Tempo Timor Online

 

Tempo Timor : Governu Salin Osan milaun wain ba kofre kompania hodi halo kuak no taka kuak liuron sira iha Dili laran wainhira Komunidade sira iha area rural susar asesu ba dalan. Iha Tinan rua ka tolu ninia laran ikus ne’e Governu salin milaun lubun liu husi liuron ku’ak ba iha kompania Estrada bo’ot di’ak maibe liuron ku’ak barak nafatin I heto’ok a’at liu tan ku’ak fali iha fatin ne’e uluk konsege Estrada bo’ot di’ak taka ba. Nune’e mos daudaun ne’e publiku asiste hela sobu trotoar ne’ebe balun tinan 2014 maka halo husi kompania sira. 

 

“Ita hare’e osan ne’e salin maka’as ba kompania sira liu husi projeitu sira hanesan ne’e. Karik ida ne’e halo ho intensaun atu fasilita kompania sira hetan osan ou Ministeiru Obras Publika maka ninia planu lalo’os nune’e halo sobu no halo sobu”, dehan Agustinho soares komunidade ida husi Kaikoli wainhira dada lia ho Tempo Timor besik Ministeiru Justica.

 

Iha parlte seluk maske reprezentante povu iha Uma Fukun Parlamentu Nasional iha tempu ruma kotuk kestiona kona ba kondisaun Estrada dirasaun Bairo Formoza no Bairos dos Grilosne’ebé iha etapa reabilitasaun nia laran maibe la iha kualidade.

 

“ hau preokupa tebes ho projetu reabilitasaun estada iha partensia Bairo Formazo nian besik apotik Cito nian. Imi lori kareta halai tesik took ba iha ne’eba kareta sempre tatidik tanba Estrada balun sei kuak hela.” Deputadu Joaquim Dos Santos kestiona iha momentu ne’ebá.

 

Preokupasaun hirak ne’e konsege responde ona, tanba daudauk ne’e empreza ka kompaina ne’ebé kaer obra refere hala’o hela serbisu iha area ne’ebá hodi taka Estrada hirak ne’ebé maka sei kuak.

 

Tuir observasaun Jornalista Online Tempo Timor iha terenu nota katak, oas ne’e daudauk ekipamentus boot hanesan silindru no kareta ne’ebé hakerek Montana Diak Grup hala’o hela serbisu iha fatin refere.

 

“Projetu reabilitasaun estarada ida ne’e kleur ona, maibe seidauk remata entaun sira kontinua mai hadia fali hanesan ita hare daudauk sira lori hela alkatraun hodi halo kaber fali Estrada, liu-liu taka Estrada kuak sira ne’e” haktuir komunidade Manuel Junior da Costa ne’ebé hela iha dirasaun refere.

 

Manuel haktuir, nu’udar komunidade sira la tau kestaun kona ba prosesu reabilitasaun ne’e sedu ka tarde, maibe importante maka tenke garantia ninia kualidade, tanba iha fatin balun Estrada ohin hadia tiha maibe liu tiha semana ida ka semana rua nia lara Estrada hahú kuak fila-fali.

 

 

“Nu’udar komunidade baibain ha’u nia mensajen ba emprezariu sira maka tenke serbisu ho konsensia bainhira kaer projetu, tanba osa ne’ebé maka imi hetan husi projetu ne’e povu nian no projetu ne’ebe imi hala ne’e ba povu ho nasaun ida ne’e, ne’e duni tenke halo ho kualidade” Manuel husu. (**)

Publika iha Nasional

 

Tempo Timor :Bazeia ba kalendariu husi Ministeriu Edukasaun (ME) loron 3 fulan Augustu eskola hotu-hotu iha teritoriu Timor-Leste sei hala’o izame ba segundu periodu nian, ne’e duni ME husu ba eskola hotu-hotu tenke kumpri kalendariu ne’ebé Ministeriu determina ona. 

 

Prosesu izame normal hanesan bainbain ita hala’o, tan ne’e iha loron 3 fulan Augustu eskola hotu-hotu iha timor laran sei hahu fali izame ba daruak nian, tanba ne’e ami husi ME husu ba eskola hotu tenke kumpri kalendariu ne’ebe maka Ministeriu fo sai, labele akontese tan hanesan fali izame ba primeiru periodu nian ne’ebé maka eskola ida rua hala’o uluk ona izame ho razaun katak eskola balun sala de aula la to’o.

 

“diretor eskola balun fó razaun katak, sira hala’o uluk izame tanba sala de aula la to’o no estudante barak liu ne’e duni Ministeriu mós toleransia” dehan Disretur Kurukulum Fernando Gama ba Jornalista hafoin vizita eskola Tekniku Vokasional Becora, Dili.

 

Nia haktuir, izame hanesan bainbain maibe material maka labele hanesan ho izame periode primeiru nian, se lae estudante sira se hetan hotu valor boot tanba hatene ona material sira ne’e.

 

Parte kurikulum sei buka identifika mos estudante sira e’ebe maka durante prosesu aprendizajen nunka tama aula hodi simu material, maibe to’o izame maka tama izame de’it. 

 

“ami sei buka razaun saida maka estudante sira ne’e la tama eskola, karik sira moras ka iha problema ruma maka halo nia latama eskola, ida ne’e professor sira mos tenke identifika lai hodi autoriza tuir izame ka lae tuir izame.”

 

 

Nia argumeta, ida ne’e regulamentu ME nian tanba se labarik ida maka latama eskola ida tenke fo avizu ba nia ka sansaun ruma hodi nune’e nia bele hanoin ba oin ne’e nusa. (**)

Publika iha Edukasaun & Kultura

 

Tempo Timor - Prezidente Republika, Taur Matan Ruak, Tersa Feira ne’e  hala’o dialogu komunitaria ba loron dahitu nian  ho komunidade iha suku Cai-Cua iha parte dader, no kontinua iha parte loraik ho komunidade sira iha suku Vemasse Villa, Postu Administrativu Vemasse, Munisipiu Baucau.

 

Iha Dialogu refere komunidade foti kestaun lubun ida inklui problemas estudantes baku mestre ho mestra sira. Kazu alunus baku hanorin nain sira sai ona kultura no la’os akontese de’it iha Dili maibe moras ne’e da’et to’o on aba distritu seluk inklui Baukau. Nune’e akontese iha Suku Cai-Cua tan ba durante dialogu ho Prezidente da Republika ho komunidade no Iha sesaun husu no hatan, iha suku Cai-Cua Mestre Domingus Freitas lamenta ho attitude estudante suku Cai-Cua ne’ebe halo violensia kontra mestre.

 

“Labarik baku mestre ne’e krime, tenki kesar ba polisia hodi halo keixa ba nia tanba ita nia lei iha para regula ida ne’e, eskola ne’e hanorin matenek deit, liu-liu atu hatene halo sasan, hanorin edukasaun moral no hanorin ema sai ema ne’ebe diak. Maibe hau espera katak ita nia oan sira iha ne’e labele baku mestre, inan no aman, tanba demokrasia iha regra”, Prezidenti da Republika dehan.

 

Hatan ba preokupasaun husi Nazario da Silva kona-ba kultura suku ne’ebe hamate ekonomia komunidade, Xefe Estadu hateten nia mos preokupa ho situasaun kultura ninian ne’e.

 

“Hau konkorda ho oan nia hanoin redus kultura, tenki iha limitasaun no ita nia oan sira mak tenki numeru um, tanba labarik sira mak hatutan ita nia kultura, nune’e tenki tau matan ba sira”, Responde Prezidenti Taur Matan Ruak.

 

Hatan kona-ba problema faluk nain tolu ne’ebe laiha uma no kbiit atu sustenta moris, Xefe Estadu hatete: “ami sei haree saida mak ami bele ajuda, no hau sei entrega ba hau nia Asesor Politika, Filipe da Costa ho Primeira Dama, Isabel Ferreira atu hare kona-ba ida ne’e. Mas hau husu ba amu liu rai Xefe Suku no komunidade sira mos tenki hamutuk buka solusaun tau matan ba ita nia inan sira.”.

 

Entretantu iha suku Vemasse Villa, liuhosi sesuan husu no hatan, Veterana Maria Bui –mesak   hato’o nia lamentasaun katak iha suku Vemasse Villa komunidade ho lider komunitaria  la fahe malu maibe la fiar malu tanba ne’e atividade iha suku komunidade ladun partisipa.

 

“Ha’u husu ba imi tenke ko’alia ba malu, ne’e importante, imi iha suku ne’e hanesan familia ida  nune’e imi tenke pasensia, haraik an  ba malu oinsa  rezolve imi nia problema”, hatan Prezidente.

 

kona-ba problema sira seluk ne’ebé komunidade sira levanta hanesan, problema irigasaun, bee moos iha aldeia balu seidauk iha, traktor halai natar familia nian de’it, kondisaun eskola la di’ak, Xefe Estadu fó oportunidade ba Xefe Deprtamentu no Administrador Munisipiu hodi hatan ba komunidade nia preokuopasoins refere.

 

Nune’e mos dialogu iha suku Vemasse Villa ne’e marka mós prezensa Ministru Nogosiu Estranjeirus no Kooperasaun, Dr. Hernani Coelho I iha biban refere MNEK mós fahe hanoin ba komunidade sira kona-ba serbisu Ministeriu Estranjeirus nian atu komunidade  mós  bele apar ho MNEK nia serbisu.


Hanesan vizita ba fatin – fatin, iha suku Cai-Cua no Vemasse Vill, Xefe Estadu mós fo agradesimentu ba komunidade sira nia kontribuisaun ba ukun aan, no kontinua husu ba komunidade sira tenki partisipa iha dezenvolvimentu hodi hetan moris diak.

 

 

Publika iha Nasional

Lautem, Tempo Timor— IV Governu Konstitusional ho V Governu Konstitusional husik hela fitar bo'ot ruma kona ba salin osan miloeins ba miloeins hodi halo konstrusaun maibe dala barak hamosu preokupasaun iha komunidade ninia let kona ba falta kualidade husi projeitu sira ne'e, preokupasaun sira ne'e ate agora sei buras iha ema nia memoria. Komunidade sira lekar sai projeitu la iha kualidade durante halo dialogu ho Prezidente da Republika (PR) iha Lospalos nune'e Xefe Estadu husu Ministerio Públiku (MP) atu barani investiga eis Primeiru Ministru (PM), Kay Rala Xanana Gusmão.

Prezidente esplika dehan antes ne'e Xefe Estadu husu ona ba MP atu halo investigasaun ba Diretor Agensia Dezemvolvimentu Nasional (ADN), maibe eis PM Xanana Gusmão hateten di’ak liu investiga nia tanba ne’e xefe estadu hateten atu di'ak liu MP investiga mós eis PM, labele ta’uk. 

“Horibainhira ha’u haruka Prokurador investiga ADN, maun Xanana dehan investiga mak ha’u, ha’u dehan investiga nia, lalika ta’uk, ha’u mós bele (hetan) investiga,”Prezidente, Taur Matan Ruak hateten lia hirak ne’e liu hosi dialogu komunitaria ho komunidade iha suku Serelau, postu administrativu Lautem, municipio Lautem, Sabado, (25/07).

Prezidenti da Republika hateten lia hirak ne’e hodi hatan ba perguntas ne’ebe husu husi populasaun kona-ba projeitu Gobernu barak iha rai laran ne’ebe la iha kualidade. 

Liu tan, PR Taur hateten sai ninia prinsipiu mak lakohi atu sai na’okten maibe sei la husik ema ida atu na’ok ka gasta osan estadu arbiru. 

“Ha’u nia principio mak ida ne’e lakoi na’ok maibe ha’u mós la husik ema ida na’ok,”PR Taur hateten. 

Eis Komandante Jeneral F-FDTL ne’e hateten mos kona-ba projeitu konstrusaun Portu Temporariu ne’ebe Governu AMP gasta saugate osan milaun lubun ida mout iha Tasi Hera. Iha momentu ne’eba governu liu husi Konsello Ministru aprova atu halo portu temporariu ida ba ro rua ne’ebe sosa husi Xina ba Komponenete Naval FALINTIL Forsa Defeza Timor-Leste (F-FDTL), mas wainhira projeitu remata tiha atu entrega ba F-FDTL maibe F-FDTL la simu tanba kualidade laiha. 

 “Foin dadauk ADN koalia, ha’u dehan nonok lalika koalia barak tanba Prezidente ne’e la’os politika, Prezidente ne’e Jeneral, Jeneral ne’e koalia naton hurlele mak barak", hateten Prezidente Taur. 

Hafoin liu tan Prezidenti da Republika mos esplika kona ba ninia observasaun relasiona ba konstrusaun Portu Temporariu iha hera ne'ebe hodi hamout osan milaun kuaze walu liu ba iha bolsu kompania ida husi Sydney ho naran Lifese Engineering ne’e.

“Ha’u haree ida ne’e sei monu tasi laran tanba saida? Tanba sira halo buat ida movel maibe tutan fali ba besi ida toos, buat ne’e (portu Hera-red) book an, book an besi ne’e manas tohar tiha buat ne’e monu,”  esplika Prezidenti Taur.

Xefe estadu esplika katak foin dadauk ne’e governu fó multa ba kompania kuaje 600 mill, depois governu atu fó sala Komadante F-FDTL maibe xefe estadu hateten komandante la sala tanba ne’e governu selu de’it. 

“Sira ba fo multa ba kompania kuaje 600 Ribul Governu fo sala ha’u nia komandante, ha’u dehan imi nonok selu de’it ona, ha’u nia komandante la sala, sira selu de’it,”dehan nia. 

Durante dialogu ho komunidade iha suku Serelau, komuidade sira lamenta katak durante ne’e governu fó fiar ba kompania sira hala’o projeitu iha municipio Lautem kualidade laiha tanba ne’e komunidade sira husu governu tenki fihir kompania ne’ebé mak iha kbi;it atu implementa projeitu mak governu entrega projeitu ba sira. 

Komunidade ida ho naran Deonozio Soares, hanesan tekniku ida hateten durante ne’e kompania sira hala’o projeitu laiha kualidade tanba engineiru ka tekniku ne’ebé mak tau matan ba projeitu ne’e laiha kapasidade. 

“Estrada kualidade laiha, ha’u hanesan ema tekniku ida maibe ha’u haree katak estrada kualidade laiha, tanba sira halo estrada kuaje kilometro 1, ida kotuk ne’e komesa att ona,”Deonozio Soares, hateten. 

 

Lia fuan ne’ebe hato’o husi Deonisio ne’e konkorda husi Xefe estadu ne’ebe haklaken dehan estrada balun ke’e tiha taka fila fali tanba ninia beskourse ladi’ak tanba ne’e projeitu kualidade laiha no la kleur att fali ona.

Publika iha Nasional

 

 

Tempo Timor - Prezidente Republika, Taur Matan Ruak, hala’o dialogu komunitaria ba loron daneen ho komunidade iha suku Daudere iha Segunda Feira parte dader, no kontinua iha parte loraik ho komunidade sira iha suku Ililai no Eukisi iha Posu Antigu Laivai, Postu Administrativu Lautem, Munisipiu Lautem.

 

 Iha Suku Dadudere, Xefe Estadu fó parabéns no senti haksolok ho relatoriu ne’ebe hato’o husi Xefe Suku hatudu numeru funsionariu publiku ne’ebe aas no suku refere livre husi anlafabetizasaun tanba labarik no joventude sira hotu asesu ba edukasaun husi nivel Primaria to’o Universidade. 

 

Xefe Estadu espera atu komunidade suku Daudere kontinua nafatin investe ba edukasaun hodi esplika, “Ita hakarak iha tinan 2030, ita atinji ona rendimentu (ekonomia-le) mediu tanba pais sira iha rendimentu mediu la simu ona ajuda husi nasaun seluk, ezemplu, Cabo Verde, nune’e ita tenki investe iha edukasaun hodi dezenvolve ita nia nasaun”.

 

Hafoin, Xefe Estadu mós husu ba komunidade sira atu labele ajuda subar Mauk Moruk, maibe servisu hamutuk ho estadu hodi bele resolve problema ne’e hotu lalais iha tempu badak tanba populasaun mak dalabarak sai vitima ba problema ne’e.

 

Iha sesaun perguntas, Rafael Pinto husu ba Xefe Estadu atu ajuda fo ai teka Filipina ba komunidade sira atu kuda tanba iha suku refere rai sempre monu nune’e persija ai hun bo’ot hodi kaer rai. 

 

Hatan ba preokupasaun ne’e, Xefe Estadu hatete, “Hau hakarak fo agradesimentu ba hau nia aman, tanba iha suku bar-barak hau ba vizita la barak mak husu ai oan para kuda,  hau sei fo ba Diretor MAP Munisipiu Lautem hodi konfirma iha ne’e iha ai oan ka lae, mas sekuandu laiha imi bele mantein kontaktu ho hau nia asesor asuntu Politiku, Filipe da Costa ne’ebe servisu diak ho Ministeriu Agrikultura iha Dili no dalaruma sira tula ai oan ba fó sidadaun sira ne’ebe hakarak kuda, no ami halo akompiañamentu.” 

 

Iha Suku Ililai no Eukisi, Xefe Estadu kontinua fahe kona-ba progresu no dezafius hari nasaun no motiva komunidade sira iha suku refere atu serbisu hamutuk ba futuru nasaun  nian ida ne’ebé prosperu ba komunidade hotu.

 

Iha sesaun husu no hatan, Xefe Suku no komunidade suku rua refere, aprezenta kestoins  lubuk ida ba Xefe Estadu mak hanesan: sujere atu Laivai sai fali postu administrativu tanba iha tempu kolonial Portugues Laivai sai ona postu Administrativu, irgasaun at tinan 8 ona hodi  halo natar  hektares lubuk ida abandona, embora kompañia ida mai 2006 hadi’a ona mas la hotu abandona tiha, kanalizasaun bee moos iha aldeia  foho leten la iha, sala eskola EBF la sufisiente,  programa fila rai gratuita hosi MAP  sempre tarde tanba udan ona mak fila rai, problema veteranus  hanesan pensaun la tuir dedikasaun esklusiva iha ai-laran, hadi’a sede Postu Antigu Laivai no problema real sira seluk. 

 

Hatan ba  kona-ba sujestaun Xefe Suku Ililai  atu Laivai bele hanesan postu administrative foun, Xefe Estadu hatan “ Iha fatin-fatin levanta, mas ida ne’e depende ba Ministeriu Administrasaun Statal, mas ha’u nia konsellu mak  ida ne’e,  ita haree lai problema sira ne’ebé iha karik iha posibiliadade aban-bainrua, ne’e Ministeriu Statal mak haree no estuda ho autoridades  munisipiu bele ka lae  hari postu foun”.

 

Kona ba problema irigasaun, Xefe Estadu  hatan mós katak,“Irigasaun orsida ha’u fó ba Xefe Deprtamentu Agrikuktura Lautem, mas ha’u mós hakarak atu hateten  dadaun ne’e governu halo irigasaun modernu iha fatin haat, porizemplu irigasaun Likidiga,(Baguia) nia kustu $5.9 milloins, iha Zumalai $12 miloins”.

 

Xefe Estadu hatutan “Komu ita halo kikoan kualidade la iha,  bee  mai sobu  entaun governu hanoin halo boot. Ita labele halo dala ida de’it  mas neineik ita bele halo para dezenvolve ita nia agrikultura, tanba agrikuktura mak fó serbisu barak, se ita la dezenvolve ne’e problema boot  tanba nia hanesan setor ida determina  kontribui ba dezenvolvimentu Timor nian  entaun ita tenke inveset maka’as”.

 

Kona-ba problema sira seluk, Xefe Estadu fo oportunidade ba xefe deprtamentus munispiu  no administrador hodi hatan  no aumesmu tempu esplika ba komunidade planu munisipiu nian ba porblema refere.

 

 

Tuir agenda dialogu ba loron dahitu, viajen Prezidente da Republika ba interior nian ne'e sei hala'o Dialogu ho komunidade iha suku Caicua no Vemasse Villa, Postu Administrativu Vemasse, Munisipiu Baucau.

Publika iha Nasional

 

Tempo Timor: Presidente Federasaun Halterolismu Arte Cultura Fisika Peso Timor-Leste(FHACUPTIL), Vicente da Silva haktuir katak, atu dezenvolve kualidade atletismu no bele hetan fini di’ak iha futuru kona modalidade binaraga, hit besi (angkat besi) no angkat berat presija iha kompetisaun hodi ita bele hatene se maka kampionatu.

 

 “Objetivu husi kampetisaun ne’e atu bele hare no identifika atleta ne’ebe maka iha kualidade di’ak hodi prepara ba kompete iha eventu internasional,” dehan Presidente FHACUPTIL, Vicente da Silva ba jornalista sira iha GMT (27/07).

 

Vicente haktuir, eventu hanesan haa’o ona ba dala rua no planu ne’e mai husi governu liu husi Sekertariu Estadu Juventude Desportu (SEJD) ne’e duni kada tinan federasaun hotu hala’o aktividade iha rai laran.

 

Vicente rekoñese katak, dala ruma iha eventu ruma atleta sirane’ebé  ita hatene haruka ba ba de’it, ne’e duni liu husi kompetisaun ida ne’e ita mós bele hetan bibit di’ak hodi bele ba kompete iha eventu internasional.

 

“eventu ne’e involve klubu 12 no atleta iha 125 mak partisipa iha eventu ne’e no orsamnetu ba eventu ne’e rasik U$ 21 mil inklui ho admistrasaun ba tinan ida ne’e. Eventu ne’e iha mós klase 4 ba kada modalidade maka hanesan, binaraga, angkat besi no angkat berat.” Esklarese Vicente. 

Iha fatin hanesan Reprezentante Sekertariu Estadu Juventude Desportu(SEJD) liu husi Direktor Nasional Arte, Luis Oliveira hateten, atu dezenvolve prestasaun atletismu iha rai laran presiza duni iha kompetisaun hanesan daudauk ne’e. 

 

“atu hola parte iha kompetisaun presiza ho laran no tenke simu bainhira manan ka lakon, tanba iha desportu sempre ida manan no ida lakon, atraves kompetisaun mak ita bele dezenvolve ida-idak nia talentu,” tenik Luis.

 

 

Luis afirma liu tan katak, agradese mos ba federasaun FHACUPTIL atu iha susesu ho atleta sira hotu no liu husi atividade ida ne’e bele foti federasaun sira nia oin.(**)

Publika iha Desportu

 

Tempo Timor:  Segunda Feira, (27/7),Vise  Ministru  Obras Públikas ba asuntus Transporte no Komunikasaun (MOPTK),  Inácio Moreira  ho ninia kometiva ofisialmente hala’o vizita urjente hodi hare direitamente kondisaun Portu Dili.

 

Objetivu husi vizita ne’e, atu hasoru malu ho ekipa boot ida husi area Portu Dili nian no Ajensia Kooperasaun JICA husi Governu Japaun, oinsá atu buka fundu hodi hala’o rehabilitasaun fila-fali ba Portu Dili.

 

Vise Ministru Inácio haktuir, Portu Dili presija hala’o ona rehabilitasaun urjente tanba hare ba kondisaun Portu Dili ladun di’ak ona.  

  

“Ami hala’o ona reniaun ho Ministru atu hahu halo duni rehabilitsaun urjente ida hodi hare lalais kondisaun Portu. Ita hare iha parte leste nian movimentasaun komesa  la funsiona ona,” tenik vice Ministru, Inacio Moreira ba jornalista sira iha Portu Dili, Segunda-Feira (27/7).  

 

Inacio rekoñese katak, kondisaun Portu Dili komesa at ba bebeik hanesan dalan, ne’e duni ba oin presiza kria politika ida oinsá atu bele hala’o ona rehabilitasaun ho lalais hodi nune’e bele responde defikulidade ne’ebé maka durante ne’e  sai obstalku iha Portu Dili.

 

Inacio haktuir, liu husi planu ida ne’e iha ona kondisaun para hadia operasaun iha ita nia portu. Tanba, hare ba movimentasaun iha parte leste nian edifisiu hirak ne’e tenke hala’o rehabilitasaun total, inklui hare mós ba projeitu portu tibar ne’ebé tuir planu sei hari.  

 

“Edifisiu hirak ne’e presija hadi, atu nune’e bele funsiona fila-fali hodi sistema kontrolu marítima nian bele la’o di’ak, se lae roó sira ne’ebe mak tama mai ita sik de’it mos labele, ne’e duni ho vizita ida atu mai hare kondisaun portu hodi bele aprova osan atu halo rehabilitasaun.” Inacio esklarese.

 

Iha vizita ne’e, Vice Ministru Inacio Moreira hare mós kondisaun roó ne’ebé maka hetan soke iha loron hirak liu ba. 

 

“agora daudauk roó refere hala’o hela manutensaun tanba roó ne’ebé hetan soke ne’e nnia poste  ida mak tohar  no Diretor sira mos informa ona ba róo nain hodi hadia urjentemente tanba iha roó nia okos nakfera liu.” Konta Inacio.   

 

Iha fatin hanesan,  Natalino da Silva responsável tekniku  informa  katak, bainhira roó ne’e departamentu Marítimo, (Horbor Master) hatama mai roó tula sasan todan ho 5 mil toneladas.

 

“to’o agora roó ne’e seidauk bele fó sai tanba seidauk hetan konkordansia husi parte rua, tan ne’e tekniku husi Vietnam mai rasik hodi hare kondisaun roó refere. Nataino konta tuir”  (**)

Publika iha Ekonomia

 

Tempo Timor : Problema menus kampu de serbisu ba juventude sira, la’os de’it sai preokupasaun ba reprezentante povu iha Uma Fukun Parlamentu Nasional, maibe kestaun ne’e sai preokupasaun mós ba Xefe Suku Kuluhun, Jose Lorenso.

 

“Ha’u preokupa tebes ho juventude barak ne’ebé la hetan servisu no halimar de’it iha uma tanba la iha kampu de serbisu ba sira.” Dehan ulun boot Suku Kuluhun, Jose Lorenso Borges iha ninia serbisu fatin foin lalais.

 

Nia haktuir, dala barak juventude sira ba buka servisu tun sae mais la hetan, ne’e duni sira deside halimar deit tanba la servisu ba sira no situasaun hirak ne’e juventude sira mós sente preokupa tebes ho sira nia moris. 

 

Brorges rekoñe katak, juventude iha ninia suku rasik mós barak maka la servisu, tan ne’e nia parte husu ba governu atu kria kampu de trabalhu hodi nune’e bele redus numeru dezempregu iha rai laran, se lae tinan-tinan numeru dezempregu aumenta ba bebeik. 

 

“Durante ita restaura indepedensia iha tinan 2002  to’o agora juventude barak seidauk hetan servisu, maski dala barak mós Governu sempre ko’alia atu kria kampu  trabalhu ba juventude sira, maibe realidade hatudu juventude barak  to’o agora la asesu ba  kampu de trabalhu,” Borges kestiona. 

 

Iha biban ida ne’e, líder suku ne’e ne’e suzere ba atu loke industria boot hodi bele fo servisu ba juventude no mos tenke kontrola kompania ne’ebe mai investe iha Timor-Leste atu fó prioridade ba timor oan sira, la’os lori fali trabailador husi rai liur maka mai serbisu. 

 

Juventude barak maka oras ne’e daudauk iha kapasidade, ne’e duni labele lori fali sidadaun estranjeiru mai halo fali serbisu ne’ebe timor oan sira bele halo. Nune'e mos Timor oan barak obrigatoriamente tenke husik hela sira nia rain hodi ba buka servisu iha Inglatera ho Irlandia.

 

"Ha’u hanoin ukun nain sira tenke hare mos asuntu sira hanesan ne’e, hodi kria politika ida ne’ebe diak atu kria kampu servisu liu husi politika  ne’ebe bele fo benifisiu ba povu tomak", dehan lider komunitariu ne'e.

 

Iha Parte seluk juventude ida husi Suku Bekora ne'ebe dehan ninia naran Amuku lorloron fa'an SDSB husi Singapora ninian hodi hetan osan.

 

"Ha'u remata tiha ha'u nia eskola maibe ate agora buka servisu la hetan nune'e duni la iha dalan seluk maske fa'an SDSB ne'ebe la'os legal mos naran halo de'it halo para hetan netik osan uitoan", Amuku hateten. 

 

Nia esplika fa'an SDSB ilegal ne'e iha risku tan ba dala barak autoridade polisia sira ne'ebe patraun SDSB lakohi fo osan pulsa maka hetan buska surpresa no kaptura lori hotu ba iha sela.

 

 

"ha'u pernah tama sela tan ba fa'an SDSB maibe la iha tan dalan seluk atu buka moris. Servisu seluk la iha maske dala barak Governu dehan investidores ida ne'e no ida ne'eba mai loke hotel ka fabrika mas durante ne'e sei iha surat tahan leten de'it no hela hanesan janji mak janji nafatin de'it", Amuku hateten. (**)

Publika iha Nasional

PR TMR Apello Matenek Nain Tulun Governu Rezolve Problema edukasaun

 

Tempo Timor - Prezidente Republika, Taur Matan Ruak, Kinta Feira semana kotuk,  hala’o dialogu komunitaria ba loron daruak nian ho komunidade iha suku Pairara iha parte dader, no kontinua iha parte loraik ho komunidade sira iha suku Parlamentu, Postu Administrativu Lautem, Munisipiu Lautem.

 

Iha Suku Pairara Xefe Estadu sente orgullu ho numeru a'as joventude suku Pairara ne’ebe hetan servisu hanesan Forsa F-FDTL no Polisia, espera numeru ne’e sei kontinua aumenta, no mós husu ba joventude sira atu servisu hamutuk ho kreativu hodi kontribui ba dezenvolvimentu iha suku laran.

 

Bainhira tama ba sesaun husu no hatan, komunidade sira iha suku Pairara levanta ba Xefe Estadu sira nia kestoins no preokupasaoins barak, hanesan harii sentru formasaun professional, apoiu komputadores no asesu internet, apoiu ekipamentus desportu, ajuda grupu feto ONFTL, hadia merenda eskolar no edifisiu eskola ensinu baziku, inklui relijiaun falsu ne’ebe komesa espalla iha munisipiu Lautem.

 

Xefe Estadu hatan ba preokupasaun sobre apoiu husi Governu ba grupu feto ONFTL dehan, “Ita iha Sekretariu Estadu ba partisipasaun feto iha dezenvolvimentu ekonomia, maibe ita bo’ot sira tenki iha proposta ho asuntu klaru para sira haree, no bele haruka mai Primeria Dama hotu, oinsa ami bele fó ajuda ba imi” 

 

Kona-preokupasoins  ba sekte ka reliziaun foun Xefe Estadu hateten, estadu  fó liberdade ba sidadaun sira hodi eskolla fiar, i estadu labele intervein ba ema nia fiar. Maibe Xefe Estadu husu ba sidadaun  ne’ebé iha ona reliziaun hanesan Katolika atu hametin fé no  labele  monu ba manobra reliziaun foun nian hodi  halai tuir. 

 

Entretantu iha Suku Parlamentu Komunidade sira liu hosi sesaun husu no hatan preokupa kona-ba la ia kualidae edukasaun, falta kampu traballu ba jovem sira hao jovem bandona nasaun hodi ba serbisu iha Eropa, produtu loka la folin,  hasa’e salariu ba profesores sira, resolve lalais problema Mauk Moruk ho nia gurpu atu sidadaun sira sirkula livre hosi pasa revista autoridae Polsial no militar, estabelese liras KAK to’o munispiu sira atu kontrola  projetus  hodi labele mosu KKN, problema veteranus  lei Pensaun Vitalisia no problema sosiais sira seluk.

 

 “Ita iha duni problema  iha edukasaun, Ministeriu Edukasaun oras ne’e esforsu dadaun atu hadia. Buat ne’ebé ita hakarak edukasaun ba future la’ós de’it atu hetan gelar maibe tenke kompetitivu introduz valor, moral étika no karakter personalidade ema nian i orienta ema ba merkadu la’ós gelar de’it”, Xefe do Estadu responde.

 

Maske nune’e Xefe do Estadu mos halo apello ba matenek nain sira atu kontribui hodi buka solusaun ba problema edukasaun ninian.

 

“Ha’u husu ba matenek sira atu labele kritika maibe fó mós solusaun oinsa ita hetan sistema edukasaun ida di’ak no diferente. Ami hotu preokupa la’ós imi de’it,  ita-nia hakarak sistema edukasaun Timor-Leste nian bele kompetetivu iha merkadu no bele produz matenek  I bele  exporta ba  ba liur la’ós deit  ita exporta  traballador hanesan agora ba Australia no Korea”, Presidenti hateten.

 

Kona-ba produtus lokal la folin Xefe Estadu husu ba agrikultor sira Suku Parlamentu nian atu organiza an haibur hamutuk produtus hodi  aluga kareta lori ba  faan iha Dili,  tanba ema idaidak la’o ketaketak ninian susar tanba merkadu ohin loron iha Dili mak kompradores barak.


Maibe Xefe Estadu mós husu atu agrikultor sira labele hasa’e folin  sasan as  tanba se hasa’e folin as mak komprador sira  sei la sosa i sei ba sosa produtus importasaun ne’ebé folin baratu.

 

Hola parte iha dialogu komunitaria ne’e mak Primeira Dama, Sra. Isabel Ferreira, Administrador Munisipiu Lautem, bainaka Xefe Estadu nian hanesan, Administrador Postu Hatulia, Munisipiu Ermera, Xefe Suku Bermana, Tursicai, Munisipiu Manufahi no  Autoridades Munisipiu Lautem no xefe sektorais sira.

 

 

Publika iha Nasional

 

Tempo Timor: Eis Vice Primeiru Ministru asuntu Boa Governasaun iha Kuatru Governu Konstituisional, Mario Viegas Carascalão hato'o ninia preokupasaun ho prezensa Negosiante Estranjeiru ne’ebé hahú domina ona merkadu Timor-Leste. Iha Timor-Leste bele nota momos katak iha merkadu tradisional no fa'an folin tama sai uma ho kios ki'ik oan sira maioria husi Xina ho Indonzia.

 

Carascalão fiar katak, prezensa negosiante estranjeiru ne’ebé komesa domina merkadu iha munisipiu no suku iha posibilidade boot sei hamate timor-oan sira no agora daudauk timor oan ne’ebé kaer negosiu iha volume ne’ebé kikuan liu.

 

“Ita foin maka halo tinan 13, ne’e duni maneira moris  presija hadia, tanba  hala’o negosiu ki’ik de’it mos sidadaun estranjeirus maka asesu di’ak liu duke kompara ho ita nia povu kbiit la’ek sira.” dehan eis Governador Timor-Timur ba jornalista sira, iha Ótel-Timor foin lalais. 

 

Iha biban hanesan ne’e, Carascalão husu ba Governu atu kontrolu no foti desizaun ruma ba sidadaun estranzeiru ne’ebé mai hala’o fai serbisu ne’ebé timor oan bele halo.

 

Carascalão mos lamenta ho ema estranjeiru balun mai ho visa Turista maibe hala’o fali servisu iha Timor-Leste. Ema estranjeiru ne’ebe tama mai ho vistu turista la iha buat ida no ida ne’e sira nia direitu bele mai pasiar, maibe la’os atu mai serbisu fali. 

 

 

Se aban bain rua maka sidadaun estranjeiru domina ekonomia Timor-Leste no , kuandu politika nasaun hetan ona dominasaun mai husi poder ekonomiku politika ne’e sei la la’o nomos ukun nain sira sei tuir de’it ema estranjeru nia hakarak.(**)

Publika iha Ekonomia
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version