Tempo Timor Online

Tempo Timor

Tempo Timor

Ho hakraik an Tempo Timor hato'o komprimentos ba laitor sira katak, Jornal Tempo Semanal hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

Website URL: http://www.tempotimor.com

 

Husi : Vicente Maubocy (Observador Politico)

 

 

Drama julgamento :

Emilia Pires konsidera nia aan, feto ida + forte iha Timor Leste. Forsa politica Emilia “doko” orgaun Judicial iha 27/10/ 2014. Nebe Parlamento hasai Resolusaun ida  especifico hodi “expulsa” Juizes portuguses sira iha biban neba nune adia julgamento ba Emilia.

 

Iha dia 24/10/2014  loron kraik membros Parlamento halo reuniaun ida “secreta” nebe acesores internacionais sira la participa. To kalan bot Parlamento hasai Resolusaun ida hodi “expulsa” juizes portugueses ho alegasaun kona decisaun kasu “taxas” nebe decisaun Tribunal Distrital Dili, decide favor ba ConocoPhillips. Iha dia seguinte  25 /10/2014 komunikado sai, hodi harapa : juizes portugueses,procuradores internacionais i acessores sira hotu  nia actividades hodi fila hotu ba Portugal i Cabo Verde.

 

Tanba atu “protege” Emilia Pires mossu duni konflitos entre orgaun Executivo + Legislativo kontra  Judicial. Ministerio Publiko ho Trinunais sira firme  defende “ supremacia lei, ba se deit, no la hakruk ba se deit”.

 

Mossu tentativas lubuk ida atu “enfrakece” orgaun judicial, hanesan troka Presidente Tribunal de Recurssos ho personagens chaves iha orgaun Judicial. Authores sira sente la iha base legal ida forte,no “reciosb”ba komunidade internacional no sociedade civil,no tendencias halai ba “ditadura” por fim desiste.

 

 Emilia hanoin no iha esperansa bot katak “sadere” ba Katuas Xanana nia bele “livra” husi Tribunal. Depois Katuas Xanana hetan explikasaun husi Presidente Tribunal Distrital Dili katak “ iha Estado de Direito tenki kumpre lei” se lae, Estado monu ba “repubklika banana”. Nune iha momento neba mai oin,  Katuas Xanana“distancia” nia aan kompletamente to ohin loron ba kasus judiciais nebe hassoru membros governo sira.

 

Reasaun forte husi Estado Portugues + pressaun internacional husi organizasaun magistrados internacionais + relatora Estado direito  Nasoens Unidas adiciona resistencia agentes judiciais Nacional, ho sira nia influencia tomak, i atu labele “prejudika” Katuas Xanana nia imagem no reputasaun maka Xanana foti decisaun resigna husi cargo Primeiro Ministro atu “hadok an” ba membros governo sira nebe pratika korupsaun no prejudika relasoens bilaterais ikus liu viola  principios “Estado Direito Democratico” consagrado iha Constituisaun RDTL.

 

Emilia hanoin katak ho posisaun Ministro Finansas + responsavel ba “diversifikasaun” Fundo Petroleo billion dollars +  responsavel ba G7+ nebe hetan konfiansa husi Ban Kim Moon, iha “imunidade” suprema atu “livre” ba julgamento iha Tribunal. Ho atributos  hirak Emilia hetan, nia sente seguro “intocavel” katak la iha ema ida, ka orgaun ida bele bok nia, mesmo  ke nia komete salah.

 

Emilia halo tentativas dala barak atu ” halai ses” husi julgamento. Infelizmente tentativas ka esforsos hirak ne hotu la kossegue hetan sucesso.

 

Maski rekerimentos husi Emilia nia advogados sira atu adia Julgamento ho razoens oi-oin, Tribunal Distrital Dili rejeita hodi marka duni loron dia 6 de Outubro 2015 ba Julgamento ba mulher +poderosa iha TL.

 

Breve Cronologia ba Kamas:

 

Tuir narasaun verbal Nelson Martins ex-ministro Saude, iha loron 2 konsekutivos  hanesan testemuha, deklara katak Iha 2012 nia integra iha ekipa membros governo halo visita oficial ba Australia. Iha biban neba Nelson simu telefone husi Director Kompanhia  MAC’S Metal Craft, Warren Macleod, atu ba visita nia oficina atu hare kamas, nebe ikus mai ministerio Saude sosa ba Hopital Guido Valadares. Fatin nebe Nelson visita maka Melbourne. Nelson ba to duni iha fatin hare kamas, no foti mos “brochures”, ho folin kamas sira nian ida-ida. Bainhira tó Dili, Nelson hakerek karta ida ba Emilia junta  ho “panfletos” + presario  hotu .

 

Kazu mais “comiko + rediculo” Director Companhia MAC’S Metal Craft, Warren Macleod Emilia Pires nia “ kaben”.

 

Espekulasaun:

§  Eskenario Nelson ba visita fatin Companhia MAC’S previamente organizado ona husi Emilia Pires ho nia “esposo”.

§  Emilia maka fo numero telefone Nelson nian hodi nia “kaben” telefone ba Nelson.

§  Tan sa maka Nelson harek surat ba Emilia hodi report nia visita ba Emilia nia kaben nia oficina no junta panfletos ho presus? Emilia maka superior Nelson nian?

§  Manobras hirak ne hotu,logicamente  iha konotasaun directa ba participasaun economica em negocio, claramente viola Artigo,299o Kodigo Penal.

 

Historia Kamas:

·         Tuir informasaun balu dehan katak Director Companhia MAC’S, maka halo konta ba reparasaun kamas ba Royal Melbourne Hopital;

·         Kamas sira Companhia MAC’S Metal Craft, fan mai Ministerio Saude TL, kamas sira nebe la uza ona iha Hospital Melbourne.

·         Kamas hirak ne nia valor economico, depreciado ona tanba Royal Melbourne Hospital la uza ona; i

·         La iha duvidas husi tranzasaun venda Kamas, MAC’S Metal Craft halo “fortuna bot”.

 

Polemika Procurement Kamas:

 

Ministerio Publiko hussu ba Diretora Hospital Dra. Odete Viegas se iha biban neba iha duni situasaun de “emergencia”? iha duni ema barak sofre (malaria, denki no gripe) iha hospital Guido Valadares?

 

Tuir deklarasaun doutora Odete Viegas, hanesan Diretora Hospital Guido Valadares iha biban neba, responde ba perguntas Ministerio Publiko nune:

      I.        Akontece duni ema barak sofre moras ba tratamento iha hospital, hanesan tinan-tinan akontece bainhira udang monu rai;

    II.        Maibe paciente hotu-hotu toba iha kama leten; fatin mamuk “espasu” maka la tó atu tau kamas;

   III.        Situasaun “emergencia” pratikamente la iha, tanba tinan-tinan akontece

 

 Tuir Odete pedidos urgentes nia halo ba kamas 2 ba pacientes fasse ran, no makina fasse ran. Ministerio Publico hussu fali: “ se maka halo pedidos sosa kamas 200?” Odete responde: “ husi hau nia parte la halo pedido”. Odete adianta tan katak “ administrador” maka halo pedido ne, tanba iha biban neba nia ba estrangeiro. Tan sa maka Administrador halo pedido iha Directora nia ausencia? Husu MP.

 Odete responde : “ Resposta ida ne, diak liu dirige ba Sr. Administrador tanba nia maka inteira diak liu assunto ne”.

 

Advogados Defensores Emilia:

 

Emilia kontrata advogados husi Firma Quatro Casas.Firma Advocacia –Luso- Espanhol. Firma ida ne, conhecido iha Portugal no Espanha. Como conhecido, concerteza kusto ba advogacia mos elevado. Sondagens informasaun nebe ami konssegue hetan total  custo ba Advogados husi Quatro Casas oscila entre $ 1 million to $ 2 million

Defensores Emelia nia ema nain 3: Portugueses nain 2 no Timor oan ida.

 

Custo ne se maka selu?

 

Ita hotu hein katak Emilia maka akareta kustos. Tanba tinan 7 ministra hetan ossan barak husi fatin barak hanesan:posto ministra; responsavel ba “diversifikasaun” Fundo Petroleo billion dollars; responsavel ba G7 + Conselheira especial Bank Kim Moom, + acessora especial Ministerio Finansas  ho salario $ 33,000 mensal, alem nia espozo mos iha business aumenta tan NGO East Timor Development Agency (ETDA), + nia alin Alfredo Pires, ministro Petroleo no Recusso Natural. Sira hotu hamutuk ossan barak liu, mesmo ke selu million dollars, familia Emilia Pires iha kapacidade financeira + ke suficiente.

 

Se por azar maka arguida Emilia Pires uza tan ossan Estado TL hanesan fundo “contigencia” maka selu nia advogados, entaun hamossu problema foun ida ke bot liu tan.

 

Oin sa, ema ida halo korupsaun ossan Estado, lori fali ossan Estado selu nia defesa?

 

Tempo “bonansa” ba Emilia Pires remata ona ho primeiro dia Julgamento, manobras atu hasai Resolusaun husi Parlamento, mos labele hotu ona. Maun Bot mos hatene mos ona “foer no demagozias” nune hadok an ona.

 

Emilia hetan pena prisaun ka lae?

 

Processo rona testemunhas 23 sira nia deklarasoens  sei lao hela atu MP no Juizes colletivo halo colesaun dados atu halo analises ba processo tenderizasaun no adjudikasaun directa tuir lei ka lae?

 

Tuir hakerek nain nia diagnostico ema nain 3 nia deklarasoens maka vitais: Ministro Saude Nelson Martins, Directora Hospital Odete Viegas no Administrador Hospital.

 

a.    Deklarasaun Nelson durante loron 2, dehan katak nia ba duni hare kamas iha Companhia MAC’S Metal Craft nia oficina, tanba simu telefone husi Sr. Warren Macleod “por azar ka sorte” Emilia Pires nia kaben. Bainhira tó iha Dili Nelson haruka surat ida ba Emilia kona ba Kamas nia kualidade + folin no panfletos .

b.    Maibe  Nelson la  hatene ka la iha konhecimento  kona ba tenderizasaun ka adjudikasaun directa ba Companhia MAC’S Metal Craft.

 

c.    Deklarasau Odete dehan katak la iha “urgencia” sosa kamas. Kamas iha Hospital barak, mas espasu maka la iha atu tau kamas. Pedido urgencia Odete halo apenas ba kamas 2 ba pacientes fasse ran no makina fasse ran.

d.    Kona pedido sosa kamas, Odete momento neba ba Indonesia, nune nia deskonhece totalmente cazu ne. Altura neba Administrador maka halo pedido. Odete nia regresso, Admnistrador informa ba Odete.

 

e.    Kestaun flagrante pedido sosa kamas  iniciativa Administrador nian ka, mai hussi superior? Iha ne, “batata quente” hanesan “ bola de gelo” halai ba para iha Madalena ka Emilia.

 

Similariedades:

 

Kazu Emilia Pires identiko kazu Lucia Lobato no Joao Cancio nebe refere ba Artigo 299o “ Partisipasaun ekonomica em negocio” Kodigo Penal. La lika sai jurista atu interpreta artigo ida ne atu aplika alma e letra Artigo 299o ba Emilia Pires. Inferencias maka tuir mai ne:

 

1.    Nelson ba Melbourne ba visita oficina MAC’S Metal Craft  obviamente iha ona encontro preliminar Nelson ho Emilia, embora Nelson rejeita deklara iha Tribunal;

2.    Numero telefone Nelson nian Emelia maka fo ba nia kaben Warren Macleod;

3.    Nelson hakerek surat ba Emilia kona ba nia visita ba Warren Macleod nia Oficina junta panfletos kamas no presus ba Emelia;

4.    Ikus mai Emilia nia espozo Waren Macleod maka hetan projecto sosa Kamas liu husi adjudikasaun directa ho alegasaun falsifikada “urgercia / emergencia” sosa kamas, situasaun ida ke Directora Hopital  Odete Viegas “denuncia”.

 

Recolhe dados pedasuk hirak ne hotu no halo rekonstrusaun atu hatene se maka “cerebro/otak”, se maka hetan beneficios barak husi projecto kamas, se maka sai  colaborador ba projecto ida ne, teoria indusaun liu raciocinio logiko hatete : “ Emilia Pires authora no maior  beneficiaria

 

Nune 100% atan hau garante katak Artigo 2990  Kodigo Penal maka kondena Emilia Pires  La os juizes sira. Juizes sira interpreta no executa saida maka hakerek iha lei no aplika ba cidadaun hotu-hotu sem excepsaun.

 

Saida maka hakbesik ba Emilia?

 

Portas prisaun nakloke hein hela Emilia depois setensa tun. Iha neba prepara ona spanduk ida, hakerek nune” Seja Bem Vinda Excelencia Corupta ex-Ministra das Finansas” Mulher + Poderosa em Timor Leste”.

Tempo Timor, 02 Outubru 2015 – Grupu Trabalhu Spesial ka Special Working Group (SWG) entre Timor-Leste ho Indonésia ne’ebé halao sorumutu bá datoluk, iha loron 01 – 02 Outubru 2015, hodi diskute konabá segmentu rua iha area Noel Besi – Citrana no Bidjael Sunan – Oben, iha parte fronteira Ambeno - Oe-cusse, ne’ebé to’o oras ne’e seidauk resolve, hahu hatudu pasu pozitivu.

 

“Rezultadu hosi enkontru tékniku ne’e pozitivu tebes, tamba durante ne’e Timor-Leste ho Indonesia tenta atu buka pontu komun ida atu bele hakat bá oin hodi resolve segmentu rua ne’ebé seidauk resolve. Hosi enkontru ne’e, parte rua konkorda atu realiza trabalhu konjuntu ida iha terenu. Trabalhu ida ne’e, nian objetivu maka hodi identifika no klarifika liña fronteira ninian nomos hodi rona tán populasaun parte Timor-Leste ho Indonesia nian, konabá sira nian hanoin, sira nian hakarak,lamentasaun,hodi nune’e, bele hatene razaun saida mak to’o agora segmentu rua ne’e seidauk resolve. Ami konkorda atu halao trabalhu konjuntu ne’e iha fulan Outubru nian laran. Data lolos, ami sei komunika bá malu liu hosi kanal diplomátika. Maibé, ami konkorda hamutuk katak sei halao molok enkontru Joint Border Committee (JBC). Akordu konabá opsaun foun ne’ebé ami konkorda hamutuk sai nudar pasu dahuluk para atu konklui delineamentu no demarkasaun fronteira terrestre,” katak Diretor Marcos da Costa, Xefe delegasaun Timor-Leste.

 

Entertantu, Diretor Marcos mós hato’o katak maske sei sedu liu atu anunsia konabá bainhira los maka atu hetan akordu final ida, nia fiar katak parte rua sei bele kumpri hanoin hotu ne’ebé hato’o hamutuk ona hosi Prezidente Repúblika Indonesia, Joko Widodo no Primeiru-Ministru Timor-Leste, Rui Maria de Araújo, durante visita ofisial Primeiru-Ministru bá Jakarta, Indonesia, iha loron 25-27 Agostu 2015. 

 

Durante visita ofisial ne’e, parte rua hato’o katak konabá fronteira terrestre, iha pontu rua mak seidauk resolve no konkorda atu bele resolve molok tinan ne’e remata. 

 

Ekipa Indonésia lidera hosi Budiono Subambang, Diretor bá Zona Spesial, Munisipiu no Assuntus Fronteiras entre Estadu, Ministériu Interior no kompostu hosi ofisial Ministériu Negósiu Estranjeiru, Ministériu Interior Repúblika Indonésia, Ajensia Informasaun Geospatial, akompaña hosi parte Embaixada Repúblika Indonésia iha Timor-Leste. Ekipa Timor-Leste lidera hosi Marcos da Costa, Diretor Sudeste Aziatiku no Oseania, MNEC no    kompostu hosi ofisial Ministériu Negósiu Estranjeiru no Koperasaun, Ministériu Administrasaun Estatal, Ministériu Justisa liu hosi DNTPSC, Unidade Patrulhamentu Fronteira (UPF), F-FDTL, Gabinete Prezidensia no Gabinete Primeiru Ministru 

 

 

 

 

HUSI: António J. Castro da Cunha

 

 

Professor ou docente ka iha Timor-Leste bain-bain ita bolu mestri, nu’udar profisaun ida ne’ebe iha papel determinante tebes atu prepara no eduka jerasaun humana kualifikadu, nune’e bele konstrui no dezenvolve nasaun ida. Professor ka docente (teacher), tuir definisaun Wikipedia katak ema ka pessoa ida ne’ebe hanorin ciensia, arte, téknika no koñesementu seluk tan. Atu bele ezerse ka asumi profisaun ida ne’e, presiza ema ne’ebe iha kualifikasoens akadémikas no pedagójikas, nune’e bele transmite ka hanorin materia aprendijazem ho forma ne’ebe di’ak liu ba estudantes ka aluno sira hotu.

 

 Ida ne’e mos atu esplika katak, papel prinsipal husi professor ida maka atu eduka, hanorin, orienta, dirigi, treina, analiza no avalia alunus ka individu ne’ebe sira hanorin. Tebes, professor ka docente nu’udar profissaun ida ne’ebe kmo’ok tebes. Tanba ne’e, papel professor iha fungsaun ne’ebe stratégiku, hodi prepara rekursu humanu ne’ebe kualifikadu.

 

Iha loron 5 fulan Outubro, tinan-tinan, mundu tomak selebra nu’udar loron ba professores hotu (dia dos professores). Objetivu prinsipal husi selebrasaun loron mundial professores ne’e maka; Da-uluk, atu fo hanoin ba professores hotu konaba sira nia fungsaun no papel stratégiku hodi prepara rekursu humanu ne’ebe kualifikadu. Da-rua, atu apoiu (suporta) ba professores hotu iha mundo tomak i fo garantia katak sustentabilidade no ezistensia husi jerasaun futuru depende ba sira (profossores) hotu. 

 

Ha’u atu hateten de’it mos katak, nasaun ida, bele sai nasaun ne’ebe dezenvolvidu, iha karater no dignidade, depende tebes ba sa-ida maka professores sira hanorin ba estudantes.

 

Loron 5 fulan Outubro, mosu husi akontesimentu históriku ida ne’ebe akontese iha loron 21 Setembro to’o 5 Outubro 1966, bainhira realiza konferensia internasional ida iha Paris. Konferensia ne’e partisipa husi nasaun 76 hanesan membrus husi UNESCO no organizasaun internasional 35. Konferensia ne’e rasik hamosu rekomendasaun konaba estatuta professores ne’ebe koñesidu ho naran “ILO/UNESCO, Recommendations Concerning the Status of Teachers”.

 

Kontiudu husi rekomendasaun ne’e maka hanesan; Da-uluk, foku ba profesionalismu no bem-estar professores, liu-liu iha nasaun sub-dezenvolvidu sira. Da- Rua, profesionalismu professores la’os atu hatu’ur profisaun professor nar-naran de’it, maibe iha bukae ciensia no kompetensia adequadu i suficiente, balun maka hanesan kompetensia pedagojia. Da-Tolu, professores tengki hadomi nia profisaun totalmente no sincero. Da-Hat, labele hili profisaun nu’udar professor hanesan Segundo alternativa, tanba de’it susar atu hetan servisu seluk.(Fontes. Kompasian.com/2010).

 

Tuir UNESCO, loron professor mundial tengki reprezenta fundamentu tolu, maka hanesan konciensia, kompreensaun no apresiasaun ne’ebe maka demonstra papel importante professor ida nian, katak hanorin ciensia no dezenvolve jerasaun (futuru).

 

Professores iha Timor-Leste

Oin-sa ho Timor-Leste? iha loron ne’ebe importante tebes ba professores hotu iha mundo tomak, ha’u hakarak dada ita hotu atu halo refleksaun hamutuk. Reflekte konaba oinsa moris professores nian iha nasaun doben ida ne’e. Karik, Timor-Leste nu’udar nasaun dignifika ona nia professores hotu? Oin-sa maka ita bele dignifika professores sira?

 

Númeru professores hotu iha Timor-Leste, tuir dadus husi Ministeriu Edukasaun, mais ou menus 12,867 professores, tantu permanente komu kontratadu. Professoers hirak ne’e hanorin husi Pre-Eskolar, Ensinu Baziku, to’o Ensinu Sekundariu Geral no Tékniku Vokasional.

 

Ha’u nia observasaun, badak no simples, katak iha dékade ikus Timor-Leste nia Ukun Rasik An ida ne’e, ita (nu’udar nasaun ida) seidauk fó atensaun ka prioridade hodi “valoriza” no “dignifika” timor-oan hirak ne’ebe hili dalan professor nu’udar sira nia profisaun. Alende ne’e, hirak ne’ebe hili dalan nu’udar professor mos, dala-ruma la (seidauk) valoriza no dignifika sira nia profisaun rasik.

 

Iha razoens barak, tuir hau’u nia hanoin, tanba sa buat hirak ne’ebe bele mosu. Maibe, ha’u bele hatu’ur ba razoens bo’ot tolu, hanesan tuir mai;

 

Da-uluk, Profisaun nu’udar professor la (seidauk) garante moris iha futuru. Tanba ne’e, hili dalan nu’udar professor dala-barak sai hanesan alternativas ka ponte ida atu bele sobrevive, molok hetan fali profisaun seluk ne’ebe bele garante sira-nia moris iha futuru. Ba ida ne’e, barak hili dalan sai professor parte-tempu (part time) de’it. Professor barak, dala-barak tengki abandona alonus sira, la’os tanba sira nia hakarak, maibe liu-liu tanba ejizensia necesidades ne’ebe obriga. Professor barak tenki buka “rendimentu” adisional atu bele garante sustentabilidade ba sira nia moris (familia). Nune’e, sira nunka foku hala’o sira nia kna’ar nu’udar professor ida. Tanba-sa maka nune’e?

 

Da-ruak, Professor “la’os” profisaun. Timor-oan barak ne’ebe remata ona sira nia estudu iha ensinu superior (barak mos iha de’it ensinu sekundariu) dala barak preukupa  liu ho kampu servisu. Tanba Timor-Leste nu’udar nasaun “sei menus” kampu servisu, nune’e formadu no licenciadu barak haré’e eskola hanesan kampu servisu ida. Licensiadu barak hatama aplikasaun iha eskola sira, no “obriga an” de’it ba hanorin alunos sira. Maske sira hatene katak, atu sai professor ida tenki iha antesedente iha area edukasaun ou iha koñesementu pedagojia ne’ebe suficiente, maibe ba sira “la-iha” obsaun ona. Tanba ne’e, professor ba ema balun la’os hanesan profisaun ida ne’ebe presiza hala’o ho professional.

 

Da-tolu, Sai professor la’os tanba vokasaun. Timor-oan balun sai professor, la’os tanba sira hakarak (iha duni vokasaun) atu sai professor, maibe liu-liu tanba atu hetan de’it servisu. Ha’u temi balun, ida ne’e signifika kata sei iha professor barak maka hadomi tebes nia profisaun nu’udar professor hanesan vokasaun hodi dedika sira-nia an tomak atu prepara no dezenvolve rekursu humanu ne’ebe kualidade iha nasaun ida ne’e. Maske professor barak hili dalan ida ne’e nu’udar profisaun ida ba sira, maibe dala-barak sira la iha vokasaun ba sira nia profisaun. Bainhira ema ida la-iha vokasaun ba nia servisu, certu katak nia sei la iha vontade atu aprende no  dezenvolve nia koñesementu nu’udar professor. Se nune’e ona, ita bele imajina ona, sa-ida los maka professor ne’e loron-loron halo?

 

Maske nune’e, ha’u lakohi hatu’ur ida ne’e hanesan problema, maibe nu’udar dezafius ba ita nu’udar nasaun ida. Vise-Ministru Edukasaun, Abel Ximenes sempre ko’alia nune’e, “lalika haré’e difikuldade hotu ne’ebe ita infrenta hanesan problema, maibe hatú’ur nia (difikuldades) hanesan dezafius”.

 

Dignifika Professores Hotu

Tuir informasaun ne’ebe iha, governu liu husi Ministeriu Edukasaun mós sei selebra loron mundial ba professores iha tinan 2015 ne’e. Maske sei la selebra iha loron 5 fulan Outubro ne’e, maibe pelu-menus, Ministeriu Edukasaun iha hanoin ne’ebe di’ak atu dignifika professores hotu iha nasaun ida ne’e. 

 

Mai ha’u, la’os selebrasaun ne’e maka importante maibe kontiudu husi selebrasaun ne’e. Sa-ida maka governu sei halo hodi bele dignifika professores hotu iha nasaun ida ne’e? no sa-ida rasik professores ida-ida bele halo hodi dignifika sira nia profisaun? ita hotu bele hein hodi akompaña no kontribui. Maibe, atu dignifika professores sira iha loron especial ida ne’e (dia mundial dos professores), la’os responsabilidade Ministeriu Edukasaun nian de’it.

 

Entidades hotu (publiku no privadu), tenki hanoin ona oinsa bele dignifika no garante moris-di’ak professor ida-ida nian. Moris di’ak iha ne’e, signifika katak professor ida-ida iha sira nia atividades loron-loron, bele senti orgullu no dignu ho profisaun ne’ebe sira asumi. Salariu ne’ebe dignu, ambiente ne’ebe saudavel, valoriza no tane-as profisaun nu’udar professor, no importante liu maka rekoñesementu ba vokasaun no dedikasaun ne’ebe professor idak-idak iha.

 

Nune’e mos ba professores hotu. Nu’udar professor, ida-ida tengki hatene no kumpriende sa-ida maka papel prinsipal nu’udar edukador ida. Professores hotu tengki kaer metin papel prinsipal hanesan ha’u temin ona (tuir prinsipiu komun), nu’udar edukador. Professor ida-ida maka tengki dignifika uluk nia-an, molok bele husu mos ba ema seluk atu halo hanesan.

 

 

Ikus.

Professor ka docente ka mestri, nu’udar profisaun ida ne’ebe maka kmo’ok tebes. haré’e ho matan-tomak, dala-ruma ita dehan ne’e fasil, maibe la-fasil hanesan sa-ida maka ema barak hanoin? Atu bele eduka individu ida sai ema ida (mendidik manusia menjadi manusia), la-to’o de’it ho matenek no titulu ne’ebe iha, maibe liu-liu presiza iha vokasaun no dedikasaun.

 

Hahu husi professores iha Pre-Eskolar, Ensinu Baziku, Ensinu Sekundariu to’o Ensinu Tersiariu ka Ensinu Superior, hotu-hotu ho nia papel no fungsaun ne’ebe la hanesan. Maibe, sira (professores) ida-ida iha papel ne’ebe importante no fundamentu tebes ba futuru nasaun ida ne’e nian. Papel ne’ebe importante no fundamentu ne’e, presiza hala’o ho vokasaun no dedikasaun. Bainhira individu ida hili dalan sai professor hanesan vokasaun ida, klaru katak nia hadomi no sincero hodi dedika nia-an tomak, hanorin no dezenvolve jerasaun futuru.

 

Lós duni katak, papel professor hotu, ohin loron (prezente) no ba-oin (futuru) sei hakat liu kruzamentu no ai-tarak ne’ebe naruk i barak tebes. Kualifikasaun professional, koñesementu pedagojia, abilidade lingua (Tetum no Portugues), ejizensi moris-di’ak, no seluk tan, sei sai hanesan bareira bo’ot ida ne’ebe satan hela professor sira. Maske nune’e, ita hotu konciente katak la-iha dezafiu ida maka la-bele hakat liu. Buat hotu presiza tempu no hakat liu husi prosesu ida. Professor hotu tenki fiar katak, governu liu husi Ministeriu Edukasaun, sempre esforsu atu haraik moris ne’ebe dignu ba hotu-hotu. Hakat nei-neik, maibe la’o bei-beik. La’o ba futuru ne’ebe di’ak liu.

 

Aproveita oportunidade iha selebrasaun loron mundial ba professores, ha’u hakarak hato’o apresiasaun, agradesementu, obrigado wa’in no hakru’uk ho respeitu tomak ba professores hotu ne’ebe maka sakrifika no dedika ona sira nia tempu no moris tomak hodi eduka, hanorin, orienta, dirigi, treina, analiza no avalia jerasaun futuru nasaun doben ida ne’e. Timor-Leste hein nafatin imi (professores) hotu nia sakrifisiu no dedikasaun hodi hanorin no dezenvolve jerasaun futuru ida ne’ebe iha kualidade no kompetividade, liu-liu iha moral no ètika ne’ebe di’ak.

 

Atu taka,  permite ha’u atu hato’o de’it liafuan badak ida, “Professores hotu, imi iha direitu atu ejizi sa-ida maka sai imi nia direitu. Maibe, keta haluha mos imi nia dever. Hanoin ba, futuru nasaun doben ida ne’e, depende tebes ba sa-ida maka imi (professores) sei “kúda” (hanorin) hela iha alunos idak-idak nia kakutak (otak). Reflekte ba, “Fini di’ak sei fo fuan ne’ebe di’ak, Fini àt sei fo fuan ne’ebe la-di’ak”.

 

 

Notas; E-Mail; This email address is being protected from spambots. You need JavaScript enabled to view it., Telp; 78361688.

 

 

Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version