Tempo Timor Online

 

Tempo Timor - Iha Sexta-Feira ne’e iha Palasiu Prezidensial Nicolau Lobato, Prezidente Repúblika, Taur Matan Ruak, simu vizita kortezia Sekretáriu Estadu Vatikanu, Sua Eminênsia Kardeal Pietro Parolin, akompañadu hosi Prezidente Epsikopal Timorense Dom. Basilio do Nascimento, Vise Ministru Negosiu Estranjeirus, Sr. Roberto Soares, Embaixador Vatikanu nian mai Timor-Leste, Arsebispo Joseph Marino.

 

Iha Sorumutu besik oras ida, ne’ebé nakonu ho ambiente amigavel ne’e, Xefe Estadu hatudu nia sentimentu kontente no agradese ba asinatura Konkordata ne’ebé finalmente halo ona iha Dili, ne’ebé tuir lolos Konkordata refere baibain asina iha Santa Sé.

 

Liutan, Xefe Estadu hateten ba Sekretáriu Estadu Vatikanu katak, Igreja Katolika nia papel boot iha luta ba independénsia no sei kontinua boot nafatin li-liu iha area promove justisa sosial. “Vizita sira hanesan ne’e renova ita nia esperansa hanesan ema fiar nain”, dehan Xefe Estadu.

 

Xefe Estadu realsa Estadu Timor-Leste no Igreja la’ós de’it hanesan parseiru maibe  mós hanesan aliadu ida.

 

Enkuantu Sua Eminênsia Kardeal Pietro, sente kontente tebes ba resesaun ne’ebé Timor-Leste halo ba nia vizita no aprezenta saudasoins husi Sua Santidade, Amu Papa Francisco nian ba Xefe Estadu no ba povu Timor-Leste tomak.

 

Sekretariu Estadu Vatikanu mós observa katak povu timoroan ema relijiozu teb-tebes no impotansia papel Igreja nian ba hametin no haburas fiar Evangellu iha nasaun ida ne’e. 

 

Iha enkontru kortezia ne’e mós Sua Eminênsia Kardeal rekoñese katak nu’udar nasaun foun Timor-Leste sei iha dezafiu oi-oin hanesan; harii pás liu husi rekonsiliasaun no diálogu, i nune’e mós dezenvolveimentu la’ós de’it ekonomikamente maibé mós espiritualmente. Ida ne’e mak espiritu Konkordata ne’ebé foin dadaun asina ne’e. 

 

 

Vizita Sekretáriu Estadu Vatikanu nian mai Timor-Leste hanesan Enviadu Espesial hosi Papa Francisco nian atu selebra missa agradesimentu tinan 500 Evanjelizasaun iha Timor ne’ebé hala’o iha Sabadu 15 Agostu 2015 iha Tasi Tolu.

Publika iha Nasional

Tempo Timor : Presu sasan iha merkadoria kontinua sai preokupasaun ba ema barak, liu-liu ba povu ki’ik sira ne’ebé moris iha risku ekonomia fraku. 

 

Situasaun hanesan ne’e, la’os de’it fó impaktu ba povu ki’ik sira, maibe prejudika mós pilares ekonomia hotu-hotu, inklui komersiante sira nivel alto ne’ebé direitamente aktivo iha area komersiu externo. 

 

“Hanesan nasaun foun, Timor Leste infrenta hela problema barak, liu-liu problema ekonomia, tanba faktus hatudu to’o ohin loron povu barak sei moris ki’ak, la kampu de serbisu, rendimentu povu minimu no problema sosial sira seluk tan, nune’e mós Timor-Leste sei dependente ba nasaun seluk hodi importa produtus hirak ne’ebé presiza atu konsumu.” dehan Xefe Grupu Juvetude Verde, Diamentino Boa Rui de Andrade ba Tempo Timor liu husi via telefone (14/8). 

 

Diamentino rekoñese katak, ho dependensia hirak ne’e jeralmente Timor Leste sei la ses husi dependensia iha setor ekonomia no ida ne’e afeita tebes ba presu merkadoria iha rai laran, tanba Governu rasik to’o ohin loron seidauk bele hala’o kontrolu masimu ba folin sasan, liu-liu folin sasan nesesidade baziku no folin sasan ba material konstrusaun nian. 

 

“situasaun hanesan la’os de’it akontese iha kapital Dili, maibe akontese mós iha Munisipiu tanba folin sasan entre Munisipiu la hanesan no ironia liu tan presu entre loza ida ba loza seluk mós la hanesan. Ezemplu, folin fós 25kg iha Munisipiu loza balun fa’an ho folin U$ 14.00 kada saku, maibe iha loza balun ho folin U$, 14. 50 centavos no folin iha Postu Administrativu dala rua bele to’o U$ 16.00 até U$ 17.00.” tenik Xefe Grupu ne’e. 

 

Entertantu Hilario F. Mendes haktuir ba Tempo Timor iha Merkadu Taibesi, (14/8) katak, atu kontrola sasan folin ne’ebé serkula iha teritoriu Timor-Leste, Governu liu Ministeriu Komersiu Industria Ambiente (MKIA) presija kria ona regulamentu ida kona ba folin sasan, hodi nune’e fa’an na’in sira labele hasae sasan folin konforme sira nia hakarak maibe tenke tuir mata dalan ne’ebé Governu fó sai. 

 

“ha’u hanoin asuntu ne’e importante tebes ne’e duni Governu presija kontrola, se lae ema ida bele hasai folin sasan konforme ninia hakarak” tenik Ainaro oan ne’e hodi sosa hela sasan nesesidade baziku nian iha merkadu Taibesi. 

 

 

Tempo Timor mós tenta konfirma ba Ministriu relevante maibe la konsege, tan ne’e to’o notisia ne’e publika seidauk hetan resposta husi Ministru relevante. (**)

Publika iha Ekonomia

 

Dili, Tempo Timor – Timor-Leste (TL) ho ninia vijinu Republika Indonezia (RI), iha loron 10-11 Agostu 2015, halao reuniaun Grupu Sub-Komite Tékniku ba Demarkasaun Fronteira no Regulamentasaun ba dala XXVIII, iha Institutu Diplomatiku, Ministériu Negósiu Estranjeiru no Koperasaun, hodi diskute konabá kalendariu atividade konjunta ba kestaun fronteira entre rai rua ne’e.

 

“Iha enkontru Sub-Komite Tékniku ida ne’e, ami diskute konabá kalendariu atividade konjunta entre Timor-Leste ho Indonezia. Kalendariu konabá atu halo survey iha terrenu hodi hare ba delineasaun nomos halo demarkasaun fronteira hamutuk. Konabá demarkasaun ne’e, oinsa halo instalasaun ba marku no kuadru avizu fronteira, iha area ne’ebé mak ita konkorda tiha ona ho Indonezia. Tuir planu, normalmente, tinan-tinan Timor-Leste halo kolokasaun marku 80 no Indonezia halo 80, iha parte fronteira nian. To agora, hari’i ona marku fronteira besik 500, hahu kedas iha tinan 2005. Tinan ne’e, Ita planu tan atu hari’i marku 200 iha fronteira. Timor-Leste kompromete atu halo tan demarkasaun fronteira 120 no Indonezia kompromete halo tan demarkasaun fronteira 80. Se’e atividade demarkasaun fronteira ne’e mak ita kompleta iha tinan ida ne’e, signifika prosesu demarkasaun iha fronteira prinsipal ne’e, ita kompleta ona. Ne’e katak ba oin, ita hare fila fali demarkasaun ba iha area fronteira Oecusse nian deit,” katak Diretor Marcos da Costa, ne’ebé nudar mos Xefe delegasaun hosi parte Timor-Leste nian. 

 

Entertantu, Diretor Marcos da Costa haktuir mos katak durante reuniaun parte rua diskute mos konabá oinsa atu produs mapa konjunta, ne’ebé, sai nudar mapa ida deit, parte rua sei utiliza hodi bele fasilita servisu iha terrenu, liu-liu ba instituisaun seguransa sira ne’ebé maka halo servisu iha area fronteira nian. Projetu mapa unika ne’e hahu halao iha tinan 2013 no oras ne’e kuaze tama iha faze final nian. Ne’e duni, tuir projesaun parte rua nian, mapa konjunta ne’e sei finaliza iha Abril 2016.

 

Delegasaun hosi parte Indonezia kompostu hosi reprezentante hosi Ministériu Negósiu Estranjeiru Indonezia nian, Ministériu Defeza, Ajensia Informasaun Geospatial ne’ebé hare konabá mapamentu nasaun Indonezia nianno Reprezentante hosi Embaixada Indonezia iha Dili. Hosi parte Timor-Leste, lidera hosi Ministériu Negósiu Estranjeiru no Koperasaun akompaña hosi parte Alfandega Ministériu Finansas nian, Karantina, parte Unidade Polisia Fronteira no imigrasaun ho reprezentante hosi Gabinete Kaza Militar, Prezidensia Repúblika.

 

 

 

Publika iha Nasional

 

 

 

                                                      

Iha fulan hirak liu ba tinan ida ne’e 2015, estudante balu baku professora iha Munisípiu Díli, kapital República Democrática Timor-Leste nian. Iha ne’ebé estudante balu hatudu nia premanizmu ba nia professora rasik iha aula laran. Estudante hirak ne’e mai husi Ensino Secundário Publiku Fitun Naroman Timor-Leste (FINANTIL) Díli,no Ensino Secundário Publiku Numerú 05 de Maio Becora, nomós iha munisipiu sira seluk tan. Depois ida ne’e, estudante baku professora iha Munisipiu Díli, iha kazu seluk estudante Timor-oan asalta malu iha Yogyakarta-Indonesia nian. Tuir hau nia hare kazu hirak ne’ebé temi iha leten ne’e nudar Timor-oan triste tebes. 

 

Tanbasá mak estudante Timor-oan balu lakoi respeitu ba nia professora?. Tanbasá estudante Timor-oan lakoi respeitu ba malu entre estudante ho estudante?. Hahalok ida ne’e tuir hau nia hare ne’e falta moral no ética. Iha tempu uluk colonial Portugés nian to’o mai tempu ukupasaun Indonesia nian ema hare mestri/a ka professor/a (pak guru dan ibu guru) hare disiplina no respeitu tebes. Ita hare fali iha era Timor-Leste hetan nia liberdade goza nia ukun rasik-án estudante balu komesa la respeitu niaprofessor/a rasik. Tuir lolos professor ne’e sai matadalan no hanesan indikador ida atu estudante sira hodi banati tuir, se kuandu iha problema ruma entre professor ho estudante laos atu rezolve ho krime.

 

Liafuan moral dehan ho lian melayu nune’e “moral merupakan pengetahuan atau wawasan yang menyangkut budi pekerti manusia yang beradab. Moral juga berarti ajaran yang baik, buruknya perbuatan dan kelakuan. Moralisasi yaitu uraian (pandangan dan ajaran) tentang perbuatan serta kelakuan yang baik. Demoralisasi, yaitu kerusakan moral”. Liafuan etika dehan ho lian melayu nune’e “Etika adalah ilmu pengetahuan yang berhubungan dengan upaya menentukan perbuatan-perbuatan yang di lakukan oleh manusia untuk dikatakan baik atau buruk, dengan kata lain aturan ataupun pola-pola dari tingkah laku yang di hasilkan oleh akal manusia”.

 

Professor sira nia kna’ar boot ba labarik sira. Primeiru, sira tenke sosializa labarik sira, no sai ezemplu ba sira-nia hahalok no atitude, hodi provoka forsa-vontade atu estuda, konsentrasaun, disiplina no responsabilidade. Segundu, sira tenke fó apoiu ba labarik sira, hatene didiak sira nia situasaun no buka maneira atu motiva no komprende ida-idak. Terseiru, sira tenke hanorin ferramentu hotu ne’ebé presiza iha moris ne’e.  

 

Iha lidun seluk, wainhira Prezidente da Repúblika (PR) Taur Matan Ruak halo diálogu ho komunidade iha suku Cai-Cua, Postu Administrativu Vemasse, Munisipiu Baucauapela ba estudante sira dehan “labele baku professor  sira tanba baku professor ne’e krime, iha nasaun seluk labarik sira mak ba Tribunál nia inan aman mak ba kadeia tanba sira minoridade. Prezidente da Repúblika konkorda eskola ne’e hanorin la’os matenek deit, moral saida mak iha hodi respeita bo’ot sira, lori ema sai ema ba futuru. Tanba ne’e Xefe Estadu hateten tan katak nasaun Timor-Leste iha orden no disiplina para la’o ba oin, demokrasia kuandu Lei laiha ne’e laos demokrasia, liberdade kuandu laiha respeita ne’e labele, maibé Lei iha para regula, ita nia sosiedade ne’e disiplina, iha orden para lao ba oin”.

 

 

Iha parte seluk, membru Deputadu Parlamentu Nasional Bankada FRETILIN Eladio Faculto hatete “kazu estudante baku nia professor nudar kazu krime no tenke prosesu ba Tribunál, eskola hotu-hotu tenke toma previdensia ba aktus hirak ne’ebé tama tanba estudante sira komesa hatudu ona sira nia malandru”. Tuir Konstituisaun RDTL artigu 16 alinea (1). Sidadaun hotu-hotu hanesan iha lei nia oin, no mós iha direitu no obrigasaun hanesan. Signifika katak kualker sidadaun sé deit mak halo krime hotu-hotu hanesan iha lei nia oin hodi halo julgamentu iha Tribunál. Hodi nune’e husu ba estudante oan sira, tenki respeitu mestri no mestra sira, tanba sira nia favor ita selu labele tanba ne’e tenke respeitu inan aman no mestri sira iha eskola no iha uma.Definisaun norma no lei, atu ita bele komprende diak liután ita ema nia lalaok, moris iha kultura no saida mak lei. Ita ema nudar natureza ida, labele moris mesak,  maibé presiza moris hamutuk ho ema seluk iha sosiedade ida. Para bele moris hamutuk iha sosiedade ida tenke iha regulamentu ka regra ruma hodi kesi no orienta ema hotu nia hahalok moris, hanesan iha familia, iha sosiedade no iha nasaun ida nia laran.

 

Saida mak norma? norma hanesan padraun ida, hodi tetu, haree ema idak-idak ka grupu ida nia lala’ok moris iha sosiedade nia laran, tuir valor no norma sira ne’ebé iha. Bainhira ema moris hamutuk se iha norma ka regra ruma hodi hatudu ka haleno dalan, ema idak-idak sei moris tuir deit sira nia hakaran, maibé bainhira iha norma, ema hotu sei kumpri, nune’e bele fó benefisiu diak ba ema hotu.

 

Hakerek na’in fó rekomendasaun ba Governu no Parlamentu Nasional, presiza ka lae atu produs Lei ida hodi fo direitu ba professor/a sira hodi defende sira nia direitu mos kuandu sira iha ameasa ne’ebé mak hamosu husi estudante ruma, nune’e bele salvaprofessor iha rai laran tomak. Nomós fó hanoin ba Diretor Eskola Públiku ka Privadu hamutuk ho professor sira hotu iha teritoriu Timor-Leste katak iha eskola mós obrigatoriu tenke kria rasik regulamentu ki’ik ida, hodi nune’e bele regulariza estudante sira ne’ebé malandru iha area eskola no iha aula laran.

 

Ikus liu, fó hanoin ba Ofisial Polisia Eskola (OPE) mai husi membru Polisia ne’ebé maka Komandu Munisipiu idak-idak nomeia bazeia nesesidade atendementu ne’ebé konsentradu. Ofisial Polisia Eskola mos hetan treinamentu ne’ebé espesifiku kona-bá atividade eskola nian no fornese husi Departementu Polisia Komunitaria Nasional tuir kolaborasaun Sentru Formasaun Polisia Nasional Timor-Leste nian. Atividade Ofisial Polisia Eskola. Primeiru, Halo vizita ba eskola sira hodi halo edukasaun ba estudante sira kona-bá prevensaun krime iha area narkotrafiku, prevensaun ba prostituisaun no prevensaun ba violasaun sira ba sinais tranzito no siguransa rodoviária. Segundu, Ofisial Polisia Eskola halo mos rejistu kona-bá total estudante sira, total professor sira no kondisaun siguransa ba eskola ne’e rasik. Terseiru, Tarefa seluk tuir matadalan Ofisial Polisia Eskola nian. Dadaun ne’e OPE estabelese ona iha Munisipiu Díli, hanesan munisipiu pilotu ba estabelesementu OPE. Iha munisipiu estabelese ona eskola 12 tuir nesesidade husi eskola ne’e no identifika ona katak eskola hirak ne’e risku ba konflitu no krime tantu iha ambiente eskola ne’e rasik no mai husi liur. ***

 

Referénsia:

 

  Etika Estudante?. Asesu iha Jornal Diariu Timor Post, 11 Jullu 2015.

  Estudante Silu Tohar Professora Nia Liman. http://www.diariutimorpost.tl/berita-estudante-silu-toha-professora-nia-liman.html. Asesu iha loron Segunda 13 Jullu 2015.

  Deputadu Parlamentu Nasional (PN) Husu Prosesa Kazu Estudante BakuProfessor ba Tribunál. Asesu iha Jornal Diariu INDEPENDENTE, 14 Jullu 2015.

  Uza Prosesa Jusitsa Hasoru Krime iha Eskola. Asesu iha Jornal Diariu INDEPENDENTE, 14 Jullu 2015.

  Primeiru Ministru Timor-Leste Rui Maria de Araújo: Dezenvolve Timor-Leste, Tenke Investe Maka’as iha Edukasaun. Asesu iha Jornal INDEPENDENTE, 14 Jullu 2015.

  Kazu Silu Tohar Profesora Nia Liman iha Prosesu Investigasaun. http://www.jndiario.com/2015/07/16/kazu-silu-tohar-profesora-nia-liman-iha-prosesu-investigasaun/. Asesu iha Jornal Nacional Diario, 16 Jullu 2015.

   Professores FINANTIL Ameasa Grave.   www.jndiario.com/2015/07/16/profesores-finantil-ameasa-greve/. Asesu iha Jornal Nacional Diario, 16 Jullu 2015.  

  Kazu Estudante Baku Professora, Ministeriu Edukasaun Apoia Tratamentu Saude ba Professorahttp://www.jndiario.com/2015/07/20/kazu-estudante-baku-profesora-me-apoia-tratamentu-saude-ba-profesora/. Asesu iha Jornal Nacional Diario, 20 Jullu 2015.

  Estudante Baku Professores Ne’e Krime. http://www.diariutimorpost.tl/berita-estudante-baku-profesores-ne%E2%80%99e-krime.html. Asesu iha Jornal Diariu Timor Post, 29 Jullu 2015.

  Estudante TL Asalta Malu Iha Yogyakarta. Asesu iha Jornal Nacional Diario, 30 Jullu 2015.

  Ministeriu Edukasaun Orienta Estudante Bandalizmo Iha Indonesia. Asesu iha Jornal Diariu Timor Post, 30 Jullu 2015.

  Estudante Timor-Oan Kontinua Baku Malu iha Indonesia. Asesu iha Jornal Diariu INDEPENDENTE, 30 Jullu 2015.

  Baku Malu Iha Jogja Estudante Timor-Leste Ida Kanek.http://www.tempotimor.com/nasional/baku-malu-iha-jogja-estudante-tl-ida-kanek#.Vblr1LHMX_Y.facebook. Asesu iha TEMPO TIMOR, 30 Jullu 2015.

  Pengertian Moral Dan Etika Lengkap. http://www.pengertianku.net/2014/06/pengertian-moral-dan-etika-lengkap.html. Asesu iha loron 6 Agostu 2015.

  Relatoriu husi Fundasaun Mahein, Mahein Nia Hanoin Nú.08, “Polítika Implementasaun Polísiamentu Komunitariu iha Timor-Leste”.  Pajina 21-22,d. Ofisial Polisia Eskola (OPE). http://www.fundasaunmahein.org/wp-content/uploads/2015/07/MNH-Nu.08_30072015_Politika-Implementasaun-POLKOM_Versaun-Tetum.pdf. Asesu iha loron 7 Agostu 2015.

 

 

Publika iha Opiniaun

 

Tempo Timor : Ema barak seidauk iha konsensia atu kumpri regras tranzitu nian, tan ne’e Deputada husi Bankada Partidu Demokratiku (PD), Maria Lourdes Besa husu ba entidade hotu atu respeita regras tranzitu ne’ebé iha, liu liu zebrakros, tanba zebrakros fó oportunidade ba ema ne’ebé maka la’o ain. 

“ tuir loloos kondoutor ka ema sira ne’ebé lori kareta tenke hatene didiak regras tranzitu nian, liu-liu kona ba zebrakros atu nune’e hotu-hotu bele la’o tuir ninia dalan para bele eveita situasaun ne’ebe akontese bebeik soke malu.” dehan Deputada Maria Lurdes Besa ba jornalista sira, iha Parlamentu Nasional, tersa,(11/08).

Iha biban ida ne’e, Deputada refere husu ba kondoutores sira ne’ebé lori transporte publiku tenke hatene didiak regras transzitu nian, tanba dala barak kondoutor sira la kumpri regra ne’ebe iha, purke bainhira hare kareta ida para hela oin maibe husi sorin kareta balun hakat liu de’it entaun dala rum abele mosu akontesementu ida ne’ebé ita hotu lakohi.

Besa hateten, regras ida ne’e tenke hanorin ba ema hotu, purezemplu tan ba sa maka TVTL lahalo programa oinsá maka bele hanorin ema hotu atu la’o iha dalan, tantu ba sira ne’ebé la’o ain no kareta para bele kumpriede regras tranzitu ne’ebé iha. 

“Ita preokupa demais ho kestaun siguransa, korupsaun no mos governantes, maibe, buat sira ne’e lolos ita tenke halo sosializasaun, tenke fo mos edukasaun sivika ba asuntu ida ne’e tanba asuntu ida ne’e mós importante ba ema nia” Besa kestiona.

 

Entertantu Jose Sarmento hateten, nu’udar komunidade sente triste tanba ita nia maluk sira ne’ebe mak lori transporte hanesan kareta no motor seidauk iha konseisa ba zebrakros.

 

“Ita hare bebeik ona iha estrada balun ne’ebe iha zebrakros, dala barak kuandu kondotoris balun fo tempu atu ema sira ne’ebé la’o ain atu hakat liu ba Estrada sorin, maibe kondotoris balun mai ho kareta tama deit ho problema hirak ne’e mak dala barak mosu aseidente bebeik,”tenik Jose (**) 

Publika iha Dili

Tempo Timor - Iha Segunda Feira (10/08) mais ou Menus iha tuku 17:00, Governu liu husi Komandante Jeral, Major Jeneral F-FDTL, Lere Anan Timur, ofisialmente entrega ona matebian Mauk Moruk ho ninia membru nain tolu seluk ninia mate isin ba familia sira no mate isin hat ne’e tau hamutuk hotu iha Xefe suku Metiaut ne’ebe familia besik ba Mauk Moruk ninia uma.  Marka Prezenca iha Ospital Nasional Guido Valadares, L4 no Major Jeneral Lere.

“Hau deside iha ne’eba katak, Mauk Moruk nudar traidor, Mauk Moruk nudar terorista no Mauk Moruk nudar kriminozu, tanba ne’e familia mak responsabiliza hotu, ne’ebé governu bele akompaña mate isin, maibé sasan ami sei la simu” informa L-4 iha Hospital Nasionál Guido Valadares (HNGV) Segunda (10/8) uainhira mate isin atu sai hosi mortuariu.

Wainhira rona tiha hirak ne’e husi L4, eis Sub Xefe Estado Maior das FALINTIL ne’e hasai lia fuan maka’as no bolu L4 sa’e hamutuk iha ninia kareta hodi ba Metiaut atu hasoru malu ho L7.Hafoin fila husi Metiaut mai Ospital Guido Valadares hodi tula mate isin hat ne'e iha kareta funerariu hat ne'ebe akompania husi kareta no mator lori liu husi liuron bo'ot diresaun sengol ba to'o iha ponte Bidau maka tesik ba metiaut. 

PNTL ho F-FDTL halo seguransa maximu iha kruzamentu sira no dala entre ponte ospital bidau ate rezidensia Embaxador Amerika ninia diresaun taka ba publiku kuaze oras ida nia laran mak loke fali.

 

Tuir fontes ne’ebe besik liu ba familias saudozu Mauk Moruk ninian dehan maske la certeza maibe tuir planu mate isin husi matebian nain hat ne’e ninia sei lori ba Laga iha loron Tersa Feira (11/08) dadersan.

Publika iha Nasional

 

Tempo Timor : Depois fó sai nota de imprensa ne’eb’e hakerek ho lian Portuguesa no Ingles hodi anunsiu “Mauk Moruk hetan mate ona husi Operasaun Konjunta”, iha Domingo (9/8/2015) mais ou menus iha tuku 11:15 Otl akontese enkontru ida iha Konselu dos Ministru.

Tuir observasaun nota katak, iha enkontru intra Ministeial ne’ebe marka prezensa iha inkontru ne’e, husi Ministru Planeimentu estratejiku, Kay Rala Xanana Gusmaã, Ministru Interior Longuinos Monteiro, Xefe Estado Maior das FALINTIL, Falur Rate Laek, Ministru Denizio Babo, Ministru da Defeza Cirilo Cristovão, Ministru Asuntus Koordenador ekonomia no Ministru Agrikultor Peska, Estanislão da Silva, Ministra Finansas, Santina Cardozo no Ministru do estado no Prezidensia do Konsello dos Ministru, Agio Pereira.

Hafoin remata enkontru, Ministru Estadu no Prezidénsia Konsellu Ministru noPortavós Ofisiál Governu Timor-Leste, Agio Pereira ba Jornalista sira hateten, enkontru ne’e segredu labele ko’alia, tanba enkontru ne’e entre komisaun ho Ministeriu Siguransa nian ne’ebe fó paraser ba Konsellu no Premeiru Ministru hodi koalia kona ba asuntu espesefiku hodi hare situasaun nasaun nian no oinsá progresu Operasaun Konjunta Hanita nian ba oin, maibe detailiu liu ami labele ko’alia.

“Ami indetifika tiha ona mate isin ne’e, agora ita bo’ot sira hein tanba tuir prosesu legal sei halo autopsia, tanba mate isin hat 4 kedas. Depois halo autopsia hafoin doutor sira fo sai nia relatoriu tanba ne’e hanesan ejizensia legal, inklui mós Mauk Moruk,”  dehan Agio ba Jornalista sira iha Palasiu Governu (9/8).

Husu kona ba prosesu funeral, Agio responde katak, kona ba ida ne’e depois Governu hare, tanba sei hein lai autopsia. Karik ne’e la kontra disizaun estadu nian, tanba durante ne’e dehan atu kaer moris Mauk Moruk, maibe to’o ikus nia bele mate fali hanesan ne’e?

“Ita bo’ot sira lee ha’u nia komunikadu horikalan kedas ha’u fo sai katak, governu lamenta operasaun konjuta halo esforsu hotu, tuir regras empenamentu ne’ebe konselhu Ministru aprova ho mos aprovasaun subsikuinte husi Presidente Republika nian, esforsu maximu para atu evita mais realidade iha terenu rejultadu dala barak estadu rasik lakohi.” Esklarese Agio.

Iha Parte seluk Komunidade lamenta ho lalaok finjidu no inkapacidafde husi Governantes sira hodi resolve problemas ruma liu husi dalan pasifiku.

“Ha’u tenke onestu ne’e atu dehan de’it Governu no politikus sira la iha kapasidade atu resolve problemas sira ne’ebe akontese iha nasaun ne’e ninia laran ho dalan pasifiku. Agora Governu uza forsa ho polisia para tiru de’it. Ita hare to’ok kazu Alfredo Reinado ho kazu Mauk Moruk ninian ne’e hanesan lolo’os”, dehan A. da C. Soares, Estudante Universitariu ida iha Dili.

Nia lamenta ho Governu ninia atetude hodi halo trava familias sira hetan asesu atu hare Mauk Moruk ninia isin mate.

“Ita iha Timor-Leste ne’e maioria katolika maibe ita ninia nai ulun sira kuandu rai odiu ne’e rohan la’ek no hetook aat liu tan biar Mauk Moruk mate ona mos kasian la husik ninia familias atu hetan mate isin hodi ba hakoi lalais. Hahalok ukun nain sira nian ne’e kontra dutrina katolika ninian mais Igrija mos nonok de’it”, lamenta juventude Soares husi Ermera ne’e. 

Tuir fontes Tempo Timor ne'ebe besik liu ba Governu dehan Governu Timor Leste sei tetu maka'as atu entrega mate isin Mauk Moruk ninian ba ninia familias.(**)

Publika iha Nasional

Tempo Timor: Bainhira mate isin sira husi akontesimentu iha Wairali Bu’u to’o iha Ospital Dili, Iha Sabadu (08/08) kalan, liu tiha minutu balun nia laran mosu tuda malu hodi halo situasaun iha area liur Ospital nian manas oituan maibe Task force ho Polisia Militar atual hodi hakalma hikas situasaun.

Tuir observasaun Jornalista Tempo Timor iha ONGV sita katak daudauk ne’e, Polisia Nasional Timor-Leste (PNTL) no Forsa Defeza Timor-Leste (FDTL) maka nakonu iha Ospital Nasional Guido Valaders hodi halo seguransa. 

Maiz ou menus tuku 16:00 Otl akontese kontra ataka entre grupu Mauk Moruk ho membru Empenamentu Operasaun Konjunta (OEK) iha fatin ida besik Aldeia Waitalibu, Suku Watuhaco, Postu Administrativu Venilale, Munisipiu Baucau ne’ebe hodi hamate Prezidenti Konsello Revolusaun Maubere (KRM) ho ninia membru na’in rua 

 Hafoin akontesementu ida ne’e, mais ou menus iha tuku 18: 25 Otl mate isin hirak ne’e lori mai iha Dili ho Helikoptru no tun iha Aireportu Nicolau Lobato. Bainhira to’o iha Aireportu mate isin hirak ne’e tula kedas ba iha ambulansia (Carro Funereriu) hodi lori ba iha Ospital Nasional Guigo Valadares (ONGV) no to’o tiha iha ne’ebá mate isin hirak ne’e tau iha Mortuariu.

Iha parte seluk, Governu Timor-Leste liu husi Ministru Estadu no Prezidénsia Konsellu Ministru no Portavós Ofisiál Governu Timor-Leste, fo hatene sai ba publiku kona ba Prezidenti Konsello Revolusaun Maubere (KRM), Paulino Gama alias Mauk Moruk (MM) ninia mate.(**) 

Publika iha Nasional

 

Tempo Timor - Governu Timor-Leste liu husi Ministru Estadu no Prezidénsia Konsellu Ministru no Portavós Ofisiál Governu Timor-Leste, fo hatene sai ba publiku kona ba Prezidenti Konsello Revolusaun Maubere )KRM), Paulino Gama alias Mauk Moruk ninia mate.

 

“Mauk Moruk hetan mate ona husi Operasaun Konjunta”, hakerek iha Komunikadu de imprensa ne’ebe fo sai husi gabinete Ministru do estadu do Prezidencia Konsello dos Ministru.

 

Tuir nota de imprensa ne’ebe hakerek iha lian portuges ho Ingles ne’e hateten katak mosu tiru malu iha area Fatulia ne’ebe tuir lian area ne’eba hakerek Watulia.

 

“Operasaun Konjunta ne’ebe involve Polisia Nasional Timor-Leste (PNTL) ho FALINTIL-Forca de Defesa Timor-Leste (F-FDTL) la konsege hases an husi konfrontasaun ohin loron (08/08) iha area Fatulia ne’ebe rezulta mosu troka de tirus”, dehan iha komunikadu de imprensa husi Governu ninian ne’e.

 

Komunikadu ne’e esplika liu tan katak, “ sei iha tan fatalidade rua sira seluk no balun kanek. Ofisial PNTL ida mos hetan kanek.”

 

Iha Parte seluk tuir fontes Tempo Timor informa katak membru KRM ida ne’ebe mate ninia naran kode Sunardi no ida ne’ebe kaptura moris ninia naran Sergio CowBoy.

 

 

Iha Parte seluk mate isin evakua kedan husi Venilale mai Dili ho Helikoptru no agora daudaun mate isin iha ona Ospital Nasional Guido Valadares.

Publika iha Nasional

Tempo Timor - Mais ou Menus antes tuku rua nolu Oras Timor-Leste kalan (08/08) kareta funerariu sira taula mate isin nain tolu tama iha resintu Ospital Nasional Guido Valadares, Bidau, Dili. Kareta Funerariu sira ne’e hetan seguransa husi Bataliaun Ordem publika, Polisia Nasional Timor-Leste 

 

Ema lubun hamriik iha resintu ONGV hodi hare, ema hatun mate isin sira husi Kareta Funerariu no entre ema sira ne’ebe hamri’ik besik Ospital Nasional ninia oin ne’e, ida, ho matanwen turu dehan, “kuitadu, kala katuas Mauk mate duni ona.”

 

Tuir autoridade seguransa ninian ida iha Ospital Nasional, ba Tempo Timor konfirma katak Prezidenti Konsello Revolusaun Maubere, Mauk Moruk mos mate iha akntesimentu tiru malu besik suku Watu Hako, Postu administrative Venilale, Municipiu Baukau.

 

“Ohin Tiru Malu iha entre tuku tolu ka tuku hat lokraik ne’e, iha Uatu Sahe Loi besik Waitali Bu’u. Iha akontesimentu ne’e katuas Mauk ho ninia membru nain rua maka mate no ida kaer moris de’it”, dehan autoridade ida ne’ebe maka marka mos prezensa iha Ospital Nasional Dili.

 

 

Informasaun ne’ebe redasaun simu dehan iha lokraik mais ou menus tuku sanolu resin lima ka tuku sanolu resin neen Oras Timor-Leste mosu Tiru malu entre Foras Husi Empeinamentu Operasaun Konjunta (EOK) ho Grupu Kinsello Revolusaun Maubere (KRM) iha area Waitali Bu’u. 

Publika iha Nasional
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version