Tuir xefe suku Debos, Agostinho da Silva (57) katak, estadu deside estende estadu emerjénsia ba dasanulu, maibé komunidade iha parte fronteira mak sai vítima tanba la hetan osan.

"Sira ida boot ne'e fulan-fulan hetan osan, maibé komunidade sira loron mak uza liman-fuan sanulu ne'e ba buka, maske araska loos, depois agora anin no ular estraga tan komunidade nia batar iha to'os laran, agora fos iha merkadu mós folin sa'e, ne'e komunidade sira bele mate hamlaha," dehan Agostinho ba www.tempotimor.com iha nia knaar fatin, Tersa (9/2).

Autoriedade lokál ne'e mós akresenta, fos uluk ne'e kilograma 20 folin dollar $12, maibé agora folin sa'e ona ba dollar $13, depois ida kilograma 30 ne'e balun sa'e ona ba dollar $16.

"Uluk fos dollar $12 nian ne'e agora sa'e tiha ona ba dollar $13, Fos ida folin $13 nian sa'e ona ba dollar $15, entaun komunidade sira komesa sosa atu araska, tanba fos folin sa'e hanesan ne'e, komunidade sira atu foti osan iha ne'ebé?," katak Nia.

Nia afirma, komunidade ne'ebé halo to'os no natar, inklui sira ne'ebé halo fila-liman kiik-oan sira ne'e, sei susar atu hola kotu fos.

"Liu-liu komunidade ne'ebé fila-liman iha merkadu hanesan fa'an bua ho malus no modo, loron ida sira nia osan la tama, entaun fos saku ida nian ne'e araska tebes," Katak Nia.

Lidér lokál ne'e mós husu ba govenu relevante karik bele hatun fos nia folin ne'e hanesan loron bai-bain, tanba komunidade sira ne'ebé iha fronteira hanesan postu administrativu Fatululik, Fatumea, Tilomar no Maucatar sai vítima.(*)