Tuir Komandante PNTL munisípiu Covalima, Superentendente António Maria de Sá katak, la'ós halo pasa revista ba kartaun eleitorál de'it, maibé kontinua halo partollamentu hodi prevene no detekta transmisaun lokál husi Covid-19 iha fronteira postu administrativo Fatululik, Fatumea, Tilomar no Maucatar.
"Komando PNTL nia orientasaun klaru ona ba komunidade sira, ba aktividades chek point ita hala'o nafatin hodi passa revista ba kartaun identidade sira, faze sosializasaun ita hala'o tiha ona husi faze primeiru Covid-19,ita halo sensiblizasaun nafatin ba komunidde sira, la'o karik tenke lori kartaun eleitorál, para evita ultrapassa vizilánsia seguransa nian," dehan Superentendente António ba www.tempotimor.com iha nia knaar fatin, Kuarta (17/2).
Komandante PNTL ne'e mós apela ba Komunidde hotu ne'ebé hakarak la'o ba mai iha munisípiu laran hahú ohin ba oin tenke lori kartaun eletorál, entaun ba sidadaun ne'ebè laiha kartaun eleitorál no la kumpri mós protokolu husi Ministériu saúde, maka PNTL sei kaptura no halo detensaun iha sela.
"Komesa dia 15 lockdown komesa hahú no pasa revista mós hahú pontu entrada iha Munisipiu Covalima ba to'o baliza Bobonaru no munisípiu Ainaro, ne'ebé timoroan liu-liu Covalima oan sira la'o tenke lori kartaun eleitorál, maibé se la lori, maka ami deskonfia nia ne'e ilegál no ami sei kaptura entrega ba ekipa médiku sira, hodi ba hatama iha karantina, depois mak ami husu tuir, ema ne'e ita nian ka ilegál," dehan Nia.
Entertantu atu prevene transmisaun lokál ba moras pandemia Covid-19, PNTL aumenta frekuénsia passa revista iha área fronteira entre munisípiu Covalima, Ainaru no Bobonaru inklui iha area frontera sira.(*)