Tempotimor (Covalima)- Maske governu Timor-Leste liuhusi Ministériu Saúde no Sentru Integradu Jestaun Krize (CIGC, sigla portugés) halo esforsu hodi trava transmisaun lokál Covid-19, iha Timor Leste, maibé deskonfia katak, hahú iha ona Covid-19 konsege invade ona iha komundade sira nia le'et iha Munisípiu Covalima ne'ebe besik liu fronteira ho Indonezia.
Tuir informasaun ne’ebé fo sai husi SS-SIJK katak, ohin Ekipa husi Ministériu Saúde (MS) rejista tan kazu foun haat, iha Covalima, ne’ebé deskonfia mosu ona transmisaun lokál, iha suku no aldeia sira ne’ebé lokaliza iha Postu-Administrativu Fatumea Munisípiu Covalima.
"Kazu konfirmadu foun 4, sira hotu husi Aldeia Klauhalek, Suku Belulik Leten, Postu Administrativu Fatumean, Munisipiu Kovalima," dehan iha komunikadu ne'e fo sai husi SIJK, Tersa (23/2).
Liu tan Komunikadu ne'e infoma Ekipa vijiánsia epidemiolójika ho ekipa laboratóriu, nafatin buka tuir kontaktu sira hodi halo análize ba sira nia amostra.
"Kazu sira iha leten hatudu transmisaun lokal husi possivelmente kazu ‘’importadu klandestinamente’’ husi populasaun ne’ebé tama sai fronteira," relata iha Komunikadu refere.
Liga ho situasaun ne’e, antes ne'e, iha semana kotuk, Doutór Rui Maria de Araújo mós alerta ona katak, bainhira iha ona transmisaun lokál ka komunitária iha munisípiu Covalima, Bobonaro no RAEOA, mak sei aplika Serka Sanitária ida ne'ebé rigór, nune’e komunidade hotu labele sai husi uma. Únika pesoál servisu liña frente mak sei bele sirkula, hodi kombate virus refere.
Relasiona ho kazu foun ne'e, mak hodi lori kazu komulativu konfirmadu atinje ona ba 107, tanba deskondia MS rejista tan kazu foun haat husi komunidade lokál, nune’e sira ne’ebé sei hein rezultadu hamutuk 168, no pasiente sira ne’ebé dadaun ne’e baixa iha izolamentu hamutuk 25.(*)