Nelio no Sentimentu Sala Bainhira Husik SEJD

Eis Sekretariu Estadu Juventude no Desportu (SEJD), Nelio Isac Sarmento Eis Sekretariu Estadu Juventude no Desportu (SEJD), Nelio Isac Sarmento Foto File

Tempotimor (Dili)-Nelio Izac tenke kumpre desizaun partidu CNRT nian hodi rezigna an husi kargu Sekretariu Estadu Juventude no Desportu (SEJD). Maske ho fuan boot simu desizaun partidu nian no ho aten-brani hato’o karta rezignasaun, maibé iha sentimentu sala kiik ida ne’ebé sikat hela iha Nelio nia fuan.

Sentimentu refere la’os mosu tanba Nelio komete kazu ruma, maibé tanba nia la konsege konklui planu serbisu durante ninia mandatu tinan rua ho balun.

"Durante tinan rua ho balun hau asumi Sekretariu Estadu Juventude no Desportu konsege halo buat balun katak, buka funsionariu no entidade hotu atu intende natureza SEJD ninia programa ne'ebé atu dezenvolve ba povu nia di’ak, no ha’u mós rekoñese labele halo buat hotu, tanba ne'e ha’u husu mós deskulpa ba funsionariu, populasaun i liu-liu ba Joven sira, tanba buat ne'ebé ha’u asumi labele konklui,” dehan Nelio iha serimonia entrega serbisu ba SEJD foun iha edifísiu SEJD, Kinta (25/06).

Maske sai ona husi SEJD, maibé Nelio kompromete atu apoiu nafatin SEJD foun, Abrão Saldanha, hodi alkansa politika ne’ebé SEJD iha.

"Ha’u sempre apoiu nafatin ba SEJD foun karik presiza ideia ruma iha kulker tempu, tanba kontribuisaun ba ita-nia rain la presiza asumi kargu, maibé iha li’ur mós bele ajuda. Karik husu ideia ha’u prontu apoiu par alkansa politika ne'ebé nia iha," dehan nia.

Iha oportunidade ne’e, Nelio mós fó parabéns ba SEJD foun ne’ebé simu ona posse husi Prezidente Repúblika Francisco Guterres Lu Olo iha Kuarta (24/06).

Ba SEJD foun, Nelio rekomenda pontu importante tolu ne’ebé presiza tau-matan mak, infra-estrutura desportu, hadi'a lejislasaun iha area desportu, no hasa’e kualidade juventude sira.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.