Login to your account

Username *
Password *
Remember Me

EKSES Covid-20 Distribui fós Saka 500-resin ba Covalimaoan iha DILI

Estudante CovalimaOan sira ne'ebé estuda iha Dili, hamriik hein atu simu nesesidade bazika, iha sede RENETIL nia oin, kuarta (18/03). Estudante CovalimaOan sira ne'ebé estuda iha Dili, hamriik hein atu simu nesesidade bazika, iha sede RENETIL nia oin, kuarta (18/03). Foto Tempo Timor

Tempotimor (Dili) - Ekipa Servisu Covalima Vitória ho Domin-20 (EKSES COVID-20) distribui fós hamutuk saka atus-lima-resin (500-resin) ba estudante Covalimaoan sira ne'ebé estuda iha Kapitál Dili.

Asaun kariedade ne’ebé hala’o husi COCID-20, atu salva estudante sira husi situasaun hamlaha durante implementasaun serka sanitária.

Koordenadór Kerál Ekipa Servisu Covalima Vitória ho Domin-20 (EKSES COVID-20), Mario Tilman hatete, situasaun estudante Kovalimaoan iha Dili, dadaun ne'e sira hasoru hela difikuldade ho ai-hán, tanba impaktu husi desizaun governu nian hodi aplika serta sanitária.

Situasaun kona-ba problema ai-han ne'e, mosu kedan iha serka sanitária dahuluk ne'ebé halo iha Postu Administrativu Fatumea, hodi hapara ona movimentu hotu, ikus mai fó impaktu ba estudante Covalimaoan sira ne'ebé hala'o estudu iha Dili laiha ona hahán.

"Entaun, ho ida ne'e mak difikulta iha sira-nia nesesidade báziku liuliu ba hahán, tanba ida ne'e mak ekipa ne'e buka esforsu oioin para oinsá hetan tulun husi parte emprezáriu sira para tulun ekipa ida ne'e, hodi apoiu mós estudante sira ne'ebé mak enfrenta preukupasaun ida ne'e”, dehan Mario iha sede Renetil Farol, kinta (18/03).

Ho fós ne'ebé prepara ona atu distribui ba estudante sira ne'e, hamutuk saka 500-resin ho kilograma sira mak hanesan,15, 25 no kilograma 30 ne'ebé suporta husi emprezáriu lokál no internasionál balu iha Dili.

Tuir levantamentu dadus ne'ebé ekipa EKSES-COVID-20 rekolla, konsege hetan estudante ne'ebé halo rejístu hamutuk 3.612, kompostu husi sira ne'ebé aluga uma (kost), maibé ho sira ne'ebé hela iha família, tanba presiza hahán.

Apoiu umanitáriu ba estudante hotu, la'os sira ne'ebé kost, maibé mós sira ne'ebé ho família, maske iha uma, maibé hahán mós inan-aman sira sempre lori husi foho, nunee iha situasaun ida ne'e sira hotu presiza hahán.

"Ami fahe 5 kilo, tanba tuir apoiu ne'ebé mak iha, tanba ita la'ós sasán na'in, sé ita mak sasán na'in, sira-nia preukupasaun hakarak hira mós ita fó ona. Maibé ekipa ne'e hanesan ponte de'it, buka hodi fó fali ba sira ne'ebé afetadu ne'e”, hatete nia.

Kompaña ne'ebé apoiu fós ba sira mak hanesan, Ataúro Express, Aitula Fuels, Telemor, Telkomsel, Timor Telekom, ajénsia Internasionàl sira hanesan Asosiasaun Xíneza iha TL, inklui kompaña lokál balu Kovalimaoan sira rasik.

"Atu dehan loloos katak, fós ho saka 500 resin ne’e labele atu kobre ba estudante sira hotu neebé ho totál 3.000 pesoas ne’e. Sé atu formula ba kilo karik, ezemplu 10 ka 12 mill kilograma, ita fahe ba númeru estudante ne'ebé iha, atu serteza katak ema ida hetan hira. Maibé ho kalkulasaun ne'ebé agora dadauk ami halo, ema ida kilograma 3 de'it, entaun ami tenta atu hasa'e oituan ba kilograma 5, maske ami hatene stock fós ne'ebé iha labele atu kobre”, afirma nia.

Maibé, fó alerta ba governu katak, atu halo mós intervensaun ruma ba estudante sira ne'ebé hela iha Munisípiu Dili, tanba hasoru hela problema ai-hán báziku.

Octavio Moniz da Costa, husi Suku Belkasa, Postu Administrativu Maukatar, munisípiu Covalima hatete, oras ne'e nia tuir hela kursu lian Korea nian no hela iha kost.

Tanba iha tempu Estadu Emerjénsia (EE) ba dala-XI no Serka Sanitária iha Dili, difikulta tebes sira atu asesu ba ai-hán, tanba dadaun ne'e, nia laiha ona fós atu uza nesesidade kada loron nian.

"Ami iha Dili hela kost, tanba hahán araska loos, entaun ohin ami Kovalimaoan sira hakat mai Farol bele simu netik fós rahun balu”, dehan mai.

Nune’e, Rosário Doloroso Ximenes, hanesan estudante UNTL, iha fakuldade Agrikultura, departamentu Agro-Sósiu Ekonómiku ne'ebé hato'o lamentasaun katak, sira Covalimaoan, sente susar liu, tanba impaktu husi serka sanitária ne'ebé implementa iha Kovalima lori to'o sira iha sira iha Dili.

"Entaun, ida susar ba ami, tanba inan aman sira iha ne'ebá transporta fós ka oras ruma mai mós araska. Tanba ne'e, ho fós ne'ebé ohin ami simu, urjentemente bele ona responde ba loron ida-rua nian”.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter