Print this page

Saudozu Daitula Nia Maun Fila Hikas ba Maromak Featured

Atual PM Taur Matan Ruak (Liman Los) ho oin midar lolon liman ba saudozu Francisco Loi Kati ne'ebe hatais jaket metan (Karuk) Atual PM Taur Matan Ruak (Liman Los) ho oin midar lolon liman ba saudozu Francisco Loi Kati ne'ebe hatais jaket metan (Karuk)

Tempotimor (DILI) Notisia triste falun veteranus no Timor-oan tomak. Veteranu ida, Francisco Freitas, ne’ebé mós nu’udar maun rasik husi saudozu David Alex Daitula, fila hikas ba Aman Maromak nia kadunan iha Tersa (25/06) iha Buibau, Postu Administrativu Baukau Villa, Munisipiu Baukau.

Iha tinan 22 liu ba, iha loron ne’ebé hanesan no fulan ne’ebé hanesan, 25 Juñu 1997, Saudozu nia alin mane David Alex Daitula hetan tiru husi Tentara Nasional Indonesia (TNI) no ikus mai lakon. Iha 25 Juñu 2019 meiudia, Saudozu mós lakon nia vida tanba moras.

Saudozu Francisco Freitas ka koñesidu ho naran Loi Kati hahú envolve an iha luta ba libertasaun nasionál iha 1975 nu’udar asistente zona. Serbisu ida ne’e Saudozu hala’o to’o tinan 1979.

Hahú iha 1979, Saudozu Loi Kati hetan fiar hodi assume kargu nu’udar responsavel ba kaixa Komando Luta ho naran “Uluk Kedas” ne’ebé ikus mai muda ba naran “Caixa Male-Male” ba Maun Boot Xanana Gusmão nian ba li’ur.

Durante periodu defisil nia laran, Saudozu Loi Kati hatudu nafatin ninia domin ba rai no povu ida ne’e. Firme iha pozisaun “mate ka moris, ukun rasik aan”.

Ida ne’e bele prova liu husi Saudozu nia knar hahú husi tinan 1975 to’o 1999.

“Pai Jiboy durante funu nia dedika vida ba funu liu-liu fó tulun ba ninia maun-alin gerilleiru sira iha ai-laran nu’udar responsavel Caixa postal. Uma ne’ebé nia ho familia hela ba hanesan Caixa postal permanente. Tempu la di’ak atu hasoru ho nia iha uma, ami husik hela surat iha Caixa Postal atu informa katak ami Frente Armada iha sira-nia zona,” veteranu ida, Custodio Belo “Jaids Blayck” fó sasin kona-ba Saudozu Loi Kati.

Sakrifisiu lubuk mak Saudozu ne’e oferese ona, la’os de’it sakrifika nia vida tomak ba luta maibé mós nia familia lubuk ida mak mate ba funu ida ne’e. 

Iha tinan 1983 bainhira Saudozu Loi Kati hetan kapturasaun no hela iha prizaun to’o tinan 1986, nia espiritu luta nian nunka mihis maibé sai boot liu tan.

“Pai (Loi Kati) nia serbisu ba funu ha’u bele dehan laiha interrrupsaun. Razaun, nia iha kadeia laran maibé ninia kaben halo ligasaun metin ho ami Frente Armada, serbisu ba exterior la’o nafatin, normal,” sasin husi Jaids Blayck.

 

Biografia Badak Saudozu Loi Kati

Saudozu Loi Kati moris iha Osso-Messa, Bualale, Postu Administrativu Kelikai, Munisipiu Baukau iha 15 Jullu 1933.

Iha tinan 1975 to’o tinan 1978, Saudozu Loi Kati hala’o serbisu ba funu libertasaun nasionál nian nu’udar Asistente Zona.

Iha tinan 1979 to’o 1981, Saudozu hala’o serbisu nu’udar Responsavel Kaixa OD/Miplin.

Iha tinan 1981 to’o 1983, Saudozu hala’o serbisu nu’udar Responsavel Kaixa CRRN/Frente Klandestina.

Iha tinan 1983, Saudozu hetan kapturasaun no tama iha prizaun, hafoin hetan liberdade iha tinan 1986.

Hafoin livre, iha tinan 1986, Saudozu kontinua kedan ninia serbisu nu’udar Responsavel Kaixa CRRN/Frente Klandestina.

Iha tinan 1987 to’o 1992, Saudozu hala’o serbisu nu’udar Responsavel Kaixa CNRM/Frente Klandestina.

Iha tinan 1993 to’o 1996, Saudozu hala’o serbisu nu’udar Responsavel Kaixa CNRM/Frente Klandestina.

Iha tinan 1998 to’o 1999, Saudozu hala’o serbisu nu’udar Responsavel Kaixa CNRT/Frente Politika Interna.

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items