Tempo Timor Online

 

Tempo Timor : Ema barak seidauk iha konsensia atu kumpri regras tranzitu nian, tan ne’e Deputada husi Bankada Partidu Demokratiku (PD), Maria Lourdes Besa husu ba entidade hotu atu respeita regras tranzitu ne’ebé iha, liu liu zebrakros, tanba zebrakros fó oportunidade ba ema ne’ebé maka la’o ain. 

“ tuir loloos kondoutor ka ema sira ne’ebé lori kareta tenke hatene didiak regras tranzitu nian, liu-liu kona ba zebrakros atu nune’e hotu-hotu bele la’o tuir ninia dalan para bele eveita situasaun ne’ebe akontese bebeik soke malu.” dehan Deputada Maria Lurdes Besa ba jornalista sira, iha Parlamentu Nasional, tersa,(11/08).

Iha biban ida ne’e, Deputada refere husu ba kondoutores sira ne’ebé lori transporte publiku tenke hatene didiak regras transzitu nian, tanba dala barak kondoutor sira la kumpri regra ne’ebe iha, purke bainhira hare kareta ida para hela oin maibe husi sorin kareta balun hakat liu de’it entaun dala rum abele mosu akontesementu ida ne’ebé ita hotu lakohi.

Besa hateten, regras ida ne’e tenke hanorin ba ema hotu, purezemplu tan ba sa maka TVTL lahalo programa oinsá maka bele hanorin ema hotu atu la’o iha dalan, tantu ba sira ne’ebé la’o ain no kareta para bele kumpriede regras tranzitu ne’ebé iha. 

“Ita preokupa demais ho kestaun siguransa, korupsaun no mos governantes, maibe, buat sira ne’e lolos ita tenke halo sosializasaun, tenke fo mos edukasaun sivika ba asuntu ida ne’e tanba asuntu ida ne’e mós importante ba ema nia” Besa kestiona.

 

Entertantu Jose Sarmento hateten, nu’udar komunidade sente triste tanba ita nia maluk sira ne’ebe mak lori transporte hanesan kareta no motor seidauk iha konseisa ba zebrakros.

 

“Ita hare bebeik ona iha estrada balun ne’ebe iha zebrakros, dala barak kuandu kondotoris balun fo tempu atu ema sira ne’ebé la’o ain atu hakat liu ba Estrada sorin, maibe kondotoris balun mai ho kareta tama deit ho problema hirak ne’e mak dala barak mosu aseidente bebeik,”tenik Jose (**) 

Lee kontinua... 0

 

Tempo-Timor : Hafoin Ministeriu Justisa, Ivo Valenti ofisialmente hala’o lansamentu ba produsaun Bileti de Identidade (BI) iha Munisipiu Lautem semana foin lalais, oras ne’e daudauk Lautem oan sira ne’ebé ho idade 12 ba leten komesa halo ona sira nia BI.

“bileti de identidade ne’e hanesan legalidade ida, legalidade ne’e hatudu mos diretu no dever balu hanesan sidadaun hodi nue’e iha futuru oin mai bele asesu saude gratuita persija mós kartaun ida ne’e “ dehan Ministru Justisa Ivo Valente iha momentu halo lansamentu. 

Iha biban ida ne’e, Ministru Justisa tenta halo esplikasaun kona ba sentiudu kartaun eleitoral ba komunidade no reprezentante membru Governu local ne’ebé marka prezensa iha serimonia refere katak, kartaun eleitoral hanesan parte ida hodi bele uza ba eleisaun, maibe bileti de identidade ne’e hanesan parte ida hatudu nia legalidade rasik.

Nia (Ivo Valente) husu mos ba funsionariu sira ne’ebé servisu iha notariadu munispiu Lautem nian atu hala’o servisu ho makas hodi atende didi’ak komunidade sira tanba kartaun ida ne’e importante no sira iha direitu atu hetan. 

Iha fatin hanesan Presidente Konselu Jeral Veteranus rejiuan ponta leste, Renan Selak lori povu Munisipiu Lautem nia naran agradese ba ministeriu justisa bele loke tan bileti de identidade iha munisipiu Lautem tamba durante ne’e feri katuas sira sempre gasta tempu ba to’o iha Munisipiu Baucau no Dili hodi halo bileti de identidade.

 

“Lori Veteranus nian naran, husu mós ba povu Lautem tomak atu kontrbui ba prosesu ida ne’e. Ha’u fiar povu tomak sei fó nafatin sira nia kontribuisaun masimu ba iha prosesu halo bileti de identidade.” dehan Renan Selak hodi taka ninia liafuan. (**)

Lee kontinua... 0

 

 

Lautem, Tempo Timor - Prezidente Repúblika (PR), Taur Matan Ruak (TMR), akompañadu hosi Primeira Dama, Isabel Ferreira, iha Domingu fim de semana hala’o dialogu komunitaria ba loron dalima nian iha suku Com,  Postu Administrativu Lautem, Munisipiu Lautem.

 

Iha Suku Com, aleinde Xefe Estadu fahe vizaun no hanoin kona-ba progresu no dezafius Timor-Leste  nian  hosi ukun an to’o a data, i motiva komunidade  sira oinsa  atu serbisu hamutuk. Xefe Estadu mós husu ba komunidade Suku Com atu sulan fahi tanba Com hanesan fatin  turistika, maibe Xefe Estadu haree ho matan rasik komunidade husik livre fahi.

 

“Ha’u horseik ma i(sabadu-le) mai haree  turista ain hat iha tasi ibun (fahi). Ha’u-nia oan sira horseik atu harís mas sira tauk tanba fahi lao ba mai iha tasi ibun”,dehan Xefe Estadu ba komunidade Com..

 

liu tan Prezidente hato’o ninia apello dehan, “Ha’u gosta imi Com, fatin furak mas se bele sulan tiha fahi tanba ha’u lakohi ema ba ko’alia at  imi ne’e ha’u mós moe”. 

 

Tuir Xefe Estadu katak problema ida tan iha Timor mak kona-ba sanitasaun.

 

“Ha’u ko’alia  ho malae sira ne’eb’e vizita  ita nia rain, sira dehan Prezidente imi nia  rain kapás, furak  mas ami tauk mak ho imi nia sintina”, Prezidenti dehan.


Ho ne’e Xefe Estadu hateten Turizmu tenke tau atensaun  tanba tursita sira ne’ebé hakarak atu vizita fatin turistiku  tenke iha kondisaun moos no hegine.

 

Enkuantu tama ba sesaun husu no hatan,  iha suku refere  komunidade ladun husu kona-ba bee moos, eletrisidade no estrada tanba iha ona kondisaun. Assuntu ne’eb’e sira husu  liu mak  kona-ba pensaun ba veteranus sira ne’ebé la tuir grau partisipasaun funu, husu atu loke basar entre Com ho illa Kisar (Maluku-Indonesia), NGO sira harii tiha eskola pois abandona,  ro illegal tama  halo peska illegal iha tasi Com, Portu Com kondisaun la favorse ro atu atraka no  problema  real sira seluk.

 

Hatan ba problema veteranus nia, Xefe Estadu  hateten “Lei la’ós biblia, lei ne’e ita mak halo  atu ajuda regula no resolve problema, mas lei ne’ebé iha para aumenta problema  hapus tiha  halo fali foun”.

 

Iha okaziaun ne’e mos komunidade sira keixa ba Prezidente kona-ba NGO loke tiha eskola mais ikus mai abandona hela tiha.

 

 

“Primeira ves ha’u mai lospalos rona ida ne’e, sira husik hela pois soe fali todan ba governu, governu mak tenke lori todan, sira kuandu loke la mai husu governu problema ona mak sira husik ba imi ba husu governu, sira loloos ne’e fo han ikan. Sira ne’e dehan loloos buka projetu komu projetu ne’e sustentabilidade la iha  pois tau sala ba governu”, Prezidente Taur hato’o ninia resposta.

Lee kontinua... 0



Tempo Timor : Xefe suku Rasa, postu administrativu Lospalos, Municipio Lautem, Joaquim Rodrigues Gomes no ninia komunidade balun monsta momos sira nia sentimentu nu’udar nain ba nasaun Timor-Leste nune’e iha dialogu ho Presidenti da Republika Taur Matan Ruak, sira husu governu liu husi Ministeriu Onbras Publiku Transporte Komunikasaun  presija monta prepagu ba komunidade ne’ebé uja eletrisidade tan ba durante ne’e komunidade sira uja ahi eletrisidade la ho epiritu poupansa.

“Eletrisidade ne’e tenki iha poupansa. Aban bainrua tenki regula, aban bainrua tau prepagu, ne’e, aban bainrua ema uja ne’e regula nia-an rasik, ne’e ema la hakilar ona, ne’e tenke governu monta prepagu,”Dehan Xefe Suku Rasa, Joaquim Rodrigues Gomes iha dialogu ho Prezidente Repúblika (PR), Taur Matan Ruak iha suku Rasa, Kuarta, (22/07).

Autoridade lokal ne’e informa, iha suku Rasa komunidade  asesu pursentu 100 lina  eletrisidade maibe laiha regulamentu no seidauk monta prepagu nune’e komunidade sira uja tuir sira nia hakarak de’it.

Nia hatutan dala ruma xefe suku la’o ba mai haree komunidade sira kontinua uja ahi eletrisidade iha tempo loron, maske loron la presija ona loke ahi eletrisidade.

Tanba ne’e presija duni monta prepagu hodi nune’e komunidae sira bele uja barak tenki iha responsabilidade hodi fo kontribuisaun tuir ahi ne’ebé komunidade sira uja.

“Iha ne’e dala ruma ha’u mak ba haree sira loke de’it ahi entaun ha’u dehan taka tan ba ne’e presija poupansa,”xefe suku ne’e hateten.


Iha fatin hanesan komunidade iha suku refere, Antonino Gomes hatudu ninia patriotizmu ba ninia nasaun hodi hateten durante ne’e komunidade sira uja ahi eletrisidade dala ruma loron komunidade sira sei loke, tan ba ne’e karik monta prepagu hanesan populasaun pronto fó kontribuisaun ba dezemvolvimentu nasional.

“Karik governu monta ona eletrisidade, hanesan komunidade pronto fó kontribuisaun ba dezemvolvimentu,”dehan Antonino Gomes.

Oras ne’e dadauk parte Eletrisidade Timor-Leste (EDTL) hahú monta ona prepagu ba eletrisidade iha Timor laran tomak hodi nune’e komunidade mós bele fó ninia kontribuisaun no hamenus naha todan kustus ne’ebe estadu Timor-Leste infrenta.

EDTL rasik halo ona inspesaun ba kada uma hodi disliga no fo sanksaun ba komunidade sira ne’ebe dada eletridade ilegal maske nune’e iha parte seluk lala’ok ne’e seida’uk hatauk komunidade seluk hodi kontinua dada lina eletrisidade ilegal.

Hatan Ba Kestaun ne’e, Xefe Estadu Taur Matan Ruak agradese no kontente tan ba komunidade Rasa no liliu Posto Administrativu Lospalos maioria asesu ona eletrisidade.

“Hau kontente tan ba iha suku Rasa, komunidade bele eletrisidade asesu ona 100%, maibe tenke poupa tanba kada tinan ita hasai orsamentu hodi sosa kombustivel maka’as,” dehan Presidenti Taur Matan Ruak ba ema lubun bo’ot ne’ebe partisipa iha dialogu ne’e. (**)

Lee kontinua... 0


Tempo Online: Iha fulan hirak liu ba Primeiru Ministru (PM), Rui Maria de Arauzo deklara katak, membru governu sira sei la halo limpeza tanba iha serbisu barak atu halo, ne’e duni knar ida ne’e sei entrega ba lider komunitariu no Xefe Suku sira. 


Mesmu nune’e, Xefe Suku Maskarinas, Mateus de Jesus Valenti hateten, ba membru governu ka funsionariu publiku sira ne’ebé hela iha suku tenke hola parte mos iha atividade suku nian, ne’e duni bainhira autoridade lokal ho komunidade sira halo limpeza konserteza nudar sidadaun iha suku refere tenke halo mós limpeza.    


Deklarasaun PM ne’ebé dehan, funsionariu sira labele halo limpeza ne’e la iha buat ida. Maibe, nu’udar autoridade lokal hakarak hateten, funsionariu sira ne’ebe mak hela iha suku konsidera mós hanesan komunidade ne’e duni sira mós bele organiza malu hodi hamos foer iha bairo laran.


“Se ita konsidera membru governu labele halo limpeza, depois komunidade mak ba hamos fali ninia uma oin, ha’u hanoin ida ne’e sala boot. Tanba, nu’udar sidadaun tenki kontribui ba atividade iha suku no aldeia ne’ebé mak nia hela ba.” dehan Valenti.


Xefe Suku ne’e haktuir, funsionariu sira halo limpeza iha estrada publiku mak la di’ak, maibe atividade limpeza iha suku laran sira tenke kontribui hodi hamos sira nia uma oin.


“Banhira ita hakarak Dili sai nu’udar sidade ne’ebé saudavel, entaun entidade hotu-hotu tenke kontribui ba prosesu ida ne’e, hodi nune’e bele garantia ambiente ne’ebé mós no saudavel, ema ida-idak tenke tau konsensia hodi labele so’e foer arbiru.” Valenti hakotu.


Iha parte seluk, Natersia da Costa estudante husi Universidade Dili hateten, ita presiza halo limpeza iha sidade Dili, atu nune’e ambiente iha sidade sai furak liu tan.


“ha’u hanoin parte hotu-hotu, hahu husi komunidade bainbain to’o funsionariu sira tenke halo limpeza. Ida ne’e la signifika atu halo limpeza ba iha fatin hotu, maibe ema idak-idak bele hamos ninia uma oin” dehan Natersia.

Maskarinhas ho Kaikoli nu'udar fatin ne'ebe sempre hetan ameasas husi inundasaun no moras tan ba we nalihun tuir kanu be no kantereiru ba kuda kanku nia fatin.(**)

Lee kontinua... 0
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version