Arão agradese ba konfiansa husi lideransa partidu CNRT, PLP, no KHUNTU hodi fó oportunidade ba nia lidera PN.
Maske nune’e, Prezidente PN ne’e dehan, nia prontu atu hakiduk bainhira avaliasaun ne’ebé hala’o iha Konferensia AMP to’o iha konkluzaun katak ninia lideransa iha PN iha failansu.
"Ha'u hatene katak ha'u-nia kapasidade umanu laiha, maibé ha'u simu (atu lidera PN) no ha'u hala'o, mak iha faillansu (ha’u) prontu par submete ba krítika no sujestaun par ita hotu atu hadi’a. Mais se to'o konkluzaun katak ha'u tenke hakiduk, ha'u prontu iha kualker momentu. Ne'e mak kuadru husi partidu ida nian submete ba desizaun saida de’it," deklara Arão iha Konferensia AMP loron dahuluk iha Terra Santa, Dili, Domingu (16/06).
Kona-ba avaliasaun ne’ebé AMP halo, Arão dehan, avaliasaun ne’e nu’udar meius ida ne’ebé AMP foti hodi bele atinze objetivu ne’ebé iha durante tinan haat oin mai,.
"Atu atinji objetivu ne'ebé Aliansa Mudansa ba Progresu iha mak ita tenke iha avaliasaun firmeza iha oin atu nune'e oinsa ita bele atinji objetivu no metas sira ne'e. Ihat tinan haat mai tan, ita ba hamriik iha sira-nia oin ko'alia ema doko-ulun no simu ita tanba susesu. Mais la'os doku-ulun ba sorin-sorin hodi dehan ita-nia frakeza sira.”