MA halo sai ona “Keraton” (hanesan Yogya?). Nu’udar “Sultan” MA mak halo “designação” (artigo 17o) ba autoridade ZEESM/ AREAO. La iha “eleição” democrático. Se Indonesia iha “Daerah Istimewa Yogyakarta”, Timor Leste mos iha “zona especial Oe-Cusse”. Diferencia, Yogya (ka Brunei, Malaysia ka Thailandia), Liurai sira investe nia rikusoy ba Estado no Povo, MA fali ba hasai Povo Timor Leste nia osan atu investe iha ninia “Keraton Oe-Cusse”.

b)Capitalismo “Konco” (iha Timor ha’u hanaran “capitalismo Padrinho”). Soeharto nia Konco (husi China lian: zu hong = maluk ho boss) mak hanaran “Gang of Four”: Liem Sio Liong, Sudikatmono, Djuhar Sutanto no Ibrahim Risjad. Sira manan “tender” liu husi Soeharto nia “nota”. Ikus mai tama mos Tomy Winata. Nia mak sai sponsor atu Beny Moerdani no Dading Kalbuadi hetan osan suficiente halo invasão ba Timor Leste 1975. Tomy Winata mak kaer projecto andar boot sira iha Dili. La kleur ba Oe-Cusse. Ne’e duni, MA fanu hikas lafaek dukur!

c)Capitalismo “beauraucracy” nebe halo ema sira nebe kaer maquina estado nian riku lalais. Tuir Yoshihara karik ita bele hare katak (i) ema sira nebe sei tur iha “sede do exercício” (Conselho de Ministros) no “sede de apoio” (diretor/ chefe sira iha ministério) foti decisão ba projecto ida maibe wainhira la iha beneficio ba nia-an, sei la liu; (ii) iha “sede efectiva”, sira la kaer governo, maibe bisu-bisu iha ministro nia tilun konaba viabilidade projecto ruma; no (iii) sira nebe la kaer ona buat ida iha governo/ Estado maibe hatutan projecto husi boss sira.

 

Nune’e mos (3) ESM hatur iha “A stable and workable monetary system with price stability”. Liu husi dalan ida ne’e mak empresario sira bele hare “velocity of money” no “speculation”! Iha Lei no. 3/ 2014, ZEESM ninia objectivo ida mak “criação de uma praça financeira ética”. Saída mak ne’e? Ita la hatene los. Maibe, ho BPA, banco MANDIRI, BNU no ANZ nebe la mate la moris iha Dili no distrito balun, oinsa mak empresário sira bele tama iha “velocity of money” (osan halai maka’as tama sai) no oinsa mak hare konaba “speculation”? Ita nia moeda boot liu mak 50 ho 100 centimos! Empresario Atoni ida nebe mak brani atu ba halo “speculation” iha Wall Street ka Nikkei, ka Hongkong ka Bursa Efek iha Jakarta ho osan hirak ne’e? Iha Dili de’it MA no XG halo labele ona, sa tan iha Oe-Cusse? Tuir hau nia hanoin, economista nebe de’it mak “hanorin” MA no XG halo projecto piloto ZEESM ne’e la iha duni sentimento konaba Oe-Cusse nia terus no susar. Sira buti mate de’it Atoni oan sira, coitado!?

 

Tuir mai (4), ESM hare ba “High employment”. Wainhira MA halo campanha konaba ZEESM iha Oe-Cusse ita hare ema ki’ik no mukit sira mak tur iha nia oin. Dala ruma Tetun mos sira la dun rona karik! Wainhira MA ko’alia kona ba ZEESM ema sira ne’e mehi, tur hateke ho matan mamuk. Maibe, MA fila ba Dili, sira mos fila ba uma fo han fahi, manu, bibi, karau no seluk tan atu halo feto-san umane! Ho ema sira hanesan ne’e MA sei hametin “high employment” halo nusa? Solução: ZEESM nia objectivo (Lei no. 3/ 2014, art. 5o) atu hari’i Universidade bo’ot, Centro de Investigação ba Mudança Climática, Verde, turismo, industria extractiva, exportação no importação, aeroporto internacional, nst. ZEESM ne’e hanesan “socialismo utópico” (Marx) ida nebe halo ema sira iha Oe-Cusse mehi loron mean. MA hanesan lori “ópio” ba Povo Atoni sira. Maibe, atu hetan “high employment”, ha’u sente MA sei lori ema husi Indonesia mak mai, ka, Macau no Hongkong. Tan ema sira ne’e mak iha “high performance” iha área casino (perjudian), money laundry (kejahatan pencucian uang), no centro ba prostituição. Oe-Cusse oan sira mak rahun no ut tiha ona.

 

Nune’e mos (5), ESM hakarak atu hametin “Fair distribution of income”. Iha filosofia “fairness” sai hanesan sasukat ba justiça social (“justiça distributiva”) nu’udar virtude boot instituição político sira nian (Cf. John Rawls, A Theory of Justice, 1970). Ita nia Lei-Inan mos hakerek konaba “Promover a edificação de uma sociedade com base na justiça social, criando o bem-estar material e espiritual dos cidadãos” (CR art. 6o alínea e). Liafuan “cidadãos” (plural) katak ba Povo Timor Leste tomak! La’os Oe-Cusse mesak! Tuir Igreja Catolica nia hanorin, principio atu hametin justiça social no paz mak bem comum, solidariedade no subsidiariedade. Iha Lei no. 3/ 2014, ZEESM mos hatur “Principio da solidariedade nacional” (artigo 6o) no “Principio da subsidiariedade” (artigo 7o). Problema iha nebe? Problema mak ne’e, Lei no. 3/2014 ne’e ko’alia konaba “corrigir as desigualdades” nebe mosu iha Oe-Cusse tan la iha “equidade na distribuição das riquezas”; nune’e MA mai hanesan herói ida iha Oe-Cusse atu bele halo “redução dessas desigualdades”.

 

Ha’u empresta lai Maun RMA nia liafuan (artigo ida dirige ba ha’u, 2005 wainhira sei Ministro de Saude) atu hateten ba MA katak Presidente da Autoridade Oe-Cusse ne’e hatudu de’it ninia “ignorância atrevida” (bahasa Indonesia karik: MA sok pintar). Ema hotu hatene katak Timor Leste ne’e Nação riku, maibe Povo ki’ak. La’os Oe-Cusse mesak mak ki’ak no mukit. Timor Leste ninia “igualdade” mak iha pobreza no miséria nia laran. Desigualdade iha nebe los? Dili mak riku. Dili mak buat hotu iha. Timor Leste ne’e “Dili centric”. MA hanoin karik Oe-Cusse sai ki’ak tan Distrito 11 mak han mohu Timor nia rikusoy ga? Be oinsa mak MA bele iha fuan no laran atu hare katak Distrito 11 hetan de’it US$ 54,4M resin, maski estrada, escola, hospital no estrutura social mukit liu? Tan ne’e mak ha’u fiar katak ZEESM ne’e hanesan crime organizado no legalizado husi Estado hasoru Povo.

 

Ikus liu (6) ESM hakarak Europa tomak atu tama iha “European integration” ida. Iha 2002, Eropa tomak adopta “moeda única” – euro! Liu de’it tinan 10, iha 2012 Europa tama iha crise financeira global. ESM halo Portugal, Espanha, Italia, Grecia no Irlandia sai bankrut (bail-out). Bail-out katak Estado/ Governo la iha ona osan atu sustenta Nação tomak! MA nia mehi iha Lei no. 3/ 2014 mos atu halo ZEESM sai hanesan ponte atu bele tama iha mercado ASEAN, CPLP no g7+ (artigo 5o alínea 2.xi). Ha’u la hatene se iha tebes “mercado” iha CPLP no g7+ nia laran. Maibe, 1988 Yoshihara hakerek “Ersatz capitalism” moris iha ASEAN. Iha 1997 ASEAN tomak tama iha “krismon” (krisis moneter). 1998 Soeharto mos monu. Povo mak moris ki’ak no mukit, tanis no halerik. Timor Leste hetan sorte, tan 1999, B.J. Habibie fo dalan ba referendum. Maski ha’u la cumpreende “mercado” CPLP no g7+ ne’e oinsa lerek, maibe hau hatene oituan katak ASEAN la adopta economia social de mercado, maibe economia cooperativa.

 

Ha’u hanoin hetan fali uluk, ha’u nia aman sai delegado FRETILIN hanorin ami atu hananu música ho liafuan nune’e “... malae sira na’ok ita nia rain, liurai sira fa’an ita nia rai, ema riku ho matenek sira be bosok ita ...” (ha’u haluha hotu ona, hela de’it frase ida ne’e mak metin iha ulun laran).

 

 

 

Husi: Moisés Vicente

Alumni: Universidade da Paz (UNPAZ)-2008

Telefone: +670 77291406

 

Instituisaun judisiáriu, sistema lei no judisiáriu iha Timor-Leste nudar instituisaun importante ne’ebé mak tau matan no suporta iha área justisa nian hodi fó julgamentu ba ema sira ne’ebé hamrook no buka justisa. Papél jurisdisionál Timor-Leste nian ne’ebé hakerek iha konstituisaun Repúblika Demokrátika Timor-Leste artigu 118, 1). Tribunál sira mak órgaun soberania ne’ebé iha kompeténsia atu hala’o justisa hodi povu nia naran. 2). Wainhira hala’o nia papél, tribunál sira iha direitu atu servisu hamutuk ho autoridade sira seluk. 3). Desizaun ne’ebé mak tribunál sira fó ona tenke halo tuir no soi kbiit aas liu desizaun autoridade sira seluk nian. Iha artigu 119 Konstituisaun RDTL hatete Tribunál sira independente no sira sei halo tuir deit Lei-inan no lei-oan sira haruka. No mós artigu 120 konstituisaun RDTL Tribunál sira labele halo ukun ka norma ne’ebé kontra Lei-inan eh PRINSIPIU sira ne’ebé konsagra iha nia laran.

 

Podér instituisaun judisiáriu, podér judikativu mai husi dalen Latina judiciariu nu’udar podér mak iha kbiit hodi kontrola lala’ok lei nian rasik. Papél jurisdisionál ne’e juís sira nia deit, ne’ebé simu papél tuir lei haruka iha konstituisaun RDTL artigu 121 alinea 1 iha prespektiva estadu direitu, poder judikativu ne’e iha sentidu rua; 

Dahuluk, podér atu kontrola implementasaun lei ne’ebé mak ezekutivu implementa. Ne’e duni jeralmente, podér atu hala’o kontrola ba servisu ezekutivu ne’e hanesan ideia ne’ebé adopta husi teoria trias politika Montesquie. Judikativu ninia servisu mak halo kontrolu no ikus mai foti desizaun balun ne’ebé presiza halo sobre hahalok no lala’ok  ezekutivu nian ne’ebé mak konsidera la’o la tuir lei. Iha kontestu foti medida ka desizaun ruma sobre ezekutivu nian, judikativu la’os deit haree iha administrasaun nian, maibé mós fó autoridade ba judikativu atu foti medida ruma hodi rezolve problema ne’ebé mak akontese. 

Ba daruak, signifika katak judikativu ne’e rasik nudar podér ne’ebé  mak atu kontrola implementasaun lei to’o iha baze. Signifika katak produtu lei ne’ebé deit mak eziste iha nasaun ida, instituisaun judikativu nia autoridade tomak atu halo kontrolu. Konseitu jerál atu halo kontrolu ne’e la’os deit ba instituisaun maibé mós ba privadu sira hotu. Kompeténsia ne’e iha nasaun barak mak adopta. Haree ba podér judikativu ne’ebé mak nia interpretasaun ne’e la’os deit hakarak fó maka’as ba pesoál sira ne’ebé mak viola lei, maibé mós ba distorsaun ba produtu lei hotu ne’ebé mak instituisaun lejizlativu. Tanba ne’e mak interpretasaun ba podér judikativu ne’e luan tebtebes. Tanba ne’e mak atu halo kontrolu ba produtu lei ruma, nuda’ar kompeténsia no responsabilidade tomak judikativu nian.         

 

Matenek na’in balu nian fó definisaun ba lei katak, tuir E. Utreccth, S.H definisaun lei mak hanesan lei sira ne’ebé deit mak halibur hamutuk sai ida deit, hanesan dekretu-lei no sansaun sira  seluk ne’ebé mak regula ema nia moris; liu-liu sobre regulamentu ne’ebé mak eziste iha komunidade ida nia leet no mós komunidade sira ne’e tenke hakru’uk no obedese ba lei ne’e. Entertantu J.C.T Simorangkir no Woerjono Sastro Pradono S.H katak lei ne’e rasik nudar regulamentu ne’ebé mak iha karateristiku hodi obriga ema ne’ebé hakarak viola lei ne’e, nia mós sei hetan sansaun tuir lei haruka. Prinsipiu legalidade ne’e mak hanesan hahalok estadu, governu nian ka hahalok povu sira ne’ebé mak atu halo buat ruma, tenke tuir lei no sistema ne’ebé mak eziste iha nasaun ne’e rasik. Lei ne’e rasik regula ema nia atividade, oinsa ema foti desizaun ruma no oinsa lideransa sira foti desizaun tuir regulamentu ne’ebé mak eziste ofisial iha nasaun ida. Lei ne’e rasik iha karateristika hakuak ema hotu, maibe mós limiti ema nia hahalok. 

 

Justisa tuir definisaun sientista sira nian, justisa tuir Thrasymachos, filózofu Gregu nian ne’ebé defini katak justisa tuir ninia hanoin justisa ne’e rasik atu defende interese ema ne’ebé mak iha podér. Signifika katak ukun na’in sira ne’e nudar ema ditadura ne’ebé mak obriga ninia hakarak ba povu nu’udar lei ne’ebé mak aas liu no justu duni, tanba fó duni vantajen ba ninia interese. Justisa tuir Plato (427-347 antes Cristo) hatete katak estabilidade ne’ebé mak eziste duni entre grupu sira no mós entre entidade ánimu sira nian. Tuir Aristoteles (384-322 antes Cristos) fahe justisa tuir karaterístiku haat: Ida, justisa distributivu (Keadilan distributif) signifika katak justisa ne’ebé iha relasaun ho distribuisaun hahalok diak, moris diak, serbisu, no mós tuir kapasidade ema ida-idak nian. Rua, justisa komutativa (Keadilan komunitatif) hanesan justisa ne’ebé iha relasaun ho igualdade ne’ebé ema hotu simu la’os haree husi ema nia hahalok diak. Tolu, justisa nudar distinu naturál (Keadilan kodrat alam) hanesan justisa ne’ebé mai husi lei destinu naturál. Haat, justisa konvensional nudar justisa ne’ebé mak kesi metin sidadaun hotu, tanba justisa ne’e rasik nudar dekretu-lei ne’ebé mak prodús husi ukun na’in sira, ne’e sorin ida.          

 

Husi sorin seluk, sidadaun Timor-Leste ou eis membru Governu ne’ebé halo abuzu poder no halo krime korrupsaun. Ita liga  justisa tuir definisaun husi Plato no Aristoles se ita prega kontekstu Timor-Leste nian, iha ne’ebé durante ne’e fó sai manas los iha mídia Nasional, mídia Internasional no ONG Sosiedade Sívil katak iha eis Membru Governu Kuartu to’o Kintu (IV-V) Governu Konstituisional balu iha mandatu eis Primeiru Ministru Xanana Gusmão nia tempu, balu halo kazu krime Korrupsaun. Maibé eis membru Governu refere bolu husi Tribunál Distrital Dili (TDD) no Komisaun Anti Korrupsaun (KAK) lakoi hatan nia sala ne’ebé eis membru Governu ne’e halo krime korrupsaun. Iha konstituisaun RDTL  artigu 113 hatete mos los ona katak, Governu nia membru hatán kona-bá krime, 1). Wainhira membru Governu ida akuzadu loloos ba krime, ne’ebé bele simu kastigu iha kadeia boot liu tinan rua nian, tenke para hala’o servisu atu bele foti prosesu. 

 

Tuir ha’u nia hare’e katak, ho impedimentu ne’ebé eis Primeiru Ministru Xanana Gusmão halo ne’e mós komete krime la partisipasaun tuir artigu 286 Kódigu Penál (KP). Iha artigu 286 ne’e hateten katak “Ema ne’ebé, iha tiha ona koñesimentu katak ema ruma halo krime públiku ruma no iha obrigasaun atu halo partisipasaun, la partisipa ida sei hetan pena konaba krime ne’ebé nia subar no nia limete mínimu no másimu tun tiha datoluk rua”. Perguntas mak ne’e, tansaida mak eis membru Governu halo tia korrupsaun ne’e la kumpri Lei? Se tuir lolos sidadaun sese deit ou eis Membru Governu sese deit  iha rai ida ne’e tenke hakruk ba Lei. Mesmu que nia Prezidente da Repúblika, Primeiru Ministru, Prezidente Parlamentu Nasional, Prezidente Tribunál Rekursu, povu kiik tenke hakruk ou kumpri hotu ba Lei. Nudar sidadaun ida diak iha rai ida ne’e tenke sidadaun hotu-hotu tenke partisipa pasiva iha kualker akuzasaun ne’ebé bolu husi  Ministériu Públiku atu tuir ba julgamentu iha Tribunál.

 

Rekomendasaun, autor ba artigu ida ne’e husu ba Parlamentu Nasional bele ka lae aprova lalais Lei Komisaun Anti Korrupsaun (LKAK) nian ne’ebé agora sei rai hela iha meja Parlamentu Nasional. Ho nune’e Lei Komisaun Anti Korrupsaun iha ona ekipa investigador KAK nian bele ba investiga eis membru governu ne’ebé la tauk Lei krime Korrupsaun. Iha lian Bunak, ami dehan “en na muk wano na aci, lei na io wa gene”. 

 

Referénsia:

  1. a.Lei Inan Konstituisaun Repúblika Demokrátika Timor-Leste, Lei Kódigu Penál Timor-Leste no Lei Kódigu Prosesu Penál. 
  2. b.Sosiedade Sívil Konsidera Eis Ministra Finansas, Emilia Pires, Bo’ot Liu Fali Lei iha rai doben Timor-Leste, basaa sai ona arguida ba iha kazu Korrupsaun, Emilia sei kontinua lao livre. Asesu iha Jornal Suara Timor Lorosae, loron 25 Fevereiru 2015.
  3. c.Hahu Hosi PR To’o Dasa Rai Tenke Iha Lei Nia Okos. Asesu iha loron 25 Fevereiru 2015. http://opinitimor.blogspot.com/2015/02/hahu-hosi-pr-too-dasa-rai-tenke-iha-lei.html 
  4. d.Eis Primeiru Ministru Xanana Gusmão Akujadu Halo Krime. Asesu iha Jornal Timor Post, loron 24 Fevereiru 2015. http://www.diariutimorpost.tl/berita-xanana-kontinua-hetan-kritika-hosi-sosiedade-sivil.html 
  5. e.Primeiru Ministru Rui Maria de Araújo Orienta Membru Governu Hotu-Hotu hodi Aprezenta Rikusoin ba Instituisaun Judisiáriu. Asesu iha Jornal INDEPENDENTE, loron 24 Fevereiru 2015.
  6. f.Bandu Tomas Cabral ba Tribunal Distrital Dili (TDD) no Komisaun Anti Korrupsaun (KAK), Asian Justice and Rights (AJAR) Konsidera Xanana Gusmão Komite Krime. Asesu iha Jornal Nacional Diário, loron 24 Fevereiru 2015.
  7. g.Xanana Saran A’an Hodi TDD Liberta Pasaporte Emilia. Asesu iha Internet TEMPO SEMANAL, loron 24 Fevereiru 2015. http://www.temposemanal.com/nasional/xanana-saran-a-an-hodi-tdd-liberta-pasaporte-emilia 
  8. h.Corrupção em Timor-Leste não precisa de leis fortes mas de forte implementação das leis-PM. Asesu iha Internet PÁGINA GLOBAL, loron 24 Fevereiru 2015. http://paginaglobal.blogspot.pt/2015/02/corrupcao-em-timor-leste-nao-precisa-de.html?spref=fb, http://noticias.sapo.tl/tetum/info/artigo/1432241.html 
  9. i.Primeiru Ministru Foun Rui Maria de Araújo Labele Tauk, Espulsa Membru Governu Foun Wainhira Komete Korrupsaun. Asesu iha Jornal TIME Timor Magazine, edisaun Fevereiru 2015.
  10. j.Cela Institusi karena Ambisi, “Hukum” bukan Kebal Hukum. Asesu iha Jornal TIME Timor Magazine, edisaun Fevereiru 2015.

 

(Artigu ida ne’e la reprezenta Institusaun ne’ebé autor haknaar ba, maibé idea no argumentu sira ne’ebé lekar iha artigu ne’e nudar opiniaun pesoál).

Page 4 of 4
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version