Tempo Timor Online

 

Tempo-Timor : Hafoin Ministeriu Justisa, Ivo Valenti ofisialmente hala’o lansamentu ba produsaun Bileti de Identidade (BI) iha Munisipiu Lautem semana foin lalais, oras ne’e daudauk Lautem oan sira ne’ebé ho idade 12 ba leten komesa halo ona sira nia BI.

“bileti de identidade ne’e hanesan legalidade ida, legalidade ne’e hatudu mos diretu no dever balu hanesan sidadaun hodi nue’e iha futuru oin mai bele asesu saude gratuita persija mós kartaun ida ne’e “ dehan Ministru Justisa Ivo Valente iha momentu halo lansamentu. 

Iha biban ida ne’e, Ministru Justisa tenta halo esplikasaun kona ba sentiudu kartaun eleitoral ba komunidade no reprezentante membru Governu local ne’ebé marka prezensa iha serimonia refere katak, kartaun eleitoral hanesan parte ida hodi bele uza ba eleisaun, maibe bileti de identidade ne’e hanesan parte ida hatudu nia legalidade rasik.

Nia (Ivo Valente) husu mos ba funsionariu sira ne’ebé servisu iha notariadu munispiu Lautem nian atu hala’o servisu ho makas hodi atende didi’ak komunidade sira tanba kartaun ida ne’e importante no sira iha direitu atu hetan. 

Iha fatin hanesan Presidente Konselu Jeral Veteranus rejiuan ponta leste, Renan Selak lori povu Munisipiu Lautem nia naran agradese ba ministeriu justisa bele loke tan bileti de identidade iha munisipiu Lautem tamba durante ne’e feri katuas sira sempre gasta tempu ba to’o iha Munisipiu Baucau no Dili hodi halo bileti de identidade.

 

“Lori Veteranus nian naran, husu mós ba povu Lautem tomak atu kontrbui ba prosesu ida ne’e. Ha’u fiar povu tomak sei fó nafatin sira nia kontribuisaun masimu ba iha prosesu halo bileti de identidade.” dehan Renan Selak hodi taka ninia liafuan. (**)

Lee kontinua... 0

 

 

Lautem, Tempo Timor - Prezidente Repúblika (PR), Taur Matan Ruak (TMR), akompañadu hosi Primeira Dama, Isabel Ferreira, iha Domingu fim de semana hala’o dialogu komunitaria ba loron dalima nian iha suku Com,  Postu Administrativu Lautem, Munisipiu Lautem.

 

Iha Suku Com, aleinde Xefe Estadu fahe vizaun no hanoin kona-ba progresu no dezafius Timor-Leste  nian  hosi ukun an to’o a data, i motiva komunidade  sira oinsa  atu serbisu hamutuk. Xefe Estadu mós husu ba komunidade Suku Com atu sulan fahi tanba Com hanesan fatin  turistika, maibe Xefe Estadu haree ho matan rasik komunidade husik livre fahi.

 

“Ha’u horseik ma i(sabadu-le) mai haree  turista ain hat iha tasi ibun (fahi). Ha’u-nia oan sira horseik atu harís mas sira tauk tanba fahi lao ba mai iha tasi ibun”,dehan Xefe Estadu ba komunidade Com..

 

liu tan Prezidente hato’o ninia apello dehan, “Ha’u gosta imi Com, fatin furak mas se bele sulan tiha fahi tanba ha’u lakohi ema ba ko’alia at  imi ne’e ha’u mós moe”. 

 

Tuir Xefe Estadu katak problema ida tan iha Timor mak kona-ba sanitasaun.

 

“Ha’u ko’alia  ho malae sira ne’eb’e vizita  ita nia rain, sira dehan Prezidente imi nia  rain kapás, furak  mas ami tauk mak ho imi nia sintina”, Prezidenti dehan.


Ho ne’e Xefe Estadu hateten Turizmu tenke tau atensaun  tanba tursita sira ne’ebé hakarak atu vizita fatin turistiku  tenke iha kondisaun moos no hegine.

 

Enkuantu tama ba sesaun husu no hatan,  iha suku refere  komunidade ladun husu kona-ba bee moos, eletrisidade no estrada tanba iha ona kondisaun. Assuntu ne’eb’e sira husu  liu mak  kona-ba pensaun ba veteranus sira ne’ebé la tuir grau partisipasaun funu, husu atu loke basar entre Com ho illa Kisar (Maluku-Indonesia), NGO sira harii tiha eskola pois abandona,  ro illegal tama  halo peska illegal iha tasi Com, Portu Com kondisaun la favorse ro atu atraka no  problema  real sira seluk.

 

Hatan ba problema veteranus nia, Xefe Estadu  hateten “Lei la’ós biblia, lei ne’e ita mak halo  atu ajuda regula no resolve problema, mas lei ne’ebé iha para aumenta problema  hapus tiha  halo fali foun”.

 

Iha okaziaun ne’e mos komunidade sira keixa ba Prezidente kona-ba NGO loke tiha eskola mais ikus mai abandona hela tiha.

 

 

“Primeira ves ha’u mai lospalos rona ida ne’e, sira husik hela pois soe fali todan ba governu, governu mak tenke lori todan, sira kuandu loke la mai husu governu problema ona mak sira husik ba imi ba husu governu, sira loloos ne’e fo han ikan. Sira ne’e dehan loloos buka projetu komu projetu ne’e sustentabilidade la iha  pois tau sala ba governu”, Prezidente Taur hato’o ninia resposta.

Lee kontinua... 0



Tempo Timor : Xefe suku Rasa, postu administrativu Lospalos, Municipio Lautem, Joaquim Rodrigues Gomes no ninia komunidade balun monsta momos sira nia sentimentu nu’udar nain ba nasaun Timor-Leste nune’e iha dialogu ho Presidenti da Republika Taur Matan Ruak, sira husu governu liu husi Ministeriu Onbras Publiku Transporte Komunikasaun  presija monta prepagu ba komunidade ne’ebé uja eletrisidade tan ba durante ne’e komunidade sira uja ahi eletrisidade la ho epiritu poupansa.

“Eletrisidade ne’e tenki iha poupansa. Aban bainrua tenki regula, aban bainrua tau prepagu, ne’e, aban bainrua ema uja ne’e regula nia-an rasik, ne’e ema la hakilar ona, ne’e tenke governu monta prepagu,”Dehan Xefe Suku Rasa, Joaquim Rodrigues Gomes iha dialogu ho Prezidente Repúblika (PR), Taur Matan Ruak iha suku Rasa, Kuarta, (22/07).

Autoridade lokal ne’e informa, iha suku Rasa komunidade  asesu pursentu 100 lina  eletrisidade maibe laiha regulamentu no seidauk monta prepagu nune’e komunidade sira uja tuir sira nia hakarak de’it.

Nia hatutan dala ruma xefe suku la’o ba mai haree komunidade sira kontinua uja ahi eletrisidade iha tempo loron, maske loron la presija ona loke ahi eletrisidade.

Tanba ne’e presija duni monta prepagu hodi nune’e komunidae sira bele uja barak tenki iha responsabilidade hodi fo kontribuisaun tuir ahi ne’ebé komunidade sira uja.

“Iha ne’e dala ruma ha’u mak ba haree sira loke de’it ahi entaun ha’u dehan taka tan ba ne’e presija poupansa,”xefe suku ne’e hateten.


Iha fatin hanesan komunidade iha suku refere, Antonino Gomes hatudu ninia patriotizmu ba ninia nasaun hodi hateten durante ne’e komunidade sira uja ahi eletrisidade dala ruma loron komunidade sira sei loke, tan ba ne’e karik monta prepagu hanesan populasaun pronto fó kontribuisaun ba dezemvolvimentu nasional.

“Karik governu monta ona eletrisidade, hanesan komunidade pronto fó kontribuisaun ba dezemvolvimentu,”dehan Antonino Gomes.

Oras ne’e dadauk parte Eletrisidade Timor-Leste (EDTL) hahú monta ona prepagu ba eletrisidade iha Timor laran tomak hodi nune’e komunidade mós bele fó ninia kontribuisaun no hamenus naha todan kustus ne’ebe estadu Timor-Leste infrenta.

EDTL rasik halo ona inspesaun ba kada uma hodi disliga no fo sanksaun ba komunidade sira ne’ebe dada eletridade ilegal maske nune’e iha parte seluk lala’ok ne’e seida’uk hatauk komunidade seluk hodi kontinua dada lina eletrisidade ilegal.

Hatan Ba Kestaun ne’e, Xefe Estadu Taur Matan Ruak agradese no kontente tan ba komunidade Rasa no liliu Posto Administrativu Lospalos maioria asesu ona eletrisidade.

“Hau kontente tan ba iha suku Rasa, komunidade bele eletrisidade asesu ona 100%, maibe tenke poupa tanba kada tinan ita hasai orsamentu hodi sosa kombustivel maka’as,” dehan Presidenti Taur Matan Ruak ba ema lubun bo’ot ne’ebe partisipa iha dialogu ne’e. (**)

Lee kontinua... 0


 
Tempo Timor : Komunidade Aldeia Larimi, Suku Kainleu Postu Administrativu Iliomar, Munisipiu Lautem to’o ohin loron seidauk asesu ba fasilidade publiku hanesan, eletrisidade, estrada no bee moos, tan ne’e komunidade sira husu ba Governu atu responde defikuldade nebe sira infrenta.
 
Xefe Suku Kainleu Postu Administrativu Iliomar, Julião Soares hateten, suku Kainleu kompostu husi aldeia 5, maibe husi aldeia hirak ne’e, aldeia Larimi mak seidauk asesu ba fasilidade publiku hanesan, eletrisidade, estrada no bee moos, tan ne’e husu ba Governu atu responde defikuldade hirak nebe durante ne’e komunidade sira infrenta.
 
Aldeia Larimi iha potensia boot kona ba setor agrikultura no iha produsaun barak, maibe sira labele lori produsaun hirak ne’e mai merkadu tanba impaktu husi Estrada nebe at, mesmu dala rua sira lori mai mais dala barak tenke uza kuda hodi hulan de’it.
 
Aliende Estrada problema bee moos defikulta mos komunidade Larimi ninia nesesidade loron – loron nian. “Aldeia ne’e izoladu tebes no dook husi Postu Administrativu Iliomar neduni komunidade sira defisil tebes atu asesu ba bee moos. La’os de’it ida ne’e komunidade Larima tinan barak ona moris iha nakukun laran tanba la iha estrisidade”  esklarese Julião.
 
Tuir Julião, husi Postu Administrativu ba iha Aldeia Lamiri ho distansia kuaze kilometru 7, tanba ne’e komunidade sira husu ba Governu atu toma atensaun lalais ba problema sosial nebe mak durante ne’e komunidade Larimi infrenta, liu problema kona babe moos, eletridade no Estrada, se lae tinan-tinan komunidade Larimi defisil atu halo buat rua iha sira vida moris loron-loron nian.
 
Iha parte seluk, Pontu Vocal Serbisu Ague Saneamentu (SAS) Postu Administrativu Iliomar, Costansio Pereira hateten, Aldeia Larimi fahe ba bairo rua no husi bairo rua ne’e, ida mak seidauk asesu ba bee moos, tanba impaktu husi problema dezastre naturais nebe hal rai halai hodi estraga hotu kanu bee nian, ne’e duni komunidade sira labee hetan bee moos.
 
“Ami hato’o ona proposta ba dirasaun nebe kompotente no materia balun haruka ona mai iha Postu Administrative Iliomar, maibe ami seidauk bele hadia ka hala’o instalasaun foun ba kanu hirak ne’ebe at, tanba kondisaun estrada iha area nebe seidauk iha, ne’e duni defisil baa mi atu hala’o serbisu ida ne’e”  Pereira kestiona.
 
Mesmu nune’e, ulun boot lidera komunitariu Suku Kainleu promote katak sira sei kontinua hato’o assuntu ida ne’e ba ulun boot sira hodi bele responde nesesidade povu nian. (Rco)

Lee kontinua... 0

Tempo Timor: Komandu Polisia Nasional Timor-Leste (PNTL) Munisipiu Lautem sei orienta ninia membru na’in 23 hodi hala’o operasaun pasa revista tama sai uma hamutuk ho Komandu Operasaun Konjunta (KOK) iha Munisipiu Lautem.

“Membru hirak ne’e Komandu PNTL Munisipiu Lautem hili hodi involve direta iha operasaun konjunta hamutuk ho forsa operasaun, maibe seidauk hatene loos orden ka orientasaun husi KOK nian tan ne’e ita sei hein bainhira loos maka atu ezekuta orden ida ne’e hodi tama sai uma” dehan  Segundu Komandante Superintendente Asistente Sebastião Alves foin lalais iha Munisipiu Lautem.

Nia haktuir, husi membru PNTL na’in 23 ne’ebé komandu hili sei hala’o operasaun pasa revista ba komunidade nia hela fatin no prosesu operasaun ne’e la iha determinasaun tempu tuir orden ne’ebe fo sai ona husi komandu.

Ho razaun hirak ne’e, Segundu Komandante husu mos ba povu Munisipiu Lautem atu koopera nafatin ho polisia atu nune’e bele garantia estabilidade no seguransa iha Munisipiu ida ne’e.



“ha’u husu komunidade tomak atu kolabora ho parte seguransa hodi nune’e polisia bele hala’o serbisu ho diak , liu-liu atu garantia estabilidade no seguransa ba povu tomak” Sebastião esklarese.

Polisia Lautem sei garantia seguransa ba komunidade 24 oras no area hirak ne’ebe maka sai targetu monta hela postu parmanente iha ne’ebá, hanesan iha area Buihomau Suku Serelau nian. Objetivu ne’e atu halo pasarevista ba motor ho kareta ne’ebe movimenta ba mai husi Postu Luro mai Lospalos vila no husi Lospalos vila ba Dili. (**)

Lee kontinua... 0
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version