"Iha kazu konkreta SEJD nian, agora daudaun ita atu kontinua koopersaun sira iha pilar formasaun rekursu umanu, iha área desportu tanba ita iha problema ho rekursu umanu, ita laiha profesór formasaun fíziku no desportiva iha eskola sira, entaun agora ami ko'alia ho Embaixadór Kuba atu hahu servisu hamutuk," dehan Sekretáriu Estadu Juventude no Desportu, Abrão Saldanha, iha knaar fatin, Eis-Sional, Lesidere, Tersa (18/8).
Tuir nia, Kuba iha prestasaun di'ak tebes iha internasionál, liuliu área Olimpiade. Nune'e, soru-mutu ne'e atu haklean asuntu rekursu umanu.
Abrão hateten, Embaixada Kuba rasik kontente no disponível atu apoiu Timor-Leste iha rekursu umanu, liuliu área juventude no desportu.
Nune'e, Kuba haruka espesialista, tékniku sira mai iha universitáriu hodi hanorin joven sira, nune'e futuru juven sira ne'e kontinua hanorin fali iha eskola sira kona-ba edukasaun fíziku no desportu.
Iha fatin hanesan, Embaixadór Kuba iha Timor-Leste, Omar Lauro Marrero Bentancourt hatete, koopersaun entre Timor-Leste rasik la'o di'ak tebes hafoin soru-mutu inísiu entre Eis-Prezidente Repúblika, Xanana Gusmão, Eis-Primeiru Ministru, Mari Alkatiri no Eis-Ministru Negósiu Estranjeiru, Ramos Horta ho Prezidente Kuba, Fidel Castro ne'ebé hala'o, iha Kuala Lumpur, Malázia.
Entertantu, antes ne'e, iha tempu I Governu Konstitusionál koopersaun entre Kuba ho Timor-Leste hala'o ona iha área médiku ne'ebé sidadaun timoroan lubun barak ba estudu iha Kuba. (*)