Asaun UPF nian hodi halo atividade pasa revista kona-ba kartaun identidade sidadaun sira nian, nune'e prevene ema tama ho ilegalmente.
Relasiona ho atividade ne'e, Administradór Munisípiu Covalima, Afonso Nogueira Nahak husu ba komunidade sira ne'ebé hela besik iha liña fronteira, atu lalika hakfodak ho servisu polísia nian, tanba ne'e nu'udár meiu ida atu prevene Surtu Covid-19 labele da'et mai Timor-Leste.
"Husu ba komunidade sira labele hakfodak, labele pániku, hotu-hotu kalma, ita nia forsa ho polísia sira halo passa revísta iha ita nia estrada ne'e, buat ida normal, atu hodi asegura buat ida katak atu hametin ita-nia unidade hodi halo prevensaun Covid-19 iha ita nia munisípiu Covalima ida ne'e," hatete Afonso ba www.tempotimor.com iha nia knaar fatin, Administrasaun Munisípiu Covalima, Horseik (9/2).
Nia mós husu ba komudade sira atu labele tama-sai bei-beik iha fronteira ho ilegál, liu-liu iha situasaun ne'ebé mundu infrenta hela surtu Covid-19, maibé hotu-hotu hakmatek iha ida-idak nia fatin.
"Husu ba família sira iha rai liur, iha rai Atambua no Nusa Tengara Timur (NTT), la presíja mai, agora la presilíja mai. Ita iha ne'e mós la presíja atu ba, hotu-hotu tenke hakmatek iha fatin atu, nune'e ita bele trava Covid-19 iha Ita-nia rain, sé lae, ita maka sei susar. Tanba ida ne'e maka horseik mós ami fò hanoin ba komunidade sira ne'ebé besik liu liña fronteira, katak imi labele ba sorin, i sira sorin mós labele mai," dehan nian.
Administradór ne'e mós alerta ba komunidade sira atu labele halo to'os besik liu ba liña fronteira nian, maibé tenke fó distánsia liu kilomentru ida mai laran, mak foin bele halo to'os tanba, iha poténsia boot teb-tebes ba ema atu tama ilegál.
Nia apela ba komunidade tomak iha munisìpiu Covalima tenke hamutuk, neon ida, hanoin ida hodi halo prevensaun Covid-19 iha sira-nia munisípiu Covalima.
"Ita moris iha liña fronteira, ema barak dehan ita rísku boot ba Covid-19 ida ne'e. Tanba ida ne'e maka ema hotu- hotu husi nasionál mai to'o iha baze, katak tenke hamutuk hodi kombate Covid-19," Nia hakotu.(*)