Diretór Servisu Saúde Munisípiu Baukau, Leonel Guterres hateten, estudante mane na’in rua husi Munisípiu Baukau ne'ebé mai husi Indonézia iha loron 8 Marsu 2020, sira na’in rua hala'o auto kuarentena iha uma hodi pesoál saúde sira halo observasaun, nune’e to’o 23 Abríl kompleta ona loron 14.
"Estudante na’in rua ne'e mai iha loron 8 fulan-Marsu, maibé la mai aprezenta-aan, kebetulan kolega sira ne'ebé mai ikus tama auto kuarentena simu sertifikadu maka sira na’in rua foin mai aprezenta-aan mak ami aumenta tan sira na’in rua ba loron 14 ne’ebé aban sira na’in rua hotu ona", dehan nia, via telefone, Kuarta (22/4).
Diretór ne'e esplika, estudante mane na’in rua ne'e mai Timor-Leste seidauk implementa kuarentena, entaun depois sira mai liu tiha mak hafoin hamosu kuarentena. Tanba ne'e, hatama fali sira na’in rua iha auto kuarentena iha loron 9 fulan-Abríl hodi kumpre loron 14 iha kuarentena.
Alende ne'e, nia dehan, iha estudante na'in tolu kompostu feto ida no mane rua, mai husi Indonézia ba liu iha Postu Aministrativu Baguia, entaun parte saúde sira hetan informasaun no ba halo kedas kontrola direta sira iha Baguia no sira daudaun ho kondisaun estavel hotu. (*)