Tempotimor (Lequidoe) – Loron rua ona Sekretáriu Estadu Kooperativa (SEKoop), Arsenio Pereira da Silva hamutuk ho komunidade Postu Administrativu Lequidoe, Munisípiu Aileu. Problema estrada sai problema importante ne'ebé komunidade sira keixa no hato'o ba SEKoop.

 

"Klaru katak, estrada rurál ne'e importante para halo konetividade husi suku ida ba suku seluk. Inklui atu fasilita ita-nia komunidade sira lori sira nia produtu ba merkadu iha sidade. Entaun liuhusi media bele hafanu governante sira, para bele tau iha planu," dehan Sekretáriu Estadu Kooperativa (SEKoop), Arsenio Pereira da Silva bainhira sorumutu ho komunidade Suku Faturilau, Kinta (22/08/19).

 

Entretantu, Xefe Suku Faturilau Albano Amaral sente triste tanba dalan ne'ebé liga ba Suku Faturilau difikulta no sai amesa ba komunidade sira. "Ami difikulta ba estrada. Liuliu ba ita nia inan feton sira ne'ebé pasiensia balun partus de'it iha dalan, tanba kestaun estrada. Estrada ladiak," haktuir Albano.

 

Alende ne'e, komunidade suku Namolesso, Augosto Mendes espresa mós nia sentimentu triste ba tempotimor.com katak, estrada mak difikulta tebes komunidade sira hodi lori produtu ba merkadu. Maski produtu iha Postu Lequidoe barak.

 

Iha fatin hanesan, Xefe Suku Namolesso Celestino Coli katak, proposta estrada nian autoridade lokál sira hato'o ona ba parte autoridade munisípiu no nasionál. Maibé, seidauk iha rezultadu.

 

"Ami nia proposta, iha tinan kotuk ami hato'o ona ba autoridade munisípiu Aileu nian. Inklui autoridade nasionál. Maibé, resposta mak dehan buat hotu la'o tuir nia prosedimentu. Entaun ami hein de'it, bainhira mak to'o mai. Mak ne'e duni ona," xefe suku ne'e hatete.

 

Observasaun tempotimor.com iha terenu katak, bainhira SEKoop hala'o vizita ba komunidade sira nia to'os, estrada ne'ebé liga ba suku sira iha Postu Lequidoe nakonu ho rai rahun.