Tempo Timor - Kanal Notisia, Husi imi ba imi

Switch to desktop Register Login

PR nomeia Samuel, maibé posibilidade AMP rejeita Featured

  • Written by 
Rate this item
(2 votes)

DILI – Prezidente Repúblika (PR), Francisco Guterres Lu – Olo desidi no nomeia ona eis diretor Ajensia Dezenvolvimentu Nasionál (ADN), Samuel Marçal atu asume kargu Ministru Planeamentu no Investimentu Estratejiku (MPIE), maibé bazeia ba informasaun balun hosi interna partidu Aliansa Mudansa ba Progresu (AMP) posibilidade rejeita membru governu nain tolu ne'e, tanba antes ne'e AMP halo ona konferensia imprensa hodi fó ultimatu ba prezidente katak durante loron 10 nia laran tenke posse ona membru governu hotu ne'ebé sei pendente hela, la'ós atu posse nain tolu de'it. 

Maske nune’e, PR Lu – Olo desidi ona katak sei fó posse ba membru governu nain tolu iha loron Kinta, 16 Agostu 2018 iha horas tuku 10:30 dadersan iha palásiu prezidensial Aitarak Laran.

Bazeia ba karta ofisial Prezidensia Repúblika ne’ebé hato’o ba xefe governu iha loron 13 Agostu foin lalais katak, Prezidente Repúblika (PR), Francisco Guterres prontu ona atu fó tomada posse ba membru governu nain tolu hanesan Alfredo Pires ba Ministru Petróleu no Rekursu Mineral (MPRM), Samuel Marçal ba Ministru Planeamentu no Investimentu Estratejiku (MPIE), no Rogério Araújo Mendonça ba Sekretariu Estadu Peskas.

“No âmbito das competências específicas que me são atribuídas, na qualidade de Presidente da República, para nomear, empossar e exonerar os membro do Governo, sob proposta do Primeiro – Ministro, nos termo da alinea h) do artigo 860 e do número 2 do artigo 106 da Constituição da República, informo que decidi nomear o Sr. Samuel Marcal para o cargo de Ministro de Planeamento e Investimento Estratégico,” esplika karta PR Lu – Olo ba Primeiru – Ministru Taur Matan Ruak ne’ebé Tempo Timor asesu.

“Mais informo que a cerimónia da tomada de posse Sr. Samuel Marcal bem como dos outros dois membros do Governo, já nomeados por mim, respectivamente, o Sr Alfredo Pires para o cargo de Ministro Petróleo e Recurso Minerais e o Sr. Rogério Araújo Mendonça para o cargo de Secretário de Estado das Pescas, tera lugar no Palácio Presidente Nicolau Lobato, no dia 16 de Agosto, às 10H30,” esplika karta PR Lu – Olo.

Tuir fontes Tempo Timor nian ne'ebé besik ba autoriedade judisiariu katak Samuel Marçal ne'e sai ona nu'udar arguidu ba kazu balun, maibé PR Lu - Olo nomeia nafatin nia ba troka Kay Rala Xanana Gusmão.

Entretantu, bazeia informasaun interna AMP nian katak iha posibilidade boot membru governu nain tolu ne’e sei la ba simu tomada posse ne’e, tanba seidauk iha solusaun final. (Oki) 

Last modified on
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

Website: www.tempotimor.com Email This email address is being protected from spambots. You need JavaScript enabled to view it.

@2018 - Tempo Timor. Developed by Kalohan.net

Top Desktop version