DILI – Asosiasuan Nasionál Músika Timor – Leste (ALMAMOR) kondena maka’as atitude bandalizmu no kriminozu hasoru artista foinsa’e Lola Cancio iha Comite Central da FRETILIN (CCF). Artista Lola Cancio hetan konvite hosi komisaun organizadora, no iha kalan ne’e Master of Ceremony (MC) konvida artista Lola hodi sa’e ba palku atu kanta múzika ida, maibé derepente hetan tuda no obriga tun hosi palku leten hosi militante partidu FRETILIN balun.
Relasiona ho akoantesementu ne’e, ALMAMOR nu’udar organizasaun mahon ba artista tomak iha rai laran kondena maka’as hahalok militante partidu FRETILIN, tanba tuir ALMAMOR katak artista ne’e la’ós nu’udar ema politiku, maibé artista nia kna’ar prinsipal ida mak hakarak halo animasaun no fó ksolok ba kualker públiku sira iha rai laran.
“Psikolojikamente ne’e estraga ona artista foinsa’e sira nia mental, tanba bainhira nia hetan oportunidade ida hodi sa’e ba palku leten nia sei sente trauma ho akontesementu iha CCF ne’e,” deklara ALMAMOR liuhosi konferensia imprensa, Segunda (21/05).
“Diskorda total haha lok bandalizmu, dis kriminativu, ne’ebé hasoru artista hotu, satan iha fatin públiku, hanesan akontese ba Lola Cancio foin lalais ne’e,” kondena ALMAMOR.
Total artista sira ne’ebé mak hamahon a’an iha ALMAMOR kuaje 600 resin ona iha rai laran.
Entretantu, bazeia ba komunikadu imprensa ida hosi CCF husu ona deskulpa ba akontesementu ne’e.
“FRETILIN iha respeitu boot ba artista Timoroan sira hotu, no defende katak artista sira tenke iha apoiu no respeitu hosi sosiedade tomak”.
Maske nune’e, ALMAMOR kontinua husu ba militante FRETILIN balun, inklui militante hosi partidu hotu, no públiku tomak atu konsidera no fó respeita ba artista Timoroan sira, tanba artista Timoroan sira mós balun mate hodi sosa independensia rai ida ne’e. (Oki)
