DILI – Governu konstitusional daualu ne’ebé lidera hosi Primeiru – Ministru, Taur Matan Ruak hasai ona desijaun final hodi adia tomada posse datolu ba membru governu nain tolu ne’ebé antes ne’e Prezidente Repúblika (PR), Francisco Guterres Lu – Olo desidi no nomeia.

Tuir karta ofisial hosi gabinete Primeiru – Ministru (PM) nian ho data 15 Agostu 2018 ne’ebé hato’o ba PR katak governu desidi adia tanba seidauk halo ajenda ba prosesu tomada posse membru governu nain tolu hanesan Alfredo Pires, Samuel Marcal no Rogério Araújo Mendonça, maibé karta ofisial ne’e mosu fallansu ida, tanba hakerek fali Manuel Marçal.

Karta ofisial ne’e mós katak pedidu ne’e nu’udar justifikasaun solidade ba membru governu nain sia sira seluk ne’ebé to’o oras ne’e seidauk simu posse.

Entretantu, partidu Aliansa Mudansa ba Progresu (AMP) haruka karta ofisial ida ba gabinete Primeiru – Ministru iha parte dadersan ho konteudu rejeita total desijaun no nomeasaun Prezidente Repúblika (PR), Francisco Guterres Lu – Olo nian atu fó tomada posse ba membru governu nain tolu. Hafoin ida ne’e, iha parte lorokraik, gabinete Primeiru – Ministru mós hasai kedas karta ofisial ida katak adia tomada posse ba membru governu nain tolu ne’e.

Antes ne’e PR Lu – Olo desidi ona katak sei fó posse ba membru governu nain tolu iha loron Kinta, 16 Agostu 2018 iha horas tuku 10:30 dadersan iha palásiu prezidensial Aitarak Laran (pr nomeia samuel maibé posibilidade amp rejeita).

Bazeia ba karta ofisial Prezidensia Repúblika ne’ebé hato’o ba xefe governu iha loron 13 Agostu foin lalais katak, PR Francisco Guterres prontu ona atu fó tomada posse ba membru governu nain tolu hanesan Alfredo Pires ba Ministru Petróleu no Rekursu Mineral (MPRM), Samuel Marçal ba Ministru Planeamentu no Investimentu Estratejiku (MPIE), no Rogério Araújo Mendonça ba Sekretariu Estadu Peskas. (Oki)