Tempotimor (Dili) – Primeiru Ministru Taur Matan Ruak, lamenta ho atetude juventude ne'ebé la respeita malu, hodi halakon maluk seluk nia vida.

"Ita lamenta ida ne'ebé mate. Ita hein katak aban bainrua labele akontese-tan. Buat hotu ne'ebé halo ho insisiativa no respeita ba malu, labele provoka malu, tanba vida ida lakon ne'e, vida ne'ebé falta. Tanba ne'e lamenta teb-tebes," tenik Primeiru Ministru Taur Matan Ruak iha Palásiu Prezidensiál, Bairru-pite, Kinta (26/09/19).

Xefe Governu ne'e mós afirma katak,  kazu ne'e kriminál entaun justisa mak sei la'o.

"Kazu ne'e kriminál ne'ebé prosesu justisa mak la'o iha kualker forma. Maibé, situasaun kontroladu iha tempu ne'ebá tanba ita nia Polísia Nasionál Timor-Leste halo servisu di'ak. Nune'e, situasaun kontroladu no ema hotu la'o hanesan bai-bain," dehan PM Taur.

PM mós ilojia ba servisu Polísia Nasionál Timor-Leste ne'ebé hala'o servisu di'ak no lalais hodi rezolve situasaun hodi labele hada'et tan iha fatin seluk.

Lamenta Beibeik

Iha fatin seluk, Domingos da Cunha, komunidade Comoro ba tempotimor.com hatete, Governu presiza buka solusaun ne'ebé klaru kona-ba problema hanesan ne'e.

“Governu presiza buka solusaun, para bele hakotu no minimiza buat hirak ne'e. La'ós hotu de'it ho estetementu lamentasaun beibeik,” afirma Domingos, iha loja Lider nia oin, Kinta (26/09/19).

Alende ne'e, Domingos mós kestiona ho servisu PNTL nian, ne'ebé tuir nia, sei dook husi profesionalismu. Nia fó ezemplu kazu Ai-mutin ne'ebé nia dehan to'o agora seidauk kaer autór ne'ebé oho vitima iha konfrontu ida akontese iha Segunda (23/09/19) liubá ne'e.

“Ida polísia kaer mak autór ne'ebé inklui mós iha konfrontasaun ne'e. Maibé, se mak oho vitima ne'ebé mate iha momentu akontesementu ne'e, to'o agora públiku lahatene,” nia dehan tan.   

Tempotimor.com nota katak iha inisiu tinan ida ne'e de'it, mosu konfrontasaun ne'ebé inkliña arte marsiais iha Munisípiu Baucau (dala 2) nia rezultadu hamate no hakanek ema balun no estraga sasán. Iha Munisípiu Likisa, na'in 2 mate no lubuk ida kanek, estraga uma barak no ema liu 100 sai refujiadu. Iha Kapitál Dili ataka malu iha Beto, Comoro no ikus liu ataka malu, Segunda (23/09/19) iha área Ai-mutin ne'ebé rezultadu na'in 1 mate no na'in 2 kanek todan.

Tempotimor (Díli) – Governu iha ona polítika atu funu hasoru lixu iha Kapitál Díli. Tan ne'e, iha tinan 2020 sei implementa oinsá bele raut lixu uza teknolojia.  

"Polítika Governu nian iha 2020 kona-ba saneamentu raut lixu ne'e, sei fó ba kompañia mak jere. Ne'ebé la'ós ona ho servisu manual. Maibé, ho teknolojia,” hatete Diretór Saneamentu Munisípiu Díli, Domingos dos Santos Soriano iha nia knaar fatin, Tersa (10/09/19).

Tuir Domingos, ho teknolojia ne'e foer ne'ebé komunidade sira hatama hotu ona iha lixu fatin ka plastiku, diretamente fakar kedas ba kareta laran. La'ós hanesan agora, ne'ebé sei aplika manual.

"Polítika ne'ebé  Governu planu hela ne'e, sei implementa iha fulan Juñu 2020. Tan ne'e, agora halo hela tenderizasaun ba kompañia hotu-hotu, tantu kompañia internasionál, nasionál inklui lokál hodi tuir projeitu ne'e," Soriano informa.

Kompañia ne'ebé iha futuru sei halo jestaun ba lixu ne'e, iha kompañia tolu. Nune'e, ida halo ateru ba lixeiru iha Tibar, rua seluk halo sirkulasaun iha Dili laran hodi rekolla lixu. Nune'e, iha inisiu tinan 2020 sei hadia fatin lixu nian iha Díli laran tomak.

Rogerio, Fruteiru

November 26, 2019

KOSAR  suli ne'ebé la para iha ninia tilun-hun, nia hikis uza ninia liman kabun. Tan de'it atu hola anin uitoan, nia tuur sadere hela iha kadera semente iha Largo Lecidere. Nia liman rua, hadi'a hela tali, ne'ebé kesi tangerinas iha ai-leba.

Rogerio Martins. Estudante ida, husi eskola Ensinu Báziku iha Munisípiu Aileu. Nu'udar fruteiru, atividade negósiu ne'e, nia halo bainhira eskola ferias.

"Ha'u rasik mak hakarak. Tanba, bele hetan osan no fila ba foho, bele hola roupa no sapatu foun,” hateten Rogerio ba tempotimor.com iha Jardín Lecidere, Segunda (25/11/19).

Tuir Rogerio, aifuan ne'ebé nia fa'an, la'ós tangerinas de'it. Dalaruma nia mós fa'an hudi tasak. “Konforme ba tempu. Bainhira tempu hudi tasak mak barak, ha'u fa'an hudi,” nia dehan.

Bainhira tuun mai Dili, Rogerio hela ho nia maun ne'ebé servisu nu'udar kondutór karreta. Joven ho idade 15 ne'e, la sente kole no baruk atu hakat ba fa'an ninia aifuan iha área Audian, Jardín 05 de Maiu, Hospitál Bidau no Largo Lecidere.  

Nia rasik hatene, rezultadu ne'ebé nia hetan, labele kompara ho kole ne'ebé nia sente. Iha loron ida tomak, Rogerio bele lori fila osan $10. Iha okaziaun seluk, nia bele hetan liu ida ne'e.

"Ha'u la moe ida. Na’ok mak ita moe. Fa'an de'it  ne'e. Kuandu pasa ferias, ha'u mai hela de'it Dili," nia dehan ho hamnasa.

Hadau moris iha Kapitál Dili ho modalidade fa'an aifuan, la'ós problema simples. Loron manas, kosar suli, hadau malu sorte ho fruteiru sira seluk. Seidauk tan, presiza maneira bainhira hasoru ho ema aat sira, ne'ebé gosta hadau sasán no osan husi fruteiru sira.

Rogerio la konta, dala hira ona ema hadau nia aifuan no osan. “Uluk ha'u tauk ho ema sira ne'ebé hadau ha'u nia sasán ho osan. Maibé, agora ha'u la tauk ona. Husik de'it ba. Pasiénsia de'it,” nia hatete.

Rogerio hanesan hatene ona maneira oinsá atu bele sees husi ema sira hanoin aat ne'e. Nia dehan, esperensia ne'ebé nia hetan durante ne'e, hanorin nia atu bele kuidadu nia an, husi ema aat sira.

Dala ruma, provérbiu: O bele kiak, maibé labele sai ema beik mak fó motivasaun ba Rogerio Martins ne'ebé mehi hela atu sai mestre. Tanba, Rogerio konsidera ema hotu tenke matenek. Ho nune'e, nia rasik hakarak aprende esforsu nia moris. Maski, nu'udar fruteiru iha tempu ferias.

Tempotimor (Dili) – Bankada FRETILIN iha Parlamentu Nasionál (PN) dezafia Governu atu halo polítika ida ne'ebé bele asegura osan Timor nian ne'ebé kuaze %80 mak sai ona ba rai liur. Nune'e hela de'it %20 iha rai laran.

"Iha primeira Governu AMP, Ministra Finansas Emilia Pires hateten dolar ida ita investe iha TimorLeste  %70 halai ba rai liur. Agora dadaun, liu ona %80, ne'e progresu dezenvolvimentu nia balansu mak ne'e, dependensia totál ba rai liur ita nia osan sira investe ne'e, ita nia povu %70 moris iha agrikultór ne'e lamentavél," dehan Vise Prezidente Bankada FRETILIN, Francisco Miranda Branco iha plenária PN,  Segunda (30/09/19).

Nia husu ba Governu, bainhira mak Governu Timor-Leste bele inverte fali osan % 80 mak hela iha TL?

"Bainhira loos mak ita bele inverte filafali ida Ministra Finansas Emilia Pires dehan kayak ita investe dolar ida, %70 ba rai liur.  Maibé, ami nia kalkulasaun ohin loron liu ona %80. Entaun, Governu halo nusa mak inverte filafali investe dolar ida, %80 ita kaer metin iha ita nia rai no husik %20 mak ba rai liur," dehan Branco.

Ho ida ne'e, ami dezafia Governu hodi halo polítika ida ba inverte situasaun real ne'e.

"Ida ne'e mak ami dezafia Governu halo polítika ida hodi inverte situasaun real ida ne'ebé Timor-Leste sai paíz konsumista ka konsimudór boot ne'ebé dependensia ba rai liur barak liu," tenik Branco.

Tempotimor (Dili) – Primeiru Ministru Taur Matan Ruak deklara, governu nafatin sai makina ba kresimentu ekonomiku no sai mós responsabilidade ba garantia justisa, inkluzaun paz i toleransia.

"Konsiderasaun ba responsablidade oioin ne'ebé estadu asume, liuliu iha planu sosiál, governu labele ignora nia obrigasaun, hodi fó nia kontinuidade ba ezekusaun planu estratéjiku 2011-2030, atu dezenvolve Dezenvolvimentu sustentavel," deklara Primeiru Ministru Taur Matan Ruak, antes hahú diskusaun OJE ba tinan 2020 nian, iha Parlamentu Nasionál, Segunda (02/12/19).

Taur afirma, espera tulun husi ema hotu ba governu ida ne'e no governu ne'ebé sei tuir mai, par bele transforma patria doben ba pais ida ne'ebé modernu, riku, forte no seguru ne'ebé bele oferese oportunidade ba ema hotu hanesan.

Nia relata, metas hirak ne'e prevee iha programa governu, ho komprimisiu klaru ne'ebé ho sidadaun sira kontinua dudu, atu konkretiza objetivu nasionál hodi liberta povu husi kiak no hamlaha.

PM Taur dehan, iha konkretiza objetivu nasionál ne'e, fundamenta tebes atu bele asegura unidade povu nian no lori prosperiedade ba patria.

Molok hato'o ninia deskursu iha Plenaria Debate Orsamentu Jerál Estadu (OJE) ba tinan fiskál 2020, PM Taur Matan Ruak to'o iha Parlamentu Nasionál hetan akompanamentu husi Ministru Prezidente Konsellu Ministru (MPKM), Hermenegildo Agusto Pereira Cabral no Ministru Reforma Lejizlativa no Asuntu Parlamentar (MRLAP), Fidelis Leite Magalhães.

PM Taur Matan Ruak to'o iha PN maizumenus tuku 09.18 OTL.

Tempotimor (Díli) – Lixu ne'ebé soe naklekar de'it iha área merkadu Taibessi, fó impaktu ba negosiante sira ne'ebé hela iha área merkadu ne'e nia saúde.

Negosiante Apolinario Castro Baptista hatete, foer ne'ebé soe namkari iha área merkadu ne'e to'o dodok, iis no ular.

"Foer hanesan ne'e fó impaktu boot ba ami iha ne'e. Halo ami atu han mós ladi'ak, tanba foer ne'ebé soe arbiru to'o dodok, iis no sai ular,” tenik Apolinario, Sabadu (07/09/19) iha merkadu Taibessi.

Kona-ba oráriu parte saneamentu raut lixu hirak ne'e, tuir Apolonario semana ida dala ida. Nia dehan, bainhira parte saneamentu la ba raut fo'er, negosiante sira mak raut rasik foer ne'ebé dodok ona ne'e.

"Sente ladún di'ak. Tanba foer iha ne'e bainhira nakonu no iis ona, ami rasik suru hodi ba soe. Sujere mós ba ministériu relevante tenke tau atensaun hodi haree servisu saneamentu nian,” Apolonariu husu.

Alende ne'e, negosiante seluk Antonio Gonçalves hatete sira mós preokupa ho sanitasaun báziku iha merkadu ne'e, hanesan hariis fatin. Tuir Apolonariu, hariis fatin ne'ebé iha la favorese.

"Hariis fatin ida agora ne'e, ema barak mak uza hodi hariis no fase roupa. Balun odamatan laiha ona. Bainhira ema barak, tenke hein malu tanba odamatan laiha," Antonio Gonçalves dehan.

Tuir Antonio, hariis fatin ne'ebé negosiante sira utiliza ne'e selu. Maski ho nia presu la hanesan, maibe balun odamatan kontinua aat.

"Hariis fatin ne'e selu, bainhira ami uza hodi hariis no fase ropa. Hariis dala ida, selu 25 centavus, fase roupa 50 centavos. Hariis fatin refere, sempre loke ba negosiante hotu iha merkadu ne'e. Maibé, too 12 oras kalan taka. Tanba sekuriti sira uza. Entaun dadeer mak bele loke fali," Antonio haktuir. 

Rekoñese 

Iha fatin seluk, Diretor Saneamentu Munisípiu Díli, Domingos dos Santos Soriano rekoñese kona-ba servisu saneamentu nian iha públiku.

“Lixu ne'e, ami bele esforsu oinsá mós lixu iha hela de'it. Maibé, esforsu Governu nian ne'ebé iha. Ami depende hotu de'it ba komunidade. Tanba ne'e, bainhira ita nia komunidade iha konsiensia aas, lixu mós sei menus," Domingos afirma.

Diretór ne'e mós rejeita kona-ba negosiante sira nia deklarasaun katak, semana ida parte saneamentu Munisípiu Díli, raut foer dala ida iha Merkadu Taibessi. Tuir Domoingos, ida ne'e laloos.

“Tanba, kada loron kareta saneamentu nian sempre ba raut fo'er. Maibé, konsiensia negosiantes iha área ne'ebá nian mak menus,” Domingos haktuir.

Tempotimor (Dili) – Komisaun Nasionál halo ona prosesu prosedimentu ba kompañia sira ne'ebé atu sai manan nain hodi fornese mina ba sentru eletrisidade sentrál Hera no Betano.

"Iha ona prosesu tenderizasaun Komisaun Nasionál prosedementu semana oin sei lori ba konsellu ministru hodi hetan apresiasaun ba kompañia ne'ebé sai manan na'in ba tenderizasaun ne'e," Informa MOP, Salvador Pires iha Ministériu Finansas, Sabadu (14/09/19).

Kompañia sira ne'ebé apply ba tenderizasaun ne'e nasionál no internasionál. "Ha'u hanoin, kompañia sira ne'e husi nasionál ho internasionál sira, halo parseria hodi bele halo joint venter ba konkursu ne'e," nia tenik.

Tempotimor (Dili) – Previzaun VIII governu atu hasa'e Kresimentu Ekonomia bele atinje %7.2 iha tinan 2020, tuir bankada KHUNTO iha Parlamentu Nasionál nu'udar tarjetu ambisiozu governu nian.

"Kresimentu Ekonómiku tuir governu nia tarjeitu, ita bele alkansa. Maibé, presiza servisu maka'as. Previzaun ne'e, ita labele ambisiozu demais. Maibé, ita tenke halo. Tanba ita tau tarjetu ida kresimentu ekonomiku sa'e ba %7.2 ne'e kuandu orsamentu aprova ona iha fulan ida ne'e," hatete Xefi Bankada KHUNTO, António Nobre iha PN, Kuarta (04/12/19).

Tuir Nobre, defisíl uitoan atu kresimentu ekonomiku bele atinje %7.2. Tanba, iha inisiu 2020 sei uza orsamentu duadesimál.

Alende ne'e, tuir deputada Fernanda Lay, governu bele ambisaun halo previzaun ba kresimentu ekonomiku nian, maibé bele ka lae? Tanba referensia barak ona.

"Governu bele iha ambisaun para propoin tau nia orsamentu. Maibé, PN bele fó lembra katak husi 2017 to'o inisiu 2019, governu la'o ho duadesimál. Tanba ne'e, ita nia kresimentu ekonomiku monu. Entaun atu rekopera filafali, tenke ho neneik. La'ós tau dala ida de'it. Tanba ne'e, governu bele propoin. Maibé, urjente ka lae? Sei la'ós urjente, tinan oin ita sei iha para hala'o," tenik Fernanda.

KSOLOK seremonia tinan 20 referendu ka Konsulta Populár, liu tiha ona. Timoroan, liuliu estranjeiru sira ne'ebé hetan rekonesementu no valorizasaun ba sira-nia kontribuisaun ba rai doben ida ne'e mós, fila hotu ona.

Maski nune'e, iha naran ida ne'ebé komisaun organizadora tinan 20 referendu haluha tiha husi lista naran konvidadus estranjeiru sira. Ema ne'e, loloos hetan mós kondekorasaun iha seremonia tinan 20 referendu ka Konsulta Populár.

Saskia Kouwenberg. Feto Olanda ida ne'ebé brani duni. Sei la'ós tan Saskia, mundo internasionál sei la hatene, saida mak akontese iha masakre Santa Cruz, 12 Novembru 1991. Ho ninia brani, Saskia konsege lori sai husi Timor, kasete gravasaun video Max Stahl nian iha Santa Cruz.

“Saskia feto brani tebes no determina subar kasete iha nia roupa laran hodi nune'e mundo bele haree imajen 12 Novembro nian,” hatete A.F de Sa, ema ne'ebé koñese Saskia liu husi istoriador balun.

Tuir fontes ne'e, estadu Timor-Leste kondekora ona ema barak. Maibé, ema ne'ebé merese liu, barak mak estadu haluha ou la hatene, nune’e ladauk valoriza sira nia kontribuisaun inklui Saskia.

Konvite ne'ebé Komité Popular fó sai, Segunda (09/09/19) hatete, komité ne’e sei oferese Prémiu Populár ba Saskia.

“Hanesan Timoroan barak hatene katak mana Saskia (Jornalista Freelance iha tempu ne’ebá) mak lori sai filmajen 12 Novembru 1991 nian ne’ebé Jornalista Max Stahl halo no subar hela iha rate laran, tanba tauk Militár Indonézia hadau husi nia,” hakerek konvite ne'ebé fó sai husi Komité populár.

“Mana Saskia lori sai Filme ne’e ho maneira brani no determinadu. Lori ba hatudu iha nasaun boot sira ne’ebé antes ne'e apoiu Indonézia nia okupasaun. Ikus mai nasaun hirak ne'e muda sira-nia pozisaun, fó sansaun ba Indonézia no apoiu ba Timor-Leste nian auto-determinasaun,” hakerek anunsiu komité populár.

Komité Populár sei oferese prémiu rekoñesimentu nian ba Mana Saskia. Ba nia dedikasaun sira ne’ebé nia halo ona ba rai doben Timor Lorosa’e,” komité populár hatete.

Entrega prémiu populár  ba Saskia ne’e sei realiza iha Komité 12 Novembru, Balide, Tersa (10/09/19) tuku 9.30 OTL.

Tempotimor (Dili) – Ministru Interiór (MI) Interinu, Filomeno da Paixão de Jesus hamutuk ho komandu Polísia Nasionál Timor-Leste (PNTL) deskute kona-ba kondisaun no prioridade PNTL nian iha Governu daualu.

"Enkontru ne'e, atu fó hanoin ba malu atu hadi'a disiplina, hirarkia no prosedimentu seluk tan atu haforsa servisu Polísia ba oin di'ak liután. Ko'alia mós kona-ba polítika Governu primária ba iha Polísia Komunitária,” tenik Ministru Interiór Interino ne'e iha Quartel Jerál PNTL, Kaikoli, Kinta (26/09/19).

Governante ne'e afirma,  liuhosi diskusaun ne'e, ba futuru mak iha fallansu no ema seluk kestiona entaun presiza hadi'a.

MI afirma, ba futuru presiza halo revizaun ba estratéjiku ne'ebé mak PNTL iha, hodi bele kontrolu di'ak liután ba kazu sira.

"Ba futuru polítika Governu nian atu revé estratéjia PNTL nian para oinsá bele halo di'ak liután no bele iha dezibilidade ka kontrola di'ak liután, ba kazu sira ne'ebé akontese iha rai laran," nia afirma.

Page 1 of 27

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com