Tempo Timor Online

 

Tempo Timor:  Segunda Feira, (27/7),Vise  Ministru  Obras Públikas ba asuntus Transporte no Komunikasaun (MOPTK),  Inácio Moreira  ho ninia kometiva ofisialmente hala’o vizita urjente hodi hare direitamente kondisaun Portu Dili.

 

Objetivu husi vizita ne’e, atu hasoru malu ho ekipa boot ida husi area Portu Dili nian no Ajensia Kooperasaun JICA husi Governu Japaun, oinsá atu buka fundu hodi hala’o rehabilitasaun fila-fali ba Portu Dili.

 

Vise Ministru Inácio haktuir, Portu Dili presija hala’o ona rehabilitasaun urjente tanba hare ba kondisaun Portu Dili ladun di’ak ona.  

  

“Ami hala’o ona reniaun ho Ministru atu hahu halo duni rehabilitsaun urjente ida hodi hare lalais kondisaun Portu. Ita hare iha parte leste nian movimentasaun komesa  la funsiona ona,” tenik vice Ministru, Inacio Moreira ba jornalista sira iha Portu Dili, Segunda-Feira (27/7).  

 

Inacio rekoñese katak, kondisaun Portu Dili komesa at ba bebeik hanesan dalan, ne’e duni ba oin presiza kria politika ida oinsá atu bele hala’o ona rehabilitasaun ho lalais hodi nune’e bele responde defikulidade ne’ebé maka durante ne’e  sai obstalku iha Portu Dili.

 

Inacio haktuir, liu husi planu ida ne’e iha ona kondisaun para hadia operasaun iha ita nia portu. Tanba, hare ba movimentasaun iha parte leste nian edifisiu hirak ne’e tenke hala’o rehabilitasaun total, inklui hare mós ba projeitu portu tibar ne’ebé tuir planu sei hari.  

 

“Edifisiu hirak ne’e presija hadi, atu nune’e bele funsiona fila-fali hodi sistema kontrolu marítima nian bele la’o di’ak, se lae roó sira ne’ebe mak tama mai ita sik de’it mos labele, ne’e duni ho vizita ida atu mai hare kondisaun portu hodi bele aprova osan atu halo rehabilitasaun.” Inacio esklarese.

 

Iha vizita ne’e, Vice Ministru Inacio Moreira hare mós kondisaun roó ne’ebé maka hetan soke iha loron hirak liu ba. 

 

“agora daudauk roó refere hala’o hela manutensaun tanba roó ne’ebé hetan soke ne’e nnia poste  ida mak tohar  no Diretor sira mos informa ona ba róo nain hodi hadia urjentemente tanba iha roó nia okos nakfera liu.” Konta Inacio.   

 

Iha fatin hanesan,  Natalino da Silva responsável tekniku  informa  katak, bainhira roó ne’e departamentu Marítimo, (Horbor Master) hatama mai roó tula sasan todan ho 5 mil toneladas.

 

“to’o agora roó ne’e seidauk bele fó sai tanba seidauk hetan konkordansia husi parte rua, tan ne’e tekniku husi Vietnam mai rasik hodi hare kondisaun roó refere. Nataino konta tuir”  (**)

Lee kontinua... 0

 

Tempo Timor: Eis Vice Primeiru Ministru asuntu Boa Governasaun iha Kuatru Governu Konstituisional, Mario Viegas Carascalão hato'o ninia preokupasaun ho prezensa Negosiante Estranjeiru ne’ebé hahú domina ona merkadu Timor-Leste. Iha Timor-Leste bele nota momos katak iha merkadu tradisional no fa'an folin tama sai uma ho kios ki'ik oan sira maioria husi Xina ho Indonzia.

 

Carascalão fiar katak, prezensa negosiante estranjeiru ne’ebé komesa domina merkadu iha munisipiu no suku iha posibilidade boot sei hamate timor-oan sira no agora daudauk timor oan ne’ebé kaer negosiu iha volume ne’ebé kikuan liu.

 

“Ita foin maka halo tinan 13, ne’e duni maneira moris  presija hadia, tanba  hala’o negosiu ki’ik de’it mos sidadaun estranjeirus maka asesu di’ak liu duke kompara ho ita nia povu kbiit la’ek sira.” dehan eis Governador Timor-Timur ba jornalista sira, iha Ótel-Timor foin lalais. 

 

Iha biban hanesan ne’e, Carascalão husu ba Governu atu kontrolu no foti desizaun ruma ba sidadaun estranzeiru ne’ebé mai hala’o fai serbisu ne’ebé timor oan bele halo.

 

Carascalão mos lamenta ho ema estranjeiru balun mai ho visa Turista maibe hala’o fali servisu iha Timor-Leste. Ema estranjeiru ne’ebe tama mai ho vistu turista la iha buat ida no ida ne’e sira nia direitu bele mai pasiar, maibe la’os atu mai serbisu fali. 

 

 

Se aban bain rua maka sidadaun estranjeiru domina ekonomia Timor-Leste no , kuandu politika nasaun hetan ona dominasaun mai husi poder ekonomiku politika ne’e sei la la’o nomos ukun nain sira sei tuir de’it ema estranjeru nia hakarak.(**)

Lee kontinua... 0


DILI- Senõra Maubisse oras ne’e domina tebes iha Merkadu Taibessi, maibé problema folin ne’ebé kompetitivu tebes mak halo negosiante sira mós sente araska itoan.  

Negosiante modo senõra, Leonardo Soares husi Munisipiu Ainaro, Postu Administrativu Hatubuilico hatete, durante tempu lobuk ida ona nia fila liman liu husi fa’an de’it modo. Leonardo hahu nia atividade fa’an modo ne’e iha tinan 2006 iha merkadu Hali Laran. Hafoin governu halo merkadu Taibessi mak nia foin muda ba iha merkadu ne’e hodi kontinua fa’an to’o ohin loron.

“Iha Merkadu Hali Laran mós ami fa’an de’it modo. Agora muda fali mai iha Taibessi mós hanesan. Ami sosa modo hirak ne’e husi maluk sira iha Maubisse (Ainaro). Kada semana ami kompras (belanja) dala ida de’it, maibé depende ba stock. Kuandu stock mamuk ona, entaun ami telefone ba sira foho hodi lori modo mai,” haktuir Leonardo bainhira dada lia ho Jornalista Tempo Timor iha merkadu Taibessi, Sabádu (25/07).

Modo sira ne’ebé Leonardo fa’an iha merkadu Taibessi mak señora, fehuk ropa, rapollu, modo mutin no koto nurak. Husi lala'ok ne'e populasaun iha ninia inisiativa rasik maibe falta atensaun husi governantes sira atu reforsa liu tan sira nia produsaun.

“Modo rapollu ne’e ami sosa ho Kareta de’it. Kuandu sosa karada ida ho folin U$ 800.00. Deopois mak ami fa’an fali eceran. Rapollu fuan ida ami fa’an ho folin U$ 0,5 centavos. Fa’an saku ida ho folin U$ 50,” esplika Leonardo.

Leonardo agradese tebes bba governu ne’ebé fasilita ona sira hodi fa’an iha merkadu Taibessi, tanba iha ona kondisaun di’ak. Kompara fa’an iha merkadu Hali Laran mosu problema barak hanesan ema sempre naok sira nia sasan.

“Agora iha ne’e di’ak loos, tanba laiha ema naok ten no ahi mós kalan lakan hela de’it,” nia hatete.

Leonardo ho nia kaben Hermelinda Fátima oras ne’e iha oan hamutuk nain lima (5), feto tolu (3), mane nain rua (2). Liu husi sira nia atividade negósiu ne’e mak hodi sustente sira nia nesesidade uma laran no sustenta oan sira ba eskola.
  

Lee kontinua... 0


Tempo Timor: Politika Governu liu husi Sekertariu Estadu Asuntu Apoiu Ekonomia Muileres hodi fó tulun fundus transferensia publiku ba grupu vulneravel sira nu’udar pontus importante ida hodi reforsa ekonomia familia, maibe presiza iha kontrolasaun di’ak.

Objetivu fundus de transferensia husi Sekertaria Estadu Promosaun Igualidade Jeneru ne’ebé agora kontinua ho Sekertaria do Estadu Mulher (SEM), atu asegura sustentabilidade ekonomia ba familia sira ne’ebe fulneravel.

“ buat sira ne’e di’ak. Maibe, ha’u hanoin tenke iha kontrolu ida tanba se bainhira la iha kontrolu ne’ebé di’ak konserteza osan sira ne’e ita fó maibe sei la muda ekonomia ema hirak ne’e nian.” dehan Deputada Bankada Fretilin Josefa Pereira iha uma Fukun Parlamentu Nasional.  

Deputada ne’e mós kestiona kona ba resposta husi Sekertariu Estadu Asuntu de Mulher ne’ebe dehan, sei halo avaliasaun ba benefisiariu. Tanba, avaliasaun ne’e labele liu tiha tinan hirak resin maka foin halo avaliasaun.

“ha’u hanoin avaliasaun ba benefisariu ne’e labele liu tiha tinan hirak kedas maka foin halo avaliasaun, tanba avaliasaun ne’e presija halo iha tinan – tinan bainhira ita hala’o tranferensia de fundus, hodi nune’e ita bele hare no hatene katak, sira susesu ka lae, iha progresu ka lae?” esklarese Josefa.

Josefa mós kestiona katak, hahú iha tinan 2008, 2009 to’o 2014 seidauk iha avaliasaun ida ba iha benefisariu sira no muintu menus ba iha fokal poin sira, ita kria tiha buat ida fokal poin maibe ita la fasilita sira nia serbisu.

Iha vizita Deputada ne’e ba iha Munisipiu Baucau propriu fokal poin sira la hatene grupu sira ne’e ninia ezistensia,? Administrador Munisipiu la hatene ezistensia grupu sira ne’e, Administrador Postu rasik ignora ejistensia grupu sira ne’e no ida ne’e hatudu katak falta de koordenasaun entre fokal poin, Sekertaria do Estadu no Ministeriu ne’ebé maka assume responsabilidade ida ne’e ho Governu lokal.

“Ha’u hanoin susar tebe –tebes tanba se la’e ita hanoin dehan montante ne’e ki’ikoan hela, maibe kuandu osan sira ne’e tau hamutuk montante ne’e boot tebes. Ita hare katak iha 7 mais de 1 miloens Setisentus iha no  setor pribadu nian mais de 3 miloens no valor hirak ne’e ita tau hamutuk osan ka la’e.” Josefa hatutan.

Klaru katak, ita hakarak atu reforsa ekonomia familia maibe kontrola ne’e tenke iha, tan ne’e husu atu reve fila-fali fundus ida ne’e ninia sistema no mekanismu, tanba ita hare katak grupu balun hakiak fahi no manu, maibe fahi ho manu sira ne’e mate maibe la iha koordenasaun husi Ministeriu Agrikultura liu husi Departamentu Pekuaria para pelemenus bele ba fó netik fasina.

“Razaun ne’ebe sira fó tanba dehan, fahi sira ne’e moras hotu maka mate. Maibe, moras duni ka lae? Ida ne’e maka ha’u dehan presiza iha kontrolu.”  hakotu Josefa. (**)

Lee kontinua... 0


Tempo Timor – Tuir nota de imprensa ne’ebe fo sai husi Embaixada Nova Zelandia (NZ) iha lokraik kuarta feira (15/07) informa katak Nova Zelandia ninia embaixada sei halo eventu ida hodi promove Vinho no produtu aihan Nova Zelandia nian ho koalidade diak maka sei aprezenta iha eventu ne’ebé sei realiza iha Kinta-Feira, 16 Julhu 2015 iha Embaixada Nova Zelandia.


Objektivu husi demonstrasaun ida ne’e laos atu hatudu deit vinho ho aihan balun husi Nova Zelandia nian ne’ebé rekonhese diak ona iha mundo, maibe importante liu maka produtu hirak ne’e bele sosa fasil no ho presu ne’ebé diak iha Dili. Esplika Ambaixador Jonathan Schwass.


“Ami sei fornese acepipes aprezentado ho Nova Zelandia nia na’an karau, na’an bibi, mussel (cipu) , produtu lacteos no variadade vinho husi Nova Zelandia. Produtu hirak ne’e fornese husi supplier lokal iha Timor-Leste. Ami nia Policia husi Nova Zelandia mos sei fo asistensia iha parte BBQ Sosis sizzle”, informa iha nota nota de imprensa ne’ebe hasai husi Embaixada Nova Zelandia iha Dili iha loron Kuarta (15/07/2015).


“Eventu ida ne’e sei la posivel wainhira la hetan suporta maximu husi Kmanek Supermerkadu, ne’ebé fornese ona aihan; Restaurante Osteria, ne’ebé iha biban hanesan prepara menu fantastiku ho naran Canape; no Cheers/East Timor Trading, ne’ebé ho laran luak fornese ona Nova Zelandia nia vinho,’ dehan Sr. Schwass. Ami agradese tebes ba parseirus nain tolu ne’e”, haktuir iha komunikadu refere.


 “eventu ida ne’e mos sei aprezenta servisu no aktividades husi Nova Zelandia nia paseirus dezenvolvimentu. Konvidadus sei iha interese ba materiais ne’ebé aprezenta hodi hare no bele koalia ho konvidadus seluk wainhira parseirus sira aprezenta sira nia menu,’ esplika Ambassador Schwass.


Komunikadu ne’e liu tan inform aba publiku katak, “Eventu ida ne’e sei realiza iha Embaixada Nova Zelandia iha Motael (Rua Geremias do Amaral) husi 5-8 Horas TLS aban”.

Nasaun Nova Zelandia produz vinho ho kualidade di’ak tebtebes no ho kuantidade a’as hodi halo exportasaun ba Nasaun seluk iha rejiaun ne’e.

Lee kontinua... 0
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version