Kazu bee lori ema ne'e akontese iha Bekusi, maizumenus tuku 17:00 bainhira udan tuun makaas iha kapitál Dili.

Tuir abitante, Suku Taibesi, Aldeia Pontu Finál, Ana Estefania da Silva, iha mota Bekusi hamate ema ida no daudaun mate isin lori ona ba Ospitál Nasionál Guido Valadares (HNGV). 

"Mota lori labarik ida ho nia-ama. Labarik ne'e nia-inan konsege salva, maibe labarik ne'e mate no evakua ona ba ospitál", dehan nia ba www.tempotimor.com. 

Fonte ne'e hatutan, akontesimentu ne'e komunidade sira ne'ebé hela besik mota ibun barak mak sai vitima, balun nia-uma hetan eatragu no ema barak iha kapital Timor Leste bee hoban nia-uma. 

"Ami nia uma mós bee tama hotu, dokumentu bee lori hotu", dehan Ana. 

Iha Fatin ketak, Komadante PNTL Munisípiu Dili, Armando Monteiro hateten, udan ohin rezulta ema ida mate iha Bekusi. 

"Iha Bekusi mak ita-nia ema ida naran Jose Antonio (16) husi Aldeia Berbidu, Suku bekora mate, tanba nia atu ajuda evakua komunidade ida mak sama kois rai entaun bee lori. Vitima ne'e lori duni ba to'o klinika Bekora maibe la konsege salva nia vida", informa komadante ne'e 

Armando relata, problema engarrafamentu tanba, kareta balu mate iha dalan, inklui rai monu no ai-monu taka hotu dalan iha fatu-ahi no Bidau. 

Komadu PNTL liga ona ba Ministériu Obras Públika (MOP) atu lori ekipamentu pezadu hodi hasai rai-monu no ai-monu, maibé seidauk iha resposta. 

Nunee, iha área Taibesse nian ponte My Friend (Taibesse) klot liu, tan ne'e bee sa'e fali mai estrada no konsege estraga hotu moru Eskola Portugues Balidi nian. 

Inundasaun ne'e obriga Komadante PNTL, inklui Komandante FALINTIL-FDTL, Majór Jenerál Lere Anan Timur tuun ba haree diretamente iha terrenu. 

To'o notisia ne'e públika, eletrisidade iha kapitál Dili maioria sei mate hela tanba kauza husi udan boot ne'e. (*)