Tuir Administradór Munisípiu Covalima Afonso Nogueira Nahak katak, informasaun ne'ebé parte autoridade simu husi CLN iha enkontru katak, intervensaun CLN nian ba merkadu Covalima maski liu husi kompañia lokál maibé tenke fa'an foos ho presu kada saka dolár $12 ho kilogram 25.

"Husi CLN atu distribui foos mai munisípiu Covalima, ne'ebé sei identifika kompañia rua iha ne’e hodi simu foos iha fronteira,” Dehan Administradór Afosno ba www.tempotimor.com iha salaun Administradór munisípiu Covalima, Tersa (2/3).

Iha fatin hanesan, pontu fokál ba servisu komérsiu indústria iha Covalima, Alberto Ferreira Vicente hateten, intervensaun CLN mai Munisípiu Covalima bazeia ba númeru xefe família iha Covalima no presu foos nian iha postu hotu-hotu hanesan.

"Foos ne'ebé CLN prepara la siginfika fahe gratuita ba komunidade sira, maibé atu halo intervensaun ba merkadu para normaliza foos nia folin iha merkadu Suai, ne’ebé iha tempu badak sei realiza,” katak Alberto.

Entertantu, Ministériu Turizmu Komérsiu no Indústria (MTKI) indika ona kompañia Arumi no Goronto atu simu fos iha fronteira entre munisípiu Covalima ho Ainaru hodi halo intervensaun iha merkadu Covalima.(*)