"Enkontru ha'u ho Xefe Estadu, ami rona ona Xefe Estadu nia hanoin no intensaun ida mak ami lori ba atu bele tetu foti desizaun, tanba Xefe Kaza Militár dezde Koronél Renilde retira hosi Prezidensia Repúblika, fila-fali ba iha Kuartél Jenerál Forsa Armada nian, pozisaun ba Kaza Militár mamuk hela", dehan Coliati hafoin sorumutu ho PR Horta iha palasiu pezidensiál, sexta (18/11).
Normalmente nomeiasaun ba xefe kaza militár tenke koronél, maibé Koronél laiha, bele mós Tenente Koronél.
Maibé, felismente enkontru ona ho Xefe Estadu, fo ona ideia no opiniaun Xefe Estadu nian no sei aprezenta ba komandu Tenente Jenerál Falur Rate Laek no hamutuk ho Komodoru, sira nain-tolu (3) tuur hamutuk hafoin foti desizaun.
Tanba, to'o ohin loron sira seidauk iha desizaun hodi nomeia ofisiál ida ne'ebé atu mai troka fali pozisaun iha Xefe Kaza Militár ninian.
Alende ne’e, ohin mós mai reprezenta Xefe Estadu Maior FALINTIL-Forsa Defeza Timor-Leste (F-FDTL), Tenente Jenerál Falur Rate La'ek, mai atualiza atividade militár ba Xefe Estadu.
"Ha'u ohin reprezenta Tenente Jenerál Falur Rate Laek, tanba nia ba vizita iha Oé-Cusse ne'ebé delega hela ha'u mai hasoru Prezidente Repúblika, hodi aprezenta pontu situasaun ba Xefe Estadu relasióna ho atividade militár ninian", nia afirma.
Atividade sira ne'ebe aprezenta, kona-ba enseramentu ba kursu forsa espesiál iha Tasi-Tolu no mós ho atividade sira seluk ne'ebé hala'o iha teritóriu Timor laran.
Nune’e, Prezidente Repúblika, José Ramos Horta, hanesan Komandante Supremu apresia tebes ba atividade hotu ne'ebé militár sira hala'o no husu atu Komandu mantein dixiplina ba militár sira sira iha fatin hotu. (*)