Komandante PNTL Munisípiu Aileu, Superintendente Xefe Jorge Monteiro hateten, hahú husi Janeiru to'o Outubru tinan ne'e ema na'in 11 mak lakon vida tanba suisídiu.
"Dadus husi Janeiru to'o agora ita rejista ema tara-aan hamutuk sanulu resin ida, ne'ebé kompostu husi feto na'in rua no mane na'in sia," Komandante ne'e koa’lia ba jornalista iha nia knaar fatin Aileu, Kinta (29/10).
Superintendente Xefe Jorge Monteiro hatetan, kazu kona-ba tara-aan ne'e autoridade seguransa suspeita katak iha asaun krimi ruma, entaun halo prosesu identifikasaun no prosesu investigasaun tuir prosedementu investigasaun polísia nian.
"Kuandu ita la suspeita, katak iha krimi ruma, maibé ema ne'e tara ann duni, normalmente ita entrega ba família hodi halo prosesu funebre. Maibé, keta haluha iha kazu tara-aan ne'e normalmente ami parte PNTL nian ba iha fatin akontesimentu hodi ba atende kazu sira ne'e nafatin ba ho parte médiku sira hodi halo kedas ezaminasaun iha terenu, antes ita deside hodi kontinua prosesu ka hodi entrega ba família," nia esplika.
