Xefe Suku Mulo José Florindo Andrade hatete, komunidade sira iha suku ne’e enfrenta problema atu asesu bee-moos, eletrisidade no laiha kondisaun estrada ne’ebé di’ak ba sira atu bele halo movimentu no lori sira-nia produtu ba merkadu.
Tuir nia, maske nia parte hato’o ona kestaun ne’e ba autoridade munisipiu no to’o mós nasional, maibé to’o ohin seidauk iha resposta pozitivu.
"Ami rekomenda bebeik ona, mais to’o agora ministru mós taka tilun, nunka rona ami-nia lian. Mai enkontru bebeik ami hato'o, mais to’o agora nunka informasaun ruma mak ami rona," dehan José iha aldeia Tatiri, Suku Mulo, Kuarta (16/9).
Nia dehan, iha aldeia rua iha Suku Mulo, aldeia Tatiri no Belehetu hetan difikuldade boot atu asesu bee-moos tanba sira iha liu area rural.
Kona-ba eletrisidade, nia dehan, iha aldeia balun ne’ebé hetan ona, maibé aldeia seluk seidauk konsege asesu.
Kona-ba estrada, nia hatete, estrada nasional nian ne’ebé liga ba munisipiu ho kondisaun ne’ebé di’ak, maibé tama fali ba suku no aldeia, ninia kondisaun aat tebes.
"Husi Prezidenti Repúblika, Primeiru Ministru hira mak promete to’o agora nafatin," dehan José.
Entertantu, Suku Mulo kompostu husi 8 mak hanesan aldeia Mulo, Tatiri, Ha’utio, Aitutu, Manumera, Maulahulu, Kheiluru no Blehetu.
Suku ne’e ho total uma-kain 270 ho total populasaun 3.000 resin.