"Ita nia hakarak, atu okupa rai atu halo obra Sidade universitáriu. Agora dadaun, distansia 86 hektares," dehan Longuinhos ba jornalista, hafoin partisipa diálogu entre Primeiru Ministru Taur Matan Ruak ho komunidade refere iha salaun Administrativu Munisípiu Aileu, Kinta (14/11/19).
Nia dehan, Governu iha hanoin atu hari Sidade Universitáriu iha Aileu ho razaun atu dezenvolve no hamenus estudante sira ba ensinu superior, ne'ebé tenke ba estudu iha Kapitál Dili. “I bele mós kria empregu ba joven sira iha Aileu,” Longuinhos hatete.
Governu, tuir MESSK ne'e, ba ho fuan no sentidu interese nasionál respeitu komunidade i entidade hotu-hotu atu halo kordenasaun ho komunidade.
“Tanba komunidade mak parte ida husi dezenvolvimentu. Entaun, presiza respeita povu nia direitu ba rai. Ida ne'e importante,” nia esplika.
Longuinhos relata, agora iha hela prosesu. Governu, nia dehan, ho fuan nafatin halo aproximasaun, husi loro ba loron. “Maibé, ita hotu tenke konsiente katak interese komun no nasionál importante liu,” nia hatete tan.