Print this page

Lere Husu PSHT Organiza-an Sa'e Sintu Iha TL

Tempotimor (Dili)-Xefe Estadu Maior Jenerál Falintil-Forsa Defeza Timor Lorosa’e (F-FDTL), Tenente Jenerál Lera Anan Timur, husu ba membru organizasaun arte marsiál Persaudaraan Setia Hati Terate (PSHT) kumpre lei hodi halo seremónia sa’e sintu iha Timor-Leste (TL).

Tanba ne’e, hodi jura ba bandeira RDTL, labele ultrapasa fronteira ho ilegal ba sa’e sintu (pengesahan) hodi halo juramentu fali ba bandeira Merah Putih iha Indonézia maibé organiza-an hodi sa'e sintu iha Timor-Leste.

“Imi (membru PSHT) balun atravesa fronteira ilegál ba hamanas fita iha ne’ebá tanba saida mak la hamanas fita iha Timor, arte marsiál hothotu Timor ninian biar mai husi estranjeiru, fiar ita-nia governu iha bandeira RDTL nia okos la’ós iha Indonézia nia okos”, dehan Lere iha salaun Timor Lodge Kampung Baru-Komoro, sábadu (31/07).

Bainhira atu hala’o seremónia sa’e sintu (pengesahan) tenke iha rai laran hodi jura ba bandeira nasionál Timor-Leste, labele ilegal ba estranjeiru hodi tuir pengesahan iha ne’ebá.

“La’ós ita mak ninia hun, Indonézia mak ninia hun maibé ita la despreza katak ne’e Indonézia nian ita haluha tiha maibé fó ona ba ita, ita mak tenke hatene (kuidadu didi’ak) la’ós atu uza arte marsiál instabiliza ita-nia nasaun no estadu”, afirma nia.

Maibé organizasaun arte marsiál la organizadu didi’ak sei sai objetu prinsipál ba ema polítiko sira hodi uza ba sira nia interese.

“Ohin loron ema barak preokupa ba arte marsiál, arte marsiál kuandu la organiza-an, la konsolida nia organizasaun polítiko sira bele uza organizasaun atu sai sira-nia forsa, tanba iha nasaun barak akontese ona dala ruma organiazasaun mak manda fali governu la’ós governu mak manda organizasaun”, deklara Lere. (*)

Rate this item
(6 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items