Tempotimor(Dili)- Administradór postu Remexio, Jacinto Mendonça, ejize ba Ministériu Obras Públika atu rezolve lalais estrada diresaun ba postu Administrativu Remexio, Munisípiu Aileu ne’ebé kotu, tanba fó impaktu maka’as ba komunidade sira moras atu asesu ba tratamentu iha ospital.

Tanba udan boot iha loron 4 fulan-abril hakotu estrada liga ba Remexio hodi difikulta komunidade sira-nia movimentu.

“Dalan ne'ebé kotu fó impaktu maka'as ba saúde, liuliu inan feto sira atu partu ne'e nomós ba moras sira seluk tanba família sira hulan de’it husi vila mai to'o iha simpang tiga kuaze kilometru neen resin, depois karreta servisu saúde Munisípiu Aileu nian tula fali hodi transporta ba Dili”, dehan Jacinto Mendonça telefone, kuarta(28/04).

Ho nune'e sira preokupa tebes atu hadia lalais dalan refere tamba sira iha alternativu seluk kee ona dalan maibé so motorista mak bele liu ba mai no karreta labele.

“Kona-ba forsa ema nian ami koko hotu ona iha loron hirak liuba, maibé tanba forsa ema nia so bele ba de’it iha motorista mak bele liu, maibé dalan ba karreta ami labele halo buat ida”, dehan nia.

Entretantu Pedro da C. Fernandes nu'udar responsável ba Klibur Estudante Universitáriu Postu Administrativu Remexio (KEUPAR) mós ejize tebes ba Ministériu Obras Públika (MOP) no Instituisaun Jestaun Ekipamentu, institutu públiku (IJE,ip) atubele tau konsiderasaun sériu ba estrada refere.

"Presiza hadi'a lalais estrada ne'ebé kotu totál iha postu Remexio ne'e, atu nune'e ami komunidade sira bele asesu filafali dalan ne'e, nomós ba komunidade sira ne'ebé moras inklui inan isin-rua sira bele hetan lalais tratamentu ho di'ak liután”, afirma. (*)