Tempo Timor Online

 

Tempo Timor - Hafoin semana ida loron ida Mauk Moruk Mate, iha loron Domingo (16/08) dadersan mais ou menus tuku sia, Mauk Moruyk ninia mate isin ho ninia membro nain tolu ninian tula iha amulansia hat ne’ebe hetan segurança husi FALINTIL-Forcas de Defesa Timor-Leste (F-FDTL) ho Polisia Nasional Timor-Leste (PNTL) no akompania husi motorizadas wain, sai husi Metiaut ba diresaun Bidau liu husi Bekora  sa’e ba Fatu Ahi.

Tuir liuron, ema wain tebes hamriik lina tuir dalan ninin hodi asiste no foti liman.nune’e mos ema sira akompania iha motor leten hakilar Viva Mauk Moruk. 

To’o iha Baukau Vila mais ou Menus tuku 16 Oras Timor-Leste no ema wain maka forma tuir estrada ninin hodi asiste konvoy transportasaun mate isin Mauk Moruk ho ninia membro sira nian liu ba Laga.

Mate Isin Mauk Moruk ho ninia membros sira nian ne’e hetan akompaniamentu husi ema wain liu tan husi Baukau ba Laga no to’o iha Laga kalan ona.

Iha Postu administrativo Laga ema rihun maka hein ona hodi simu mate isin Mauk moruk ninian. Maibe lakleur de’it mosu ema balun hodi tuda autoridade sira ne’ebe fo segurança sira iha eskuadra PNTL Laga ninian.

“Ami la hetan kanek mas ema tuda ami nia kareta rahun ona”, dehan membro segurança ida ba Tempo Timor.

Nia Haktuir katak, “ami iha hela edifisiu eskuadra PNTL laga ninian ne’e maka ema tuda ami nune’e ami sai ona”.

Iha parte seluk, Cornelio Gama aliás L7, maun husi matebian Mauk Moruk halo esforsu hodi hakalma ema sira ne’ebe halo problema ne’e. 

Ho akontesimentu ne’e ema sira ne’ebe akompania mate isin husi Baukau la konsege hakat tama to’o ba iha mate uma iha susugua maibe fila de’it iha dalan klaran ba fali diresaun Baukau.

 

“Ami sente triste tebes tan ba ami fila ona de’it iha dalan klaran tan ba ema tuda malu,” dehan eis veteranus ida husi Baukau vila.

Publika iha Nasional

 

Tempo Timor : Desizaun Komite Gestão Merkadu Centru Munisipiu Lautem hodi hasai karta offisial ida ba Vendedor husi Munisipiu Baucau atu labele ba fa’an sasan iha merkadu Centru Lospalos, daudauk ne’e hetan kritika makas husi komunidade balun, liu-liu Movimentu Estudante Juventude Lautem (MEJL), tanba konsidera desizaun ida ne’e la iha baze legal.

 

“Problema ne’ebé daudaun ne’e akontese iha Munisipiu Lautem entre Komite Gestão Merkadu Centru Munisipiu Lautem ho negosiante husi Maunisipu Baucau semana hirak liu ba oras ne’e daudauk sai hela polemika, ne’e duni ami husi MEJL husu ba Autoridade local iha Munisipiu Lautem atu resolve problema hirak ne’e ho seriu no labele taka dalan ba vendedor husi Munisipiu Baucau tanba sira maka sosa produtu local povu Lautem nian barak liu hodi lori mai fa’an fali iha Munisipiu seluk, inklui iha Baucau.” dehan Portavos MEJL, Francelino Resi Malu liu husi konferensia d imprensa ne’eb’e hala’o iha kampus induk UNTL. 

 

Tuir kronolojia, iha loron 22 Juñu 2015, Comite Gestão Mercado Centro Munisipiu Lautem  hasai karta offisial Gestaun merkadu nian hodi hapara negosiante husi Municipiu Baucau atu labele ba fa’an sasan iha merkadu Centru Lospalos, maibe karta refere rasik la iha baze regal no lei ne’ebé maka vigora la tuir regras husi Komersial ka Dekrtu Lei ruma husi Governu liu-liu Ministeriu Komersiu Industria Ambiente (MKIA) nian. 

Nune’e mós, iha loron 4 Jullu 2015, Comite Gestão Mercado Centro Munisipiu de  Lautem ne’ebé Xefia husi Alarico LY, S. Kom uza poder autoridade Comite Gestão Mercado Centro Munisipiu Lautem nian hodi muda negosiante husi Munisipiu Baucau ba hala’o aktividade negosiu iha liur husi ambiente Merkadu Centru Lospalos nian. 

Tuir karta ho Nu. offisial : 01/CGMCML/LOS-LTM/VI/2015 ne’ebé fó sai husi Comite Gestão Mercado Centro Munisipiu Lautem ne’ebé assina husi Xefe Merkadu Alarico Li, S.Kom ne’ebe sita kona ba razaun la autoriza vendador husi Munisipiu Baucau labele fa’an sasan iha merkadu laran tanba, fatin ne’e sei uza ba FA’AN ANIMAL husi povu munisipiu Lautem no fatin TERMINAL hodi para fatin ba kareta no motor nian.

Ami konsidera razaun hirak ne’ebe Xefe Komite Jestaun merkadu mensiona la iha baze legal, ne’e duni ami husu ba orgaun kompotente atu hare kestaun ida ne’e, tanba ho interese ema balun nian agora daudauk halo povu ninia produsaun kuaze ema la sosa.

Komesa husi loron 22 Jullu 2015, komunidade sira ne’ebé hodi produsaun lokal bfa’an iha merkadu Lospalos ninia rendimentu komesa tun no produtu local hanesan Nu’u, Mina Nu’u, modo nomos animal sira hanesan manu no fahi komesa la sosa ona husi negosiante sira ne’ebé mak sempre sosa tamba kauza husi problema ne’ebé iha. 

Kauza husi problema ne’e rasik komunidade husi Suku Souro, Home, Lore I, Bauro, Muapitine, Rasa, Leuro, Baduru, Maina I no Maina II ne’ebé ho produsaun lokal hanesan Nu’u ne’ebé hetan rendimentu bo’ot komesa tun no menus liu iha merkadu no la iha ona ema maka sosa ne’e duni sira lori fila ba uma. ..

Iha karta konferensia ne’e, kestiona mós kona ba aktu husi Sekretariu Munisipiu Lautem, Julio Canto Iha loron 7 Agostu 2015, ne’ebé tun direitamente hodi ba esklarese no haruka Vendedor husi Munisipiu Baucau fila ba tamba laiha ona fatin ba sira atu bele fa’an sasan. 

Ho razaun hirak ne’e ami MEJL ejize ba Governu liu-liu Ministeriu Komersiu Industria no Ambiente atu uza nia kompetensia hanesan orgaun Ezekutivu hodi bele resolve probelma aktividade ekonomiku iha Centru Merkadu Lospalos.

Husu ba mos ba Parlamentu Nasional Komissaun D assuntu Ekonomia no Dezenvolvimentu hodi uza nia poder legislasaun nia toma medida mos problema ne’e, tanba konsidera karta ne’ebé hasai husi Comite Gestaun Merkadu Munisipiu Lautem ho Nu. offisial 01/CGMCML/LOS-LTM/VI/2015 la iha legitimidade husi regulamentu Ministeriu Komersiu Industria no Ambiente.

Desizaun ne’e mak foti husi Administrasaun Munisipiu Lautem ho Comite Gestaun Merkadu Lautem ne’e hanesan politika Regionalizmu, Sukuismu no Rasismu ne’ebé laiha sentidu valor nasionalizmu hodi fo impaktu ba integridade territorial soberania Timor Leste. 

Politika gestaun merkadu ne’e mos fo impaktu maka’as ba rendimentu komunidade ho produsaun lokal ne’ebé lori ba bazar la folin tamba ema la sosa liu-liu husi negosiante ne’ebé mak husi Baucau. 

Desizaun ne’ebé foti husi Xefe Comite Gestaun Merkadu Municipio Lautem ne’e hanesan pratika monopoliu komersiu iha merkadu lokal.

Sira mos ba Administrador Municipio Lautem, Zeferino dos Santos Sequeira, atu uza nia kompetensia hanesan Autoridade Lokal hodi halo diagolu publika hodi envolve parte hotu atu rezolve problema.  

 

Se karik ezizensia hirak la hetan resposta iha tempu badak nia laran maka Estudante no Juventude husi Municipio Lautem no Baucau sei mobiliza Xefe Suco sira ho komunidade Lautem hodi hala’o asaun Pasifika hasoru Administrador Municipio Lautem. (**) 

Publika iha Ekonomia

 

Tempo Timor : Problema irigasaun la’os buat foun ba agrikultor sira iha Timor-Leste, tanba tinan barak ona agrikultor sira halerik ba governu atu hadia irigasaun, maibe Governu nafatin hatudu hahalok finjidu ba ejizensia husi povu nune’e tinan-tinan governantes sira halo proposta atu importa foos husi estranjeiru. Tuir informasaun ikus ne’ebe redasaun konsege simu virus atu hatama foos husi rai liur mos hahu propoin ona husi Ministeiru relevante maibe seidauk iha rezultadu.

Problema falta irigasaun ne’e akontese mós ba agrikultor sira iha Suku Seisal, iha Munisipiu Baucau iha ne’ebe kuaze natar hektares 70 sofre estragus tanba impaktu husi irigasaun ne’ebé la funsiona ho di’ak.

Deputada Bankada Fretilin, Ana da Conceição Ribeiro ba Jornalista iha Uma Fukun Parlamentu Nasional hateten, daudauk ne’e komunidade Seisal, liu-liu agrikutor sira preokupa tebes ho sira nia natar 70 hektares ne’ebé maka at.  

“Ha’u kestiona preokupasaun ida ne’e iha Parlamentu Nasional, tanba bainhira ami hala’o vizita eleitores ba Suku refefe komunidade sira hato’o lamentasaun barak kona ba irigasaun ne’ebé maka la funsiona no iha momentu ne’ebá sira husu ba Governu liu-liu Ministeriu kompotente tau atensaun ba problema ida ne’e.” dehan Deputada ne’e iha PN.

Fatin sira ne’ebé maka presiza atu tau atensaun maka hanesan, Irigasaun Kasa meta sobadere  no sira seluk. Irigasaun balun foin lalais maka hala’o husi projeitu PDD maibe balun at fali ona. 

Relasiona ho kestaun ne’e, Deputada refere husu mós ba Governu liu husi Ministeriu relevante, se bele karik tau orsamentu ba tinan 2016 nian, atu nune’e  bele hadia irigasaun sira ne’ebe maka at, liu liu irigasaun iha suku Seisal nian, tanba Suku Seisal hanesan Centru no natar bo’ot tebes.

“se irigasaun hirak ne’e maka ita la tau atensaun no governu la  tau matan konserteza komunidade iha Suku Seisal labele halo natar, tanba bainhira irigasaun la diak no la fornese bee rejultadu mos sei la di’ak.” tenik Deputada ne’e.

Iha oportunidade ne’e, Deputada konta tuir ezijensia Xefe Suku nian ne’ebé husu ba governu tun direitamente ba iha terenu hodi hare ho matan rasik, hodi nune’e oinsa atu halo bareira, moru portesaun nian, se lae natar hirak ne’e sei hetan estragus hotu.

 

“se ita hakarak hasa’e produsaun iha rai laran no hamenus importasaun husi rai liur, governu presiza tau atensaun ba irigasaun, liu liu iha Suku Seisal tanba iha irigasaun hat ne’ebe bo’ot hodi fornese bee ba povu nia natar” deputada ne’e kestiona. (**)

Publika iha Nasional

 

Tempo Timor - Prezidente Republika, Taur Matan Ruak, Tersa Feira ne’e  hala’o dialogu komunitaria ba loron dahitu nian  ho komunidade iha suku Cai-Cua iha parte dader, no kontinua iha parte loraik ho komunidade sira iha suku Vemasse Villa, Postu Administrativu Vemasse, Munisipiu Baucau.

 

Iha Dialogu refere komunidade foti kestaun lubun ida inklui problemas estudantes baku mestre ho mestra sira. Kazu alunus baku hanorin nain sira sai ona kultura no la’os akontese de’it iha Dili maibe moras ne’e da’et to’o on aba distritu seluk inklui Baukau. Nune’e akontese iha Suku Cai-Cua tan ba durante dialogu ho Prezidente da Republika ho komunidade no Iha sesaun husu no hatan, iha suku Cai-Cua Mestre Domingus Freitas lamenta ho attitude estudante suku Cai-Cua ne’ebe halo violensia kontra mestre.

 

“Labarik baku mestre ne’e krime, tenki kesar ba polisia hodi halo keixa ba nia tanba ita nia lei iha para regula ida ne’e, eskola ne’e hanorin matenek deit, liu-liu atu hatene halo sasan, hanorin edukasaun moral no hanorin ema sai ema ne’ebe diak. Maibe hau espera katak ita nia oan sira iha ne’e labele baku mestre, inan no aman, tanba demokrasia iha regra”, Prezidenti da Republika dehan.

 

Hatan ba preokupasaun husi Nazario da Silva kona-ba kultura suku ne’ebe hamate ekonomia komunidade, Xefe Estadu hateten nia mos preokupa ho situasaun kultura ninian ne’e.

 

“Hau konkorda ho oan nia hanoin redus kultura, tenki iha limitasaun no ita nia oan sira mak tenki numeru um, tanba labarik sira mak hatutan ita nia kultura, nune’e tenki tau matan ba sira”, Responde Prezidenti Taur Matan Ruak.

 

Hatan kona-ba problema faluk nain tolu ne’ebe laiha uma no kbiit atu sustenta moris, Xefe Estadu hatete: “ami sei haree saida mak ami bele ajuda, no hau sei entrega ba hau nia Asesor Politika, Filipe da Costa ho Primeira Dama, Isabel Ferreira atu hare kona-ba ida ne’e. Mas hau husu ba amu liu rai Xefe Suku no komunidade sira mos tenki hamutuk buka solusaun tau matan ba ita nia inan sira.”.

 

Entretantu iha suku Vemasse Villa, liuhosi sesuan husu no hatan, Veterana Maria Bui –mesak   hato’o nia lamentasaun katak iha suku Vemasse Villa komunidade ho lider komunitaria  la fahe malu maibe la fiar malu tanba ne’e atividade iha suku komunidade ladun partisipa.

 

“Ha’u husu ba imi tenke ko’alia ba malu, ne’e importante, imi iha suku ne’e hanesan familia ida  nune’e imi tenke pasensia, haraik an  ba malu oinsa  rezolve imi nia problema”, hatan Prezidente.

 

kona-ba problema sira seluk ne’ebé komunidade sira levanta hanesan, problema irigasaun, bee moos iha aldeia balu seidauk iha, traktor halai natar familia nian de’it, kondisaun eskola la di’ak, Xefe Estadu fó oportunidade ba Xefe Deprtamentu no Administrador Munisipiu hodi hatan ba komunidade nia preokuopasoins refere.

 

Nune’e mos dialogu iha suku Vemasse Villa ne’e marka mós prezensa Ministru Nogosiu Estranjeirus no Kooperasaun, Dr. Hernani Coelho I iha biban refere MNEK mós fahe hanoin ba komunidade sira kona-ba serbisu Ministeriu Estranjeirus nian atu komunidade  mós  bele apar ho MNEK nia serbisu.


Hanesan vizita ba fatin – fatin, iha suku Cai-Cua no Vemasse Vill, Xefe Estadu mós fo agradesimentu ba komunidade sira nia kontribuisaun ba ukun aan, no kontinua husu ba komunidade sira tenki partisipa iha dezenvolvimentu hodi hetan moris diak.

 

 

Publika iha Nasional

 

 

Tempo Semanal  Breaking News - informasaun badak ne’ebe Tempo Semanal konsege hetan kona ba akontesimento iha dia 08/03/15 mais ou menus tuku 02 liu minutu15 madruguada.

 

Iha akontesmientu refere grupu deskoñesidu asaltu eis PNTL eskuadra Baquia.eis edifisio nee membrus PNTL Baquia hela iha laran.

 

Grupu deskoñesidu derepenti deit tama hodi hakilar " SERANG-SERANG" no baku airin elektrisidade. Grupu deskoñesidu ne’e uza maskra taka oin no kaer ho samurai. 

 

Husi akontesimento nee membrus pntl ida Agente JDR sai ba liur hodi tiru teus dala rua i membru ne’e tama fila fali ba laran hodi fanun nia maluk nain rua.

 

Hafoin membru PNTL Sarjentu ida loke odamatan derepenti grupu deskoñesido nain 1 soe tama kedas granada ba uma.

 

iha asidenti ne’e grupu deskoñesidu soe tama granada ida  ba Esquadra PNTL Baquia, husi akontesimentu ne’e membru PNTL nain hat(4) hetan kanek no nain rua (2) hetan kanek todan.

 

Membru nebe hetan kanek maka:

 

1. Sarjentu Matias Pinto (kanek todan) membru eskuadra Baquia

2. Sarjentu Secar Goveia (kanek todan CSP)

3. Ajente xefe Antero da Costa (kanek kaman CSP)

4. Sarjetu Agusto Soares ( kanek kaman CSP)

 

Sasan nebe hetan sunu no istragus mak hanesan:

 

1. Sunu motuk komunidadede ni kareta truck 1

2. Kareta patrolla PNTL  eskuadra Baquia  04.083 G tiru koak nia roda parte los

3. vidru janela kazernas 1 hatan tiru kuak

4. kareta STAE Baucao nian hetan tuda rahun

5. Xefe suku Alawa- Kraik nia uma hetan sunu motuk

6. Motorizada Saúde nian 2 nebe para iha xefe  suku nia uma mos hetan sunu motuk

7. motorizada postu nia 1 mos ema sunu

8. Mambru polisia Baquia Agente xefe Maria Teresa  nia uma hetan tuda  granada dala 1  nebe kauza  ahi han sal visita.0

 

Tuir Autoridade seguransa ninia deklarasaun hateten sasan nebe membru deskoñesidu sira uza maka Kilat, Granada, Marotok no samurai.

 
Publika iha Nasional

 

 

Tempo Semanal Breaking News – Membru CSP ba Prezidenti Parlamentu Nasional ne’ebe hetan kanek evakua ona mai Dili ho helikoptru ne’ebe haruka husi Dili iha loron Domingo (08/03) maibe fatin la to’o nune’e  heli AS50 konsege tula de’it membru PNTL ida ne’ebe kanek todan mai Dili no membru PNTL kanek tolu seluk iha akontesimentu hanesan tula ona iha kareta ambulansia husi Baguia ba Ospital Baukau.

 

“Kolega eskoltu ida ne’ebe kanek todan ne’e tulan ona iha Helikoptru sai ona husi Baguia mai Dili no kanek sira seluk ne’e ho kareta husi Baguia ba Ospital Baukau. Hare kondisaun sira ne’ebe lori mai Baukau ne’e mos kanek maka’as  ida maka kolega Mateus Pinto maibe tan ba helikoptru fatin la to’o nune’e sira ho kareta ambulansia tula de’it ba ospital Baukau”, dehan ofisial PNTL ida ba tempo Semanal.

 

Aviaun Helikoptru refere to'o hikas iha kapital RDTL amis ou menus meudia Oras Timor-Leste tun iha kuartel PNTL Kaikoli depois ambulansia mak transporta membru CSP ne'ebe kanek todan ne'e ba Ospital Nasional iha Bidau. Iha insidenti ne’ebe mosu iha kalan fahe ba rua entre loron Sabado (07/03) ho loron Domingo (08/03) iha estasaun Polisia Nasional Timor-Leste (PNTL) eskuadra Baguia, rezulta membru instituisaun seguransa ninian nain hat maka kanek.

 

“Sarjentu, cesar Goveia, sarjentu Agusto Soares no ajente Xefe Antero. Sira nain tolu ne’e, nain rua sarjentu no nain ida ajente xefe hanesan membru Corpu Seguransa Pesoal (CSP) eskoltu Prezidenti parlamentu ninian. Depois membru ida husi eskuadra Baguia ninian ne’e sarjentu Mateus pinto”, hateten ofisial PNTL nian ida  ne’ebe husu Tempo Semanal atu labele publika ninia identidade.

 

Tuir autoridade husi aeroportu ninia mos rekuinese katak Helikoptru ne’ebe haruka husi Dili va halo evakuasaun ba kanek sira iha baguia ne’e ninia kondisaun ki’ik duni.

 

“Helikoptru ne’e ki’ik AS50 (super Puma 50). Helikoptru ne’e GHG niian,” dehan autoridade ida iha Aeroportu Komoro.

 

Iha akontesimentu iha postu administrative Baguia la’os de’it hakanek membrus PNTL nain hat ne’e maibe grupu ne’e halo asaltu ne’e mos estraga sasan balun.

 

“Sira halo estragus ba kareta trek ida, kareta eskuadra PNTL ninian ida depois sira sunu uma ida iha suku Alawa karaik, sunu mutuk motorizadas saude ninian rua no motorizada projeitu nian ida no membru PNTL eskuadra Baguia, maria Teresa nia uma mos hetan tuda ho bomba malotop depois ahi han sala vizita de’it”, ofisial PNTL ne’e hatutan.

 

 

Prezidenti Parlamentu hala’o vizita ba Baguia tan ba asuntus familiar ninian Ironia tebes eskoltu ba Prezidenti Parlamentu ninia ba hela ketak iha eskuadra PNTL ninian hodi hetan kanek.

 

“Sorte Prezidenti Parlamentu la hetan atakes nune’e PNTL la rona lia. Ha’u la kompriende tan bas a maka seguransa Pesoal sira akompania nai ulun sira to’o tiha fatin haruka ema sira ne’e ba hela ketak? Se iha momentu akontesimentu ne’e maka bu’at ruma akontese ba Prezidenti parlamentu entaun kasian polisia oan sira ne’e sala nafatin. Mai ha’u Prezidenti Parlamentu lolo’os prepara fatin ba ninia seguransa besik nia la’os hanesan saida maka akontese agora”, dehan Olderico juventude ida ne’ebe hamriik hodi hare membru CSP ne’ebe kanek transporta tama ba ONVG (08/02).

 

Membru PNTL ida ne’ebe kanek husi explusaun iha atakes husi grupu balun ba iha eskuadra PNTL Baguia iha kalan fahe ba rua loron Sabado (07/03) evakua ho helikoptru to’o ona iha Dili  iha meudia Oras timor-Leste no transporta ona ho ambulansia ba Ospital Nasional Guido Valadares  (ONGV) hodi hetan tratamentu.

 

Nia hatutan, “hare husi lala’ok akontesimentu ne’e ema la so’e granada ba iha uma Prezidenti parlamentu ninian entaun ema ataka duni polisia eskuadra Baguia ninian. Prezidenti Parlamentu tenke responsabiliza tan ba nia hatene katak eskoltu ne’e atu mate ka moris tenke hamutuk ho nnia. Tuir lolo’os kuandu la’o ne’e nia tenke hare fatin ba eskoltu sira. Nia la’os ba toba iha uma ida depois eskoltu ba toba fali iha fatin seluk. Sorte nia la hetan bu’at ida se kona prezidenti Parlamentu karik eskoltu ho PNTL maka sala’.

 

Falta loron hitu atu halo fulan rua hafoin de akontesimentu Sa’e lari iha loron 15/01/2015 ne’ebe rezulta mos membru PNTL balun hetan kanek mosu tan fali akontesimentu ne’ebe membru PNTL nain hat hetan kanek tan ba kona estalasu husi expluzaun ne’ebe deskonfia tuda husi grupu balun.

 
Publika iha Nasional

Deskonfia KRM Asaltu Eskuadra PNTL Baguia

 

 

Tempo Semanal Breaking News - Iha meia noite Oras Timor-Leste (OTL) ema grupu bo’ot ida halo asaltu ba kna’ar fatin Polisia Nasional Timor-Leste (PNTL) iha postu adminitrativu Baguia, Distritu Baukau.

 

“Ema serka hela ami nia fatin no ami sai la di’ak. Ema tiru tan kareta no tuda granada mai ami nia fatin”, dehan membru PNTL ida iha fatin akontesimentu.

 

Iha parte seluk autoridade PNTL ida seluk informa katak Prezidenti Parlamentu Nasional, Vicente Guterres mos vizita hela ba Baguia wainhira mosu akontesimentu ne’e. 

 

Tuir informasaun husi PNTL dehan membru PNTL sira ne’ebe hetan kanek ne’e nain ida husi eskuadra PNTL Baguia no nain tolu seluk husi korpu seguransa pesoal Prezidenti Parlamentu Nasional ninian.

 

“Ema tuda granada ou malotop karik  mak ne’ebe halo ami kolega sira kanek ona no seguransa Prezidenti Parlamentu ninian ida maka kanek maka’as”, dehan membru PNTL ida ne’ebe Tempo Semanal konsege hetan kontaktu.

 

Autoridade sira deskonfia grupu ne’ebe halo atakes ba eskuadra PNTL Baguia ne’e iha relasaun ho Grupu Konsello Revolusaun Maubere. Infelizmente Tempo Semanal la konsege hetan konfirmasaun maske halo ona esforsu balun.

 

“Tuir informasaun husi tereno dehan ema sira ne’e husi Konsello Revolusaun Maubere mak mai asaltu ami”, dehan ofisial PNTL id aba Tempo Semanal.

 

Iha Domingo dadersan (08/03) autoridade sira iha Dili sei organiza hela helikoptru ida atu ba halo evakuasaun ba kanek sira husi Baguia mai hodi hetan tratamentus iha Ospital. 

Publika iha Seguransa Defesa

 

Baguia, Tempo Semanal - Problema dalan no eletrisidade la’os problemas foun iha nasaun Republika Demokratika de Timor-Leste mezmu iha Ukun Rasik A’an ida ne’e ninia laran Governu salin ona milaun rihun ba rihun maka ezekuta liu husi projeitu emerjensia maibe komunidade sira sei halerik iha area rural kona ba kondisaun dalan no kuran ahi oan.

Publika iha Baucau

Baukau, Tempo Semanal - Komisaun Nasional Kombate HIV SIDA, (KNKS)  koko aijuda haberan matenek no kuinesimentu autoridade lokal husi suko lima nolu resin sia iha Distrito Baukau, atu nune’e lider komunitariu sira ne’e bele sensibiliza sira nia komunidade hodi prevene moras SIDA. 

 

“ Xefe suco sira presiza iha koinesimentu lolos konaba problema moras HIV SIDA ne’e. Wainhira sira hatene mak sei prevene moras ne’e; agora ita aijuda sira hanoin balun hodi halo nusa para sira sai ba esplika ba sira nia komunidade tan ba kota Baucau hanesan sidade numeru dois depois Dili tan ba iha Baucau mosu kazu moras HIV SIDA to’o agora iha numeru ema nain tolu ona” dehan  Daniel Marcal, Sekretariu Ezekutivu KNKS-TL.

 

Iha fatin hanesan reprezentante administrador Distritu Baucau, Fransisco ximenes konkorda ho Diretor KNKS nune’e nia halo apello ba autoridade local sira atu lori rezultadu sorumutu konsolidasaun advokasia prevensaun HIV SIDA atu hatutan ba sira nia povu iha aldeia tan ba autoridade local maka besik liu ba povu iha baze  no lider komunitariu sira maka dala barak hatene liu sira nia povu sira ne’ebe maka dia’k no moras.

 

“Lider lokal sira maka besik liu povu no sempre hatene uluk povu ida ne’e (saude) di’ak ka la’e,” Francisco dehan.

 

Hafoin Daniel Marcal haktuir katak intensaun husi Komisuan Nasional HIV SIDA maka konsolida lideransa lokal atu tau hamuutk no barani atu ko’alia, halo esforsu buka konvense komunidade nune’e duni liu husi programa nasional kombate HIV SIDA iha sidade segundu iha Timor-Leste hodi liberta Baucau husi HIV SIDA atu nune’e foin sa’e sira hodi estuda matenek para hadia kota Baucau.

 

“ Agora hare ba problema sira ne’e hotu, laos iha Baucau deit maibe hare ona iha rai barak, barak, governo agora fo atensaun maka’as ba moras HIV SIDA “ hateten Marcal 

 

Maske numeru populasaun iha nasaun ne’e ladun bo’ot maibe numeru populasaun ne’ebe hetan moras HIV SIDA aumenta ba beibeik nune’e Governu Timor-Leste fo importansia hodi kombate asuntu refere nune’e Komisaun kombate HIV SIDA direitamente lidera husi vice premeiru ministro asuntu social iha Kintu Governu Konstitusional ninian ne’e.

 

“ Ita timor ne’e ema juta ida resin deit, ita nia kazu agora iha ona lima ratus resin ona (atus lima resin ona), Tmor ema juta ida, imi hanoin took, se ita iha ona atus lima maka spfre ona HIV SIDA,” Daniel hateten.

 

Iha nasaun ne’ebe maioria populasaun mesak ema fiar nain ba relijiaun katolika, protestante, muslumanu, hindu ne’e mosu aktividade seksual livre no ema estranjeiru tama sai timor livre tan ba to’o iha aeropportu maka hetan vistu on arrival iha rai ketan entre TL ho Indonesia no aeroportu Dili.

 

“ita la iha buat ida atu identifika ema ne’ebe atu tama mai, ita nia ema bot sira sai ba liur barak, to mai ita la hatene, ida ne’e potensia teb-tebes se ita la kuidadu agora tinan ida ka rua tan ita nia ema sira maka kona HIV sei aumenta,” Daniel relata.

 

Hafoin de independencia vitima ba kazu moras HIV SIDA mos hetan dezenvolvimentu maka’as iha Timor-Leste tan numeru aumenta  ba beibeik no ema balun mate ona. Maske moras halakon ona ema TimorOan balun ninia moris maibe barak maka seidauk iha koinesimentu kona ba moras HIV SIDA no maske ema balu hetan HIV SIDA sira la koinesementu halo nusa maka nia kona HIV SIDA.

Publika iha Nasional

Tempo Semanal - Ministru obras publikas (MOP), Gastao de sousa kestiona kapacidade kompania internacional ENSUL tan ba kaer projeitu ponte Taroman iha Distritu Suai la’o lento los. Kontrusaun ba ponte refere inisiu tender manan husi kompania Portuges ENSUL iha tinan 2012 maibe kompania refere la konsege executa ninia responsabilidade tuir fiar ne’ebe Governu deposita.

 “Ponte ne’e seisenta metrus de’it mas lori tinan maka halo. Ne’ebe ita hare’e kapasidade teknika no financeira kompania sira nian ne’e. Iha komapnia portuguesa ida maka ka’er. Kompania ne’e ENSUL. Ha’u hanoin bu’at sira ne’e ita toma pontu de avaliasaun ba aban bain rua sira bele hetan projeitu ka la’e. Portantu ne’e hanesan notas ida ba obras publikas ho governu katak kompania sira ho kapasidade hanesan ne’ene kuandu hetan projeitu ita tenke question mark ka ita tenke tau nia iha pontu interogasaun, tan ba sa? Sira bele ou labele?” relata Ministru Obras Publika, Gastao Sousa. 

Publika iha Nasional
Page 1 of 3
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version