Tempo Timor Online

Tempo Semanal, Dili - Instituisaun F-FDTL manan publiku ninia respeitu tan sai ixemplu iha lala’ok mak konsistente no rigor iha implementasaun disiplina ba ninia membrus sira. 

 

Iha semana ruma kotuk, membru F-FDTL balun obrigatoriamente tenke entrega sira nia farda militar ho ekipamentus fila fali ba instituisaun tan ba hetan komete eru disiplinar. 

 

Iha seremonia entrega atributu F-FDTL ninian husi membru sira ne’ebe hala’o iha kuartel Jeneral F-FDTL Fatuhada, Dili, Brigadeiro Jeneral Filomeno da Paixao de Jesus, informa ba publiku katak membru sira ne’e tenke lakon sira nia kna’ar tan ba indisiplina no faltosu. 

 

Maibe ironia maka lideransa F-FDTL ne’ebe mosu hanesan espelho mos hetan alegasaun komete eru hodi hatudu hela ixemplu balun maka falun metin ho fitun ida kapas nune’e publiku la hetan informasaun refere.

 

Tuir informasaun ne’ebe Tempo Semanal simu alega katak brigadeiru Jeneral F-FDTL, Filomeno da Paixao de Jesus, abandona Kuartel Jeneral F-FDTL iha fulan Setembru 2013 wainhira Maijor Jeneral F-FDTL hala’o hela visita de trabalho ba estranjeiru.

 

“Vice husik hela ninia servisu durante semana ida hahu husi 26 de Setembru 2013,” dehan fontes Tempo Semanal iha Kuartel F-FDTL iha Fatu Hada Dili.

 

Fontes ne’e esplika katak, “brigadeiru ne’e abandona ninia servisu depois mosu argumentu ida ho ofisial ida tan ba tenderizasaun balun maka hamosu perguntas.”

 

“Durante semana ida senhor Brigadeiru lori ninia seguransa ba hela de’it iha Likuisa mas fila mai la iha investigasaun ba nia ate agora,” fontes ne’e hatutan.

 

Wainhir Tempo Semanal husu Konfirmasaun ba Sekretariu do Estadu de Defesa, DR. Julio Tomas Pinto via SMS wainhira hala’o hela visita de trabalho hamutuk ho Primeiru Ministru ne’ebe mos hanesan Ministru de Defesa ba Jakarta hodi hola parte iha Jakarat Dialogue on Defense and security.

 

Perguntas ne’ebe hato’o maka karik parte Ministeiru Defesa investiga ona asuntus abandona Kuartel F-FDTL ne’e komete husi Brigadeiru Jeneral no razaun ema numeru daruak ne’e husik hela ninia kna’ar fatin durante semana ida no karik MD ho SED halo ona investigasaun ba kazu refere maibe ho diplomasia tuir lei ninian dutrina, DR. Pinto hatan dehan, “kualker kazu saida de’it, tantu krime ou disiplinar tenki investiga mai husi instituisaun rasik.”

 

“MS (Ministeiru da Defesa) ou SED (Sekretariu do Estadu de Defesa) so interven koandu iha ona rekursu,” Sekretariu do Estadu da Defesa esplika iha ninia sms ba tempo Semanal.

 

Iha parte seluk relasiona ho kazu abandona kuartel ninian ne’ebe alega hala’o husi Brigadeiru jeneral ne’e, Primeiru Ministru no Ministru da Defesa, Kay Rala Xanana Gusmao iha aeroportu Dili (23/03/2014) promete sei tau atensaun ba kazu refere.

 

“ok, ha’u sei hare kazu ida ne’e depois maka ha’u……..,” Xanana dehan.  

 

Tempo Semanal mos koko ona atu hetan konfirmasaun husi Brigadeiru Jeneral, Filomino Paixao maibe infelizmente to’o notisia ne’e hatun la hetan resposta ruma.

 

Tuir hirarkia militar soldadus halo sala komandante maka investiga maibe wainhira komandante ida maka involve iha alegasaun indisiplinar susar atu hatene se maka bele investiga.

 

Antes iha iha loron 03/03/2014 instituisaun F-FDTL hasai ninia membru nain 24 tan ba involve iha lala’ok naksalak balun inklui abandona sira nia kna’ar ne’ebe tuir Brigadeiru Filomeno da Paixao de Jesus katak tama F-FDTL hanesan vocasaun tama padre ninian la’os tama F-FDTL tan ba osan.

 

Membru F-FDTL sira ne’ebe hetan espulsa ne’e mai husi komponente  komponente Terrestre (CT), komponente Apoiu Serbisu (CAS), komponente Centru Formasaun no Treinu (CFT), komponente Naval (CN), no mos Kuartel General Fatuhada rasik.

Naran membru F-FDTL ne’ebe mak mak komando espulsa kompostu husi Aleixo dos Santos (Primeiru sargentu) distrito Lautem, Germano Leão de Deus (Segundu Sargentu) Distrito Lautem, Angelino Pius das Dores Silva (segundu sargentu) distrito Baucau separasaun serbisu, maibé seidauk hetan desijaun husi Chefi Estado Maior General Forsa Armada (CEMGFA) Leonato Soares de Carvalho (primeiru Sargentu), husi distrito Dili, Nicolau Fernandes (Segundu sargentu) Distrito Manufahi,  Olavio Dias Cabral (Cabo) husi Distrito Lautem, separasaun serbisu, maibé seidauk hetan desijaun husi CEMGFA, Sarvador Marques Soares (Soldadu) husi Distrito Manufahi, Alina Fernandes (Soldadu) distrito Lautem, Adriana Colo (Soldadu) Distrito Oecusse, Adão de Jesus Nascimento (Soldadu) Distrito Aileu, Pereira (Soldadu) Distrito Ainaro, Joanico Geva dos Santos (Soldadu) distrito Aileu, Ricardino de Jesus Soares (Soldadu) distrito Manatuto, Olivio Mendonsa do Amaral (Soldadu) distrito Dili, Romeu Magno Varela Guterres (Soldadu) distrito Baucau, Felicidade da Costa (Soldadu) distrito Baucau, Gabriel Ola Caunan (Soldadu) Distrito Oecusse separasaun serbisu, maibé seidauk iha desijaun husi CMGFA, Marcus Soares Gonçalves (Soldadu) distrito Liquisa, Mariano Barros (Soldadu) distrito Covalima, F, Agustinho Moniz (Soldadu) distrito Bobonaro, Silvano da Cruz (Soldadu) ho Justino Viera (Soldadu) husi Componente Terrestre (CT), Olga S. Ximenes (Soldadu) no Flotentina de Jesus Lobo (Soldadu) distrito Liquisa husi Componente Apoiu Serbisu.

 
Publika iha Seguransa Defesa

Dili, Tempo Semanál – Atu proteze riku soin povu Timor-Leste nian iha tasi laran,  estadu Timor-Leste presiza profunda relasaun di’ak ho nasaun vizinu hanesan Australia, Indonézia no Estadus Unidus Amérika ne’ebé desde tinan 2002 fó ona asistensia mai Timor-Leste liu husi koperasaun militar. 

Publika iha Seguransa Defesa

Tempo Semanal – Dili, 19/02/2014

 

Komandante fitun rua husi F-FDTL, Lere Anan Timur  deklara sai ninia lia menon ba Mauk Moruk ho konselho Revolusaun Maubere atu labele viola lei ne’ebe vigora iha RDTL hodi hatais nafatin Farda Militar.

 

Publika iha Seguransa Defesa

Tempo Semanal - Dili, 10/02/2014

F-FDTL daudaun ne’e iha hela faze de selesaun dokumentus hodi prepara ba rekrutamentus membru F-FDTL foun atus lima tan iha tinan 2014 nune’e duni Xefe Estado Maior das Falintil –Forca de Defasa Timor Leste (Xefe EM F-FDTL), Falur Rate la’ek husu ba instruktores sira atu kuda disiplina ne’ebe rigorous ba membru foun sira iha instituisaun ne’e ninia laran hodi labele banati tuir izemplu maka ladi’ak ita pasadu.

Publika iha Seguransa Defesa

Istória Timor-nian Ema Fábrika De’it

Dili, Tempo Semanál – Desde tinan 2002, ema ko’alia barak konaba klandestinidade no ema ida-idak ho ninia versaun rasik. Nune’e, tama iha ema nia kakutak liu-liu joven sira istórias dala barak ema fábrika de’it molok realiza, ne’eduni ikus mai sei la fasil atu hasai ka halakon. Kestaun maka Timor-Leste seidauk iha istória eskrita konaba klandestinidade atu sai hanesan baze. 

 

Publika iha Edukasaun & Kultura

Durante funu kontra militar Indonézia

 

Dili, Tempo Semanál – PovuTimor-Lestekoiletavitoria ba luta ukun rasik-an iha tinan 1999 liu husi referendum ne’ebé uluk lider rejistensia nian sira mehi ona atu referendum iha tinan 1979. Maibé tanba forsa mínimu, maka referendum iha tinan 1979 la konsege realiza. Tanba ne’e, durante tempu naruk nia laran, povu tomak hamutuk ho Falintil, luta kontra militar Indonezia i aumezmu tempu luta kontra Timor oan sira seluk ne’ebé fó apoiu ba militar Indonezia. 

 

Publika iha Nasional

Komunidade Dale MS Kona Virus Injustisa Iha Tratamentu Saúde

ANTES ne’e, iha publikasaun Jornal Tempo Semanal fulan kotuk sosiedade sivil kestiona makas desizaun Ministeriu Saúde ne’ebé aprova orsamentu urujente ba sidadaun estranzeiru, Welfried Adolfus Seran hodi ba halo tratamentu saúde iha rai liur.

Publika iha Nasional

MS Abandona Veteranus Na’in 8 Seidauk Hetan Tratamentu

KUAZE tinan ida ona membru F-FDTL na’in valu (8) ne’ebé kompostu husi, Tanente Koronel ema na’in 1, Major na’in 1, Sarjentu Xefe na’in 1, Sarjentu na’in 1, Segundu Sarjentu na’in 1 no Primeiru Kabu na’in 3 hein atu ba hala’o tratamentu saúde iha rai liur. Maibe, to’o ohin loron Ministeriu Saúde seidauk halo tranferensia.

Publika iha Nasional

Sidadaun Estranzeiru “Anak Emas,” Timor Oan Tau Ba Kotuk

Ministeriu Saúde Prefere Apoiu Sidadaun Estranzeiru Halo Tratamentu Iha Rai Liur Hodi Abandona Pedidu Veteranus Na’in 8 Ne’ebé Ativu Hela Iha Instituisaun F-FDTL satan Populasaun bainbain sira nian. 

NOTISIA ho titlu,“Nepotizmu Iha Tratamentu Saúde” parese sei manas hela iha publiku nia tilun. Ema barak kestiona desizaun Ministeriu Saúde (MS) ne’ebé fó atendementu espesial ba sidadaun estranzeiru, Welfried Adolfus Seran hodi hala’o tratamentu sáude iha Surabaya, Indonesia.

Situasaun ne’e, halo timor oan sira senti “dianak tirikan.”  Tanba, faktus hatudu membru veteranus na’in valu (8) ne’ebé oras ne’e ativu hela iha Falintil-Forsa Defeza Timor-Leste (F-FDTL) kuaze tinan ida ona hein desizaun Ministeriu Saúde atu ba hala’o tratamentu iha Singapura. Maibe, tansá..? to’o ohin loron seidauk halo transferensia. 

Indikasaun ne’e hatudu katak, Servidor estadu sira oras ne’e prefere fó atendementu espesial ba sidadaun estranzeiru, duke Timor oan. Pior liu, sira buka ajuda de’it familia, parentes no kolega, hodi tau ses tiha interese povu. Ezemplu, kazu Welfried Adolfus Seran, sidadaun Indonesia ne’ebé hetan “rujukan” husi Ministeriu Saúde ba hala’o tratamentu iha Surabaya ho povu timor nia osan.   

Fasil tebes, sidadaun ho pasaporte Indonesia ne’e asesu ba fasilidade estadu. Maibe, ba Timor oan, povu baibain, veteranus no familia veteranus defisil la halimar. Tansá, ida ne’e bele akontese.? Karik, Ministeriu Saúde mak la iha planu di’ak, ou karik, nia (red-Welfried Adolfus Seran) nu’udar Vise Ministra Saúde, Maria do Ceú Sarmento nia kuinadu. Ne’e duni, bele hetan lalais atendementu husi Ministeriu Saúde hodi ba hala’o tratamentu iha rai liur.?

Perguntas hirak ne’e, dala ruma bele loos. Tanba, se ita analiza no halo komparasaun dokumentus entre sidadaun Indonesia, Welfried Adolfus Seran nian no membru F-FDTL na’in 8 ni’an ne’ebé Tempo Semanal asesu, deskonfia buat balun la loos no bele akontese konflitu de interese iha prosesu ne’e. 

Karta pedidu husu atu haruka membrus F-FDTL na’in 8 ba hala’o tratamentu saúde iha Singapura, ida fó sai iha loron, 3 Agostu 2012 no ida fali fó sai iha loron, 19 Setembru 2012. Iha karta primeiru husu atu haruka ema na’in lima (5) no karta segundu ema na’in tolu (3). Karta hirak ne’e asina husi Dr. Mendes Pinto,s.B.

Kontestu (red-isi) husi karta ho asuntu “lista do pessoal de veteranus para tratamentu fora de pais” ne’ebé hato’o ba Xefe Departamentu Servisu Enkaminamentu DNSHE MdS iha loron 19 Setembru 2012 katak, bazeia ba despaxu (surat) husi Servisu Enkaminamentu DNSHE MdS ne’ebé atu hala’o paraser kona ba membru veteranus na’in 8 hodi hala’o tratamentu iha Singapura, tuir lista pedidu ne’ebé hato’o husi Gabinete do CEMG das F-FDTL, maka depois halo reviu ba kazu hirak ne’e, ami tau prioridade (I) ba membru na’in 5 no agora aumenta tan ema na’in 3.

Membru F-FDTL hirak ne’e mak hanesan, Manuel Freitas ‘Maubuti’ ho kargu Tanete Koronel, presiza hala’o endoscopy ho CT-scan abdomen no konsulta ho doutor Gastrohepatoenteroligia/ Urologista. Armindo Nunes dos Santos ho kargu Major, presiza hala’o endoscopy ho MRI vertebra no konsulta ho doutor gastrohepatoenterologia/neurologista. Virgilio da Costa ‘Tuba-Rai’ ho kargu Sarjentu Xefe, presiza hala’o endoscopy no colonoscopy, konsulta ho doutor gastrohepatoenterologia/endokrinologi. Maunel da Silva Cabral kargu Sarjentu, presiza hala’o endoscopya ho CT-scan abdomen, konsulta ho doutor gastroenterologia/nefrologista. Antonio Pinto ho kargu Primeiru Kabu, presiza hala’o CT-scan abdomen konsulta ho doutor nefrologista/urologista.

Ba membru na’in 3 ne’ebé ninia karta pedidu hato’o ikus mak hanesan, Gregorio Meneses ho kargu Segundu Sarjentu, presiza hala’o endoscoy no CT-scan abdomen, konsulta ho doutor Gastrohepatoenteroligia. Justinho Madeira ho kargu Premeiru Cabo, presiza hala’o endoscopy ho CT-scan abdomen, konsulta ho doutor Gastrohepatoenteroligia. Nune’e mós, Raul Cipriano Madeira Premeiru Cabo, presiza hala’o endoscopy ho CT-scan, konsulta ho doutor Gastrohepatoenteroligia/endokrinologi.

Situasaun hanesan akontese mós ba pasiente, Joana Maria Dulce Victor. Tanba, to’o ohin loron Ministeriu Saúde seidauk halo tranferénsia ba pasiente refere atu hala’o tratamentu saúde iha rai liur, mezmu nia rasik hetan ona karta referensia (surat rujukan) husi junta mediku iha Hospitál Nasional Guido Valadares HNGV (Timor Post edisaun Tersa 06 Agustu 2013). 

Antes ne’e, Joana Dulce baixa loron sanulu ona iha HNGV no hetan karta husi junta mediku atu hala’o tratamentu iha rai liur tanba sofre moras tumor. Mezmu nune’e, Joana Dulce, nu’udar mós Komisária CNE bainhira lori karta ba entrega iha Ministeriu Saúde. Maibe, husi Ministeriu Saúde dehan la iha osan atu halo transferensia.

Relasiona ho kestaun hirak ne’e Tempo Semanal tenta hakat ba edifisiu Ministeriu Saúde atu hasoru Diretor Servisu de Enkaminamentu,  DNDHE. Maibe, la konsege tanba resepsionista ne’ebé atende Jornalista Tempo Semanal iha momentu ne’ebá dehan, Diretor la iha fatin.   

Deskonfia Mosu Nepotizmu 

Problema ida ne’e hahú, bainhira Ministeriu Saúde aprova orsamentu urujente ba sidadaun estranjeiru, Welfried Adolfus Seran hodi hala’o tratamentu saúde iha Surabaya, Indonesia. Dokumentus ne’ebé Tempo Semanal hetan hatudu katak, orsamentu inisial ne’ebé presiza hamutuk U$ 1.396.00. Kona ba Kustu  intervensoens diagnostika no terapeutikas sei selu bainhira Hospital Husada Utama, Surabaya Indonesia haruka invoice mai. 

Nepotizmu tanba faktus hatudu katak, pasiente nu’udar sidadaun Indonesia mais Ministeriu Saúde kontinua aprova orsamentu urujenti ba nia hodi halo tratamentu. Maibe, ba timor oan hanesan, Joana Maria Dulce Victor no membru F-FDTL na’in 8 to’o ohin loron seidauk tranfere ba rai liur hodi hetan tratamentu.

Ironia liu tan, Ministeriu Saúde dehan la iha osan ba pasiente Joana Maria Dulce Victor atu halo tranferensia. 

Ironia seluk tan, tuir informasaun ne’ebé Tempo Semanal hetan husi fontes konfirmadu katak, pasiente Welfried Adolfus Seran ne’ebé agora daudauk hala’o tratamentu saúde iha Surabaya, antes ne’e nunka hala’o tratamentu iha Ospital Nasioanl Guido Valadares.

Tratamentu Paradu 

Tinan rua kotuk, veteranus sira ne’ebé sofre moras sempre ba hala’o tratamentu saúde iha rai liur, hafoin hetan ‘rujukan’ husi Ministru Saude liu husi Ospitál Nasional Guido Valadares. Uluk Governu haruka veteranus sira ba hala’o tratamentu iha Ospitál Surabaya, hodi konsulta no hala’o analizasaun ba moras ne’ebé sira sofre. Maibe, iha ne’ebá la halo operasaun. Ne’e duni, se sira (red-Veteranus) ne’ebé hetan moras todan haruka ba Ospitál Mount Elisabet Singapura. 

Iha 7 Augustu 2013, tuir Filomeno da Paixao de Jesus, nu’udar Vise Xefe Estadu Maiór General F-FDTL katak, tinan rua kotuk Veteranus sira ne'ebé hetan moras sempre ba hala’o tratamentu iha rai liur. Maibe, la hatene, tansá iha tinan ida ne’e paradu tiha.? “ita la hatene, tanba saida mak prosesu tratamentu ba ita nia veteranus ne’ebé naran iha lista, to’o agora seidauk ba hala’o tratamentu. Karik, difikuldade kona ba osan, ou karik seidauk iha kontratu ho Ospitál Elisabet Singapura, ne’e duni mak seidauk haruka mós ita la hatene.” dehan Paixao ho duvida.

Paixao rekonese, lista naran veteranus F-FDTL ne’ebé atu ba tratamentu iha rai li’ur to’o ona iha ninia meza no ida ne’e agora sai preokupasaun boot ba membru F-FDTL hotu ne’ebé hetan moras, liu-liu ba sira ne’ebé Veteranus. “ba veteranus ne'ebé hetan moras durante ne'e, Governu iha polítika ida, atravesa Ministru Defeza no Sekretariadu Estadu, iha osan atu aloka ba Veteranus sira hodi hala’o tratamentu iha rai li'ur. Maibe, tinan ida ikus ne’e tratamentu ba Veteranus paradu” esklarese Paixao. 

Kazu ne’e agora daudauk iha hela ninia meza no hein atu trata ho Sekertariu Estadu, oinsá mak osan ne’ebé aloka husi Governu ba iha orsamentu tranferensia bele fó ba veteranus sira atu ba hala’o tratamentu.

“Veteranus sira ne'ebé atu hala’o tratamentu iha rai li'ur, ami labele haruka ba arbiru de'it. Maibe, Governu mak tenke iha akordu (MoU) ho Ospital ne’ebé atu haruka veteranus sira ba halo tratamentu, depois Ministeriu Saúde ba asina tiha kontratu, hafoin mak ami bele haruka ba. Se ida ne’e la iha, entaun ami atu haruka oinsá? Aliende ne’e, tenke iha osan.” Paixao kestiona.

Publika iha Nasional

Ohin Ministru de defesa Australia hala'o vizita ida mai dili hafoin iha semana kotuk Forsa Estabilizasaun Internasional husik hela nasaun ne'e. Stephen smith halo vizita mai dili hodi hasoru malu ho lider nasaun ne'e hodi ko'alia kona ba kooperasaun militar entre nasaun vizinu rua ne'e.

Publika iha Seguransa Defesa
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version