“Tanba ne'e husu ba parte relevante sira atubele tau matan ba ida ne'e, tanba iha ha'u-nia suku ne'e, ha'u-nia komunidade sira la asesu hotu liña eletrisidade, nune'e susar tebes ami atu asesu ba informasaun iha nível nasionál”, deklara Xefe Suku Dato-Tolu, João Agostinho Resi, kinta (06/08).
Maske iha tinan 2011 no 2012, Governu ajuda oferese solár panel ba komunidade iha suku Dato-Tolu maibé solár panel ne'e aat hotu ona.
Tanba ne’e husu ba parte relevante sira hodi bele tau matan ba komunidade sira iha área remota ne'e.
“Solár panel aat hotu ona, tanba ne'e preokupasaun boot ba komunidade sira, liliu ba estudante sira tanba labele estuda ho di'ak no la asesu ba informasaun”, dehan nia.
Antes ne'e hatama ona proposta dalabarak maibé laiha rezultadu tanba ne'e iha mandatu Governu ne'e husu atu hein, maibé komunidade espera bele asesu liña Eletrisidade.
Entretantu totál populasaun iha Suku ne’e hamutuk, rihun-ida-atusneen-limanolu-resin-hitu (1647) ho nia aldeia tolu ho uma-kain atushaat-limanolu-resin-rua (452). (*)