Iha fulan Abril tinan ne’e, Primeiru Ministru Taur Matan Ruak hasai despaisu ida hodi delega Vise Ministra Saúde Elia A.A. dos Reis Amaral ne’ebé mai husi CNRT atu ba partisipa iha reuniaun Organizasaun Mundial Saúde ne’ebé hala’o iha Jenebra hahu husi 20 Maiu 2019.

Ho despaisu ne’e, iha 17 Maiu 2019, Vise MS Elia ho komitiva dezloka ba Jenebra hodi partisipa iha enkontru Asembleia Mundial Saúde ba dala 72 ne’ebé partisipa husi Ministériu Saúde husi nasaun 194 ne’ebé sai nu’udar membru WHO.

Tuir orariu husi Minstériu Saúde, delegasaun Timor Leste ne’ebé xefia husi Vise MS Elia aranka ba Jenebra iha 17 Maiu no sei fila fali mai iha Timor Leste iha 28 Maiu 2019.

Maibé iha 25 Maiu 2019, Vise MS Elia telefone mai Diretór Aprovizionamentu no Diretór Finansas MS nian atu muda nia bilete aviaun nian atu nia bele halai fila uluk.

“Iha 25 Maiu kalan, Vise Elia ho nia asistente ho tan deputada ida to’o tiha ona iha Bali,” informa fonte husi MS ne’ebé lakohi públika nia identidade ba tempotimor.

Tuir informasaun ne’ebé fonte ne’e hetan, Vise MS Elia sei halimar iha Bali to’o 31 Maiu, maibe hafoin fila fali mai Timor Leste iha 29 Maiu.

Fonte ne’e dehan, Vise MS halo mudansa orariu serbisu no viajen sein koordena ho Ministru Saúde Interino Bonifacio Maucoli dos Reis.

“Loloos kuandu hakarak halo mudansa, nia tenke husu autorizasaun husi Ministru Interinu, tanba Vise Elia ba ne’e reprezenta Ministru Saúde, no mudansa sira ne’e iha implikasaun finanseira ba governu,” dehan fonte ne’e.

Iha fatin ketak, Ministru Saúde Interinu hatete katak nia delega duni Vise MS Elia hodi ba partisipa reuniaun Organizasaun Mundial Saúde (OMS) iha Jenebra, maibé Vise MS ne’e fila uluk.

“Ha’u delega nia ba partisipa iha reuniaun OMS iha Jenebra. Maibé nia halai tiha de’it husik diretór ida ho asesor mak partisipa, tanba reuniaun ohin mak finaliza. Nia mai pasiar tiha iha Denpasar (Bali),” dehan Ministru bainhira hetan konfirmasaun husi tempotimor.

Hahalok Vise MS ne’e hetan mós kritika husi membru PN no kuadru CNRT balun.

Kuadru CNRT ida lamenta ho atetude husi Vise MS ne’ebé la hatudu ninia responsabilidade iha eventu internasionál, sa tan nia ba lori governu no povu Timor Leste tomak nia naran.

Tuir membru PN no kuadru CNRT ne’e, hahalok Vise MS ne’e hatudu katak Xefe Governu la konsege kontrola nia membru sira.

“Vise Ministra ne’e nia hahalok at ne’e la’os foin dala ida. Uluk nia perna hatudu hahalok la respeitu ba Primeiru Ministru,” dehan fonte ne’e maibé la esplika detallu hahalok la respitu oinsa.

“Daudauk ne’e nia halo tan hahalok ne’ebé hamoe ita. Gasta osan estadu ba pasiar iha Bali,” dehan fonte ne’e.

Fonte ne’e husu atual Xefe Governu ne’ebé nu’udar eis Komandante F-FDTL mak koñesidu ho disiplina maka’as ne'e atu kontrola no kuda  disiplina iha membru governasaun Aliansa Mudansa ba Progresu (AMP).

Tan ne’e, nia husu ba PM Taur Matan Ruak atu labele “mamar” demais ba nia membru governu sira, liu-liu sira ne’ebé la hatudu respeita ba knar no fiar ne’ebé sira simu ona.

Entretantu, tempotimor koko haruka pergunta balun liu husi WhatsApp ba Vise Ministra Saúde atu konfirma kona-ba reuniaun iha Jenebra no tanba sa mak nia fila uluk, maibé maske iha sinal ne’ebé hatudu Vise MS ne’e lee ona mensajen refere, maibé nia la fó resposta.

Hanesan informasaun, AMS nu’udar reuniaun entre ministériu saúde husi nasaun ne’ebé sai membru WHO ne’ebé hala’o kada tinan iha Jenebra.

Ba tinan ida ne’e, AMS ne’ebé lidera husi Ministru Saúde Laos hodi troka MS Zimbawe, foti tema “Kobertura Universal Saúde: La Husik Ema Ida iha Kotuk” (Universal Health Coverage: Leaving No One Behind).