Tempo Timor Online

 

 

Dili, Tempo Semanal - Vise-Ministru Negósiu Estranjeiru no Koperasaun, Constâncio da Conceição Pinto iha loron 21 – 25 Janeiru 2015, halao vizita trabalhu ba Rejiaun Administrativu Espesiál Oe-Cusse hodi partisipa iha reuniaun Konselhu Ministru Extraordinariu no seremonia entrega poder ba Autoridade ZEEMS.

 

Durante vizita loron 5 ne’e, Vise-Ministru Constâncio Pinto aproveita mos oportunidade hodi halao visita ba  Postu Unidade Polísia Fronteira rua iha Besa-Toko, Aldeia Ato, Suku Abani, Sub-Distritu Passabe no Leol-Batan, Aldeia Laku-Foan, Suku Kosta, Sub-Distritu Pante Makasar, iha Rejiaun Administrativa Espesiál Oe-Cusse.

 

Iha loron 21 Janeiru 2015, Vise-Ministru Negósiu Estranjeiru no Koperasaun, Constâncio Pinto, halao vizita ba area fronteira Passabe hodi hasoru malu ho Autoridade seguransa Indonesia nian.

 

“Para alem de partisipa iha Konselhu Ministru hamutuk ho Ministru no Sekretáriu Estadu ba Assuntus ASEAN, ho oportunidade ida ne’e, hau halao mos vizita ba fronteira sira ne’ebé maka dalaruma iha problemas, liu-liu iha Passabe i tambem Naktuka. Maibe, tamba tempu, ami so vizita deit mak Passabe. Iha Passabe, ami hasoru malu ho militar Indonézia nian ne’ebé maka servisu iha area fronteira. Hare’e mos ba postu sira ne’ebé TNI sira hapara ita nian ema dada fiu, aproveita koalia mos ho sira katak fiu ne’ebé dada iha ita nian teritoriu, ahi ne’e sei benefisia mos parte rua i nune’e mos kontribui ba seguransa iha fronteira. Komandante husi sira nian parte hato’o katak problemas iha komunidade parte sira nian, tamba ne’e maka sira hapara dada fiu. Mas, hau esplika ba sira katak sira nian responsabilidade para esplika didiak ba sira nian komunidade konabá liñas fronteiras ne’ebé iha,” haktuir Constâncio Pinto.

 

Durante iha Passabe, Vise-Ministru Constâncio Pinto vizita mos postu Polisia Unidade Patrolhamentu Fronteira hodi hare ho besik kondisaun no situasaun servisu iha ne’ebá.

 

“Hau ba vizita mos ita nian Polísia UPF. Ita hare katak kondisõens mínimu, liu-liu sira nian hela fatin, assessu ba be, transporte, buat sira ne’e hotu, agora minímu tebes. Espera ke iha tempu badak husi Sekretáriu Estadu Seguransa nian bele hare’e problema sira ne’e hodi resolve i nune’e mos hare ba movimentasaun ita-nian komunidade ho sira nian tamba iha Passabe mos iha border-pass. Ita hare katak iha atividades ekonómikas iha ne’ebá, iha merkadu ki’ik oan ida iha sira nian parte, ita nian seidauk iha. Ita hein katak iha tempu badak mos bele loke espasu ida para komunidade sira bele halao mos atividades ekonómikas iha fronteira ne’e. Ita hare dezenvolvimentu infraestrutura husi ita nian parte, presiza teb-tebes. Embora iha estradas balun diak ona, maibe barak mak seidauk diak no tenki hadia, para nune’e bele fasilita populasaun bele halo sira nian negósiu no mobilizasaun,” hatutan Vise-Ministru Pinto.

 

Hafoin remata vizita iha Passabe, Vise-Ministru ne’ebé akompaña husi Sekretáriu Estadu ba Assuntus Kombatentes Libertasaun Nasional, Julio da Costa “Meta Malik” hamutuk ho Komandante Postu UPF Passabe, Edigar dos Remedies, Komandante Postu UPF Leol-Batan, Carlos Luan, Ofisial Ligasaun PNTL ba MNEK, Komandante Quintiliano Soares no Ofisial Gabinete Demarkasaun Fronteira MNEK, Pedro Laranjeira, kontinua halao vizita ba Leol-Batan. 

 

Iha tinan kotuk, mosu problema iha Leol-Batan entre komunidade Timor-Leste ho Indonésia nian ne’ebé rezulta uma tolu maka hetan sunu, markus fronteira balun hetan estragu husi parte populasaun Indonésia nian no mosu reklamasaun liu-liu ba rai-henek no rate ne’ebé lokaliza iha teritoriu Timor-Leste nian.

 

“Ami ba to’o fatin ne’ebé sira reklama, liu-liu konabá rai henek no rate ne’ebé mak iha. Rai henek ne’e iha ita nian rai, rate mos iha ita nian rai. Ita hare parte rua ne’e mak hanesan problema ituan ba sira. Ita laiha problema. Sira hanoin katak ne’e sira rain tamba sira nian familia hakoi iha rate ne’ebá. Ita hare klaru katak teritoriu ne’e ita nian. Indonésia mos konkorda tiha ona ho ita katak ita iha liña fronteira ida. Ba rate ne’e, konkluzaun katak komu sira uza rate ne’e desde kedas avo sira nian tempo, ne’ebé ita hanoin katak bele mos fasilita sira uza nafatin ou ba vizita maibe labele hakoi tan mate ona maibe bele ba vizita. Desde ke iha kordenasaun diak ho autoridade iha ne’e, fo informasaun, hau hanoin buat sira ne’e mak bele hametin relasõens amizade entre povu rua ne’e, liu-liu iha liñas fronteiras,” katak Constâncio Pinto. 

 

Vise-Ministru Constâncio Pinto mos expressa ninian preokupasaun relasiona ho kondisaun postu Polisia UPF no kondisaun infraestrutura ne’ebé nia hare iha Aldeia Leol-Batan.

 

“Husi dalan ba Leol-Batan, ami konsege para iha ita nian postu UPF. Hau hare kondisaun iha ne’ebá susar tebes ba sira liu-liu ba be. Be sira laiha i sira toba fatin mos la diak. Toba deit iha rai, kulsaun tau iha rai deit, kama kala laiha i sira mos husu para atu bele aumenta tan postu ida iha Leol-Batan. Populasaun mos husu atu tau postu ida iha ne’ebá. Postu ida atu kontrola para nune’e ita nian UPF sirabele ba bebeik iha ne’ebá. Ida ne’e mak hau rona husi komandante UPF nian.Ita hare’e sira servisu diak, estabelese relasaun diak ho Indonézia hanesan mos iha Passabe. Maibe tenki fo fasilidades ba sira no lojístiku ne’ebé nesesáriu para sira bele halo sira nia atividades sira ho diak. Aldeia Leol-Batan ne’e izolodau tebes. Embora estrada, dalan ba diak ho kareta. Maibe tenke ser hadia. Portantu, Aldeia ida ke laiha asesu ba eletrisidade mos. Ne’ebé, hau hanoin, ita hein katak autoridade lokál, Rejiaun Autónoma Oe-Cusse nian sei tau matan ba sira, liu-liu hadia estrada sira no be.”

 

Entertantu, Vise-Ministru Constâncio Pinto mos iha loron 22 Janeiru 2015 halao vizita ba Nitibe hodi hare Veteranu ida ninian rate no observa katak kondisaun infraestrutura husi Pante Makasar ba Nitíbe sei kontinua hanesan ho fatin sel-seluk ne’ebé presija hetan mos atensaun. Tamba ne’e, Constâncio Pinto rekomenda katak infraestruturas tenke sai prioridade, liu-liu estrada, atu nune’e, populasaun bele iha asesu no fasilita sira nian movimentasaun. 

 

“Hau hanoin i rekomenda katak infraestruturas ne’e tenki prioridade, liu-liu estrada, atu nune’e ita nian populasaun bele iha asesu. Ita hare bele asesu ba eskola, asesu ba merkadu, asesu ba ospitais no halo sira nian negósiu. Ita hare mos katak labarik sira barak mak lao dok teb-tebes ba eskola i hau hanoin se estrada diak, se iha transporte, labarik sira em vez de lao dok oras ida ka rua mak to’o eskola, sira bele utiliza transporte ne’ebé maka iha”.

 

Tuir plano, Vise-Ministru Negósiu Estranjeiru no Koperasaun hamutuk ho komitiva atu halao mos vizita ba Bijael-Sunan ho Naktuka. Maibe, tamba tempu ne’ebé ladun diak prevene delegasaun labele atu kontinua vizita ba area ne’ebé oras ne’e tama hela kategoria area sira seidauk resolve entre Timor-Leste ho Indonézia. Vise-Ministru Constâncio Pinto haktuir mos katak oras ne’e, prioridade ida husi Indonézia nian polítika esterna maka atu resolve kestõens fronteira. Tan ne’e, iha tinan ne’e nian laran presija servisu makas liu tan para bele resolve tiha segimentus rua ne’ebé maka seidauk resolve ho Indonézia.

Lee kontinua... 0

Nitibe, Tempo Semanal - Prezidente Repúblika, Taur Matan Ruak, halo vizita nauk ida ba distritu Oekuse hodi selebra loron aniversariu restaurasaun independência hamutuk ho povu atnoi no halo vizita ba sub distritus no suku sira iha distritu enklave ne’e hodi rona ho hare ho matan povu ninia moris.

  

Iha loron 22 Maiu 2014 Presidenti da Republika akompañadu hosi Embaixadór Austrália ba Timor-Leste, Sr. Peter Doyle, inagura estrada ho distànsia kilómetru 9 ne’ebé hetan reabilitasaun liuhosi projetu Road For Development (R4D), iha aldeia Mahata, suku Lela-Ufe, sub-distrítu Nitibe, Oecusse.

 

Lee kontinua... 0

Oekuse, Tempo Semanal - Prezidente Repúblika,  hahi’i Polìsia Unidade Patrullamentu Fronteira (UPF) ne’eb’e hala’o sira-nia serbisu ho di’ak hodi fó seguransa ba komunidade sira iha liña fronteira hosi Sakato to’o Citrana, maske ho kondisaun ne’ebé mínimu tebes. Presidenti da Republika Taur Matan Ruak, hato’o nia apresiasaun ne’e wainhira hala’o vizita ba Kompañia UPF “Charlie” iha Pante Makasar, Segunda-feira (26/05/2014).

 

“Ha’u agradese ba imi-nia badinas, vontade no dedikasaun, serbisu ne’ebé imi halo di’ak lós.  I ha’u admira tebes ho imi-nia serbisu. Imi tenke prontu 24 oras serbisu para ke povu hakmatek iha sira-nia uma, tanba imi instrumentu estadu nian”,dehan Xefe  Estadu ba membru UPF sira.

 

Lee kontinua... 0

Oecusse, Tempo Semanal – Governu sentral foin lalais anunsiu ona lista kompania sira ne’ebe manan atu dada linea eletrisidade iha distritu enklave oecusse maibe komunidade uma kain 133 husi Aldeia Kutete, Suku  Costa, Sub-Distritu Pante-Makassar, Distritu Oecusse, sei moris iha nakukun laran, tan ba la iha asesu ahi eletrisidade maske Governu oferese solar panel ba komunidade iha area balun iha Oecusee.

 

Vicente Ena, Xefe aldeia Kutete informa katak sira ninia aldeia to’o ohin loron ladauk hetan naroman  husi eletrisidade inklui mos ninia povu lada’uk hetan solar panel, nune’e duni sei kontinua kastigu aan ho roman husu lampu tradisional no sunu lilin.

Lee kontinua... 0

DILI- Ro’o pasajeirus rute enclave Oekusi no Sub-distritu Atauro labele hala’o ona operasaun hanesan tempu normal tanba, ro’o Tiga Anugrah no Raja Ampat 3 ne’ebe governu kontrata laiha forsa hodi hakat ondas tasi nian ne’ebe oras ne’e dadauk komesa siak ona.

Lee kontinua... 0
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version