Tempo Timor Online

 

 

 

Tempo Timor : Eis Komandante Forsa Armada Libertasaun Nasional Timor-Leste (Falintil), Rogerio Tiago Lobato hateten, reforma iha militar ne’e normal, tanba bainhira ema ho idade katuas ona laiha ona forsa atu hala’o servisu military nian ne’e duni tenke reforma ona.

“Aktividade militar ne’e eziji forsa ne’ebe maka iha fiziku di’ak, ne’e duni ba sira hirak ne’ebe katuas ona tenke reforma hodi pasa ona ba vida sivil no iha ne’e maka estadu bele apoiu sira, la’os liu de’it husi siguransa social, maibe mós kria oportunidade ba sira, kria kondisois iha banku ba sira para hodi bele fo kredit ba sira hodi fila liman,” dehan Lobato ba Jornalista sira iha Tasi Tolu, Dili hafoin partisipa serimonia tinan 40 Falintil (20/8).

 Lobato haktuir, ita tenke husik forsa tuan sira ba reforma atu bele dezenvolve sira nia moris rasik.

Entertantu, Antonio da Costa Silva (Terra Mauk bulak) hafoin seremonia entrega kilat hodi muda ba vida sivil hateten, simu ba povu nia liman kroat no kmeik ne’ebé lori durante tinan 24 hodi halo funu hodi liberta patria no agora intrega no simu no lori ba hodi defende povu no nasaun ida ne’e nomós kria pas no establidade iha nasaun ne’e.

Terra Bulak haktuir, jerasaun foun sira ne’e edukuadu tena, hau hanoin oinsa mak sira bele halao kna’ar ida ne’e,  kompentensia ba militar nian liu husi governu informa ba  jerasaun foun atu kontinua Falintil nia terus durante tiana 24 nia laran.

Nia dehan, agora ita hetan ona indepedensia no mos iha situasaun hakmatek nia laran, ne’e duni resposablidade ba jerasaun foun sira atu tutan mehi ida ne’e hodi dezenvolve ita nia rai.

“Ami hanesan jarasaun tuan, eduka tiha ona no hanorin tiha ona ba jerasaun foun, ne’ebe jerasaun foun  sira tenke dezenvolve F-FDTL di’ak liu tan ba futuru,”  informa Tera Mau Bulak. 

Nia esklarese katak, uluk sira maka forsa no agora mos iha forsa, ida ne’e solok tebes ba povu timor-oan tomak. Tanba iha lei hatete katak, ami ne’ebe mak idade ona tenke diskansa.

Iha fatin hanesan, Sargento FALINTIL Forsa Armada Timor-Leste(F-FDTL), Edmundo da Silva dehan hanesan jerasaun foun sente orguilho hodi hatutan no vale todan ne’ebe husik hela husi jerasaun tuan sira. Nia hateten lia hirak ne’e wainhira simu kmeik no kroat husi jerasaun tuan.

 

“Ami simu no lori hodi hatutan husi jerasaun ba jerasaun, hodi tane no satan Timor-Leste nia soberania, no estadu direitu demokratika no salva mos lutu ba nasaun republika demokratika de Timor-Leste(RDTL), no sai mos liman kroat povu nian, hanesan asuain funu nain Falintil sira,” Edmundo promete. (**)

Publika iha Nasional

Tempo Timor : Governu Timor Leste liu husi Ministeriu Defeza ofisiamente asina ona kontratu ho kompania KWANG DONG FRP INDUSTRIAL CO, atu halo mantensaun ba roo komponente naval F-FDTL ninian ne’ebé iha tinan rua liu ba oferese husi Governu Korea do Sul ba Timor-Leste.

“Ami persija hala’o manuntensaun ba roo komponente naval nian, hodi nune’e bele fasilita ita nia kompenente Neval bainhira hala’o operasaun iha area tasi nian,” dehan Ministru Defeza, Cirilo Cristovão ba jornalista sira ninia serbisu fatin, Fatuhada, foin lalais. 

Cirilo haktuir, ohin asina kontratu entre Ministeriu Defeza ho Kompania ida husi Korea, atu nune’e bele hala’o rehabelitasaun no reparasaun ba roo komponente Neval nian.

Aliende ne’e, Ministru ne’e husu hotu-hotu atu pasiencia tan ba kompania mós sei hatama ekipamentus husi Korea do Sul, nune’e duni prosesu manutensaun ne’e sei presija mós tempu. 

“Ami foin maka primeiraves atu hala’o manutensaun ba roo ida ne’e no orsamentu ba manuntensaun mais ou menus hamutuk Dollar Amerikanu 600 ital mil,” tenik Cirilo

 

Iha fatin hanesan Ministru Defeza ne’e espera katak iha tinan ida ne’e reparasaun bele remata ona nune’e bele hala’o fali atividades hanesan bainbain.. (**)

Publika iha Seguransa Defesa

Tempo Timor : Involvimentu Forsa Armada Libertasaun Nasional Timor-Leste (FALINTIL) ba Ukun Rasik An hakerek mós iha istoriu Luta Timor nian, tanba iha momentu ne’e Falintil eziste nu’udar Forsa uniku ne’ebé defende prinsipiu Ukun Rasik An.

Ko’alia kona ba lalaok funu ida ne’e liu husi prosesu ne’ebé naruk no asuwain FALINTIL barak didika sira nia vida tomak ba funu ida ne’e, to’o balun tenke mate tanba hakarak hetan independensia. Ne’e duni, husu ba jerasaun foun sira atu kontinua luta makas ba buat ne’ebe Jerasaun tuan sira husik hela mai ita, liu-liu oinsá atu luta ba libertasaun povu tanba ida ne’e nu’udar kumprimisiu ida ne’ebé uluk asuwain FALINTIL sira prega iha sira nia prinsipiu katak, “Liberta Patria no Liberta Povu”   

Relasiona ho loron selebrasaun FALINTIL tinan 40,Presidente Partidu Frente Revulusionariu Timor Leste Indepedente (Fretilin), Francisco Lu-Olo hateten, iha loron ne’e ita hanoin hikas istoria FALINTIL nian tanba iha loron ida ne’e lideransa Fretilin sira hahu funda FALINTIL. 

 Lo-Olo haktuir, inisiador hodi hamosu FALINTIL mai husi desizaun husi Comite Central Fretilin (CCF) no sasin balun agora sei moris ida maka, Mari Alkatiri, atual Sekretariu Jeral Fretilin.

 “Sira maka foti desizaun hodi hamoris Fretilin no Falintil sai hanesan Forsa liman kroat povu nian, maubere nian, atu luta no defende independensia Timor-Leste.Ha’u hanoin fundador ne’e koletivu, maibe sira seluk mate hotu ona hahu husi Nicolao Lobato, ita rai hela rekonesementu boot ba nia no ba sira ne’ebe maka mate ona hanesan mós membru Comite Centra Frilitin,” dehan Presidente Partidu Freitlin, Francisco Guteres Lu-Olo ba Jornalista sira iha Tasi Tolu, Dili hafoin partisipa seremonia tinan 40 FALITIL, (20/8).

Lu-Olo esplika liu tan katak, eis Presidente Jose Ramos Horta nu’udar mós membru Comete Central Fretilin iha altura ne’eba, mesmu kriasaun Falintil nia la iha. Maibe, nia (Horta)  mós iha Comete Central hotu. 

Ita mós rekoñese Rogerio Tiago Lobato ne’ebe hanesan ikus liu iha 20 Agostu, hafoin asumi Komandante das Falintil nian. 

 “Naturalmenete iha autores ida hodi la’otuir  sira  nia ain fatin no lori rai ida ne’e ba oin maka jerasaun foun, maibe jerasaun tuan sira mós buka nafatin atu bele sai hanesan ezemplu di’ak ba jerasaun foun sira.” Lu-Olo apela.

Eis Presidente Parlamentu Nasional afirma katak, jerasaun tuan halo ida ne’e ho orgulho boot  tebes, hodi rekuinese nia oan no alin sira ne’ebé maka partese  ba jerasaun foun atu kontinua kaer nafatin prosesu dezenvolvimentu ba ita nia rai.

“Jerasaun foun tenke  sama nafatin jerasaun tuan nia kabas leten,atu hatene hatutan no hateke ba dok hodi dezenvolve  ita nia nasaun,” Lu-Olo hakotu.

Antes ne’e, iha Uma Fukun Parlamentu Nasional (PN), SegunduVice Presidente PN, Aderito Hugo hateten, atu haktuir istoria Falintil nian tenke hakerek tuir tinta ne’ebe lolos, ezemplu se mean tenke hakerek tuir tinta mean no metan mos hakerek ho  tinta metan. 

“atu hetan istoria ida ne’ebe bele responde hotu realidade no faktus sira, presiza tempu, tanba iha ema peritus barak mós dehan, autor ba istoria ida, nia konta kona ba istoria ida ne’ebe iha ne’e bele mós loos no bele mos la loos.” Dehan Aderito Hugo ba Jornalista sira iha PN foin lalais. 

Hugo haktuir, iha orsamentu Jeral Estadu 2015, PN aprova orsamentu ida atu elabora no fó ba  akademiku sira hala’o estudu atu hakerek sobre istoria. Tanba istoria  tenke hakerek ho neneik no ho di’ak, atu nune’e iha prespetiva ida akademiku sira nian, para depois  labele iha konflitus, atraves istoria ne’ebe hakerek individual ka grupu.

“agora oinsá atu  orienta ita nia akademiku sira ba intesaun ida atu hakerek istoria ida ne’ebe realidade no faktus  hatudu ba ita, tanba autorador ba istoria balun iha hela, maske balu mate tiha ona, maibe sira ne’ebe moris sei iha hela para atu konta” tenik Hugo. 

 

Agora daudauk,  presiza autor ba istoria ida, para hakerek sira nia konjustu ne’ebe maka hare ema individu  balun ou grupu balu ho sira nia inisiativa rasik hakerek istoria ida ne’ebe ita apresia. Maibe la’os hakerek fali istoria ida hodi hamosu fali prokontra. (**)

Publika iha Nasional

 

 

Ho haksolok boot mak ha’u iha onra atu prezide festa tinan 40 ba konstituisaun Falintil nian ida-ne’e.

Ha’u sauda Ita-Boot sira hotu ne’ebé marka prezensa, no ha’u  fó-benvindu ba ilustre konvidadu sira hosi rai-belun sira ne’ebé hakat tasi hodi mai halibur iha ita-nia festa, señor Almirante Ray Griggs hosi Forsa Defeza Austrália, no señor Jenerál Ci Guowei, hosi Ezérsitu Populár Libertasaun Repúblika Populár Xina nian.

Ha’u sauda mós delegasaun Veteranu sira hosi Austrália, Japaun, Guiné Bissau, Serra Leoa no Sudaun Sul. Vizita hosi veteranu sira-ne’e fó haksolok boot ba ita. 

Tinan haat-nulu sai nu’udar marku importante ida: iha ema sira-nia moris no mós iha instituisaun sira-nia moris. 

Ohin ha’u hateke ba Falintil-FDTL no ha’u haree instituisaun ida ne’ebé nakonu ho orgullu, iha renovasaun lalais, ne’ebé hateke ba futuru ho konfiansa, sein haluha kona-ba lisaun sira istória nian.  

Falintil-FDTL sai nu’udar instituisaun estadu Timor-Leste nian ida ne’ebé antigu liuhotu. 

Tinan 40 liu ona, bainhira Falintil moris, ita hakat-liu momentu sira ne’ebé iha perigu boot. Nasaun timoroan nian hasoru krize ida hosi krize sira hotu ne’ebé grave liuhotu iha ita-nia istória.

Hamosu Falintil signifika organiza timoroan sira atu hasoru ameasa sira no prepara asaun ida aas liuhotu ba sidadania timoroan nian—Proklamasaun Independénsia ne’ebé ninia aniversáriu ba dala 40 ita sei komemora mós iha tinan ida-ne’e.  

Ha’u hakru’uk ba memória Francisco Xavier do Amarak nian, nu’udar saudozu líder Proklamadór. Bainhira proklama Independénsia, Francisco Xavier do Amaral nia lian hato’o espresaun kona-ba ita-nia povu nia sentimentu no vontade sidadania.

Organizasaun Falintil kria kondisaun sira ne’ebé foun hodi enkuadra sidadaun sira-nia partisipasaun atu halo defeza ba rai doben Timor no hamutuk ho ita-nia komunidade.  

Hamosu Falintil sai nu’udar manifestasaun ida ba vontade nasionál. Povu nia adezaun ba Faliuntil sai nu’udar espresaun determinasaun nian ida hosi timoroan sira ba vontade partisipasaun, hodi hatan ba líder sira-nia apelu, atu halo defeza ba ita-nia rain.

Ha’u hakru’uk ba mártiriu sira-nia memória, feto no mane sira nia memória ne’ebé fó sira-nia vida ba sobrevivénsia Nasaun nian no mós ba servisu Falintil nian.

Ha’u hato’o onra ba mémoria saudozu Nicolau Lobato nian, nu’udar Falintil nia aman no mós timoroan sira-nia nasionalizmu. Ninia ezemplu ba lideransa, matenek no mós ninia memória sai nu’udar ahi-lakan ne’ebé fó-roman ba Rezisténsia nia dalan no mós tulun ita atu hetan vitória, hafoin tiha funu durante tinan 24 nia laran.

Ha’u hato’o hako’ak boot no kmanek ida ba ha’u-nia maun Xanana Gusmão, ne’ebé troka Nicolau Lobato no orienta Falintil ho susesu no mós Rezisténsia tomak to’o povu nia vitória.

Hosi nia ezemplu, iha momentu sira ne’ebé importante iha ita-nia istória, no hosi kapasidade lideransa, Xanana Gusmão sai nu’udar aman fundadór ida ne’ebé loloos ba Timor-Leste. Ninia vizaun—molok no hafoin tiha independénsia—harii iha baze polítika rekonsiliasaun, pás no estabilidade ne’ebé ita-nia rain no ita-nia povu adota no implementa ho deteminasaun boot no ho fuan nakloke.

Falintil no Rezisténsia defende bebeik diálogu atu hetan pás iha ita-nia rain no ita-nia povu nia seguransa. Ita luta bebeik ba pás. 

No ohin loron Falintil-FDTL serbisu atu hametin pás no tulun ba nasaun nia konsolidasaun no estabilidade. 

 

Aniversáriu Falintil nian ba dala 40 sai nu’udar momentu adekuadu ida atu hato’o omenajen ba líder másimu Rezisténsia nian no fundadór Timor-Leste independente, Kay Rala Xanana Gusmão, no manifesta rekoñesimentu Nasaun nian ba nia.

Ha’u hako’ak ita-nia rain nia eroi deskoñesidu sira hotu, maun-alin inan-feton sira hotu ne’ebé serbisu ba vitória no kontribui ba Independénsia. 

Ha’u hako’ak partisipante sira hotu iha Frente Armada, Frente Klandestina no iha Frente Diplomátika. 

Sira-nia korajen no servisu hamutuk mak halo sai posivel hodi lori Nasaun hetan vitória, hamosu nasaun ida no asegura ita-nia komunidade nia sobrevivénsia, ita-nia kultura no ita-nia tradisaun sira-nia sobrevivénsia.  

Barak sei kontinua serbisu atu hametin Timor-Leste. Ha’u hako’ak ha’u-nia maun sira: José Ramos-Horta, Mari Alkatiri no Francisco Lu-Olo. Ha’u hanoin kona-ba saudozu alin Fernando La Sama de Araújo ne’ebé husik hela ita sedu tebe-tebes. 

Falintil nia susesu iha tanba eroi no mártiriu barak—entre sira barak, hanesan irmaun Ma-hudu, Nino Konis Santana, David Alex Daitula, no Ular.

Barak kontinua hamutuk ho ita no kontribui hodi harii Falintil-FDTL no konsolida nasaun—inklui komandante eróiku sira hanesan ha’u-nia maun-alin Lere Anan Timur, Ma’hunu, Sabika, Aluk Descartes, Falur Rate Laek, Trix, Maunana, Maubuti, Maukalo no sira seluk barak ne’ebé serbisu atu defende soberania nasionál no estabilidade.

---X---

Líder no komandante sira sempre hetan apoiu hosi militár no sivil sira rihun ba rihun.  Eroi deskoñesidu sira-ne’e nia kontribuisaun sai desizivu ba vitória.

Iha komemorasaun tinan 40 Falintil nian, ha’u hakarak, hodi nasaun nin naran, hanoin kona-ba memória ba nasionalista sira hotu, ne’ebé mate ba rai doben Timor nia liberdade—militár no sivil sira. Ha’u hakru’uk ba memória saudozu líder no komandante sira barak: membru sira hosi Komite Sentrál Fretilin, adjuntu sira Komité Sentrál nian,  Komandante Setór sira no Brigada sira no saudozu maun-alin inan-feton sira hotu ne’ebé mate iha ofensiva violenta kontra baze apoiu sira no kombate sangrentu sira seluk, durante tinan 1980 no 1990 nia laran.

Falintil nia susesu iha tanba ema hotu. Família timoroan sira hotu halo tiha ona sakrifísiu. Kuaze família sira hotu lakon oan doben sira. Kuaze Timoroan sira hotu hasoru perigu no tulun halo istória ne’ebé lori  ita ba Restaurasaun Independénsia.

Verdadeiramente, ema ida-idak, sai nu’udar istória ida.  Serbisu ho nonok ema rihun ba rihun nian hosi eroi deskoñesidu sira, iha unidade nia laran ho líder sira, mak tulun hodi manan Falintil no Nasaun nia vitória. Nasaun rekoñese no hetan onra hosi kontribuisaun no sakrifísiu hosi veteranu sira. Ita tenke fó impulsu foun ida no dezenvolve prosesu rekoñesimentu, ho rigór no ho lia-loos. Ha’u renova ha’u-nia apelu ba veteranu sira atu kontribui hodi tulun klarifika situasaun sira ne’ebé hamosu dúvida, hodi nune’e governu bele rezolve kazu sira ne’ebé pendente. Ha’u haree ho preokupasaun katak prosesu ne’e kontinua la’o kleur. Difikuldade sira ne’ebé eziste tenke supera ho Justisa no rigór.

Militár sira. Povu Timor-Leste.

Forsa armada kontinua hala’o renovasaun ba jerasaun sira. Aniversáriu ida-ne’e duni marka ho pasajen militár distintu na’in 27 ba reforma, ho karreira sira ne’ebé onroza iha gerilla Falintil nian no ne’ebé integra iha F-FDTL to’o ohin loron.   

Iha tinan 15 nia laran ikus ne’e, militár esperiente sira-ne’e serbisu ba transformasaun Falintil ba Falintil-FDTL. Sira transmiti esperiénsia, prinsípiu  no valór sira Falintil nian ba soldadu foun sira.

Iha momentu ne’ebé militár sira pasa ba reforma, ha’u hakarak manifesta rekoñesimentu nasaun nian ba sira publikamente tanba servisu no dedikasaun hanesan militár.

Agora, mak termina ho onra sira-nia karreira militár, ema sira-ne’e merese hetan apoiu iha sira-nia integrasaun ba vida sivil. Sira sei iha kontributu atu hato’o ba nasaun.

Ita-nia forsa kontinua rekruta no treina soldadu foun sira. Atu hatan ba dezafiu foun sira, ita tenke hetan lisaun sira istória nian.

Valór sira ne’ebé aprende durante funu sai nu’udar Nasaun nia riku-soin no nu’udar institiuisaun militár nia patrimóniu ida. Kbiit hosi valór sira-ne’e mak lori ita ba Independénsia nia vitória: 

  • -Falintil nia lealdade ba povu:
  • -Povu nia konfiansa ba iha Falintil;
  • -Unidade entre militár no sivil sira;
  • -Espíritu servisu ba Nasaun, dedikasaun ba servisu bodik ba moris-di’ak ema barak nian. 

Nasaun kontinua presiza valór sira-ne’e atu alkansa vitória sira ne’ebé foun. 

 

Militár sira. Maun-alin no inan-feton sira. 

Funu tinan 24 nia laran hakat liu derrota no vitória. Iha debate atu adapta Rezisténsia no Falintil nia estratéjia hasoru dezafiu sira okupasaun nian, ne’ebé evolui ho tempu.

Livru sira hotu mundu nian, universidade sira hotu mundu nian laiha resposta ba Rezisténsia nia problema sira. Ita mak tenke deskobre estratéjia foun no solusaun sira atu garante Falintil, Rezisténsia no povu nia sobrevivénsia. 

Vitória sai posivel tanba komportamentu hosi sira ne’ebé reziste—iha ai-laran, iha sidade laran, no iha to’os no natar laran sira.

Iha mós sira ne’ebé deziste. Maibé vitória ne’e sai nu’udar rezultadu hosi esforsu no sakrifísiu hosi sira ne’ebé luta no la deziste.

Povu no Falintil nia vitória hamosu nasaun ida ba Timoroan sira hotu.  Laiha ema ida maka eskluidu. Maibé Nasaun nia admirasaun hato’o ba sira ne’ebé reziste no proteje povu. Nasaun nia admirasaun hato’o ba sira ne’ebé la deziste.

Restaurasaun Independénsia sai posivel tanba iha unidade ida ne’ebé loloos entre povu no kombatente sira, hodi halo servisu ba Nasaun. 

Lisaun ida-ne’e kontinua sai importante, iha prezente no ba futuru nasaun nian. Presiza atu hametin unidade, no hametin konfiansa povu nian ba instituisaun sira, sivil no militár nian. 

 

Maun-alin no inan-feton sira.

Serbii nasaun durante tinan 36 nia laran iha Falintil no iha Falintil-FDTL sai nu’udar onra boot ida ba ha’u-nia vida. Sai nu’udar onra ida ba ha’u atu hahú no lidera prosesu transformasaun forsa gerillia Falintil nian ba forsa militár moderna, ne’ebé iha kbiit atu hatan ba nasaun nia nesesidade foun sira. 

Falintil-FDTL hala’o tiha ona progresu sira ne’ebé importante. Iha sevisu ida-ne’e, ita hetan apoiu militár hosi rai belun barak. Ha’u agradese parseiru sira hotu ba kooperasun militár tanba sira-nia asisténsia, sira-nia partilla esperiénsia no sira-nia amizade.

Oras ne’e, Falintil-FDTL nia kombate prinsipál maka dezenvolve no aumenta kompeténsia téknika no profisionalizmu atu kumpri ninia misaun konstitusionál sira hodi garante independénsia, integridade territoriál—iha rai-maran no iha tasi— liberdade no mós populasaun nia seguransa. 

Bainhira sai Prezidente Repúblika ha’u nunka haluha kona-ba lisaun sira ne’ebé Falintil fó mai ha’u no fó ba Nasaun.  

Konfiansa povu nian ba militár sira, no protesaun ne’ebé povu fó ba kombatente sira, sempre sai nu’udar fonte no abut ba Falintil nia kbiit—no vitória nia segredu.

Mane no feto sira Falintil-FDTL nian tenke estuda no labele haluha lisaun ida-ne’e. 

La ho konfiansa povu nian, la ho unidade Nasaun nian, militár sira laiha kondisaun atu kumpri misaun sira ne’ebé nasaun husu ba sira atu hala’o. 

Ba jerasaun sira militár nian ne’ebé foun, ha’u hatete: benvindu mai Falintil-FDTL. 

Estuda lisaun sira hosi ita-nia istória rasik. Serbisu ba hodi aumenta konfiansa hosi povu ba militár sira, ho profisionalizmu no espíritu servisu ba nasaun. 

Liuhosi imi-nia ezemplu, dedikasaun no rigór, tulun nasaun atu hakat ba dook liután! 

Onra ba Falintil. Onra ba Eroi sira. Viva Falintil-FDTL.  

 

Husu boot Maromak fó-bensaun ba imi hotu no imi-nia família sira no fó-bensaun ba Timor-Leste.

Publika iha Nasional

 

Se los maka sai  master  brain iha terenu?

 

 

Koalia kona-ba Insurreição Armada  Aileu iha 15 de Agosto de 1975, la ses husi loron importante balun komesa husi dia 7 to’o dia 18 de Agosto de 1975. Durante loron sanulu resin ida nia laran iha akontesementu barak. Ho akontesimentu hirak ne’e maka ita konklui hanesan istória nasional ida, to’o temi “loron Falintil”. 

Kona-ba se los maka sai otak pengatur to’o Saudouzu Presidente Nicolau Lobato bele halo intervensaun direkta no emidiata no sai sasin  lolos hodi hadau markas militar Portugues nian iha Aileu???

 

Faktus ne’e faktus. Istória ne’e istória. Gosta ka la gosta ida ne’e maka realidade. 

 

Tuir istória ne’ebé hau rona  katak ema ne'ebe sai xavi estratéjiku kona-ba armada Aileu monu ba CCF Fretilin maka kamarada Abel da Costa Freitas Ximenes (Larisina) agora aktual Vice-Ministro Educacao. Iha dia 09 de Agosto de 2015, kamarada Abel Larisina ho nia kamarada seluk maka hanesan kamarada Mauhunu, Faliciano Mausiri (Bobonaro), Oscar de Araujo, sira hamutuk na'in haat ho kamioneta ba Same hodi partisipa konsentrasaun bo'ot ho militante Fretilin -halo avaliasaun ba situasaun nasional. Iha momentu ne'e, sira na'in haat toba iha kamarada CEPEDA nia uma. Depois de konsentrasaun iha Same sira hetan amiasas husi UDT. Sira na'in haat (4), idak-idak separa ba malu ho objetivu ida deit. Balu fila liu husi Aileu, Balu ba kamarada Presidente Francisco Xavier iha Turiscai. Komu UDT buka atu kaer sira, entaun kamarada Abel Larisina maka sae motor ho soldado Furel ida naran Rosalino. Loron ne'e kedas sira na'in rua tama iha Markas bo'ot nia laran. Kamarada Abel subar iha laran no Furel Rosalino kontinua mai Dili. Momentu kamarada Abel iha markas Aileu nia laran maka nia halo kontaktu ho soldadu balun. Soldadu dahuluk nebe nia kontaktu maka Domingos Gaio. Liu husi Domingos Gaio maka kamarada Larisina konsege hetan pistola no kilat no hasoru malu mos ho direjentes Komite rejional Fretilin nian iha Ai-Sirimou. Depois de halo kontaktu hotu,Kamarada Larisina rasik halo bilete ida haruka mai Vice-Presidente Nicolau Lobato iha Dili. iha Bilete nia hakerek nune'e "“Camaradas, estou em Aileu, vindo de Same. Aileu esta somos noso controle e organisado. Esso informação e Orientação, Abel Larisina”, Ema nebe lori bilete naran "Agusto" aktual membru parlamentu nacional husi CNRT. Tuir istoria nebe iha, bele konfirma rasik ho nia nain katak durante nia lori bilete tun mai Dili, bilete ne'e nia tau iha ai nebe uja hodi tara aifarina. Entaun durante lao tun mai Dili, nia finji faan aifarina. Bainhira ema atu sosa aifarina, nia hasae aifarina nia folin, nebe laiha ema ida maka sosa aifarina no nia konsege lori bilete ne'e entrega duni ba Saudouzu Nicolau Lobato. Bazeia ba Bilete ne'e maka, Saudouzu Kamarada Nicolau Lobato ba Aileu ho kamarada sira seluk, no ho kamarada Abel Larisina konsege hadau Markas bo'ot Militar nian husi Malae Portugal no iha tempu ne’e duni markas militar monu ba kontrolu CCF Fretilin. Bazeia ba istoria ne'e hau bele konklui katak "yang menjadi otak pengatur to’o  Fretilin kontrola markas militar primeiru iha AIleu maka Senhor "Abel Larisina". Atu konfirma kona-ba ida ne'e, bele konfirma ho Senhor Abel Larisina, aktual Vice-Ministru Edukasaun, bele mos kontaktu senhor Agosto iha Parlamento Nacional.

 

Istoria kona-ba loron Falintil la ses husi loron Insurreição Armada  15 de Agosto de 1975. Istoria kona-ba loron Insurreição Armada, labele nega atu temi mos ema na’in hirak ne’ebé halao idak-idak papel durante loron 11 nia laran. Ema hirak ne’e sei moris no balu mate ona. Sira ne’e maka hanesan Saudouzu Nicolau Lobato, Abel da Costa Freitas Ximenes, Mauhunu, Feliciano Mausiri, Oscar de Araujo, Lucas da Costa, Rosalino, Sarjentu Brass, Domingos Gaio,  Adao, Januario Lobato, Simao, Januario, Agusto, Alarico Fernandes, Justino Mota, Marí Alkatiri,  senhor Larisina nia Noiva, Junior  Jose Lobato,  Fernando (Baucau),  Liandro, Raul Isak, Eujenio Pires, Albino, Tera Mau Bulak, Jose da Silva, Rogerio Lobatu. No talves iha mos sira seluk ne’ebé fo ona sira nia kontribuisaun-liu-liu apoiantes sira iha Same no iha Aileu. 

 

Iha loron Falintil ida ne’e, Ita Timor oan ne’ebé sei moris bele harohan ba Aman Maromak atu fo fatin ba Saudouzu sira ne’ebé dedika ona sira nia moris tomak hodi hetan libertasaun ba ita nia nasaun no ho liberdade fo honra gloria ba Aman Maromak. 

 

 

Obrigadu

 

Hakerek nai’n agora daudauk 

Iha Bali Indonesia. 

HP:+6281237115303

 

Email:This email address is being protected from spambots. You need JavaScript enabled to view it.

Publika iha Opiniaun

 

 

Dili, Tempo Semanal - Primeiru Ministru VI Governu konstitusional hala’o visita kortezia ba iha Ministeiru da Defesa no Kuartel Jeneral FALINTIL – Forsa Defesa Timor-Leste (F-FDTL) iha Fatu Hada dili, iha tuku 10h00 Oras Timor-Leste, iha loron Tersa Feira (24/02).

 

Wainhira Primeiru Ministru DR. Rui Maria de Araujo to’o iha edifisiu Kuatel Jeneral ho Ministeiru da Defesa simu ho Parade military hafoin tuir kedan ho enkontru ho Estadu Maior Jeneral F-FDTL hafoin vizita ba iha kna’ar fatin Ministeiru da Defesa ninian.

 

“Primeiru Ministru nia vizita mai iha ne’e (Kuartel F-FDTL ho Ministeiru Defesa) atu hare no rona preokupasoeins ne’ebe Ministeiru Defesa infrenta, liu-liu Forsa FDTL infrenta”, Ministru da Defesa Jose Cirilio Cristovao ba jornalista sira hafoin de vizita Primeiru Ministru ninia remata.

 

Ministru Defesa ne’e esplika liu tan katak durante vizita Primeiru Ministru VI Governu Konstitusional hetan esplikasaun direitamente husi Xefe Estadu Maijor Jeneral F-FDTL kona ba situasaun dezenvolvimentu lutu nasaun ninian ne’e inklui mos problemas no preokupasaun kona ba meloramentu ba kondisaun moris forsa ninian.

 

“Hanesan ita hotu hatene katak ohin loron ita iha postu sanolu resin ida i postu balun seida’uk konstroe i depois nesecidades bazikus ba forsa sira nian. Kona ba formasaun halo nusa maka halo kapasitasaun ba forsa nune’e ita bele hetan forsa ne’ebe professional liu. Kapasita ita nia rekursu ho kualidade di’ak liu-liu iha komponente unidade enginaria. Ba komponente Naval halo nusa maka ita fo kursus no fo formasaun di’ak liu ba sira para bele mos, ita labele dependenti ona kona ba halo nusa maka hadi’a ita nia parku sira ne’ebe iha komponente Naval”, Ministru Defesa relata hikas briefing ne’ebe hato’o husi Xefe Estadu Maijor Jeneral F-FDTL ho ninia komponente ba Xefe do Governu.

 

Antes ne’e eis Sekretariu Estadu da Defesa iha IV no V Governu Konstitusional husu ona Ministru da Defesa iha VI Governu Konstitusional atu tau atensaun ba revizaun planu 2020, despozitivu forsa, Konseitu Estratejiku Defesa Seguransa Nasional, Autoridade Nasional Maritima ho konstrusaun postu ba F-FDTL sira.

 

Tuir Planu Estratejiku Dezenvolvimentu 2020 F-FDTL ninian fo Prioridade ba dezenvolvimentu komponente Naval maibe dezenvolvimentu F-FDTL sei hein hela aprovasaun ba Estatutu Defesa no Seguransa Nasional ne’ebe tuir informasaun ne’ebe Tempo Semanal hetan ate agora sei latan hela iha meja leten Parlamentu Nasional ninian no ate agora seida’uk deskute nafatin. 

Publika iha Seguransa Defesa

 

Dili, TEMPO SEMANÁL – Iha diskursu Prezidente da Republika Taur Matan Ruak iha okaziaun selebrasaun aniversariu Falintil ba 39, Xefe Estadu nee ladun satisfas ho prosesu dezenvolvimentu iha rai laran nebe seidauk bele kore povu husi mukit tanba ema kiak barak daudaun nee sei padese.

 

“Ita harii sosiedade ida bazeia ba lei nebe respeita dignidade ema nian ho objetivu nebe Falintil sira fakar ran hodi hetan. Ita-nia lei iha ita-nia rain hanesan ba ema hotu, la foti ida as liu nein hatun ida tun liu. Ita harii estadu iha dezemvolve no haforsa ita-nia estadu, itaharii sosiedade ida ho institusoens politikas nebe bazeia ba direitus sidadaun sira nian atu partisipa, asumi sira-nia responsabilidade no hametin dalan atu tuir ba harii ita-nia estadu”.

 

“Instituisaun militar ita nian hametin liutan, Falintil-FDTL dezemvolve liutan. Forsa garante soberani nasaun nian, hametin an, fo prioridade ba formasaun ita-nia ema sira nebe hakarak fila ita-nia an sai forsa, sai teknikamente hodi apoia dezemvolve ita-nia nasaun hahu husi hametin ita-nia nasaun iha defeza no soberania no tau matan ba ita-nia riku soin sira. 

 

Falintil hanesan forsa ida nebe defende konstituisaun, sobernira ba poder sivil iha tinan sanulu resin rua halo esforsu boot, tantu hametin disiplina ho nia profesionalidade. Koalidade nebe militar sira hetan nee kontribuitu boot ida ba estabilidade sosiedade ninian, nebe hametin komfiansa ita-nia povu ba institusoens sira nebe ita harii iha ita-nia rain”, dehan nia. 

 

Taur hatutan liutan katak, “ita hametin daudaun ita-nia reinsersaun rejional nebe diak, ita haree relasaun amizade ho Indonezia, Australia no paiz sira nebe besik liu ita no hametin ita-nia relasaun iha aspeitu siguransa no area militar. Ita mos hametin relasaun iha rejiaun, ho paiz hotu-hotu liu-liu paiz ASEAN, Pasifikus, Zelandia Foun nebe ita dezemvolve ita-nia relasionamentu ida diak, relasionamentu ida nebe tau interese nasaun ida-idak nian iha leten no buka dalan atu hametin liutan servisu hamutuk iha area importante ba interese ida-idak nian”. 

 

Ita iha relasaun diak ho Japaun, Korea du Soul, China, Estadus Unidus, Uniao Europeia no nasaun sira hotu nebe nungka kole atu kontinua hametin amizade no kooperasaun produtivas ho ita-nia nasaun. Timor-Leste daudaun nee prezide CPLP, kooperasaun Timor-Leste CPLP makaas tebes iha nivel militar nomos iha nivel sira seluk iha area sira seluk tantu bilateral no multilateral. 

 

Komfiansa komunidade internasional foti prestizu Timor-Leste nian no kontribui atu ita bele hetan dezemvolvimentu nasional ida nebe tuir mehi no hanoin ita nian. Falintil-FDTL fo nia kontributu pozitivu no importante tebes ba afirmasaun ita-nia estadu nian, tanba F-FDTL kontribui ba protesaun rekursu naturais ho ezersisiu efetivu ita-nia soberania nasional.

 

Kontribui ba estabilidade no paz hodi prestezia ita-nia nasaun. Aumentu prestizu nasaun nian atraves misoens sira nebe ita-nia estadu fo, liu-liu mosiens manutensaun paz ho komunidade internasional foti Timor-Leste nia naran. Maibe dejafius ita-nia nasaun sei makaas, se barak los. Ejize empeinamentu ita hotu nian, sidadaun hotu-hotu nian para ke ita hamutuk kontinua buka mehi ida nebe iha tinan rua nulu resin haat Timor oan rihun ba rihun fakar ran.

 

Investe ita-nia nasaun ninia riku soin ho matenk no koidadu tebes. Dezemvolve setor produtivu ida nebe  fo benefisiu ba ita-nia komunidade sira, valoriza rekursu naturais liu-liu ita-nia rain no agrikultor kiik sira nebe namkari iha ita-nia nasaun. Fila Timor-Leste sai nasaun ida nebe menus depende ba rai seluk, dezemvolve ekonomia ida diak bazeia ba infraestrukturas nebe iha koalidade, ajuda komunidade sira atu produs liutan hodi hetan asesu ba merkadu. Nee servisu sira nebe ita tenke preparadu los ba halao iha tempu oin. Tanba ita-nia mehi ita hakarak dezemvolve populasaun ida nebe saudavel ka iha saude diak. 

 

Mais de 50 pursentu ita-nia populasaun malnutrisaun, proteze ambiente no tau matan ba sukus sira sai moos aldeia sira sai moos, prevene moras, bee diak, eletrisidade diak ba ita-nia sidadaun sira. Dezemvolve sosiedade ida nebe elevadu koalidade edukasaun, ofrese eskolas ba ita-nia sukus no aldeia sira. Nee servisu balu nebe ita tenke halo no kontinua halo para lori ita-nia nasaun ba oin. 

 

 Falintil-FDTL dedikasaun instituisaun militar nian, tau matan atu kumpri nia misaun ho diak no hola parte konstribuisaun boot ida nebe Falintil fo ba dezemvolvimentu nasional. Falintil sira-nia misaun ida importante tebes atu proteze ita-nia rain no riku soin, kontribui ba dezemvolvimentu, estabilidade, kontribui mos ba manutensaun paz iha mundu liu husi Nasoens Unidas. Para dezempena misoens sira nee Falintil tenke kontinua prepesoa ninia kapasidade teknika no operasional iha aspeitu hotu-hotu.

 

Hau husu ba militar sira para ke kontinua tau matan ba imi-nia formasaun profesional para imi bele iha altura atu responde servisu nebe ita-nia nasaun no ita-nia povu integra ba imi. Dezemvolve ita-nia nasaun hanesan dezafiu boot ida i so lori ita-nia domin, lori ita-nia sakrefisiu mak ita-nia nasaun bele ba oin. Tanba ne’e, husu para ita hotu labele haluha sira nebe iha tinan naruk fo sira-nia vida, mate hodi ohin loron ita-nia nasaun sai nasaun ida nebe livre no independente. Barak liman tohar ain tohar, kontinua lao ho bala iha isin, faluk no oan kiak sira iha ita-nia rain sei namkari, padese no terus.

 

Ita hotu nasaun tomak lebele haluha sira, nee forma ida atu fo ita-nia kontribuisaun no inspira sira seluk para sente katak vale apena ita fo ita-nia kontribuisaun ba ita-nia nasaun, tanba ita-nia nasaun bainhira diak nia sei la haluha ita”, hakotu Taur. (ts)

Publika iha Nasional

Dili, TEMPO SEMANÁL – Involvimentu veteranus sira nian iha prosesu kaer projetus la’ós de’it bele kauza kualidade projetus, maibé iha indikasaun atu kauza mós dignidade veteranus sira nian, tanba dutrina onestidade veteranus ne’e labele sai nu’udar termus de’it maibé tenke sai nu’udar realidade ida hodi identifika veteranus sira nia afirmasaun dala ida tan hodi dezenvolve nasaun ida ne’e ho ko’alidade

 

“Ita hotu hatene katak, sidadaun hotu-hotu iha direitu atu kontribui ba nasaun ida ne’e, sa tan nudar veteranus ida ne’ebé ke durante ne’e fó an hodi liberta rai ida ne’e, se nia kaer projetu ruma entaun ninia intensaun di’ak liu duke sira seluk.

 

Publika iha Nasional

Tempo Semanal – Baukau, 20/03/2014

 

Tenente koronel Manuel Pinto Maubuti halo prediksaun katak lala’ok grupu Konselho Revolusaun Maubere ho CPD-RDTL foo kbi’it bo’ot ba pozisaun Australia no la fo’o vantajen ba pozisaun Timor Leste tan ba kontribui ba hafahe konsentrasaun governu ninian iha kazu nasaun ne’e lori Australia ba Tribunal Internasional relasiona ho kazu priendesaun dokumentus maka halo husi ASIO husi Timor Leste ninia advogado no kazu CMATS. Maubuti dehan lia hirak ne'e wainhira halo dialogu ho komunidade iha suku Saelari laga iha loron 19/03/2014.

Publika iha Nasional

Tempo Semanal – Dili, 19/02/2014

 

Komandante fitun rua husi F-FDTL, Lere Anan Timur  deklara sai ninia lia menon ba Mauk Moruk ho konselho Revolusaun Maubere atu labele viola lei ne’ebe vigora iha RDTL hodi hatais nafatin Farda Militar.

 

Publika iha Seguransa Defesa
Page 1 of 2
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version