Tempo Timor Online

Tempo Semanal – Baukau, 19/03/2014

 

Ema haklalak bolu malu lori rama, fatuk tuda, kilat raizadas, bomba tarutu nakfera, Membru PNTL kanek, ema balun kaptura, ahi suar tan ba uma sunu no feto ho labarik trauma. Ne’e maka rezultadu husi rezolusaun 05/III/2014 ne’ebe representante povu iha parlamentu nasional aprova iha loron 03/03/2014 ne’ebe dekreta hapara atuasaun atividades husi grupu ilegal CPD-RDTL ho KRM.

 

Tuir estudante UNTL ida ne’ebe dehan ninia Amaro da costa hahi servisu Parlamentu Nasional ne’ebe konsege hasai Rezolusaun hasoru CPD-RDTL ho KRM maske rua konteudu deklarasaun husi lideransa organizasaun rua ne’e la iha diferente barak ho kasete ne’ebe uluk ies Alfredo Reinado hasai maibe Parlamentu sira la hasai rezolusaun kedan hodi atua hanesan agora.

 

“Ha’u fo parabein ba ita nia representante povu sira iha Parlamentu Nasional ne’ebe konsege duni halo rezolusaun ba hapara deklarasaun husi lideransa CPD-RDTL ho Konselho Revolusaun Maubere maibe parlamentu iha 2007 kala dukur ne’ebe la halo mos rezolusaun hodi halo atuasaun ba Alfredo ninia deklarasaun iha kasete video ne’ebe espala lemo iha Timor laran ate internasional hodi halo mos operasaun hanesan agora,” amo so’e piadas no iha ninia oin hatudu deskontentamentu.

 

Tebes duni ita bele nota katak Polisia Nasional Timor Leste hala’o duni sira nia kna’ar barak ho di’ak maibe balun mos hanesan operasaun Lalulai hamosu perguntas tan ba durante de operasaun iha membru hodi pistola tiru tama ba uma balun laran ne’ebe ikus mai deskobre iha ferik ho labarik sira maka haksumik aan hela iha uma laran.

 

Liu tiha minute balun ferik oan ne’e la’o sai mai liur hasoru bainaka KRM ne’ebe tama fali ba ninia uma ne’e. Ferik oan ne’e hatudu oin kalma maibe la’os ba labarik balun ne’ebe ne’ebe hamutuk ho ferik oan ne’e. 

 

“Ita triste hare situasaun sira hanesan ne’e mosu iha ita nia nasaun depois de Ukun Rasik Aan. Bo’ot sira halo problemas ki’ik oan sira maka simu hanesan ita hare ne’e,” dehan ema ida ne’ebe dehan de’it ninia naran Maria wainhira TS dada lia ho iha Lalulai besik fatin akontesimentu iha Sabadu semana kotuk.

 

Nia hatutan, “ema sira ne’e mai hela iha ne’e la signifika ami hotu mos. Ami iha ne’e inseguru tan ba la iha seguransa tan ba PNTL ho F-FDTL do’ok.”

 

Iha mos sunu uma Baraka sira ne’ebe iha Lalulai maske parte autoridade balun deklara ona katak uma sira ne’e la sunu. Uma sira ne’ebe baibain membru Konselho Revolusaun Maubere hela ba ne’e agora hela ahi anar de’it hamutuk bu’at balun ne’ebe KRM sira la konsege lori hanesan hahan balun.

 

“Ami hakfodak tebes mos kuandu rona kilat tarutu fali iha ne’e no haree ahi han fali uma. Ha’u hanoin la devia polisia sira sunu uma sira ne’e hanesan fali Sembilan Sembilan,” dehan Maria ne’ebe dehan ninia tinan 32 anus ne’e.

 

Iha Parte seluk maske antes ne’e PNTL rasik hatene momos ona katak Konselho Revolusaun Maubere foo sai ona sira nia preparasaun atu simu operasaun PNTL ninian ba Laga Lalulai. Maibe bele nota momos katak operasaun Lalulai ne’e falta planu didi’ak nune’e wainhira PNTL to’o iha fatin refere hodi husik fatin altu  sira ba membru KRM okupa hodi halo rezistensia hodi rezulta membru PNTL ida kanek. PNTL tama husi parte ida de’it hodi halo ema ne’ebe atus liu halai lakon hotu I kaptura de’it suspeitu rua. 

Maske nune’e operasaun halo ona no tuir mai ita akompania hamutuk deklarsaun komandante PNTL distritu Baukau, Jose Neta Mok ba Tempo Semanal hanesan tuir mai ne’e:

 

“Hau hakarak hatete de’it katak iha terenu ne’e sira halo planu programadu, hanesan hau hatete ona ami halo aproximasaun ba grupu CPD ho KRM tan ba ema sira ne’e, ema ida de’it mak ba mai. Ami halo aproximasaun iha Sabado (07/03) duni. Ami husu ba sira nia lider para atu kopera para bainhira ami tun karik halo koopera de’it para ita bele halo rekolla sira nia ekipamentu i ita hatun atribut sira ne’e tan ba ami ezekuta rezolusaun Paralamentu ninian para atu kumpri.”

 

“Entaun ami ba halo aprosimasaun sira mantein dehan ami prontu koopera. Maibe labele iha tiru buat sira ne’e hotu hau dehan ami mai ne’e la’os atu tiru, se ita kopera malu diak liu tan. Sira dehan ita bo’ot sira mai, ami hein deit, atu hatun bandeira mak la hatun, atu sobu ne’e mak la sobu ami mantein mate, sira dehan ami laiha buat ida , maibe ami hasoru imi ho fatuk ho ai, maibe ami dehan lae ami mai nafatin para halo aprosimasaun liu husi telefone, liu husi fontes balu ne’ebe ita fiar maibe sira kontinua mantein sira nia posizaun. “

 

“Sira ema por volta trezentu it aka kuatru centus mas sira nia azitasaun sira ninia propoganda sira nian oitusentus maibe ita haree ne’e la to’o ida ne’e.”

 

“Entaun ami nia operasaun ne’e mos labele altera ami kontinua nafatin tuir programa. I ami ba mos atu halo koopera nafatin no aviza nafatin para sira atu bele koopera ho ami. “

 

“Maibe bainhira ami to’o iha ne’eba sira simu kedas ami ho fatuk, asim ke ami tun husi Salari ninian tun ba kruzamentu ne’e sira hamate kedas ahi hotu ona pontu sira preparadu nune’e ami tama sira simu hasoru ami entaun ami nia ema balu serka tiha sira, bainhira komesa iha ona lansamentu bomba marotok buat sira ne’e hotu nukazu ami nia membru ida mak kanek i ami alarme ba sira para sira bele namkari. I iha atuasaun ida ne’e mos ami kaer duni ema nain rua lori ona mai iha ne’e ho evidensia sasan balu rama abon ne’e iha 19 ho tan rama dima, katana, farda balu mas ami ladauk identifika.”

 

“Ami nia Ajenti xefe Salvador Correia, nia husi unidade espesial COE ninian maka kanek.”

 

“Ami mos hakarak informa katak, wainhira ami atu fila fali sira blokeia tiha ami  taka ami labele sai, ami nia membru ne’e hetan kanek iha  7: 20  oras i ami labele evakua para ba halo tratamentu lalais tanba sira taka hotu ho fatuk iha estrada sira nee hotu husi kruzamentu Merkado ninian atu ba Salari mai to’o besik iha simiteriu Heroi ninian ne’ebe mak besik Laga ninian ne’e iha parte fatin 7 kedas i ami mai mos sira ataka tiru kontra ami dala rua.

 

“Tiru ho kilat, tuda ho marotok, depois sira tiru tan ho fogetis sira ne’e mas dala ruma sira aproveita ida ne’e mak hodi halo rame depois lakan sae ami haree ne’e fogeti ninian, marotok kona rin eletrisidade ne’e lakon hotu kilat musan kona fiu eletrisidade ne’e lakan hotu. Kilat iha mos bomba marotok.”

 

“Sira (Membru KRM) iha ne’eba ne’e tiru hasoru ne’e ami bele identifika tanba membru sira ami kuinhese Coboy mak tiru. “

 

“Ami iha ne’eba, ami iha ne’eba retira iha oras 12: 15 ida hanesan ne’e, maibe ami la’o de’it, Ba mai ami labele sae kareta tanba ameasa ne’e makas ida ne’e mak lubuk ida taka netik husi merkado nian entaun ami tenke-ser tiru para ami bele ses husi ne’eba para bele liu kareta tanba ai taka tiha dalan ami lori oras 2 ho balun mak tama to’o fali Baucau.”

 
Publika iha Nasional

Tempo Semanal - Tuir Informasaun ne'ebe redasaun Tempo Semanal simu husi parte PNTL Baukau dehan Operasaun Kontra Konselho Revolusaun Maubere (KRM) ninia membru iha Lalulai laga iha dia 10 de Marsu dadersan foti hafoin de iha loron rua antes aproximasaun ne'ebe halo husi parte Polisia Nasional Timor Leste (PNTL) falla hodi hetan kooperasaun di'ak husi parte Mauk Moruk ninia membru sira.

Publika iha Seguransa Defesa

Tempo Semanal - Dili

 

Presidenti Konselho Revolusaun Maubere Mauk Moruk loron ida antes de hetan cerku husi PNTL (12/03) halo konferensia de imprensa ida iha Fatuhada (Bele haree iha Video sira iha okos ne’e) hodi esplika sira nia pozisaun kona ba operasaun PNTL ninian iha Lalulai – Laga (10/03).

Publika iha Nasional
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version