Deklarasaun hirak ne'e hato'o husi Xefe grupu agrikultura sira bainhira simu prezensa Sekretáriu Estadu Elizário iha postu admistrativu Hatu'udu, Munisípiu Ainaro.

"Ne'e hanesan motivasaun ba ami, ba oin ami sei kontinua lori hakat ba oin labele para iha ne'e," dehan Xefi grupu Judas Aderito da Costa Moniz iha Aldeia Dausua Suku Loilima, Sesta (18/9).

Nune'e hateten sei transforma aan sai nu'udar grupu Koperativa nune'e ba oin bele kolabora diak liu tan entre grupu no bele hetan formasaun no dalan atu asesu na merkadu.

"Dadaun ne'e ami tau hamutuk kbiit esforsu lao hamutuk hodi hakat ba koperativa," dehan Aderito.

Antes ne'e, grupu Judas hanesan grupu horti agrikultura ne'ebé produs modo maibe defikuldade ne'ebé sira iha mak laiha asesu na merkadu no dalaruma laiha fundus no ekipamentu agrikultura.

Iha fatin seluk, Xefi grupu Haburas Foho Ai-liku Juvinal da Costa hateten produtu ne'ebé durante grupu ne'e harii mak halo to'os, hakiak animal hanesan Karau maibe hasoru difikuldade asesu ba merkadu.

Nune'e nia parte hato'o agradese no senti urgullu ho prezensa hodi hare'e dereita produtu no aktividade husi grupu Haburas Foho Ai-liku.

"Ami hato'o ba SeKoop katak bainhira ami halo to'os presija mos iha merkadu, ami presija mos iha tekniku oinsa atu kuda produtu sira nune'e Sua selensia sekretariu estadu fo ajuda oinsa atu ami hatene hakiak no fo bokur karau," dehan Juvinal iha Aldeia Ainaro Kiik Suku Foho-Ailiku.

Nune'e Sekretáriu estadu kooperativa Elizário Ferreira fo mos motivasaun ba grupu sira atu hahu esforsu aan kria produtu ne'ebé ho kuantidade boot no transforma aan sai koperativa multi sektor.

Elizário mos akresenta relasiona ho merkadu, iha tempu besik nia parte sei halo kontaktu ho grupu tomak ne'ebé mak produs Ai-han atu perpara hahan ne'ebé barak too toneladas hodi SeKoop sei sosa atu distribui ba povu.

Enkuantu SeKoop mos sei halo treinamentu ba grupu sira relasiona ho programa husi SeKoop nian kona ba edukasaun, kuinesementu, kapasitasaun no informasaun importante mak tuir SeKoop husu atu grupu sira hotu presija nakfilak aan ba kooperativa hodi bele koordena hodi  dezenvolve aan diak liu tan.