Eis primeiru - ministru, Kay Rala Xanana Gusmaão hamutuk ho fundador ENSUL Engenharia, António Couto halo lansamentu fatuk dahuluk ba investimentu ENSUL nian atu hari uma andar 10 iha rai Kolmera iha tinan 2013, maibé to’o oras ne’e seidauk akontese.      

DILI - Kompañia nasionál sanulu (10) desidi ona hodi suspende pagamentu arendamentu rai ba kompañia internasional ENSUL Engenharia, S.A., tanba deskonfia mosu “irregulariedade” balun iha prosesu arendamentu rai ne’e rasik. 

Historikamente, iha tinan 2009 ENSUL Engenharia, S.A. hetan aporvasaun hosi governu liuhosi reuniaun Konsellu Ministru sira kona - bá arendamentu rai ho nia luan 22.635,00m2 iha kedas sidade Dili nia fuan laran, no tama ba tinan 2013 kuartu governu konstitusional ne’ebé lidera hosi primeiru - ministru, Kay Rala Xanana Gusmão halo lansamentu fatuk dahuluk (primeira pedra) ba rai ne’e, tanba ENSUL promete ba governu Timor - Leste katak sei halo investimentu ba rai ne’e ho valor osan hamutuk US $ millaun 18, maibé to’o oras ne’e seidauk iha buat ida. Iha mak rehabilita ka pinta de’it ruko oan sira iha rai ne’e nia laran.

Bazeia ba informasaun balun ne’ebé Tempo Timor asesu katak, hafoin asina kontratu ho governu Timor - Leste, empreza ENSUL la’ós halo investimentu, maibé halo fali subarenda rai ne’e ba  CFT, nia baze iha Luxemburg. Empreza sira ne’e rejista iha Luxemburg, tanba livre hosi taxa.

“Ida ne’e mak problema. Sira la investe ida. Sira aluga fali ba ita Timoroan sira ho valor a’as tebes. Tanba sira laiha baze legal ruma, ami deseidi hodi suspende tiha pagamentu ne’e, no hein esklaresementu hosi ENSUL,” hatete nain ba empreza Timoroan ida ne’ebé mós aluga tutan rai ne’e hosi Central Sociedade Comercial, S.A (CSC, S.A) ba Temo Timor iha Dili foin lalais.   

Emprezariu Timoroan ne’e relembra katak Governu Timor - Leste halo kontratu ho ENSUL kona - ba utilizasaun rai ho nia luan aproximadamente 22.635,00m2 iha sidada Dili nia fuan  ho kondisaun katak se eziste investimentu global ida ho valor osan US$ millaun 18 hodi hari Colmera Business Center mak to’o oras la eziste.

Tuir dokumentu kontratu entre CSC, S.A ho investidor nasionál sira ne’ebé Tempo Timor iha katak, kompañia ne’e mak sai nu’udar jestor prinsipal ba empreza ida seluk ho naran Compagnie Financiere Terria S.A. (CFT S.A), maibe ENSUL Engenharia, S.A. nia naran la eziste iha kontratu ho investidor nasionál sira. Iha parte seluk, Governu mós la rekoñese empreza CFT S.A nu’udar kompañia ne’ebé aluga rai hosi Estadu Timor - Leste, maibé rekoñese de’it empreza ENSUL Engenharia, S.A. Maibé, empreza CFT S.A. halo fali sub-arendamentu rai ne’e ba empeza nasionál sira ho valor ne’ebé superior hosi kontratu arendamente entre ENSUL ho governu.

Tuir portal Luxembourg Business katak, empreza CFT S.A. rejistadu nu’udar company incorporated iha Luxembourg ho númeru identifikasaun mak B46567. Empreza ne’e inkorpora iha 1994 - 02 - 10, entaun idade empreza ne’e kuaje besik tinan 24.3 ona ho tipu nu’udar Société Anonyme (S.A), no enderesu rejistrasaun mak 24, Rue Saint - Mathieu L - 2138  Luxembourg. Empreza ne’e mós iha nia sukursal iha Portugal, iha R. Elvira Velez, Torre A3 R/C Loja 4/C. 2825-485 Almada.

“Atu rehabilita ka pinta de’it ruko oan sira ne’ebé mak oras ne’e eziste hela desde Portugues nia tempu, kompañia Timoroan barak mós prontu ona hodi halo. Ida ne’e la persija empreza internasional,” esplika emprezariu Timoroan ida ne’ebé sujere ba governu foun persija halo revizaun ba kontratu arendamentu rai ho empreza ENSUL Engenharia, S.A iha tinan hirak ba kotuk.    

Empezariu ne’e hatutan, lei propriedade katak subarendamentu nia valor labele a’as liu arendamentu ho governu, maibé realidade hatudu katak investidor nasionál sira ka kompañia nasionál sira durante tinan barak ona selu arendamentu rai ne’e ba empreza CFT S.A ho valor osan ki’ik liu mak US $ 1200 to’o boot liu mak US $ 6700.

“Situasaun ne’e la kria kondisaun seguru ba kompañia nasionál sira hodi kontribui ba dezenvolvimentu ekonómia iha rai laran,” nia esplika.

Nia hatutan, empreza nasional hirak ne’e ohin loron hala’o ona investimentu ho osan rasik iha rai ne’ebe sira aluga hosi CFT S.A. ho valor osan US $ millaun ida resin ona.

Hafoin lansamentu fatuk dauhuluk iha tinan 2013, fundador empreza Ensul Engeñaria S.A, António Couto esplika, kontratu ho governu Timor - Leste definitivamente asina iha tinan 2012, no promete katak sei hari uma andar 10 ba Sentru Komersial no Finanseira ho durasaun tinan rua nia laran, maibé promesa ne’e la sai realidade to’o ohin loron.

“Investimentu ida ne’e hahú hala’o iha tinan sanulu liubá maibé kontratu loloos foin asina iha tinan 2012. Ami hakarak hahú obra ne’e no ami orgullu tebes, tanba hanesan konfiansa boot ida ne’ebé Governu Timór nian fó ami ninia empreza”, António Couto, fundadór empreza timoroan Ensul Engenharia nian, hatete.

Edifisiu ne’e sei harii ho besi no vidru, hakarakk kontribui hodi reabilita no moderniza kapitál timoroan nian, no sei iha andar sanulu, barak liu sei sai hanesan eskritóriu no estasionamentu ida.

“Obra ne’e sei kria postu serbisu barak no sei lori teknolojia foun sira ba Timór no ezijénsia maka’as tanba aposta ne’ebé ami halo maka edifísiu ne’e sei sai hanesan ho iha Lisboa, Paris no sei hanesan ho nesesidade Timor-Leste nian iha futuru”, António Couto hatutan. Iha parte seluk, eis Ministru Ekonómia no Dezenvolvimentu, João Mende Goncalves rekoñese katak nia mak asina duni akordu investimentu ba empreza ENSUL nian, maibé hafoin iha tempu ne’eba to’o oras ne’e nia la’ós ona nu’udar membru governu hodi tau matan kona - bá investimentu ne’e rasik.

“Se ha’u mak nu’udar membru governu nafatin ha’u sei halo avaliasaun ida ba prosesu investimentu ne’e rasik depois mak bele foti desijaun atu hapara ka la’e, maibé durante ha’u nia tempu ha’u hapara ona projetu ida iha Com, munisipiu Lautem, tanba empreza ne’e la kumpri saida mak nia asina ho governu,” hatete eis ministru João Goncalves ba Tempo Timor iha nia serbisu fatin, Landa Mark, Fatuhada - Dili, Kinta (24/05).

Nia hatutan, desijaun atu halo arendamentu ba rai ne’e desidi iha reuniaun Konsellu Ministru sira iha mandatu kuartu governu konstitusional nian.

Tempo Timor tenta konfirma assuntu ne’e ba parte ENSUL, maibé dirijente ENSUL nian laiha fatin, tanba desloka hela ba Portugal.

“Sira ba hotu Portugal. Dalaruma semana rua tan mak sira foin mai,” esplika traballador Timoroan ba Tempo Timor iha sira nia serbisu fatin, Pate, Kolmera - Dili. 

Emprezariu Timoroan sira ne’e mós rekomenda ba governu foun katak persija halo avaliasaun ba investimentu ne’e, tanba kuaje tinan 6 ona, maibé nia rezultadu mak halo de’it ruko ka baraka oan sira iha rai ne’e, no promesa atu halo uma andar 10 to’o oras ne’e la sai realidade. (Oki)