Haree ba situasaun ne’e, halo komunidade iha suku Belulik leten, aldeia Clau-Halek Postu administrativu Fatumean, Munisípiu Covalima tauk, tanba to’o agora ambulánsia husi nasionál seidauk ba tula pasiente sira ne’e.
Tuir Xefe suku Belulik Leten, Quintino Amaral katak, kazu pozitivu na'in 4, aumenta tan ona na'in rua ne'e posibilidade, maibé sidauk bele anunsiu, hein de'it rezultadu husi konferensia nasionál ne'ebé sei fo sai iha Sentru Integradu Jestaun Krizi (SIJK).
"Komunidade komfirmadu ba Covid-19 na'in 4, ne'e hatudu teste hodibainrua kedas, maibé tuir ami hatene horseik dadersan mak rona informasaun ida ne'e, maibé agora dadauk parte relevante sidauk foti medida ruma, komfirmadu hirak ne'ebé mak iha ida-idak hela iha sira nia uma, ne'ebé ami mos agora preokupa hela", Nia informa ba Tempotimor via telefone, kuarta (24/02/21).
Nia afirma, Kazu komfirmadu na'in 4 ne'e to'o agora sidauk submete ba izolamentala, abandona hela, ne'e risku ba komunidade, pior liu tan hela hamutuk ho familia.
"Rona husi parte saúde horseik aranka ona husi Dili mia, maibé liu tiha ona 24 oras mais sidauk to'o", Nia relata
Tuir informasaun ne'ebé kazu pozitivu Covid-19 iha Munisípiu Covalima aumenta tan na'in rua hodi sa'e ba 6 ne'e, parte xefe suku labele fo sai uluk, tanba nia la'os profisionál saúde.
"Ne'e hau sidauk bele fo sai, tanba hau la'os teknika, ne'e bazeia ba orsida karik konferensia nasionál mak bele fo sai, na'in 4 aumenta tan rua ne'e posibilidade, maibé sidauk anunsiu", dehan Nia
Entretantu, tuir informasaun ne’ebé www.tempotimor.com asesu katak, dadaun ne’e pasiente ne’ebé pozitivu ba Covid-19 iha Fatumean la’ós na’in haat de’it, maibé sa’e ona ba na’in neen.(*)