Tuir Portavós Sala Situasaun Sentru Integradu Jestaun Krize (SS-SIJK) Doutór Rui Maria de Araújo katak, horseik ekipa saúde rekolla totál amostra 90 husi fatin haat hanesan aldeia Klauhalek, aldeia Belulik Kraik husi postu administrativu Fatumea, inklui aldeia Onu-Laran, Suku Maudemu, Postu Tilomar nomós iha Suai vila.

"Amostra hirak ne’e seidauk halo hotu análiza, maibé iha amostra 47 ne’ebé halo ona análize laboratóriu, iha tan kazu konfirmadu na’in rua. Kazu konfirmadu na’in rua ne’e, ema família uma-laran husi estensionista," dehan Rui liuhusi konferénsia imprensa, Ohin (28/2).

Nia afirma, kazu pozitivu rua ne'ebé parte ekipa vizilánsia sentinela detekta iha Onu-Laran, na'in ida estudante ne'ebé pelumenus tinan 10.

"Informa ba públiku tomak katak, husi kazu konfirmadu foun ne’ebé ohin anunsía nee, iha estudante klase lima ida, iha eskola Bázika Sentrál Salele, postu Tilomar ho idade maizumenos tinan sanulu," Dehan Rui.

Nia hatutan, ekipa saúde nian kontinua kordena ho autoridade relevante sira, hodi buka tuir alunu sira seluk ne'ebé sala ida ho estudante refere.

Portavóz ne'e mós apela ba inan-aman estudante nomós profesór sira iha EBC Salele atu kalma, labele pániku no kolabora ho ekipa saúde nian, hodi foti amostra husi profesora da turma no kolega sira.(*)