Pedro da Conceição Fernandes nu’udar komunidade afirma maske estrada liga ba sira-nia postu Remexio kotu ona, maibé governu seidauk ba verifika dadus ruma iha fatin ne'eba.
Tanba ne'e, husu ba governu liuhusi Ministériu Obras Públika (MOP) atubele tun ona oinsá mak bele buka solusaun.
"Dezastre Naturál ne'ebé mak akontese iha loron 4 fulan-abril 2021, to'o mai ohin loron 11 fulan-abril 2021, kompleta ona semana ida, maibé ami povu husi Posto Administrativo Remexio nia dalan ne'ebé mak hetan estragu totál seidauk hetan intervensaun emerjénsia ruma husi governu”, preokuasun hato'o liuhusi mídia sosial, domingu (11/04).
Povu Remexio oras ne'e, sente triste tebes ho governu ne’ebé seidauk tun ba observa kondisaun estrada no komunidade sira ne'ebé afetadu.
Husu governu atu labele halo deskriminasaun ba populasaun sira tanba Remexio besik hela ho Munisípiu Dili.
"Se ami povu, hanesan mós ho fatin sira seluk, tenke trata ami hanesan mós sira ne'ebé mak loroloron imi ba hamutuk ho sira ne'e, Remexio Posto ida ne'ebé mós besik liuba Munisípiu Dili”, dehan nia.
Rekomenda Ba governu atu buka lalais alternativu di'ak, nune'e bele ke'e dalan foun hodi fasilita komunidade Remexio halo movimentasaun hodi buka sira-nia moris sustenta nesesidade familia nian.(*)