Diretór Eskola Eskola Sekundária Jerál númeru 01 Suai, Francelino Freitas hatete, prosesu aprendizajen hahú fali ona, maibé estudante balun ne'ebé sei iha postu administrativu Fatumea sei iha toleránsia tanba postu refere sei iha serka sanitária.
"Aula presensiál ne'e hahú ona eceptu estudante ne'ebé iha Fatumea mak sei tolera tanba sei iha serka sanitária entaun eskola la tau falta mezmu la tama eskola," dehan nia ba www.tempotimor.com iha nia kna'ar fatin, tersa (16/03).
Iha prosesu aprendizajen hahú ona, tanba ne'e profesór no estudante sira tenke kumpri protokolu husi Ministériu Saúde (MS) no Organizasaun Mundiál ba Saúde (OMS).
"Ami profesór no estudante sira hotu nafatin kumpri OMS no MS nian, nune'e bele prevene moras aat ida ne'e. Agora totál estudante ne'ebé sei iha foho ami seidauk iha dadus, tanba eskola horseik no ohin mak foin hahú”, informa nia.
Tuir observasaun jornalista www.tempotimor.com iha terenu nota katak, hafoin remata serka sanitária ba munisípiu Covalima estudante ba loron dahuluk semana ne'e hahú normál, maibé vólume sei naton.(*)