Tanba ekipa Programa Nasionál ba Dezenvolvimentu Suku (PNDS) hamutuk ho ekipa Uma ba Kbiit Laek (UKL) sukat ona uma tolu ne'ebé sai vensedór iha aldeia Lesupu, suku Purugua.

Julião Talo nu’udar benefisiáriu no sai manán na'in ba programa Uma ba Kbiit Laek iha aldeia Lesupu sente kontente tanba nia-uma mós governu selesiona husi uma hotu ne'ebé iha suku Purugua.

"Ha'u kontente tebes, entaun hakarak agradese ba governu liuhusi autoridade sira iha aldeia, suku, postu to'o Munisípiu, tanba bele apoiu mai ha'u liuhusi halo selesaun ba ha'u-nia uma, tanba ne'e obrigadu barak ba nai-ulun sira. Maske uma sedauk halo, maibé nia rezultadu iha ona tanba ohin sukat ona. Entaun ha'u laiha buat ida atu fó ba imi maibé ha'u só orasaun de'it”, afirma idozu Julião ho lian kemak ba jornalista www.tempotimor.com iha nia rezidénsia Lesupu, kinta (18/03).

Diretór PNDS munisípiu Bobonaru, Paulino Viegas Tilman hatete, ekipa mai sukuat uma benefisiáriu ne'ebé hetan ona selesaun husi governu atu hetan apoiu.

"Ohin ami mai sukat uma sira ne'ebé hetan ona selesaun atu bele hatene rai ne'e nia médida, atu nune'e bele hatene uma ne'e iha tipu ida ka rua, para oinsá atu implementa. Tanba ne'e mak presiza enjiñeiru sira halo analiza iha terenu diretamente, nune'e dadus atuál ba kondisaun rai para dezemvolve dezeñu uma nian”, dehan nia.

Atividade importante tolu husi PNDS mak hanesan atividade regular PNDS nian, halo reabilitasaun ba sede suku sira iha Timor-Leste no programa foun seluk mak halo uma ba kbiit laek sira, ne'ebé dekretu lei nú. 29/2021.

Tanba, suku iha munisípiu Bobonaru hamutuk 50, nune'e governu sei hari’i uma kbiit laek hamutuk 150.

"Kailaku iha suku ualu, entaun husi suku ualu ne'e iha aldeia ualu ne'ebé governu selesiona katak, kada aldeia ida governu selesiona uma tolu, nune'e iha munisípiu Bobonaru tomak hamutuk suku 50, entaun governu sei estabelese uma 150 ba kbi’it laek sira iha tinan 2021”, katak nia.

Xefe suku Purugua Claudio Bere Pelu dehan programa husi PNDS di'ak, tanba ne'e husu ba governu kontinua programa refere.

"Ha'u sente programa ne'e di'ak tebes, tanba dadaun ne'e komesa la'o, entaun hanesan autoridade lokál sujere ba governu resiza tebes iha kontinuidade ba programa refere, atu nune'e hadi'ak liután iha futuru para komunidade sira bele sente programa ne'e nia benefísiu”, afirma xefe suku ne'e.(*)