DILI - Tribunal Rekursu proklama ona rezultadu eleisaun antisipada katak partidu koaligasaun Aliansa Mudansa ba Progresu (AMP) mak sai nu’udar partidu manan nain iha eleisaun ne’e ho total votu 309.663 (49,6%) fahe ba kadeira hamutuk 34.

Entretantu, partidu manan daruak mak partidu FRETILIN ho total votu 213.324 (34,2%) fahe ba kadeira 23. Tuir fali Partidu Demokraátiku (PD) ho total votu 50.370 (8,1%) fahe ba kadeira 5, partidu koaligasaun Frente Dezenvolvimentu Demokrátiku (FDD) hetan votu hamutuk 34.301 (5,5%) fahe ba kadeira 3.

Juiz Prezidente Tribunal Rekursu, Deolindo dos Santos hatete, ho rezultadu eleisaun antisipada ne’ebé fó sai Tribunal mós nia serbisu remata ona. 

“No serbisu sira tuir mai orgaun kompetente sira seluk mak halo,” hatete Deolindo iha Tribunal Rekursu, Kaikoli - Dili, Segunda, (28/05).

Iha fatin hanesan, Fidelis Magalhães hosi partidu koaligasaun AMP hato’o agradesementu barak ba povu tomak ne’ebé depozita ona sira nia konfiansa ba AMP liu hosi eleisaun antisipada iha loron 12 Maio liuba.

“Ami hato’o agradese barak ba povu tomak. Agora sei públika tan iha Jornal Repúblika, no hahu hosi loron públikasaun to’o loron 15 nia laran, membru deputadu foun tama ona hahu plenaria dahuluk depois sei hili tan meja Parlamentu Nasionál no ikus liu mak ba iha governu,” hatete Fidelis ba Jornalista sira. 

“Maibé agora ita sei diskuti hela programa sira, no ha’u seidauk hatene klaru kona - bá kompozisaun estrutura governu ne’e rasik. Liliu se mak sei asume kargu primeiru - ministru. Ida ne’e ha’u seidauk hatene. Depois mak maun Xanana ko’alia ho ita boot sira,” esplika Fidelis.

Fidelis hatutan, partidu koaligasaun AMP prontu desde uluk kedas hodi funsiona governtiva to’o tinan lima. Signifika, sei la iha tan eleisaun ida iha fulan 8 nia laran hanesan akontese liu dadauk. (Oki)