Tuir Portavoz Sala Situasaun Sentru Integradu Jestaun Krize (SS-SIJK) Rui Maria de Araújo, kazu pozitivu na'in haat iha suku Belulik ne'ebé aumenta ona ba na'in neen, mak ekipa ambulánsia ohin meudia to'o iha Fatumea no evakua mai farun izolamentu iha Vera Cruz.
"Kazu sira konfirmadu foun husi horisehik to'o ohin iha Fatumea, nafatin hatudu katak iha ona transmisaun lokal husi posivelmente kazu importadu klandestinamente husi populasaun ne'ebé tama no sai fronteira maibé sei restritu iha agrupamentu ida iha suku Belulik Leten", dehan Rui liuhusi konferénsia imprensa iha Sentru Konvensaun Dili (CCD), Kuarta (24/2).
Nia afirma, ekipa vizilánsia epidemiolójika ho ekipa laboratóriu hamutuk ho ekipa Sentru Saúde Fatumea, kontinua foti amostra husi ema ne'ebé iha kontaktu besik ho abitante mak konfirmadu ona pozitivu Covid-19.
"Husi sira na'in 6, balun asintomátiku, balun iha síntoma infesaun respiratóriu agudu, maibé sira hotu iha kondisaun estável no horsida kalan to'o ona iha Vera Cruz," katak eis PM ne'e.
Portavóz ne'e mós apela ba komunidade iha Fatumea atu labele pániku, maibé tuur hakmatek iha ida-idak nia fatin inklui sira ne'ebé hela besik fronteira labele ultrapasa fronteira, tanba iha Indonézia iha hela transmisaun lokál.(*)