Maske governu iha planu hodi estabelse merkadu munisípiu nian, maibé realidade merkadu munisipál Bobonaru iha Maumali abandonadu besik tinan rua ona, nune'e komunidade sira hahú halo negósiu maske governu seidauk inagura merkadu refere.

Xefe Suku Ritabou Maximiano do Santos Araújo hatete, merkadu Maumali ne'e abandona besik tinan rua ona, maibé governu seidauk iha planu atu inaugura merkadu refere, nune'e parte balun hahú aat ona.

“Mais hanesan semana ida ka rua ona ita-nia komunidade sira hola parte de suku ida ne’e liuliu iha konsiénsia rasik lori sira-nia produtu ba fa’an iha ne’eba, tanba Merkadu ne'e munisípiu nian, maibé governu seidauk iha interese hodi tau matan kona-ba ida ne'e, entaun komunidade sira iha suku Ritabou liuliu aldeia Samelaun ho Diuru-Aben organiza malu hodi fa’an ona sasán, entaun parte ida atu fanu estadu oinsá inaugura lalais merkadu refere”, dehan Xefe Suku Maximiano ba www.tempotimor.com iha sede Suku Ritabou, tersa (23/03).

Maibé, iha semana kotuk parte autoriedade munisípiu, postu inklui suku nian mai haree ona hodi tau ajenda atu inaugura ba tempu badak, maibé to'o agora seidauk iha informasaun ruma.

Autoridade lokál ne'e mós husu ba governu atu ko'alia lalais ho kompaña Biasale, nune'e bele realiza inaugurasaun ne'e ho di'ak.

Iha fatin hanesan komunidade, Marçal de Oliveira Moniz, ne'ebé hela viziñu ho merkadu abandonadu ne'e hatete, konstrusaun ba metkadu ne'e hahú tinan 2017 no finaliza iha tinan 2019, maibé to'o agora seidauk inaugura.

"Ha'u hela besik iha ne'e, maibé sente triste tanba komunidade sira seluk laiha konsiénsia entaun estraga sasán sira, pinta arbiru no merkadu ne'e sai fali fatin ne’ebé la marese atu feto ho mane mai tuur iha ne'ebá, tanba ne'e la'ós jardin”, dehan nia.

Komunidade ne'e afirma, merkadu ne’e konstroi lori povu nia osan, maibé husik de'it, entaun la sente furak tanba abandona hanesan no komunidade organiza malu hodi fa’an sasán, maske hola-na'in sira menus.

"Ami rasik organiza malu hodi mai fa’an sasán iha ne'e, hodi ita haree to'ok governu fihir ita ka lae, realidade sira husi munisípiu mak mai haree, maibé ami hakarak husi nasionál mak mai haree, maibé di'ak liu Ministru Administrasaun Estatál (MAE) mak mai haree rasik”, afirma nia.

Ba konstrusaun merkadu foun ne'e atu muda fali merkadu antigu mai iha ne'e, maibé to'o agora seidauk inaugura.

Entretantu informasaun ne'ebé www.tempotimor.com rekolla katak, konstrusaun ba merkadu ne'e ho totál orsamentu rihun US$479,000.00, maibé governu seidauk halo pagamentu kompletu ba kompaña Biasale ka seidauk selu 10%, entaun kompaña mós seidauk seluk badaen sira ne'ebé durante ne'e servisu hodi konstroi merkadu foun ne'e. (*)